Yesu Aahipacerya Waapaka Awiixutti

Nuuvira mahiku 40, Yesu ori ene moothakoni ni ohinatthi otthikela oGalileya, Yesu aahirowa wa Yohani Mbatiza. Vaavo Yesu aamwaattamela awe Yohani, nto Yohani aahimuthoonya Yesu ohimyaka wira: “Nkamoneni: ola Mwapwittipwitthi a Muluku, onttipiha yottheka y’elapo. Ola ti yole miyo kamuhimyaka, kìraka: ‘Ottuli waka onimorwa mulopwana òkivikana miyo, mana anikhala miyo kihinatthi’”. (Yohani 1:29, 30) Nnaamwi Yohani aari muulupale onvikana Yesu, Yohani aanisuwela wira Yesu aahikhala wiirimu ntoko nlaikha ohinatthi orwa valaponi.

Isumana vakhaani saavinre, vaavo Yesu aaronwe awe wira obatiziwe, Yohani khaasuwela saana akhala wira Yesu aarowa okhala Mesiya. Yohani aahimmye so: “Yomi ene nkamusuwela: vano kihorwa obatiza ni màsi, wira yowo òniheriwe w’atthu a Isarayeli”.—Yohani 1:31.

Yohani aahaaleela atthu ale yanwiriyana itthu saakhumelenle okathi ambatiza awe Yesu, oriki: “Miyo kihona eroho [munepa] ya Muluku ekhuruwaka wirimu ntoko epomba, khwemela vasulu vawe. Vano miyo nkamusuwela: nto ole okirumme obatiza ni màsi t’ukilènle wira: ‘Nyuwo munimona eroho emukhuruwelaka mutthu, yemelaka vasulu vawe. Mutth’uwo t’ule onrowa obatiza n’iroho [munepa] yowarya’. Miyo kihòna: tivó vanlaleyaka wira: Owo tthiri Mwana a Muluku”.​—Yohani 1:32-34.

Nihiku naattharelana Yesu aahirowa wa Yohani. Okathi owo Yohani aari ni awiixutti awe anli. Yohani aahimmye so: “Nkamoneni: ole Mwapwittipwitthi a Muluku”. (Yohani 1:36) Vano awiixutti ale anli a Yohani Mbatiza, yaahimutthara Yesu. Mmosa aari Andreya. Woonasa wene, mukina tolempe yowiiraneya ela, nsina nawe ti Yohani. Onikhala ntoko wira Yohani ola munnawe Yesu, mwaana a Salome. Nave, woonasa wene, Salome aari muhima awe Maria, nto Salome owo aatheliwe ni Zebedeyo.

Vaavo Yesu aarukununwe awe, aahimoona Andreya ni Yohani amuttharaka, nto Yesu aahaakoha wira: “Mumphavela-ni?”

Awo yaahimwaakhula amukohaka so: “Rabbí, munkhala vai?”

Yesu aahiwaakhula wira: “Murweke, mone”.—Yohani 1:37-39.

Vano, yaari ewoora ya neexexe ya makaaripi, Andreya ni Yohani yaahikhala ni Yesu mpakha wiila. Nto, Andreya aahihakalala vaavo amphwannye awe munnawe iihaniwa Simoni Pedru, onamuleela wira: “Nomphwanya Mesiya!” (Yohani 1:41) Andreya aahimuroiha Pedru wa Yesu. Itthu siiraneyale muhoolo mwaya, sinnooniherya wira Yohani aahimphwanya-tho munnawe iihaniwa Yakobe khumuroiha wa Yesu. Masi okathi Yohani onlavula awe yowiiraneya ela, khonihimya itthu iya.

Nihiku naattharelana, Yesu aahimphwanya Filipi a oBethisaida. Muttetthe waakhala mpantta Onikela Epheyo waattamela Ephareya ya oGalileya, owannyawe Andreya ni Pedru. Yesu aahimphwanya Filipi khumwiirela: “Mukitthareke”.​—Yohani 1:43.

Nave, Filipi aahimphwanya Natanayeli, yoowo iihaniwa-tho Bartolomeyo, khumwiirela: “Nomphwanya yole Moise omuhimmyawe mulivuruni mwawe, yowo-tho maprofeta amulaleiyaya. Ti Yesu, mwana a Yosefe, òNazarethi”. Aanyiheryaka, Natanayeli aahimuhimeerya Filipi wira: “ONazarethi wokhala wokhumelela-wo etthu yorera?”

Nto Filipi aahimwaakhula wira: “Murwé, mone”. Vaavo Yesu aamoonale awe Natanayeli aattamelaka, Yesu aahimmye so: “Ola va mwIsarayeli èkekhai: mwa yola khuvo-vo wotha”.

Vano Natanayeli aahimukoha Yesu iiraka: “Mukisuwenle sai?”

Yesu aahimwaakhula wira: “Miyo kahiwònani vale varyanyu mukhitte mwa murale”.

Otikinihiwe ene, Natanayeli aahihimya wira: “Pwiya, nyuwo mwá Mwana a Muluku! Nyuwo mwá Mwené a Isarayeli!”

Nto Yesu aahimukoha wira: “Nyuwo munnamini, mana kihohimeryani wira: ‘Miyo kahiwònani varyanyu mukitte mwa murale’? Vano, munimona-tho itthu sulupalexa ovikana iya”. Nuumala-vo, Yesu aahimuleiherya wira: “Kinolèlani ekhweli wira: munimona erimu ehuleiyene ni malaikha a Muluku ewelaka ni emukhuruwelaka Mwana a mutthu”.​—Yohani 1:45-51.

Moohipisa, Yesu ni awiixutti awe ale a niinaano yaahirowa Ekhato ya muro Yordani, nuumala-vo oGalileya.