Muthiyana Aarika Maasi

Omanle ene Paasikha, Yesu ni awiixutti awe yaahivira oSamariya ahokolowelaka oGalileya. Waattamela epooma ya oSikari, Yesu aaheemela opuro wiitthaniwa ehimye ya Yakobe. Vaavo aaphumurya awe, awiixutti awe yaahirowa opooma othuma eyoolya.

Muthiyana mmosa aahirwa veehimeni-vale orika maasi. Yesu aahimwiirela wira: ‘Mukivahe maasi’. Owo aahimukoha wira: ‘Xeeni nyuwo munkilavuliha anyu? Miyo ka muSamariya. AYuda ni aSamariya khanlavulihana’. Yesu aahimuhimeerya wira: ‘Nyuwo mwaakisuwenle, mwaamukivekela maasi, nto kaamoovahani maasi a okumi’. Owo aahimukoha wira: ‘Muniphavela ohimya exeeni? Nyuwo khamurina hata etthu yoorikana maasi’. Yesu aahihimya so: ‘Ole onwurya maasi miyo kininvaha aka, khanvoliwa-tho ntthona’. Muthiyana ole aahaakhula oriki: ‘Pwiya, mukivahe maasi awo’.

Yesu aahimwiirela muthiyana ole wira: ‘Murowe mwawiitthane aiyanyu’. Owo aahaakhula wira: ‘Miyo nkitheliwe’. Yesu aahimuhimeerya wira: ‘Moohimya ekeekhai. Nyuwo mwaahitheliwa ikwaha 5, vano mulopwana orina anyu, khahiyo taawinyu’. Muthiyana ole aahihimya so: ‘Pwiya, kinoona wira nyuwo mwa profeta. Hiyo aSamariya ninkupali wira opuro nikhanle ahu oomukokhorela Muluku, mwaako yoola, masi nyuwo aYuda munihimya wira Muluku akokhoreliweke oYerusalemu paahi. Kinnikupali wira Mesiya arwa, onoonisuweliha saana mwaha owo’. Yesu aahimuhimeerya muthiyana ole wira: ‘Mesiya owo ti yoomi’.

Muthiyana ole aahitthimakela oSamariya ni aahaaleela atthu wira: ‘Kinoona wira komphwanya Mesiya. Owo ookihimeerya itthu sotheene siirale aka. Nrowe mwamoone!’ Atthu yaahimutthara weehimeni ni yaahinwiriyana Yesu aixuttihaka.

ASamariya yaahinvekela Yesu wira okhale epooma ele. Yesu aahiviriha mahiku manli owiixuttihaka itthu sinceene, nto anamunceene yaahimwaamini. Awo yaahimuleela muthiyana ole wira: ‘Nuumala hiyo onwiriyana mulopwana ola, nookupali wira ola vekeekhai Moopoli a atthu otheene’.