Mutthenkeso Onipaka Otthuna wa Yehova

OLUMWENKU wotheene, sookhala mitthenkeso sinceene, ntoko mitthenkeso sa etiini, sa epoliitika, sa nakoso ni sa mmuttettheni. Mitthenkeso iyo, sookhalana mikhalelo, soolakela, muupuwelo ni miyoonelo soovirikana. Masi, wookhala mutthenkeso mmosa woovirikana ni mitthenkeso sotheene sikhanle. Nto Nuulumo na Muluku ninnooniherya wira owo, Mutthenkeso wa Anamoona a Yehova.

² Tthiri ninnihakalala wiirela mpantta mutthenkeso wa Yehova. Nuumala nyuwo osuwela otthuna wa Yehova, vannoosivelani opaka itthu oniphavela awe. (Esal. 143:10; aRom. 12:2) Moohaanyiherya, nyuwo mwa murumeyi ooluttuweliwa onirumeela ni anna ni arokora oophenta a olumwenku wotheene. (2 aKor. 6:4; 1 Ped. 2:17; 5:9) Ntoko Biibiliya oleihenrye awe, wiirela mpantta mutthenkeso wa Yehova, onniphwanyiha mareeliho manceene ni ohakalala wekeekhai. (Mir. 10:22; Mar. 10:30) Vaavo olelo-va munipaka anyu otthuna wa Yehova, nyuwo munniilokiherya wira mwaphwanye mareeliho manceene ni oohakalaliha muhoolo.—1 Tim. 6:18, 19; 1 Yoh. 2:17.

³ Mpattuxa ahu Yehova ookhalana mutthenkeso wa vameekhaaya olumwenku wotheene, yoowo onilamulela awe. Eyo enooniherya wira Yehova tori Muhooleli a itthu sotheene. Nave hiyo, ninnimuroromela Yehova ni murima wotheene. Owo Tonnilamulela, Tonnivaha malamulo ni tori Mwene ahu. (Yes. 33:22) Okhala wira tootthokiheya, Yehova ootthokiha itthu sotheene wira niweryeke ‘ovara vamosá’ mowiiraana.—2 aKor. 6:1, 2.

⁴ Vaavo olumwenku ola ontepa aya waattamela wanikisa, hiyo ninnirowa vahoolo nihooleliwaka ni Kristu Yesu, yoowo ori Mwene othanliwe ni Muluku. (Yes. 55:4; Wis. 6:2; 11:15) Yesu mwaneene, aahihimya vahinatthi wira atthareli awe yanvara miteko suulupalexa ovikana iye Yesu aavare awe okathi wa muteko awe woolaleerya valaponi. (Yoh. 14:12) Eyo yaamwiiraneya, mwaha woowi atthareli awe yaarowa wuncerereyaka ni yaarowa olaleeryaka ilapo sinceene. Tthiri awo yaarowa olaleyaka ihapari sooreera sa Omwene mpakha omalenle elapo.—Math. 24:14; 28:19, 20; Mit. 1:8.

⁵ Tthiri eyo ti etthu eniiraneya olelo-va. Masi, ntoko Yesu aahimmye awe, muteko woolaleerya onrowa omala okathi Yehova othanlale awe. Ntoko iprofesia sa mBiibiliyani sinooniherya aya, ninnaattamela nihiku nowoopiha na Yehova.—Yow. 3:4; Sof. 1:14-18; 2:2, 3; 1 Ped. 4:7.

⁶ Mahiku ala ookiserya, nuumala osuwela otthuna wa Yehova, nihaana wiimananiha vanceene opaka ele Muluku oniphavela awe. Nto wira nipake eyo, nihaana osuwela oratteene moota mutthenkeso wa Yehova onivara awe muteko ni wiiwelela. Musuweleke wira mutthenkeso wa Yehova onivara muteko moovarihana ni malakiheryo, malamulo ni sowiixuttiha sa mBiibiliyani.—Esal. 19:8-10.

⁷ Vaavo atthu a Yehova anitthara aya malakiheryo ni malamulo a mBiibiliyani, awo annivara muteko moowiirana ni murettele. (Esal. 133:1; Yes. 60:17; aRom. 14:19) Etthu xeeni enlipiha wiiraana wa anna ni arokora a olumwenku wotheene? Ophenta. Otheene ahu nneettihiwa ni ophenta. (Yoh. 13:34, 35; aKol. 3:14) Okhala wira Muluku onniniiraaniha, ninniwerya weetta vamosa ni mutthenkeso awe.

MPANTTA WA WIIRIMU WA MUTTHENKESO WA YEHOVA

⁸ Profeta Yesaya, Ezekiyeli ni Daniyeli yaahoonihiwa mpantta wa wiirimu wa mutthenkeso wa Yehova. (Yes., ekap. 6; Ezek., ekap. 1; Dan. 7:9, 10) Nave murummwa Yohani aahoonihiwa mpantta wa wiirimu wa mutthenkeso wa Yehova. Nto eliivuru ya Wiisupulula, Yohani onninikhaliherya osuwela moota ori awe mutthenkeso wa Muluku. Yohani aahinweha Yehova okilaathale ene ehice yoovuwa, orukureriwe ene ni malaikha yaahimya wira: “Òwarya, òwarya, òwarya, Pwiya Muluku òwerya sothene, yowo akhala, yowo onikhala, yowo ontthuna orwa”. (Wis. 4:8) Nave Yohani aahinweha “mwapwittipwitthi emenlene eriyari y’ehije”. Owo onithoonyerya Mwaapwittipwitthi a Muluku, Yesu Kristu.—Wis. 5:6, 13, 14; Yoh. 1:29.

⁹ Okhala wira yowoonihiwa ele yaanimooniherya Yehova okilaathale ene veehiceni, eyo enooniherya wira tori Muhooleli a mutthenkeso awe. Voohimya sa okhulupale wa Yehova, 1 Wahala 29:11, 12 onihimya so: “Wunnuwa n’uwerya ni warya n’omwene n’uvuwa ti wawinyu nyuwo, Apwiya! Tthiri itthu sothene ti sawinyu, iye siri wirimu n’iye siri vathí-va. Nyuwo munnettiha itthu sothene n’uwerya wanyu. Mwa nyuwo onnikhuma murerelo n’uvuwa. Nyuwo munniruma itthu sothene n’uwerya wanyu n’ikuru sanyu. Nyuwo munniwerya olipiha ni wunnuwiha”.

¹⁰ Okhala wira onivara vamosa ni Yehova, Yesu oovahiwa okhulupale wiirimu ni oovahiwa owerya. Nave “Muluku òkhaliha itthu sothene vathí va inawu sa Kristu; òmukhaliha Yes’uwo muru” wa muloko wotheene. (aÉf. 1:22) Omuhimyaka Yesu, murummwa Paulo olempe so: “Muluku ònvuwiha vanjene, khunvaha nsina novikana masina othene, wira sothene sikokhorele nsina na Yesu, iye siri wirimu n’iye siri mulaponi n’iye siri mowixani, ni wira atthu othene elaleye wira: ‘Yesu Kristu ti Pwiya’, ni siso envuwihe Muluku Tithi”. (aFil. 2:9-11) Nto nihaana ororomela okhulupale wa Yesu Kristu.

¹¹ Profeta Daniyeli aahinweha Humu a Mahiku Otheene okilaathale ene veehiceni vawe wiirimu. Nave aahiweha malaikha ‘òhalikeleya yamurumela hum’uwo: arumeyi awe ikonto ikonto sene yanimwemelela’. (Dan. 7:10) Biibiliya onnihimya muttitthi owo wa malaikha okhala ‘arumeyi a Muluku, anirummwa ni yowo wakhaliherya ale anrowa ohiyeriwa wòpowa’. (aHéb. 1:14) Soopattuxiwa iyo somunepani siri sootthokiheya ntoko “omwene n’uwerya n’utokwene”.—aKol. 1:16.

¹² Vaavo nnuupuwelela ahu mikhalelo iyo sa mpantta wa wiirimu wa mutthenkeso wa Yehova, ninniwerya wiiwexexa moonelo wa profeta Yesaya vaavo aamonale awe Yehova ‘okilathalene vehijeni vorakama ni vottittimiheya’ ni “oxerexere waya, yahikhala malaikha, yihaniwa maSerafi”. Vano Yesaya aahihimya wira: “Ayina! Korimela, kihokhwa! Miyo kikhanle mutthu a iyano sonanara, kikhalaka eriyari y’atthu a iyano sonanara, vano ni maitho ak’ala komona Mwené, Apwiya [Yehova] òwerya sothene”. Moohaanyiherya, Yesaya aahitikinihiwa vanceene ni aanoona wira aari mwaamukhaani nuumala woona munnuwelo wa mutthenkeso wa Yehova. Yowoonihiwa ele yaahinvara murima vanceene, nto nuumala wiiwa nsu wiirimu nimulattulaka orowa ovara muteko wa vameekhaaya wa olaleya ophukela wa Yehova, Yesaya aahimmye so: “Miyo kiri va: Kirumekeni”.—Yes. 6:1-5, 8.

¹³ Osuwela ni oxukhurela mutthenkeso wa Yehova, onniniiriha okhalana moonelo mmosaru aarina awe profeta Yesaya. Nto vaavo mutthenkeso ahu onikela awe vahoolo, hiyo khaninhala ottuli. Maana ninniimananiha wooniherya wira ninniroromela mutthenkeso wa Yehova olelo-va.

MUTTHENKESO WA YEHOVA ONNIKELA VAHOOLO

¹⁴ Ekapiitulu 1 ya eprofesia ya Ezekiyeli ennimooniherya Yehova eettihaka ekaaro awe yuulupale ya wiirimu. Ekaaro eyo enithoonyerya mpantta wa wiirimu wa mutthenkeso wa Yehova. Owo onneettiha ekaaro awe mwa enamuna yoophenta ni moovarihana ni ele oniphavela awe.—Esal. 103:20.

¹⁵ Khula nroota na ekaaro ele nookhalana nroota nikina na munnuwelo mmosaru, nave ninneetta. Tivonto onihimmwa aya wira marota otheene “yaniwerya wetta ipantte soxexe, ehirukunuwaka”. (Ezek. 1:17) Moowaakuveya maroota awo yaanirukunuwela mpantta mukina. Masi musuweleke wira ekaaro eyo ookhala oneettiha. Maana, Yehova khoniphavela wira mutthenkeso awe oroweke khula mpantta onthetemanela aya. Yoolepa ya Ezekiyeli 1:20 enihimya so: “[Maroota awo] yanirowa watthunaya eroho” wala munepa wowaarya wa Muluku. Eyo enooniherya wira munepa wowaarya wa Yehova onniiriha mutthenkeso wa Yehova orowa khula opuro Yehova oniphavela awe. Nto ti vooloka wiikoha so: ‘Kiireke kinneetta vamosa ni mutthenkeso wa Yehova?’

¹⁶ Weetta vamosa ni mutthenkeso wa Yehova onihela muhina itthu sinceene ohiya paahi orowela mithukumano ni olaleerya. Etthu yoopacerya, nihaana okela vahoolo momunepani. Hiyo ‘ninnisuwela othanla itthu sintepa ophwanela’, nto eyo enninikhaliherya okhala moovarihana ni iprokrama sotheene sa yoolya ya omunepani. (aFil. 1:10; 4:8, 9; Yoh. 17:3) Nave nihaana osuwela wira nipuro okhanle mutthenkeso, wookhala ovarihana ni wiiraana wooloka. Nto nihaana orumeela saana okathi ahu, ikuru sahu, osuwela wahu ni mireerelo Yehova onivanhe awe wira nivare muteko awe. Vaavo nneetta ahu moovarihana ni ekaaro ya wiirimu ya Yehova, ninnivarihela muteko mookumini mwahu muhupi ninlaleya ahu.

¹⁷ Nikhaliheriwaka ni mutthenkeso wa Yehova, hiyo khaninhiya opaka otthuna wa Muluku. Musuweleke wira Yehova toneettiha ekaaro ya wiirimu. Nto vaavo nneetta ahu vamosa ni ekaaro eyo, ninnooniherya wira ninnimuttittimiha Yehova ni ninnimuroromela ntoko Mwala ahu. (Esal. 18:32) Biibiliya onihimya so: “Muluku onimwavaha ikuru atthu awe: onimwareriha atthu awe ni murettele”. (Esal. 29:11) Okhala wira olelo-va nniirela mpantta mutthenkeso wa Yehova, ninnikhalana ikuru ni murettele, maana Yehova onnaareeliha atthu awe ni mutthenkeso awe. Tthiri Yehova khonrowa ohiya onireeliha vaavo ninrowa ahu opakaka yootthuna awe olelo-va mpakha mahiku otheene.