Yesu Aahaathanla Arummwa 12

Waahivira mwaakha nnimeya okhuma vaavale Yohani mBatiza aamuhimmye awe Yesu okhala Mwaapwittipwitthi a Muluku. Okathi Yesu aapacenrye awe muteko awe woolaleerya, alopwana akina yaahikhala arummwa a Yesu. Awo yaari: Andreya, Simoni Pedru, Yohani, woonasa wene Yakobo (munnawe Yohani), Filipi ni Bartolomeyo (yoowo-tho iihaniwa Natanayeli). Muhoolo mwaya, atthu akina yaahipacerya omutthara Kristu.​—Yohani 1:45-47.

Waahiphiya okathi wira Yesu aathanle arummwa awe. Awo yaarowa weettaka ni Yesu ni anwiixuttiha mwa vameekhaaya. Masi ohinatthi waathanla, Yesu aahirowa omwaako woonasa wene waattamela Ephareya ya oGalileya, oKafarnawu. Yesu aahiviriha ohiyu wotheene ovekelaka, woonasa wene onvekelaka Muluku miruku ni mareeliho. Vaaxiiye aya, Yesu aahiwiitthana awiixutti awe wira aathanle arummwa awe 12.

Yesu aahaathanla arummwa 6 vamosa ni Matheyo yoowo Yesu amphwannye awe olivihaka mpoosito. Arummwa akina 5, yaari: Yuda (iihaniwa-tho Tadeyo “mwan’awe Yakobo”), Simoni a oKanani, Tome, Yakobo mwaana a Alfeyo ni Yuda Isikaryoti.​—Matheyo 10:2-4; Luka 6:16.

Arummwa ale 12 yaaheetta ni Yesu, nto Yesu aanaasuwela oratteene ni anamunceene a yaawo yaari amusi. Woonasa wene, Yakobo ni munnawe Yohani yaari amusi awe Yesu. Atthu akina anihimya wira Alfeyo aari munnawe Yosefe, yoowo ari tiithi awe Yesu. Nto vanikhala ntoko wira murummwa Yakobo aari mmusi awe aahiiso munnawe Yesu.

Tthiri, Yesu khaarina muxankiho a wuupuwelela masina aarummwa awe. Masi niireke nyuwo munnuupuwela masina aya? Etthu enrowa wookhaliheryani owuupuwelela tiila: musuweleke wira yaahikhala arummwa anli yaarina nsina na Simoni, anli nsina na Yakobo ni anli nsina na Yuda. Simoni (Pedru) aari munnawe Andreya ni Yakobo (mwaana a Zebedeyo) aari munnawe Yohani. Eyo enimookhaliheryani owuupuwela arummwa 8 a Yesu. Akina 4, mmosa aari mulipa-ooliviha mpoosito (Matheyo), mukina tuule aamwaanyihenrye Yesu (Tome), mukina aitthaniwe vathi va mwiri (Natanayeli) ni okiserya mpatthani awe Natanayeli, ti (Filipi).

Arummwa 11 a Yesu yaari a oGalileya, elapo awe Yesu. Natanayeli aari a oKanani. Filipi, Pedru ni Andreya yaayariwe oBethisaida. Pedru ni Andreya yaahithaamela oKafarnawu, woonasa wene elapo aakhala awe Matheyo. Nave Yakobo ni Yohani yaakhala waattamela oKafarnawu ni elapo ele yaanitumiha ihopa yaatotha aya. Yuda Isikaryoti, yoowo muhoolo mwaya anvarinhe Yesu, aari murummwa mmosa paahi aakhuma oYudeya.