MURU 19

Yesu Aahimwiixuttiha Muthiyana Musamariya

YESU AAHIMWIIXUTTIHA MUTHIYANA MUSAMARIYA NI ATTHU AKINA
OKOKHORELA ONEEMERERIWA NI MULUKU

Akhumaka oYudeya arowaka oGalileya, Yesu ni awiixutti awe yaahivira mpantta onikela epheyo wa edistritu ya oSamariya. Awo khiyaareere okhulumuwa. Othana eriyari yaaheemela waattamela epooma ya oSikari wira amumule. Awo yeemenle waattamela ehime yaathimpwale ni Yakobe aahiiso aalinve awe wira ethimpwe iseekulu sinceene saavinre. Olelo-va, yookhala ehime eyo waattamela epooma ya oNablus.

Vaavo Yesu aamumula awe waattamela ehime ele, awiixutti awe yaahirowa othuma yoolya epooma yaattamenle aya. Nuumala okhuma, muthiyana a oSamariya aahirwa orika maasi. Vano Yesu aahimwiirela wira: “Mukivahe màsi, kiwurye”.—Yohani 4:7.

Yesu ophumuryaka veehimeni, awiixutti awe akhumaka, ni muthiyana a oSamariya orwaaka orika maasi

Okathi ole, aYuda ni aSamariya yaaninyokhana. Tivonto, muthiyana ole aahitikinihiwa onamukoha Yesu wira: “Vanìraneya sai nyuwo munari muYuda, khíyakivekela màsi miyo, kiri muthiyana òSamariya?” Yesu aahimwaakhula oriki: “Mwasuwenle sovaha sa Muluku, mwamusuwenle ole oniwirelani: ‘Mukivahe màsi, kiwuryé’, nyuwo ti mwatthuna onvekela. Owo amovahani màsi èkumi”. Muthiyana ole aahimmye so: “Pwiya, nyuwo khamurina y’orikana màsi: ehime ti yowixa. Màsi awo makumi mphwannye vai? Atith’ihu Yakobe ànithipela ehim’ela: awo mmansaya yawurya vava, vamosá n’an’aya n’inama saya. Khino nyuwo munìkhaliha mùlupale onvikana Yakobe?”—Yohani 4:9-12.

Nto Yesu aahimwaakhula wira: “Othene ale anwurya màsi ala, nnimwavola-tho ntthona. Nto ole onrowa owurya màsi kintthunaka onvaha, khanvoli-tho ntthona. Vekekhai, màsi anrowaka onvaha, anokhala mwa yowo nattuttu a màsi ankhuma mpakha ekumi yohimala”. (Yohani 4:13, 14) Hata Yesu aakhulumunwe, aahiimananiha omwiixuttiha muthiyana a oSamariya moolumo a ekeekhai aniphwanyiha okumi.

Muthiyana ole aahinvekela wira: “Pwiya, kivaheni màsi ene yawo, wira kihivoliwé-tho ntthona, kihirwelé-tho orika vava”. Vano, vaakhala ntoko wira Yesu aahituruka mwaha ole, onamuleela wira: “Rowani mwawihane aiy’anyu murwane vava”. Muthiyana ole aahimwaakhula wira: “Miyo nkirina iy’aka”. Woonasa wene, muthiyana ole aahitikinihiwa vaavo Yesu aamulenle awe wira: “Mohimya sana wira: ‘Nkirina iy’aka’, okhala wira mwahitheliwa n’alopwana athanu. Nave ole orinanyu vano, khahiyó awinyu”.—Yohani 4:15-18.

Muthiyana ole aahiiwexexa saana moolumo a Yesu, nto otikinihiwe ene, aahihimya wira: “Pwiya, kinòna wira mwá profeta”. Tthiri muthiyana ole aahooniherya wira aaniphavela wiiwa itthu somunepani. Moota xeeni? Owo aahivikaniha oriki: “Axitith’ihu aSamariya yahimukokhorela Muluku vamwako vava [Mwaako Garizimi yoowo waattamenle vaavale]: vano nyuwo aYuda munihimya wira nipuro n’omukokhorela Muluku t’oYerusalemu pahi”.—Yohani 4:19, 20.

Masi, Yesu aahimutthokiherya wira etthu yootthuneya khahiyo opuro onimulompa ahu Muluku, oriki: “Onophiya okathi ohinrowanyu wakokhorela Atithi, nnákhala vamwako va, nnákhala oYerusalemu”. Nuumala-vo, aahimuleela wira: “Onophiya okathi ’okathi ene ti yola: wophiya tthiri ’onìraya alipa-òkokhorela èkekhai yakokhoreleke Atithi yettihiwaka n’iroho [munepa] y’ekekhai. Atithi annaphavela atthu antthuna wakokhorela siso”.—Yohani 4:21, 23, 24.

Etthu yootthuneya wa aTiithi khahiyo opuro anikokhoreliwa aya, masi moota anikokhoreliwa aya. Otikinihiwe ene, muthiyana ole aahihimya wira: “Miyo kosuwela wira Mòpoli, onìhaniwa Kristu, ohanle orwa”. Nave aahincererya oriki: “Arwá vale, ononisuweliha sothene”.—Yohani 4:25.

Nuumala-vo, Yesu aahimuleela ekeekhai yootthuneya oriki: “Ti miyo, kinlavula ni nyuwo”. (Yohani 4:26) Muupuwele ela! Muthiyana ole aarwiiye othana eriyari wira orike maasi. Nto Yesu aahimureerela murima mwa vameekhaaya. Owo aahimuleela etthu waaniheryasa aahaaleelale awe atthu akina, eyo piiyo, wira aari Mesiya.

ASAMARIYA ANCEENE YAAHIMWAAMINI YESU

Atthareli a Yesu yaahitthika oSikari akunxe ene yoolya. Nto yaahimphwanya Yesu ori ene ehime ya Yakobe opuro yoole yaamuhiyale aya. Masi iira olavulaka ni muthiyana a oSamariya. Vaavo atthareli a Yesu yaaphiyale aya, muthiyana ole aahihiya mwaapu awe onarowa omuttettheni.

Awiixutti a Yesu aphiyakaru veehimeni aari Yesu, nto muthiyana a oSamariya okhumaka

Epooma ele ya Osikari, muthiyana ole aahaaleela atthu itthu Yesu aamulenle awe. Moohihoverya aahaaleela wira: “Murwé, mmone mulopwana okihimenrye sothene sìralyaka”. Woonasa wene otikinihiwe ene, aakonhe so: “Khino yowo Mòpoli?” (Yohani 4:29) Nikoho nne naari nootthuneya, okhala wira okhuma mahiku a Moise atthu yaanimulipelela Kristu. (Otumererya 18:18) Nto eyo yaahiwiiriha atthu a epooma ele orowa onweha Yesu.

Muthiyana a oSamariya aahimeeryaka atthu a oSikari itthu iixuttihiwe awe ni Yesu

Okathi owo, awiixutti a Yesu yiira amukhanyereryaka wira olye etthu yaaruuhale aya. Masi Yesu aahiwaakhula wira: “Miyo kokhalana yoly’aka, nyuwo muhinsuwelanyu”. Awiixutti yaahipacerya okohana ariki: “Khino orokhala omuruhenle yolya?” Mooreerela murima, Yesu aahaatthokiherya atthareli awe, ele yaatapulela aya moolumo awo oriki: “Yoly’aka miyo, wettela otthuna wawe ole okirumme n’umaliherya miteko sawe”.—Yohani 4:32-34.

Muteko Yesu aalavula awe khahiyo waari woohepha, yoowo waarowa opacerya myeeri mixexe muhoolo. Ohiya-vo, Yesu aalavula sa ohepha womunepani, nto eyo ennooneya vaavo aahimmye awe wira: “Muttukhule maitho, nwehé imatta: mihokorokho sottokottha, sihemphweke. Alipa-òhepha ahàkhela musurukhu aya: vano annithukumanyerya mihokorokho ekumi yohimala. Siso, alipa-òwala annitteliwa murima vamosá n’alipa-òhepha”.—Yohani 4:35, 36.

Yesu aahoona wira omulaleerya wawe muthiyana a oSamariya waahikumiherya mireerelo. Atthu anceene ooSikari yaahaamini itthu sotheene muthiyana ole aaleelale awe oriki: “Owo òkihimerya sothene sìralyaka”. (Yohani 4:39) Vaavo atthu ale yaakhumme aya oSikari arowaka weehimeni, awo yaahinvekela Yesu wira okhale ni yaawo wira owiixuttihe itthu sikina. Nto Yesu aaheemererya nlattulo nne ni aahikhala oSamariya mahiku manli.

Vaavo atthu ale a oSamariya yanwiriyana aya, anceene yaanimwaamini Yesu. Nto awo yaahimuhimeerya muthiyana ole wira: “Vano, khahiyó mwaha wa molumo anyu pahi nnaminahu: hiyo mmansihu nomwiwa. Vano nosuwela wira vekekhai owo Mòpoli àtthu othene”. (Yohani 4:42) Tthiri, muthiyana ole a oSamariya oovaha ntakiheryo nooloka na moota woovaha onamoona voohimya sa Kristu. Nto nihaana owiiriha atthu ophavela owiriyana itthu sikina.

Muupuweleke wira saahanle myeeri mixexe wira ophiye okathi woohepha, eyo piiyo, ohepha esevada. Muttetthe ole esevada yaahemphwa elimwe. Onkhala ntoko wira waari mweeri wa Novembro aahiiso Dezembro. Nto eyo enooniherya wira nuumala Paasikha a 30 EC, Yesu ni awiixutti awe yaahiviriha myeeri 8 awiixuttihaka ni waabatiza atthu a oYudeya. Nuumala-vo, yaahirowa mpantta onikela epheyo wa elapo aya, oGalileya. Exeeni enrowa owiiraneela?

TANI YAARI ASAMARIYA?

Muttetthe wa oSamariya waari eriyari wa mpantta onikhuma epheyo wa oYudeya ni mpantta onikela epheyo wa oGalileya. Nuumala Mwene Salomoni okhwa, mahimo 10 a Isarayeli yaakhala mpantta onikela epheyo, yaahimwalanasa ni mahimo a Yuda ni Beniyamini.

Atthu a mahimo ale 10 yaahipacerya okokhorela elatarato ya mwaanyompe. Tivonto, mwaakha wa 740 AEC, Yehova aahiweemererya aSiria otuphela muttetthe wa oSamariya. Anakhotto a wAsiria yaahaavara atthu anceene a oSamariya yaaroiha elapo aya. Nto elapo ele ya oSamariya, Asiria yaahaaruuha atthu a opuro mukina yaalamulela aya. Amalapo ale yaahaathela aIsarayeli yaahanle elapo ele ya oSamariya. Muhoolo mwaya, atthu awo yaahipacerya wuulaanyiha okokhorela ni soolema saahela muhina Nlamulo na Muluku, ntoko winnuwihiwa. Nnaamwi vaari siiso, okokhorela waya khahiyo waari wekeekhai.—2 Mamwene 17:9-33; Yesaya 9:8.

Mahiku a Yesu, aSamariya yaaneemererya iliivuru sa Moise masi khiyaakokhorela otemplo oYerusalemu. Mwa iyaakha sinceene, yaanirumeela etemplo yaatekiwe vaMwaako Garizimi, yeeyo yahaattaivenle oSikari. Nto awo yaanivikaniha omukokhorela Muluku vamwaako vale nnaamwi etemplo ene yaanyaanyiwe. Okathi wa muteko woolaleerya wa Yesu, waanooneya tthiri wira aSamariya ni aYuda khiyaaphavelana.—Yohani 8:48.