Yehova Aahimukhapelela Yesu

Epantte enikhuma nsuwa ya wIsarayeli, yaahikhala atthu yaakupali wira itheneeri sanwerya oweettiha. Ohiyu omosa, atthu awo yaahiweha etthu yaalikana ni etheneeri yowaarya yeettaka musulu, nto awo yaahitthara opuro yaarowa aya. Etheneeri ele yahaahoola oYerusalemu. Alopwana ale yaahipacerya waakoha atthu wira: ‘Ori vai mwaana onrowa okhala mwene a aYuda? Nirwenle omukokhorela’.

Okathi Herodi mwene a oYerusalemu aiwale awe sa mwene a ninaano, aahoova vanceene. Aahaakoha aalupale a anamukuttho wira: ‘Mwene owo onrowa oyariwa elapo xeeni?’ Awo yaahimwaakhula wira: ‘Maprofeta yaahimmye wira aarowa oyariwa oBethelehemu’. Herodi aahiwiitthana alopwana ale a Epantte Enikhuma Nsuwa ni aahaaleela so: ‘Murowe oBethelehemu mwamphavele mwaana owo. Mwarwe mukihimeerye opuro ori awe. Ni miyo-tho kimphavela omukokhorela’. Masi Herodi aamootha.

“Etheneeri” ele yaahitthikela-tho weetta. Alopwana ale yaahitthara mpakha oBethelehemu. “Etheneeri” yaaheemela mooluluwanya ni empa emosa, vano alopwana ale yaahikela mpaani mmo. Awo yaahimphwanya Yesu ni maama awe, Maria. Yaahimukokhorela mwaana ole ni yaahinvaha itthu sinceene sa eweero, erupani ni miira. Niireke tthiri Yehova taarumme alopwana ale omphavelasa Yesu? Nnaari!

Ohiyu ene yoole, Yehova aahimuleela Yosefe moolohani wira: ‘Herodi omphavela omwiiva Yesu. Mwaakuxe amwaarinyu ni mwaana mutthyawele wEjiitu. Mwakhaleke weiwo mpakha miyo woohimeeryani wira mutthikeke’. Moohipisa Yosefe ni etthoko awe yaahirowa wEjiitu.

Yehova aahaaleela alopwana a Epantte Onikhuma Nsuwa wira ehitthikele wa Herodi. Vaavo Herodi aawenhe awe wira alopwana ale khiyaahokolonwe, aahinanariwa. Nto okhala wira khaawerya omphwanya Yesu, aahiruma wiiviwa anamwane otheene axilopwana oBethelehemu, yaawo iyaakha saya saalikana ni sa Yesu. Masi Yesu aari ottaiwene, wEjiitu.

Nuuvira okathi, Herodi aahikhwa. Yehova aahimuleela Yosefe wira: ‘Vano muhokoloweleke elapo anyu’. Yosefe, Maria ni Yesu yaahihokolowela wIsarayeli, ni yaahipaka empa aya epooma ya oNazarethi.