MUTAKIHEKE WAAMINI WAYA | TIMOOTHEYO

“Mwan’aka Onimphentaka ni Òroromeleya mw’Apwiya”

TIMOOTHEYO aaniwehaweha vaavo eetta awe mphironi ni onakhala ottaiwene ni elapo awe. Owo aanaatthara apatthani awe vaavo yaavikana aya imatta seiyo Timootheyo aasuwela awe saana. Nto vaavo eetta awe, aanihiya ottuli epooma ya oListra, muttetthe woowaataleya yoowo waari vamwaako. Timootheyo aanitheya vaavo aawuupuwela awe amamawe ni apiipi awe, yaawo yaahakalala ni yaimananiha ohimoroxa maithori okathi yanweha aya Timootheyo orowaka. Niireke owo aahaana orukunuwa wira aaleihe ekwaha yookiserya?

Ikwaha sikina, murummwa Paulo aaninweha Timootheyo ni aanitheya moomulipiha. Owo aanisuwela wira Timootheyo aanuuliwa muru vakhaani, masi Paulo aanihakalala ni mmiravo owo. Waaniheryasa Timootheyo arina iyaakha saattamela 20, ni aanimphenta ni omuttittimiha Paulo. Vano Timootheyo aahaana omutthara mulopwana ola oowaamini ni aikuru, mwa ikiloomo sinci. Awo yaaheetta mwentto; nave-tho, yaaheetta ni ekalawa. Masi-tho sahaaphwanya mixankiho mphironi. Timootheyo khaasuwela akhala wira aamutthikela-tho waaweha amusi awe.

Exeeni yaamwiirinhe mmiravo owo wiivahererya mwa enamuna eyo? Niireke aahiphwanya mareeliho mwaha woopaka eyo? Nto nniixutta exeeni sa waamini wa Timootheyo?

“OKHUMA ENAMWANE” AWE

Nuupuwelele ekwaha yoopacerya Paulo ni Baarnaba yaaphiyale aya oListra. Woonasa wene Timootheyo aayariwe oListra. Epooma eyo yaamukhaani yaari yoomaaleleya ni yooriirya ntoko ejardim enikhuwariwa. Waaniheryasa atthu ale yaaniiwa eGriki, masi awo yaalavula nttaava na muttetthe ole, eLikawonia. Nihiku nimosa atthu a epooma ele yoomaaleleya yaahikhuwela mwaha woowi mamisionaario manli a eKristau, Paulo ni Baarnaba yaahiphiya wIkonio, epooma yuulupale yoowaattamela. Paulo ni Baarnaba alaleeryaka, yaahimphwanya mulopwana oorakala aapacenrye waamini. Nto Paulo aahipaka mwiiriirya khunvoniha mulopwana owo.​—Miteko 14:5-10.

Anamunceene a oListra yaanikupali ihantisi saahimya wira amuluku yaanipakeya atthu ni enarwa oxukurya muttetthe ole. Nto yaahinvaha Paulo nsina na Herme, nave Baarnaba nsina na Zeu. MaKristau awo manli oowiiyeviha “waharikela wakupaliha atthu wira ehahelele mukuttho”.​—Miteko 14:11-18.

Masi, wa atthu akina oListra, okathi ole khahiyo waari wa amuluku a epagau. Awo yaahiiwexexa wira atthu ale yaaruuha ihapari sooreera. Mwa ntakiheryo, Eunisi, yoowo aari muYuda aatheliwe ni muGrikia, vamosa ni amamawe, Loide, yaahinwiriyana Paulo ni Baarnaba moohakalala. Awo yaahileeliwa ihapari seiye aYuda otheene oororomeleya yaalipelela aya, eyo piiyo: Mesiya aahirwa ni aahimaleliha iprofesia sinceene saamuhimya yoowo.

Timootheyo aakhanle sai nuumala oxukuriwa ni Paulo? Timootheyo aahiixuttihiwa “okhuma enamwane” awe ophenta Soolempwa sa eHeeberi. (2 Timótheyo 3:15) Moolikanasa ni amamawe ni apiipi awe, owo ahoona wira Paulo ni Baarnaba yaalavula ekeekhai ya Mesiya. Nkahaya mmuupuwele mulopwana ole oorakala aapenuxiwe. Okhuma enamwane awe, Timootheyo aaninweha mulopwana ole mustaraatani oListra. Vano aaninweha eettaka! Eyo yaahimwiiriha Eunisi, Loide ni Timootheyo okela eKristau. Olelo-va, anamuyari ni axipiipi anoowerya wiixutta itthu sinceene sa ntakiheryo na Loide ni Eunisi. Tthiri nyuwo munoowerya waavaha ntakiheryo nooloka amiravo.

“OVIRA MOHAWANI MUNJENE”

Awiixutti ale oListra yaahihakalala mwaha wa wiixutta itthu iye isya. Masi-tho awo yaahoona wira okhala muKristau khonikhweya. AYuda ootakhala a wIkonio ni wAntiyokiya, yaahirwaasa muttetthe ole nto khuwiiriha atthu omurukunuwela Paulo ni Baarnaba. Nuumala onvonya maluku Paulo, owo aahimorela vathi. Nto awo yaahimpurulela ota wa muttetthe yuupuwelaka wira aahikhwa.​—Miteko 14:19.

Awiixutti a oListra yaahirowa opuro ole, nto khimurukurerya. Tthiri awo yaahihakalala vaavo yaamonne aya Paulo ari ene mukumi, eemelaka, ni onarowa-tho oListra moolipa murima! Mmeeloni mwaya, Paulo aahivenya ni Baarnaba, khurowa olaleerya muttetthe wa oDerbe. Nuumala waapaka awiixutti asya, awo yaahilipiha murima khutthikela-tho oListra nnaamwi waari wowoopiha. Nto yaarowa opaka exeeni? Biibiliya onnileela wira “awo yanalipiha eroho ale yamini”. Nkahaya mmuupuwele mmiravo Timootheyo anwiriyanaka mootikinihiwa Paulo ni Baarnaba. Awo yaaleela maKristau ale wira yoolipelela ya muhoolo ya eKristau yaari yootepa oreera. Nto yaahaana ovilela mixankiho sotheene. Awo yaahimmye so: “Hiyo nihana ovira mohawani munjene, wira nikele momweneni mwa Muluku”.​—Miteko 14:20-22.

Timootheyo aahoona wira Paulo aanikhala moovarihana ni moolumo awe, ovilelaka olupatthiwa wira alaleye ihapari sooreera. Nto Timootheyo aanisuwela wira atthara ntakiheryo na Paulo, khaarowa ophaveliwaka ni atthu anceene, waahela muhina apapawe. Masi kheemerenrye wira olupatthiwa iwo omukhoottiherye omurumeela Muluku oratteene. Olelo, aakhala amiravo anlikana ni Timootheyo. Mwa miruku awo annaathanla apatthani oowaamini, yaawo anaalipiha ni waavaha miruku sooloka. Nto khaneemya wira olupatthiwa waakhoottiherye omurumeela Muluku!

“YANITTHAPELA MWETTELO AWE”

Iyaakha 3 muhoolo mwaya, murummwa Paulo aahitthikela oxukurya oListra. Moohaaniherya, Timootheyo, amamawe ni apiipi awe yaahihakalala mwaha wa omoona-tho Paulo; ekwaha ela aaphiyale ni Sila. Nave-tho Paulo aahihakalala. Owo aahoona wira ihapari sa Omwene aalaleyale awe oListra saahikhalana mitathaari. Opuro ole aahikhala Loide ni mwanawe, Eunisi. Athiyana awo yaari maKristau oororomeleya maana Paulo aahitikinihiwa ni waamini waya wekeekhai. (2 Timótheyo 1:5) Moohaaniherya Timootheyo aanaamini-tho.

Paulo aahoona wira okhuma mukwaha awe wookiserya, mmiravo ole aanisuwela Nuulumo na Muluku ni aaneettela. Timootheyo ‘anitthapeliwa ni mwettelo awe’, ohiya paahi oListra masi-tho wIkonio weiwo erakamelo aya waari wa ikiloomo 32 epantte enikela epheyo. (Miteko 16:2) Exeeni yaamukhalihenrye osuweliwa siiso?

“Solempwa sowarya” Timootheyo aixuttihiwe awe ni amamawe ni apiipi awe “okhuma enamwane” awe, saahela muhina miruku soovareleya muteko wa amiravo. (2 Timótheyo 3:15) Nto owo aaneettela masu oowi: “Muhimuliyaleké Muluku òpattunxeni nlelo muri mmiravo”. (Musuweli 12:1) Masu ale yaahimukhaliherya vanceene Timootheyo. Owo aahoona wira enamuna yooloka ya omuupuwela Mpattuxa awe, waari olaleya ihapari sooreera sa Mwaana a Muluku, Yesu Kristu. Timootheyo ahoona-tho wira aahaana oxintta woova ni okhala oolipa murima wira owerye waalaleerya akina voohimya sa Yesu Kristu.

Axitokweene a muloko wa eKristau yahoona wira Timootheyo anirowa vahoolo. Moohaaniherya awo yaahikuxeya murima oweha wira mmiravo ole aanaalipiha ni waakhaliherya atthu otheene. Ohiya-vo, Yehova aanoona orowa vahoolo wa Timootheyo. Muluku aahirumiha olepiwa iprofesia saamulavula Timootheyo voohimya sa muteko aarowa awe ovara miloko sinceene. Okathi Paulo aaxukunrye awe epooma ele aanoona wira Timootheyo aamukhaliherya vanceene muteko wa oMisionaario. Axitokweene a muloko ole yaaheemya ni yaahimwiixaatherya matata Timootheyo, yooniheryaka wira owo aahithanleliwa muteko wa vameekhaaya wa orumeela mmutekoni wa Muluku.​—1 Timótheyo 1:18; 4:14.

Waaniheryasa Timootheyo aahitikinihiwa ni eparakha eyo yuulupale aavahiwe awe nto aanuupuwela wira khaaphwanelela. Owo aahiilokiherya wira oroweke.b Nto apapawe Timootheyo yoonenle sai onweha mwanaya okelaka muteko wa eKristau wooweetteetta? Waaniheryasa awo yaanuupuwela itthu sinci sa muhoolo voohimya sa mwanaya. Ankhi amamawe ni apiipi awe? Niireke awo yaahixankiheya mwaha wa okumi awe? Khanisuwenle.

Ensuwela ahu paahi tiila: Timootheyo aahirowa. Voosisu ene yoole, ntoko niwenhe ahu wanipacerya wa mwaha ola, owo aahipacerya muteko awe wa weetta mukwaha ni Paulo. Nto vaavo aiwa awe onyakula wa maluku aanyakela awe ni ixapattho sawe, ni onyakula wa inawu mutakhwani, Timootheyo aanuupuwela wira aanitepa orakamela owaani tthiri. Nuumala weetta nihiku ntero, alopwana awo araru yaahiphiya wIkonio. Timootheyo aahiweha moota Paulo ni Sila yaalaleyale aya malakiheryo a niinano a nikhuuru noolamulela na oYerusalemu. Nave, aahoona wira yaaniimananiha wira alipihe waamini wa anna a wIkonio. (Miteko 16:4, 5) Masi iwe waari opacerya paahi.

Nuumala oxukurya miloko sa eKristau oGalasia, mamisionaario awo yaahihiya istarata sooloka sa oRoma ni aneetta ikiloomo imiya sene aviraka mittetthe soowaataleya sa oFrijia epantte enikela epheyo ni onikela nsuwa. Ekhaliheriwaka ni ikuru sa Muluku, yaahiphiya oTrowade khuwela ekalawa yaarowa oMasedonia. (Miteko 16:6-12) Paulo ahoona wira Timootheyo aari mutthu ootthuneya. Paulo aahimuhiya Timootheyo ni Sila oBereya. (Miteko 17:14) Nuuvira okathi aahimuruma mekhawe orowa oTesalonika. Timootheyo aahirumeela miruku aixuttihiwe awe ni aahaalipiha maKristau oowaamini a mapuro ale.​—1 aTesalonika 3:1-3.

Nuuvira okathi Paulo aahilepa wira: “Nkirina-tho mutthu mukina òmukawela othokorerya waka mwaha wa nyuwo: khavo mukina oniwetetelani nyuwo ni murima wothene”. (aFilipi 2:20) Timootheyo khaattottopeliwe mahala ene paahi. Owo aahiimananiha ovara muteko mowiiyeviha ni ovilela okathi wa mixankiho. Tthiri Timootheyo oovaha ntakiheryo nooloka wa amiravo olelo-va! Nyuwo munoowerya ottottopeliwa akhala wira munoompweha Yehova Muluku opuro woopacerya, ni waathokorerya akina mwa niphento ni nttittimiho.

“MPHAVELEKE ORWA OKIPHWANYA”

Mwa iyaakha sowiiraka 14, Timootheyo aahirumeela okathi awe ovaraka muteko ni mpatthani awe Paulo. (2 aKorinto 11:24-27) Ekwaha emosa Timootheyo aahitthukweliwa mwaha wa waamini wawe. (aHéberi 13:23) Ntoko Paulo, Timootheyo aaniimananiha waaphenta ni waalipiha axinnawe a eKristau. Paulo aamulepenle so: ‘Kinnupuwela maithori anyu’. (2 Timótheyo 1:4) Woonasa wene Paulo, aahimwiixuttiha Timootheyo “wunla vamosá n’ale anìkhupanyerya”. Oreera murima iwo waanimukhaliherya waalipiha ni waamaaliha axinna. (aRoma 12:15) Nto hiyo nihaana wiimananiha omutakiha.

Tthiri, Timootheyo nuuvira okathi aahikhala mutokweene a eKristau. Paulo aahimuroromela miritti sinceene ohiya paahi sa oxukurya miloko wira olipihe, masi-tho aahimuruma waathanla alopwana oophwanelela wira erumeeleke ntoko axitokweene a mmulokoni ni arummwa oorumeela.​—1 Timótheyo 5:22.

Paulo aanimphenta Timootheyo, ni aaninvaha miruku soovareleya muteko, ntoko tiithi. Owo aahimutumererya Timootheyo weettela malakiheryo a Muluku ni ovikaniha orowa vahoolo. (1 Timótheyo 4:15, 16) Owo aahimukhaliherya oheemererya wira omiravo vamosa ni wuuliwa muru aarina awe woonasa wene, omukhoottiherye waakiherya itthu sooloka. (1 Timótheyo 1:3; 4:6, 7, 11, 12) Okhala wira Timootheyo aaniwereiwa nipwiipwi “imara sinjene”, nto Paulo aahinvaha malakiheryo a moota woovukula oretta owo.​—1 Timótheyo 5:23.

Waahiphiya okathi Paulo oonale awe wira okumi awe waahiphiya wanikisa; woonasa wene aarowa wookotthiwa. Nto aahimulepela Timootheyo epaphelo awe yookiserya ohela muhina moolumo ala oovara murima ani: “Mphaveleke orwa okiphwanya vohilekela”. (2 Timótheyo 4:9) Paulo aanimphenta vanceene Timootheyo; tivonto aahimwiitthana okhala mwanawe onimphenta awe ni “òroromeleya mw’apwiya”. (1 aKorinto 4:17) Ti maana aya Paulo aaphavela awe vanceene wira mpatthani awe ole okhale hoothe wanikisa wa okumi awe! Nto niikoheke so: ‘Kiireke atthu annikiphavela wira kaalipihe okathi onaaphwanya aya mixankiho?’

Niireke Timootheyo aahirowa okumana ni Paulo? Khaninsuwela. Masi enisuwela ahu tiila: Okathi wotheene owo aaniimananiha omulipiha ni ommaaliha Paulo ni atthu akina. Owo aanikhala moovarihana ni yootaphulela ya nsina nawe noowi: “Ole onimuttittimiha Muluku”. Tthiri, Timootheyo ti ntakiheryo nuulupale na waamini, ohiya paahi wa amiravo, masi-tho wa atthu otheene!

[Inoota]