Nyuwo Munneetta Vamosa ni Nikhuuru Nootthokiheya na Yehova?
“Maitho Àpwiya annawòna anaxariya”.—1 PED. 3:12, Biblya Exirima.
MWAAROWA WAAKHULA SAI?
Yehova onrowa waakhula sai otupheliwa wa atthu awe?
Itthu xeeni Muluku onnivekela awe wira niwerye wataana ni yena?
Xeeni vanitthuneya ahu weetta vamosa ni nikhuuru nootthokiheya na Yehova?
1. Nikhuuru xeeni nootthokiheya naranttenle aIsarayeli oomwareya yiitthaneliwa nsina na Yehova? (Nwehe elatarato yoopacerya)
YEHOVA toniphwanelela ottittimihiwa mwaha wookumiherya muloko wa eKristau eseekulu yoopacerya ni oreeriha okokhorela wekeekhai mahiku ahu ala. Ntoko soonale ahu muru ovinre, nikhuuru nootthokiheya na atthareli oopacerya a Kristu yaranttela nloko noomwareya na aIsarayeli yiitthaneliwa nsina na Yehova. Mwaha wowataana saana ni Muluku, nikhuuru nle nsya na atthareli a Kristu, nahoopowa opwetexiwa wa Yerusalemu mwaakha wa 70 EC. (Luka 21:20, 21) Itthu siiren’ye eseekulu yoopacerya, saari ntoko ethoonyeryo wa ele yaarowa owiiraneela arumeyi a Yehova olelo-va. Mukhalelo ola wa itthu sa Satana moohipisa onirowa omala, masi nikhuuru nootthokiheya na Muluku ninrowa woopowa wuumalani wa olumwenku ola. (2 Tim. 3:1) Masi ninrowa okupaleela sai eyo?
2. Exeeni Yesu aalavunle awe voohimya sa “maxakha maalupale” nto anrowa opacerya sai?
2 Voohimya sa orwa wawe wohooneya ni omala wa olumwenku ola, Yesu aahimyale so: “Tthiri, okathi yowo, anokhala maxakha malupale, ehinákhumelele okhuma wopajeryani w’olumwenku mpakha vano, nnákhala ahinrowa-tho okhumelela”. (Math. 24:3, 21) Maxakha awo ahitonko wiireya, anrowa opacerya okathi yoole Yehova onrowa awe owiiriha amahoolela a ipoliitika ompwetexa “Babilonia Muulupale” eyo piiyo, olamulelo wa ilapo sotheene wa etiini yoowoka. (Wis. 17:3-5, 16) Nto exeeni enrowa okhumelela moottharelana?
SOWIIRA SA SATANA SINOOMUKUMIHERYA HARMAGEDONI
3. Nuumala opwetexiwa etiini yoowoka, ti pani onrowa weererya waatuphela atthu a Yehova?
3 Nuumala opwetexiwa etiini yoowoka, arumeyi a Satana ni ipantte sikina sa olumwenku awe, anrowa waatuphela arummwa a Yehova. Voohimya sa ‘Gogi, a elapo y’oMagogi’, Biibiliya onnihimya vahinatthi wira: “Nyuwo n’anakhotto anyu n’atthu a maloko manjene ari ni nyuwo munimwatuphela atthu awo, mulikanaka ni mwanamukhaya ni neku noripa nnikhunela elapo”. Okhala wira Anamoona a Yehova atthu a murettele yaawo ahirina ikapwitthi anirowa wooniwaka okhala ookhweya owiivakasa. Masi waatuphela atthu a Muluku onrowa okhala etthu yeelolo!—Ezek. 38:1, 2, 9-12.
4, 5. Yehova onrowa waakhula sa otupheliwa wa arumeyi awe?
4 Yehova onrowa waakhula sai okathi Satana onrowa awe waatuphela atthu awe? Yehova onrowa owaakiherya atthu awe, orumeelaka edireito awe ya okhala Mwene a Olumwenku Wotheene. Yehova onnoona otupheliwa wa atthu awe okhala ntoko onitupheliwa yoowo ene. (Mmusome Zakariya 2:13) Tivonto Tiithi ahu a wiirimu onrowa opaka etthu wira onaakiherye. Woopoliwa iwo onrowa wooneya saana, okathi onrowa aya opwetexiwa olumwenku wa Satana va Harmagedoni, eyo piiyo, “ekhotto ya nihiku nulupale na Muluku òwerya sothene”.—Wis. 16:14, 16.
5 Voohimya sa Harmagedoni, iprofesia sa mBiibiliyani sinihimya so: “‘Apwiya annakumiherya mulattu atthu a maloko othene, anrowa walamula atthu othene a vathí. Yàphwanyana mulattu, anrowa owìva. Enihimyaya Apwiya òwerya sothene t’ila: Ehasara enomwarela mulaponi mothene, nloko ti nloko, ettheku yulupale enokhumelela mpakha wokiseryani w’elapo. Atthu anrowa wivakasiwa n’Apwiya, khaninleliwa nnákhala ovithiwa, mirutthu saya sinrowa okhalaka vatthayani ntoko eturumu’”. (Yer. 25:31-33) Harmagedoni onrowa omala-maliha makhalelo a olumwenku ola wootakhala. Tthiri olumwenku wa Satana onrowa opwetexiwa, masi nikhuuru nootthokiheya na Muluku epantte ya vathi ninrowa woopowa.
ETTHU ENIIRIHA NIKHUURU NA YEHOVA WUNNUWA OLELO-VA
6, 7. (a) Anikhuma vai atthu aniirela mpantta “muttitthi mulupalexa”? (b) Munnuwelo xeeni onooneya mahiku ala?
6 Nikhuuru nootthokiheya na Muluku olelo-va ninninnuwa okhala wira atthu aniirela mpantta anneemereriwa ni Yehova. Biibiliya onihimya so: “Maitho Àpwiya annawòna anaxariya”. (1 Ped. 3:12, Biblya Exirima.) Anaxariya anaahela muhina atthu a “muttitthi mulupalexa” yaale “yaharere olupatthiwa n’uhaxiwa”. (Wis. 7:9, 14) Atthu anrowa woopowa, khahiyo “muttitthi” paahi. Awo ari atth a “muttitthi mulupalexa” eyo piiyo atthu oowaatta ahinkontareya. Niireke nyuwo munrowa okhala mpuwa mwa atthu awo anrowa woopowa “maxakha malupale?”
7 Nto atthu ala a muttitthi muulupalexa anikhuma vai? Atthu awo annitthukumanyiwa mwaha wa ele Yesu aalavunle awe vahinatthi voohimya sa orwa wawe. Owo aalavunle so: “Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto, olumwenk’ula omaleke”. (Math. 24:14) Mmahiku ala ookiserya, ola tokhanle muteko muulupalexa wa nikhuuru nootthokiheya na Muluku. Mwaha wa muteko woolaleerya ni wiixuttiha onivariwa olumwenku wotheene ni Anamoona a Yehova, imilyau sinceene sa atthu ahiixutta omurumeela Muluku orweela mwa munepa wootteela ni “ekekhai”. (Yoh. 4:23, 24) Mwa ntakiheryo, iyaakha muloko sivinre, niire so, okhuma mwaakha wa 2003 mpakha 2012 atthu anivikana 2.707.000 yaahibatiziwa ntoko ethoonyeryo ya wiivahererya waya wa Muluku. Olumwenku wotheene aakhala Anamoona anivikana 7.900.000 ni sookhala imilyau sinceene sa atthu anithukumana ni anamoona, vanceenexa okathi wa Wuupuwelela Okhwa wa Yesu khula mwaakha. Ekeekhai wira hiyo khanniittottopa mwaha wa nummuru nlo, okhala wira ‘Muluku toninnuwiha’. (1 aKor. 3:5-7) Masi, khula mwaakha onivira, muttitthi muulupale onnitepa wunnuwa!
8. Sowiiraneya xeeni sinooniherya wunnuwa wuulupale wa nikhuuru na Yehova mahiku ala?
8 Mahiku ala onnoonaneya wunnuwa wuulupale wa atthu a Muluku okhala wira mwaneene Yehova onnaakhaliherya Anamoona awe. (Mmusome Yesaya 43:10-12.) Wuncerereya nno wahihimmwa vahinatthi ni eprofesia ela: “Etthoko anyu yoyevaxa enokhala nloko nowatta atthu. Miyo, [Yehova], kinrowa omaliherya sothene vowakuveya, waphiyakaru okathi aya”. (Yes. 60:22) Wookhala okathi, alipa oowoottihiwa ari valaponi, yaakhala aya ntoko ‘etthoko yoyevexa”, masi nummuru naya nihincerereya mwaha woowi aIsarayeli akina oomunepani aaruuhiwa khuvolowa munikhuuruni nootthokiheya na Muluku. (aGal. 6:16) Mwaha woreelihiwaka ni Yehova mwa iyaakha sinceene, muttitthi muulupale onnivikaniha wunnuwa.
EXEENI YEHOVA ENNIVEKELA AWE?
9. Exeeni enitthuneya ahu opaka wira naakhele elapo esya elaiheriwe ni Muluku?
9 Hata hiyo nryeene muKristau owoottihiwa wala a muttitthi muulupale, ninniweherya mareeliho maalupale a muhoolo a elapo esya yeeyo eleiheriwe ahu ni Muluku. Wira naakhele mareeliho awo, hiyo nihaana wiiwelela ele Yehova ennivekela awe. (Yes. 48:17, 18) Nkahaya muthokorerye makhalelo a nloko na Isarayeli yaawo yaatthara Nlamulo na Moise. Yoolakela emosa ya Nlamulo nlo waari owaakiherya aIsarayeli ihasara sinceene, tivonto vaavahiwe aya malamulo ooloka voohimya sa wiisuumaaliha, nakoso, waakhapelela anamwane, wathokorerya saana atthu akina ni itthu sikina. (Okhu. 20:14; Onam. 19:18, 35-37; Otum. 6:6-9) Nave wiiwelela malamulo a Muluku olelo-va onniniphwanyiha mireerelo sinceene, tthiri hiyo khannoona okhala voovila weettela malamulo awo. (Mmusome 1 Yoh. 5:3.) Tthiri moolikana ni aIsarayeli yaale yaakhapeleliwe ni Nlamulo, wiiwelela wahu malamulo a Yehova Muluku onninikhapelela ni onikhaliha ‘owetta orattene mowaminini’.—Tito 1:13.
10. Xeeni vanitthuneya ahu waavya okathi wira nimusome Biibiliya ni Omulompa Muluku Vatthokoni khula esumana?
10 Nikhuuru nootthokiheya na Yehova epantte ya vathi ninneetta nirowaka ohoolo mwa inamuna sinceene. Mwa ntakiheryo, omwiiwexexa wahu Biibiliya onnincerereya khula okathi. Eyo enniiraneya okhala wira “Mukhalelo w’atthu [a xariya] onlikana ni warya wa nsuwa, onkhumelela oxaka, khunnuwa mpakha othana eriyari”. (Mir. 4:18) Masi nihaana wiikoha so: ‘Kiireke miyo kinniiwelela otthokiheriwa wa naanano wa ikeekhai sa mBiibiliyani? Kinnipaka okhala yoolema aka omusoma Biibiliya khula nihiku? Kinnikhalela nthiti osoma iliivuru sahu? Kiireke miyo ni emusi aka ninnimulompa Muluku vatthokoni vahu khula esumana?’ Anamunceene a hiyo annaakhulela wira opaka itthu iyo khonivila. Etthu enitthuneya ori waavya okathi woopaka itthu iyo. Tthiri ti vootthuneya wiiwexexa oratteene ekeekhai, ovarihela muteko ni wunnuwa omunepani, vanceenexa mahiku ala anaattamela maxakha maalupale!
11. Inamuna xeeni ifesta sa khalai ni mithukumano mahiku ala siniphwanyiha aya mireerelo?
11 Nikhuuru nootthokiheya na Yehova ninnipaka itthu sinniphwanyiha mureerelo, tivonto vanitumereriwa aya wiiwelela miruku sa murummwa Paulo sini: “Nupuxeryaneke mukina ni mukhw’awe, wira nakuviheryaneke ophenta n’uvara miteko sorera; Nihijompeleké orowa mmuthukumanoni, nihatthariheké ale ahinrowatho. Ohiya vo, nlipiheryaneke, votepa-tho vavo vanonanyu wira nihiku n’Apwiya nri vakhiviru”. (aHéb. 10:24, 25) Ifesta sa khula eyaakha ni mithukumano sa omukokhorela Yehova sanaalipiha aIsarayeli omunepani. Ohiya-vo saahikhala ifesta sa vameekhaaya ntoko Niira na Maxaxa okathi wa Nehemiya nenlo naari okathi woohakalala vanceene. (Okhum. 23:15, 16; Neh. 8:9-18) Hiyo ninniphwanya-tho ohakalala vaavo vanirowa ahu omithukumanoni ntoko asembeleya ni akongresu. Nto nimananiheke ottottela mureerelo mithukumano iyo wira nikhale oolipa omunepani ni oohakalala.—Tito 2:2.
12. Nooneleke sai muteko woolaleerya Omwene?
12 Ale aniirela mpantta nikhuuru nootthokiheya na Muluku, aakhalana eparakha ya: “onvareIa muteko” Muluku alaleyaka ihapari sa Omwene. (aRom. 15:16) Okhalela nthiti “muteko wa Muluku” onninikhaliha atthu “anivara muteko vamosa” ni Yehova, Muluku “orera murima”. (1 aKor. 3:9; 1 Ped. 1:15) Olaleya ihapari sooreera onnikhaliherya otteelihiwa wa Nsina noowaarya na Yehova. Tthiri eparakha yuulupale ovahereriwa “Ehapari Yorera, yeyo enkhuma wa Muluku òvuwa ni òttottopeliwa”.—1 Tim. 1:11.
13. Okhala wahu saana omunepani ni ekumi ahu sinilipa ni exeeni?
13 Yehova oniphavela wira hiyo nivikanihe okhala oolipa omunepani vaavo vanimutthara ahu ni okhaliherya miteko sa nikhuuru nawe nootthokiheya. Moise aahaahimeerya aIsarayeli wira: ‘Olelo va kinnakhaliha anamona itthu sothene sa wirimu ni sa vathí, miyo kopweha va maithoni vanyu ekumi n’ukhwa, oreriwa n’utakhaliwa. Muthanleke ekumi, wira mukhaleke nyuwo n’an’inyu n’osùlu anyu. Mwaphenteke Apwiya Muluku anyu, mwiweleleke molumo aya, mutthareke. Mwirá siso, munokhalana ekumi yinjene, mahiku anyu anrowa watta mulaponi Apwiya Muluku anyu yalaphenlyaya wavaha axitith’inyu Abrahamu n’Isakhi ni Yakobe’. (Otum. 30:19, 20) Ekumi ahu enilipa ni opaka otthuna wa Yehova, omphenta, omwiiwelela ni otthara malakiheryo awe.
14. Moonelo xeeni munna mmosa aarina awe voohimya sa nikhuuru nootthokeya na Yehova?
14 Munna Pryce Hughes, yoowo aalakenle omwiiwelela Muluku ni weetta vamosa ni nikhuuru nawe nootthokeya aalempe: “Miyo kinnitteeliwa murima okhala wira kihiixutta ekeekhai ya Yehova khalai ehinatthi ophiya eyaakha ya 1914 . . . Etthu yaari yootthuneya wa miyo waari weetta vamosa ni nikhuuru nootthokiheya nowooneya na Yehova. Okhuma khalai kihiixutta wira waaroromela apinaatamu khorina efaita. Nuumala osuwela eyo, kaahithanla weetta ni otthokeya woororomeleya. Etthu xeeni ekina yuulupale enivikana okhala ooweemereriwa ni oreelihiwa ni Yehova?”
MWEETTEKE VAMOSA NI NIKHUURU NOTTHOKEYA NA MULUKU
15. Nvahe ntakiheryo niri mBiibiliyani nnooniherya moota nikhanle ahu owoonaka mirukunuxo sinipakiwa sa omwiiwexexa wahu Biibiliya?
15 Wira nivikanihe weemereriwa ni Yehova nihaana okhaliherya nikhuuru na Muluku ni weemya mirukunuxo sinipakiwa sa omwiiwexexa wahu Biibiliya. Mwa ntakiheryo, muthokorerye ela: Nuumala okhwa Yesu, yaahikhala maKristau aYuda imiya sinceene, yaawo yoona ovila ohiya weettela Ikano sa Moise. (Mit. 21:17-20) Masi akhaliheriwaka ni epaphelo murummwa Paulo aalepenle awe aHeeberi, awo yaaheemya wira khiyaattelihiwe ni mikuttho “sa inama sopahiwa” saatumereriwa ni Nlamulo, masi yatteelihiwe ni “mukuttho wa erutthu ya Yesu Kristu, aivaherenrye omosá pahi wa mahiku othene”. (aHéb. 10:5-10) Ninnikupaleela tthiri wira anamunceene mwa aYuda ale yeemyale eKristau, yaahilokiherya muupuwelo aya nto anavikaniha weetta ni nikhuuru nootthokiheya na Yehova. Hiyo-tho nihaana osomaka Nuulumo na Muluku mwa nthiti ni okhalana muupuwelelo wooloka wira niwerye wiiwexexa ele eniixutta ahu.
16. (a) Mareeliho xeeni anrowa wiiriha ekumi ya elapo esya okhala yoohakalaliha? (b) Yoolaiherya xeeni ya elapo esya enitepa woosivelani?
16 Otheene yaale anirowa ovikaniha okhala oororomeleya wa Yehova ni nikhuuru nawe nootthokiheya anooreelihiwa voohimala. Ale ari owoottihiwa animwaakhela eparakha aya yuulupale ya orowa olamulela ni Kristu wiirimu. (Rom. 8:16, 17) Vakhala wira hiyo nirina yoolipelela ya okhala mParayiisu valaponi, nto nuupuweleke moota ninrowa ahu okhala ohakalala. Tthiri ninnihakalala vaavo vanaaleela ahu atthu akina voohimya sa anatiri a Yehova a elapo esya! (2 Ped. 3:13) Esalimo 37:11 enihimya so: “Vano atthu òmàla anoreriwa vathí-va: anokhala-mu ni murettele womalela”. Atthu awo “anrowa oteka ipa saya, ekhaleke memmo” nave awo “animolya mihokorokho sihawenlyaya”. (Yes. 65:21, 22) Khanirowa okhala atthu oothanyiwa, oothoiwa hata oovoliwa etala. (Esal. 72:13-16) Babilonia Muulupale khonirowa waawokaka atthu, okhala wira onrowa wiiraka opwetexiwe ene. (Wis. 18:8, 21) Alipa ookhwa anrowa ohihimuxiwa, ni ovahiwa eparakha ya okhala moohimala. (Yes. 25:8; Mit. 24:15) Tthiri vanirowa okhala voohakalaliha wa imilyau sa atthu yaale yiivaherenrye wa Yehova! Wira naakhele mareeliho awo, nihaana wiimananiha orowa ohoolo momunepani ni weetta vamosa ni mulokiheryo wa Yehova.
17. Nikhalaneke moonelo xeeni voohimya sa omukokhorela Yehova ni nikhuuru nawe nootthokiheya?
17 Vaavo makhalelo ala a itthu anihala aya vakhaani omala, nrowe nilipihe nroromelo nahu ni oxukhurela wuulupale marehereryo a Muluku a okokhorela wekeekhai. Owo ti waari moonelo wa nasaalimo Davidi yoowo aalempe so: “Kihavekela Apwiya etthu emosaru pahi, entthunaka ni murim’aka wothene, kikhaleke w’Apwiya mahiku othene, kipuheke mwahá w’orera waya murima, kisukiwaka mpani mwaya”. (Esal. 27:4) Nto khula mmosa a hiyo ohaana wataana ni Muluku, weetta ni atthu awe ni ovikaniha weetta nirowaka vahoolo ni nikhuuru nootthokiheya na Yehova.