YOOSOMA 13
Timootheyo Aaniphavela Waakhaliherya Atthu
Timootheyo aari mmiravo aasiveliwa waakhaliherya atthu. Owo aahirowa mapuro manceene wira aakhaliherye atthu. Tivonto, owo aari mutthu oohakalala. Nyuwo munniphavela omusuwela Timootheyo?—
Amamawe ni apiipi awe Timootheyo yaahimwiixuttiha Nuulumo na Yehova
Timootheyo aayariwe epooma yaitthaniwa oListra. Vaavo aaryaawe mwaana, apiipi awe yaitthaniwa Loide, ni amamawe, Eunisi, yaahimwiixutiha Nuulumo na Yehova. Vaavo annuwa awe, owo aaniphavela waakhaliherya atthu omusuwela Yehova.
Vaavo Timootheyo aaryaawe mmiravo, Paulo aahinvekela wira amuhoole olaleerya ilapo sikina. Timootheyo aaheemererya! Owo aahiphavela orowa waakhaliherya atthu akina.
Nto Paulo ni Timootheyo yaahikhumasa erowaka epooma ya oMacedonia, muttetthe wa oTesalonika. Wira ephiye muttetthe owo, yaheetta vanceene, nuumala yaahiwela ekalawa. Nuumala ophiya muttetthe owo, yahaakhaliherya atthu anceene omusuwela Yehova. Atthu akina yaahinanariwa ni yaaniphavela waahaaxa. Nto Paulo ni Timootheyo yaahikhuma muttetthe ole enarowa olaleerya mapuro makina.
Timootheyo aahikhalana okumi woohakalaliha
Nuuvira myeeri vakhaani, Paulo aahimuruma Timootheyo otthikela oTesalonika wira aaxukurye axinna. Owo aahaana olipa murima okhala wira epooma ele yaari yowoopiha! Masi Timootheyo aahirowa maana aanaaphenta axinna awe. Owo aahitthikela wa Paulo, nto khimuleela itthu sooreera. Anna oTesalonika yaari oohakalala!
Mwa iyaakha sinceene, Timootheyo aahilaleerya ni Paulo. Owo aahilepa wira Timootheyo aari mutthu ooreerela omuruma wira akhaliherye miloko. Owo aanimphenta Yehova ni anna.
Nyuwo munnaaphenta atthu ni ophavela waakhaliherya wira amusuwele Yehova?— Akhala wira munnipaka eyo, munookhalana okumi woohakalala ntoko Timootheyo!