Mwaaxukhureleke Alopwana Athanliwe Wiira Ahooleleke Muloko

1. Yesu aavanhe exeeni apinaatamu?

YESU, mulopwana onisuweliwa okhala ootepexa ovaha. Okathi aari awe valaponi, owo aahipaka miiriirya sinceene wiira aakhaliherye ale yaapirisari. (Luka 9:12-17) Nave-tho, owo oonivaha etthu ya faita yuulupale, eyo piiyo, okumi awe. (Yoh. 15:13) Nuumala ohihimuxiwa, owo khaahiyale okhala oovaha. Aahihimya wiira aamunvekela Yehova wiira onivahe munepa woowaarya wiira oniixuttihe ni onimaaliha. Nto owo aahipaka eyo. (Yoh. 14:16, 17; 16:13) Orumeelaka mithukumano, Yesu khonihiya oniixuttiha moota woowaapaka awiixutti elapo yootheene. — Math. 28:18-20.

2. Moovarihana ni aEefeso 4:7, 8, tani akhanle “soovaha”?

² Nwehe etthu ekina Yesu onivanhe awe. Murummwa Paulo, ohimye wiira nuumala Yesu orowa wiirimu, “aahaaruma alopwana awo wiira akhale soovaha”. (Mmusome aEefeso 4:7, 8.) Paulo otthokihenrye wiira Yesu aahaaruma alopwana awo ntoko soovaha wiira akhaliheryeke muloko mwa inamuna soovirikana. (aEef. 1:22, 23; 4:11-13) Olelo-va, “soovaha” iya anihimmwa arumeyi ookhaliherya, axitokweene a mmulokoni ni axitokweene a esirkwiitu.a Ekeekhai wiira alopwana awo toottheka ni ikwaha sikina annivonya. (Yak. 3:2) Masi Pwiya ahu Yesu Kristu, onnaarumeela alopwana awo wiira anikhaliherye. Awo yoovaha yuulupale para hiyo.

3. Ninrowa waakhaliherya sai alopwana yaawo akhanle “soovaha”?

³ Yesu, ohaathanla alopwana yaawo akhanle “soovaha” wiira alipiheke muloko. (aEef. 4:12) Khula mmosa a hiyo, ohaana opaka sootheene oniwerya awe wiira aakhaliherye alopwana awo omaleliha muteko avahiwa aya. Wiira niiwexexe oratteene, muupuwele ela: Akina a hiyo, ninnivara muteko wa oteka Ipa sa Omwene, akina annikhaliherya alokiheryaka eyoolya ni miteko sikina. Mwa enamuna emosa-ru, nnoowerya waakhaliherya arumeyi ookhaliherya, axitokweene ammulokoni ni axitokweene a esirkwiitu ni moolumo ahu aahiiso ni miteko sahu. Nrowe niwehe moota muteko aya, onnikhaliherya aya ni moota nikhanle ahu oowaaxukhurela ni omuxukhurela Yesu, mwaha wa onivaha alopwana awo akhanle “soovaha”.

ARUMEYI OOKHALIHERYA ANNIVARA MUTEKO MUNCEENE

4. Miteko xeeni sikina arumeyi ookhaliherya yaavara aya okathi wa arummwa?

⁴ Okathi wa arummwa, alopwana akina yaanithanliwa wiira akhaleke arumeyi ookhaliherya. (1Tim. 3:8) Vanikhala wiira okathi murummwa Paulo aalavula awe sa “ale anaakhaliherya akhwaaya”, aahimya arumeyi ookhaliherya. (1aKor. 12:28) Tthiri arumeyi ookhaliherya annivara muteko munceene, okhala wiira eyo ennaakhaliherya axitokweene a mmulokoni okhalana okathi wiira yaalipihe anna ni olaleerya. Mwa ntakiheryo, pooti wiira arumeyi ookhaliherya a okathi wa arummwa, yaanirumeeliwa wiira akopiyariki Soolepa sa mbiibiliyani aahiiso wiira athumeke materiyaale yaarowa orumeeliwa okathi wookopiyari.

5. Miteko xeeni arumeyi ookhaliherya anivara aya olelo-va?

⁵ Muupuwele miteko sikina arumeyi ookhaliherya anivara aya muloko anyu. (1Ped. 4:10) Woonasa wene, akina annikhapelela ikontha sa mmulokoni, muttetthe muloko onilaleerya awe aahiiso annikhapelela iliivuru. Akina annikhapelela ikaruma sa audiyu ni iviidiyu, annirumeela ntoko anamathoonyerya nave akina annikhaliherya edepartamento ya olokiherya Empa ya Omwene. Miteko sootheene anivara aya sookhalana efaita okhala wiira sinnikhaliherya muloko okhala wootthokiheya. (1aKor. 14:40) Ohiya-vo, arumeyi ookhaliherya akina, anniirela mpantta mithukumano sa eriyari ya esumana ni annilavula myaha aniroiheliwa atthu ootheene. Murumeyi ookhaliherya, onnithanliwa wiira omukhaliheryeke muhooleli a ekurupu yoolaleerya. Ikwaha sikina, arumeyi ookhaliherya annilattuliwa ni axitokweene wiira yaaxukurye anna ni arokora.

6. Xeeni ninreerela ahu ovaha efaita miteko sa arumeyi ookhaliherya?

⁶ Nwehe itthu sikina atthu akina anoonela aya, voohimya sa miteko arumeyi ookhaliherya anivara aya mmulokoni. Beberly,b murokora onikhala oBolívia, onihimya so: Mwaha wa miteko sinceene anivara aya arumeyi ookhaliherya mmulokoni, kinniwerya ottottela muraarelo mithukumano sootheene. Mwaha wa miteko iyo, miyo kinniwerya wiipa, okomentari, owiriyana myaha, oweha iviidiyu ni ifootu seiyo sinooniheriwa okathi wa mithukumano. Awo annikhapelela Empa ya Omwene ni annaakhaliherya alipa-oowiriyana amurumeelaka videoconferência. Nuumala mithukumano, awo anniivahererya wiira arattele Empa ya Omwene, okhapelela ikontha sa mmulokoni ni onivaha iliivuru nimpirisari ahu. Tthiri kinnaaxukhurela vanceene mwaha wa miteko anivara aya!” Leslie, mwaara a mutokweene onikhala oColômbia, onihimya so: “Iyaka onnihakalala vanceene mwaha wa muteko anivara aya arumeyi ookhaliherya. Nahaakhanle nikhaliheryo naya, owo aarowa waatteliwaka miteko. Nto kinnaaxukhurela vanceene mwaha wa miteko sootheene anivara aya”. Moohaanyiherya, pooti wiira muniwoonela siiso arumeyi ookhaliherya a muloko anyu. — 1Tim. 3:13.

7. Ninrowa wooniherya sai oxukhurela wahu miteko anivara aya arumeyi ookhaliherya? (Nwehe efootu.)

⁷ Nnaamwi naaxukhurelaka arumeyi ookhaliherya mwaha wa miteko sootheene anivara aya, Biibiliya onnitumererya wiira nihaana wooniherya wiira na “atthu ooxukhuru”. (aKol. 3:15) Cristóvão, mutokweene onikhala oFilândia, onnitthokiherya moota onooniherya awe oxukhurela wawe, owo onihimya so: “Kinnilepa ekarta aahiiso kinnimwinviyarela mensaxi, kiromolaka yoolepa emosa ya mbiibiliyani. Nave kinnimuleela moota okilipihale awe aahiiso moota kinivaha aka efaita miteko sootheene onivara awe”. Pascal ni Jael, yaawo anikhala oNova Caledônia annavekelela arumeyi ookhaliherya. Pascal onihimya so: “Mahiku ala, ninninvekela Yehova, omuxonttela ni omuxukhurela mwaha wa miteko anivara aya arumeyi ookhaliherya a muloko ahu”. Moohaanyiherya, Yehova onniiwa ni onnaakhula mavekelo awo. Nto atthu ootheene a mmulokoni, anoottottela muraarelo nikhaliheryo naya. — 2aKor. 1:11.

AXITOKWEENE A MMULOKONI ‘ANNIVARA MUTEKO NI NTHITI’

8. Xeeni murummwa Paulo aalempe awe wiira axitokweene ‘annivara muteko ni nthiti’? (1 aTesaloonika 5:12, 13)

⁸ Okathi wa arummwa, axitokweene yaanivara muteko ni nthiti wiira akhaliheryeke muloko. (Mmusome 1 aTesaloonika 5:12, 13; 1Tim. 5:17) Awo, ‘yaanihoolela’ muloko, eyo piiyo, yaanihoolela mithukumano nave akhaliheriwaka ni axitokweene akina, yaanipaka soothanla. Nave ‘yaanaalopola’ anna ni arokora masi mwa enamuna yoophenta wiira akhapelele muloko. (1aTes. 2:11, 12; 2Tim. 4:2) Ohiya-vo, alopwana awo yaahaana ovara muteko wiira akhapelele emusi aya, ni yaahaana olipiha waataana waya ni Yehova. — 1Tim. 3:2, 4; Tito 1:6-9.

9. Itthu xeeni sikina axitokweene a mmulokoni olelo-va anivara aya?

⁹ Olelo-va, axitokweene a mmulokoni annaatteliwa miteko. Axitokweene awo annilaleya ihapari sooreera. (2Tim. 4:5) Awo anninivaha ntakiheryo nooloka na okhalela nthiti muteko woolaleerya. Nave annitthokiha muteko woolaleerya a muloko aya ni anniniixuttiha moota wookhala anamalaleerya ooloka. Nave-tho, axitokweene a mmulokoni anirumeela ntoko makhulupale a xariya ni oomoriwa ikharari. Okathi mutthu onipaka awe etampi yuulupale, axitokweene annimukhaliherya wiira otthikele okhalana waataana wooloka ni Yehova. Okathi omosa-ru, axitokweene annipaka sootheene aniwerya aya wiira muloko okhale woowaarya. (1aKor. 5:12, 13; aKal. 6:1) Axitokweene a mmulokoni, annisuweliwa okhala amakampusi. (1Ped. 5:1-3) Awo annilokiherya oratteene myaha saya sinikhuma mbiibiliyani. Nave awo anniimananiha wiira amusuwele khula mutthu a mmulokoni ni annaaxukurya anna ni arokora. Axitokweene akina, annikhaliherya edepartamento ya oteka ni olokiherya Ipa sa Omwene, anniirela mpantta ekomisau ya kongresu ni asembeleya, anniirela mpantta ekomisau enilavula ni mameetiku, anniirela mpantta ekurupu enaaxukurya aretta ni miritti sikina. Mweekeekhai, axitokweene a mmulokoni, annivara muteko munceene!

10. Xeeni ninreerela ahu ovaha efaita miteko sa axitokweene a mmulokoni?

¹⁰ Yehova, aahaaleiherya amakampusi wiira yaarowa okhapelelaka ipwittipwitthi sawe, yiira siiso, ipwittipwitthi iyo “khasinrowa wova, nnákhala ovelavela”. (Yer. 23:4) Eyo ti etthu aawehale awe murokora onikhala oFinlândia, oniitthaniwa Johanna, vaavo amamawe yahaareere aya owereiwa. Owo onihimya so: “Vaanikixankiha waaleela atthu akina mixankiho saka, masi mutokweene mmosa a muloko aka aahikiwiriyana moopixa murima, aahivekela ni miyo nave aahikooniherya moota Yehova onikiphenta awe. Miyo nkinuupuwela oratteene itthu mutokweene ole aalavunle awe, masi etthu enuupuwela aka, okhala wiira kaahiphwanya murettele. Kinnikupali wiira Yehova aahimuruma wiira okikhaliherye okathi kaapirisari aka”. Axitokweene a muloko anyu, yookhalihenryeni sai?

11. Ninrowa wooniherya sai oxukhurela miteko anivara aya axitokweene a mmulokoni?

¹¹ Yehova onnihakalala vanceene, okathi nnaaxukhurela ahu axitokweene a mmulokoni, “mwaha wa muteko onvaraya”. (1aTes. 5:12, 13) Henrietta, yoowo-tho onikhala oFinlândia, ohimmye so: “Axitokweene a mmulokoni, ari oolikana ene wiira anikhaliherya. Masi eyo khentaphulela wiira awo kharina mixankiho saya. Ikwaha sikina kinnimwaattamela mutokweene kinamuleela so: ‘Kooleelekeni etthu? Nyuwo mwa mutokweene ooreera murima nto muhiliyale eyo’”. Murokora mmosa onikhala oTurquia oniitthaniwa Sera, ohimmye so: “Axitokweene, anipirisari olipihiwa wiira ahihiye ovara miteko saya. Nnoowerya opaka eyo, naalepelaka ekarta enooniherya oxukhurela wahu, naalattulaka wiira nalye etthu hoothe aahiiso nikhumaka muteko woolaleerya naawo”. Mutokweene onivara muteko munceene wiira okhaliherye muloko, onnireerela oxukhureliwa. Munoonela sai ophavelasa inamuna wiira mooniherye wiira munnimuxukhurela? — 1aKor. 16:18.

AXITOKWEENE A ESIRKWIITU ANNILIPIHA MILOKO

12. Yesu aarumeela aani wiira alipihe miloko okathi wa arummwa? (1 aTesaloonika 2:7, 8)

¹² Alopwana akina Yesu aarumme awe ntoko “soovaha”, annikhaliherya miloko mwa inamuna sinceene. Axitokweene a oYerusalemu, yaahimuruma Paulo, Baarnaba ni alopwana akina wiira yaxukuryeke miloko. (Mit. 11:22) Awo yaarowa ovaraka muteko xeeni? Ntoko arumeyi ookhaliherya ni axitokweene a mmulokoni, axitokweene a esirkwiitu annilipiha miloko. (Mit. 15:40, 41) Alopwana awo, anniimananiha vanceene wiira amalelihe yoothanleliwa aya, nto eyo enihela muhina oleva okumi aya wiira awiixuttihe ni waalipiha anna ni arokora. — Mmusome 1 aTesaloonika 2:7, 8.

13. Miritti xeeni sikina axitokweene a esirkwiitu arina aya?

¹³ Axitokweene a esirkwiitu, khula okathi ahaana oviyaxari. Akina anniviyaxari ikiloomo sinceene wiira aphiye muloko mukina. Khula esumana, axitokweene a esirkwiitu annilavula myaha sinceene, annipaka muthukumano wa mapioneero, muthukumano wa axitokweene a mmuloko ni arumeyi ookhaliherya, ni annihoolela mithukumano sa muteko woolaleerya. Awo annilokiherya myaha ni annaalokiherya asembeleya ni akonkresu. Khula eyaakha, anniiriha eskola ya mapioneero ni annilokiherya muthukumano a vameekhaaya wa mapioneero a esirkwiitu anirumeela aya. Ohiya-vo, awo annikhapelela miteko sikina sa faita seiyo ikwaha sikina, sinivariwa moowaakuveya.

14. Xeeni ninhimya ahu wiira axitokweene a esirkwiitu mareeliho para miloko?

¹⁴ Xeeni ninhimya ahu wiira axitokweene a esirkwiitu soovaha para miloko? Munna mmosa onikhala oTurquia, olavulaka sa oxukurya anipaka aya axitokweene a esirkwiitu, ohimmye so: “Khula ekwaha mutokweene a esirkwiitu onixukurya awe muloko aka, kinnipaka ele eniwerya aka wiira kaakhaliherye anna ni arokora. Nkireere waasuwela axitokweene a esirkwiitu anceene masi nkitonko wuupuwela wiira awo khanivaaneleya aahiiso waatteliwa miteko”. Johanna yoowo nimulavunle ahu ittima sivinre, aahirowa olaleerya ni mutokweene a esirkwiitu masi awo khiyaawenrye olavula ni mutthu. Owo onihimya so: “Hata vari siiso kinniwerya wuupuwelela nihiku nle. Kaahinkheliwa vanceene ni axihima aka anli yaawo yaakhala muttetthe woorakamela. Mutokweene a esirkwiitu ole, aahikilipiha ni aahikooniherya wiira orakamelana iwe waari wa okathi vakhaani paahi. Olelo-va, pooti ohiweryaneyaka okhala vakhiviru ni amusi aahiiso apatthani masi elapo esya ninrowa okhalaka hoothe okathi wootheene”. Ala matakiheryo vakhaani paahi, anooniherya moota axitokweene a esirkwiitu, anaakhaliherya aya anna anaaxukurya aya. — Mit. 20:37–21:1.

15. a) Moovarihana ni 3 Yohani 5-8, ninrowa wooniherya sai waaxukhurela wahu axitokweene esirkwiitu? (Nwehe efootu.) b) Xeeni ninreerela ahu waaxukhurela axaara aya alopwana anirumeela mmulokoni, nave ninrowa opaka sai eyo? (Nwehe ekaaxa eni: “Mwaaxukhureleke Axaara Aya”.)

¹⁵ Murummwa Yohani, aahimutumererya Gaio wiira aahaana owaakhela anna yaarwa olipiha muloko ole. Owo aalempe so: “Mwaakhaliherye vaniwerya anyu, okathi onikhuma aya, ni mukhalelo onimusivela Muluku”. (Mmusome 3 Yohani 5-8.) Ankhi hiyo, ninrowa opaka sai eyo? Enamuna emosa, ori onvaha eyoolya mutokweene a esirkwiitu. Enamuna ekina ori orowa muteko woolaleerya esumana annixukurya aya. Leslie, yoowo nimulavunle ahu ittima sivinre, onnooniherya oxukhurela wawe muteko anivara aya axitokweene a esirkwiitu mwa inamuna sinceene. Owo onihimya so: “Kinninvekela Yehova wiira aavahe itthu anipirisari aya. Miyo ni iyaka, ninnaalepela ikarta axitokweene a isirkwiitu naaxukhurelaka ni naaleelaka moota anikhalihenrye aya”. Muhiliyale wiira axitokweene a esirkwiitu, annikhalana mixankiho ni annikhulumuwa ntoko hiyo. Ikwaha sikina, sinnaaphwanya oretta, annixankiheya ni annikhulumuwa. Yehova pooti onirumeela wiira aakhule mavekelo a axitokweene a esirkwiitu, ni moolumo ahu ooreera aahiiso naavahaka etthu! — Mir. 12:25.

NINNAAPIRISARI ALOPWANA WIIRA AKHALE “SOOVAHA”

16. Moovarihana ni Miruku 3:27, makoho xeeni khula munna onireerela awe wiikoha?

¹⁶ Olumwenku wootheene, ninnapirisari anna wiira akhale “soovaha”. Akhala wiira mwa munna oopatisiwa, niireke muri oolikana ene waakhaliherya atthu akina “anireerela okhaliheriwa”? (Musome Miruku 3:27.) Niireke munniimananiha wiira mukhale murumeyi ookhaliherya? Akhala wiira mwa murumeyi ookhaliherya, niireke munniimananiha wiira mukhale mutokweene nvaraka muteko mwaakhaliheryaka anna ni arokora?c Niireke munnipaka marukunuxo mweekumini mwanyu wiira mphwanelele orowela Eskola ya Anamalaleerya a Omwene? Eskola eyo, enoowiixuttihani ni wookhaliheryani wiira nvikaniheke orumeeliwa ni Yesu. Akhala wiira munuupuwela wiira khivaniweryaneya ophwanya iparakha iyo, mmuleeleke Yehova. Munvekeleke Yehova wiira oovaheeni munepa awe woowaarya ni ookhaliheryeni omaleliha khula yoothanleliwa munrowa anyu waakhela. — Luka 11:13; Mit. 20:28.

17. Anna yaawo ari “soovaha” anooniherya exeeni wa Mwene ahu, Yesu Kristu?

¹⁷ Mwaha wa Yesu waarumeelaka anna yaawo ari “soovaha”, eyo enooniherya wiira owo khonihiya onikhapelela mahiku ala ookiserya. (Math. 28:20) Ninnimuxukhurela vanceene Mwene ahu yoowo ori oophenta, oovaha ni onisuwela itthu nimpirisari ahu, nuumala-vo, onanivaha anna wiira anikhaliheryeke. Okathi nnuupuwela ahu eyo, ninnitepa oxukhurela. Tivonto, mphavelaseke inamuna sa owooniherya waaxukhurela wanyu anna awo aniimananiha vanceene. Muhiliyale omuxukhurela Yehova mwaha wa “soovaha sotheene sooreera ni soomalela” onnivaha awe. — Yak. 1:17.