Yaahoopowa Mmatatani Mwa Mwene Ootakhala

Yosefe aahinvenxa Maria wira omuleele muhupi mmosa. Maana ohiyu ole, nlaikha na Yehova naahimukhumelela Yosefe moolohani, nihimyaka wira: “Nvenyé, mmukuxe Mwana n’ame awe, mutthyawele wEjitu. Mwakhaleke weiwo mpakha miyo wohimeryani, mana Herodi onrowa omphavela Mwana, wira amwive”.​—Matheyo 2:13.

Moohipisa, Yosefe, Maria ni mwanaya yaahikhuma ohiyu ole. Awo yaahipaka eyo mowaakuveya, okhala wira Herodi aahisuwela wira asomi ale yaahinwoka. Maana aahimenrye wira yaahaana otthika wira amuleele opuro aari Yesu. Masi asomi ale yaahitthikela elapo aya aviraka ephiro ekina. Nto, Herodi aahinanariwa vanceene. Nlelo ophavelaka omwiiva Yesu, aahiruma wiiviwa anamwane aaxilopwana otheene a oBethelehemu yaarina iyaakha piili orowa vathi. Herodi aahipaka eyo, okontarelaka ele aaleeliwa awe ni asomi a itheneeri yaakhuma mpantta Onikhuma Nsuwa.

Wiivakasiwa wa anamwane ale waari wootakhala! Nnaamwi nihisuwelaka nummuru na anamwane yaiviwe, ninnisuwela wira wunla ni oriipiwa murima wa aximai, yaahimaliherya eprofesia ya mBiibiliyani yeeyo Muluku aamurumme awe profeta Yeremiya olepa.​—Yeremiya 31:15.

Okathi owo, Yosefe ni emusi awe yiira akhalaka wEjiitu, weiwo yaatthyawenle aya. Muhoolo mwaya, ohiyu omosa, nlaikha na Yehova naahimukhumelela-tho Yosefe moolohani. Nlaikha naahimmye so: “Nvenyé, mmukuxe Mwana n’awe awe, muhokolowele elapo ya Isarayeli: tthiri, ale yaphavela omwiva Mwana àkhwasa”. (Matheyo 2:20) Tivonto, Yosefe aahoona wira owo ni emusi awe, yaahaana otthikela elapo aya. Nto eyo yaahikhaliherya wiiraneya eprofesia ekina ya mBiibiliyani, yeeyo yaahimya wira: Mwaana a Muluku onniihaniwa wEjiitu.​—Hoseya 11:1.

Woonasa wene, Yosefe aaniphavela okhala ni emusi awe oYudeya. Muttetthe ole waattamenle oBethelehemu, opuro yaakhala aya ahinatthi otthyawela wEjiitu. Masi Yosefe aahisuwela wira Arikilawo, mwaana a mwene ootakhala Herodi, taalamulela oYudeya. Muluku aahimulopola Yosefe ekwaha ekina moolohani. Tivonto, Yosefe ni emusi awe yaahirowa mpantta onikhuma nsuwa, khumaka epooma ya oNazarethi, muttetthe wa oGalileya, ottaiwene wa eseedi ya etiini ya aYuda. Yesu aahinnuwa muttetthe ole, nto yaahiiraneya eprofesia ekina, eni: “Owo onimwihaniwa muNazarethi”.​—Matheyo 2:23.