Arumeyi Oorumeela Annivara Muteko Wa Faita Yinceene

OLEPELAKA muloko wa oFilipi, murummwa Paulo aahimmye so: “Hiyo, Paulo ni Timótheyo, arumeyi a Yesu Kristu, ninnolepelani nyuwo, aKristu othene munkhala oFilipi, munimwamini Yesu Kristu, vamosá ni makhulupale ni madiákono [arumeyi oorumeela]”. (aFil. 1:1) Moone wira yoolepa ela, murummwa Paulo onnaahimya arumeyi oorumeela. Vanikhala ntoko wira alopwana awo yaahikhalana muteko wa faita, yaakhaliheryaka axitokweene a muloko wa okathi ole. Etthu emosaru enniiraneya olelo-va. Maana arumeyi oorumeela annivara muteko wa faita yaakhaliheryaka axitokweene ni okhaliherya okhala wiiraana mmulokoni.

² Niireke munnaasuwela arumeyi oorumeela a muloko anyu? Niireke munnisuwela muteko anivara aya wira yoophwanyiheni mureerelo nyuwo ni muloko wotheene? Tthiri muteko anivara aya anna awo, Yehova onnixukhurela vanceene. Murummwa Paulo aahimmye so: “Madiákono [arumeyi oorumeela] anvara orattene miteko saya annìphwanyiha nttittimiho norera, annilipiherya murima olaleya omwamini Yesu Kristu”.—1 Tim. 3:13.

ITTHU SINIVEKELIWA MBIIBILIYANI WIRA MUTTHU OKHALE MURUMEYI OORUMEELA

³ Arumeyi oorumeela ahaana okhalaka moovarihana ni mweettelo wa eKristau, okhala oottittimiheya ni ovaraka saana miritti saya. Eyo ennooneya vaavo ninthokorerya ahu ele Paulo aalavunle awe voohimya sa itthu sinivekeliwa wira munna ophwanelele okhala murumeyi oorumeela. Epaphelo aamulepenle awe Timootheyo, owo aahimmye so: “Madiákono [arumeyi oorumeela] ahana okhala atthu òttittimiheya ni èkekhai. Ehikhaleké anamuhapaliwa. Ehiphaveleké muhakhu vohixariya. Yetteleke ikekhai so wamini ni murima worera. Ehinatthi othanliwa, epajeryeke owehiwa murim’aya: vano, yòniwa okhala òhàkanyereya, ekhalihiweke madiákono. Diákono akhaleke mulopwana a muthiyana mmosá pahi, asuweleke owettiha orattene an’awe n’etthoko awe”. (1 Tim. 3:8-10, 12) Vaavo muloko onitthara awe oratteene malakiheryo a moota anithanliwa aya arumeyi oorumeela, owo khonilavuliwa voohiloka mwaha wa enamuna ya alopwana anithanliwa wira akhalane miritti mmulokoni.

⁴ Moohicikha iyaakha arina aya, okhale mmiravo wala oowuuluvala, khula mweeri arumeyi oorumeela anniluttuweliwa olaleerya. Amutakihaka Yesu, awo anniluttuweliwa ovara muteko woolaleerya. Oluttuweliwa waya onnooniherya wira arina moonelo mmosaru ntoko wa Yehova, yoowo oniphavela owoopola apinaatamu.—Yes. 9:6.

⁵ Nave arumeyi oorumeela ahaana ovaha ntakiheryo nooloka mwa enamuna aniwara aya, wiitthokiha, ilavulelo, moonelo ni mweettelo. Awo ahaana okhala oottittimiheya wira atthu akina yaattittimiheke. Ohiya-vo, awo ahaana okhalana waataana wooloka ni Yehova ni osuwela ovara oratteene miteko saya mmulokoni.—Tito 2:2, 6-8.

⁶ Alopwana awo, ahaana owehiwa akhala wira anniwerya ovara muteko saana. Hata ahinatthi othanliwa, awo ahaana wooniherya wira alopwana oowiivahererya. Ahaana wooniherya wira annihela Omwene wa Muluku nipuro noopacerya mookumini mwaya ni anniimananiha okhalana iparakha anrowa aya ovahiwa. Tthiri awo ahaana waavaha ntakiheryo nooloka atthu akina mmulokoni.—1 Tim. 3:10.

MITEKO ANIVARA AYA

⁷ Arumeyi oorumeela annivara miteko sinceene sa faita mmulokoni wira yaaphwanyihe mireerelo anna ni arokora. Eyo ennaakhaliherya axitokweene okhalana okathi wira avareke miteko sikina ntoko wiixuttiha ni waaxukurya anna ni arokora. Vaavo axitokweene anaavaha aya miteko arumeyi oorumeela, awo anniweha mikhalelo, itthu anisuwela aya ni itthu sinitthuneya mmulokoni.

⁸ Vano nwehe miteko sikina arumeyi oorumeela anivara aya: Murumeyi oorumeela pooti othanliwa wira okhapeleleke iliivuru ninkuxa ahu wira nisomeke mmensihu aahiiso naalaleeryaka. Akina annithanliwa wira akhapeleleke ikartau sa muloko wala sa muttetthe woolaleerya. Nave akina pooti othanliwa wira akhapeleleke ikaruma sinirumiha masu, okhala anamathoonyerya wala waakhaliherya axitokweene mwa inamuna sikina. Wira Empa ya Omwene elokiheriwe ni eratteliwe saana, onitthuneya okathi ni wiimananiha vanceene, nto okathi mukina pooti othanliwa arumeyi oorumeela wira akhapeleleke miritti iyo.

⁹ Miloko sikina, pooti oweryaneya khula murumeyi oorumeela okhapelela muritti mmosa paahi. Masi miloko arumeyi oorumeela ari aya vakhaani, murumeyi oorumeela mmosa pooti okhapelela miritti soovirikana. Nave pooti arumeyi oorumeela oovirikana okhapelela muritti mmosa. Yaahikhale arumeyi oorumeela anceene wira akhapeleleke miritti sikina, nikhuuru na axitokweene pooti waathanla anna oopatisiwa ni oophwanelela wira avareke miteko sikina. Eyo enimwaakhaliherya osuwela itthu sikina sinrowa waakhaliherya muhoolo yaphwanelela okhala arumeyi oorumeela. Yaahikhale anna oopatisiwa, arokora anivaha ntakiheryo nooloka ni arina mweettelo wooloka pooti okhaliherya miteko sikina, nnaamwi ahirowaka othanliwa wira akhale arumeyi oorumeela. Onnihimmwa wira mutthu owo ookhalana mweettelo wooloka, akhala wira mweettelo awe onnooniherya wira onnimukokhorela Muluku ni onnivaha ntakiheryo nooloka wira atthu akina atthareke. Owo onnaavaha ntakiheryo nooloka atthu akina ohicompelaka mithukumano, olaleerya, makhalelo awe vatthokoni, soothanla sawe, matthekulelo awe ni moota oniwara awe ni wiitthokiha ni itthu sikina.

¹⁰ Miloko axitokweene ari aya vakhaani, arumeyi oorumeela oophwanelela pooti othanliwa wira athokorerye makoho a opatiso anilavula sa sowiixuttiha sa Biibiliya. Makoho awo ari apendise: “Mpantta 1: Sookupali sa MaKristau”. Wala “Mpantta 2: Makhalelo a MaKristau”.

¹¹ Yakhala mathowa ooloka, nikhuuru na axitokweene pooti oturuka miritti sa arumeyi oorumeela. Masi sinnikhumelela itthu sooloka akhala wira munna onikhapelela muritti mmosa okathi munceene, maana eyo ennimukhaliherya osuwela oratteene muteko awe.

¹² Moovarihana ni makhalelo a mapuro awo, pooti okhala miteko sikina sinireerela ovahiwa arumeyi oorumeela, yaawo anooniwa ni ‘atthu othene’ wira annikela vahoolo. (1 Tim. 4:15) Akhala wira axitokweene ari vakhaani, murumeyi oorumeela pooti othanliwa wira omukhaliheryeke mutokweene a ekrupu yoolaleerya wala okhala murumeyi a ekrupu ohooleliwaka ni axitokweene. Nave arumeyi oorumeela pooti othanleliwa mipantta sa muthukumano Okumi ni Orummwa Ahu wa Ekristau, ohoolela Yoosoma ya Biibiliya ya Muloko wala olavula myaha sa atthu otheene. Nave-tho pooti ovahiwa iparakha sikina akhala wira yookhala etthu enireerela ovariwa ni yakhalana mikhalelo sinireerela wira avare muteko owo. (1 Ped. 4:10) Okathi anaakhaliherya aya axitokweene, arumeyi oorumeela ahaana wiivahererya vootthuna vaya.

¹³ Nnaamwi muteko aya ovirikanne ene vanceene ni muteko wa axitokweene, muteko anivara aya arumeyi oorumeela ti woowaarya ni ti wa Muluku. Nave wookhalana efaita yinceene, maana onnikhaliherya muloko weetta saana. Nuuvira okathi, akhala wira murumeyi oorumeela onnivara saana muteko awe, onakhala makampusi ooloka, mwiixuttihi ooloka ni okhalana mikhalelo sooloka, owo pooti orekomentariwa wira okhale mutokweene.

¹⁴ Akhala wira mwa mmiravo wala mpatisiwe niinaano, niireke munniimananiha wira mphwanelele okhala murumeyi oorumeela? (1 Tim. 3:1) Khula mwakha, atthu anceene anneemererya ekeekhai, nto anniphaveliwa alopwana anceene oolipa momunepani wira akhalane miritti mmulokoni. Munoowerya okhalana miritti iyo, akhala wira onnoosivelani waakhaliherya atthu akina. Enamuna emosa mukhanle anyu oopaka eyo, ori wuupuwelela ntakiheryo na Yesu. (Math. 20:28; Yoh. 4:6, 7; 13:4, 5) Ophavela wanyu waakhaliherya atthu akina onrowa wunnuwaka vaavo munrowa anyu ophwanyaka ohakalala mwaha wookhala mutthu oovaha. (Mit. 20:35) Nto mwiivahereryeke waakhaliherya atthu akina, okhaliherya olokiherya ni orattela Empa ya Omwene ni omuranttela mutthu okathi wa muthukumano Okumi ni Orummwa Ahu wa Ekristau. Nave wiimananiha wira mukhale murumeyi oorumeela, onihela muhina okhalana mikhalelo sa omunepani mmusomaka Biibiliya khula nihiku ni okhalana yoosoma anyu. (Esal. 1:1, 2; aGal. 5:22, 23) Ohiya-vo, munna oniimananiha onnooniherya wira toororomeleya okathi onivahiwa awe miteko mmulokoni.—1 aKor. 4:2.

¹⁵ Arumeyi oorumeela anithanliwa ni munepa wowaarya wa Muluku wira akumiheryeke mireerelo mmulokoni. Atthu otheene mmulokoni, annooniherya wira annixukhurela muteko onivariwa ni arumeyi oorumeela akhala wira anniwiiwelela vaavo arumeyi oorumeela anivara aya miteko saya. Mwa enamuna eyo, muloko onnooniherya wira onnixukhurela mareheryo ala a Yehova wira emusi awe ekhaleke yootthokiheya.—aGal. 6:10.