‘Nwiitthane Axitokweene’

1. Yehova onooniherya sai wiira onnaavaha efaita arumeyi awe?

YEHOVA, onnaaphenta atthu ootheene animurumeela ni onnaakhapelela, ntoko siisaale makampusi onikhapelela awe ipwittipwitthi sawe. Yehova oovaha mukuttho wa mwanawe wiira owoopole atthu ni ohaathanla axitokweene a mmulokoni wiira yaakhapeleleke. (Mit. 20:28) Muluku, oniphavela wiira axitokweene yaathokoreryeke mooreerela murima arumeyi awe. Yehova oomuthanla Kristu wiira okhale muhooleli a muloko. Nave oniphavela wiira axitokweene, atthareke malakiheryo a Yesu wiira yaalipiheke anna ni arokora ni yaakhaliheryeke ohihiya olipiha omwaamini waya Yehova. — Yes. 32:​1, 2.

2. Tani Yehova onitepexa awe waakhaliherya? (Ezekiyeli 34:​15, 16)

² Yehova onnaathokorerya ni onnaakhapelela arumeyi awe ootheene, masi otepexa wene, ale sinaaphwanya mixankiho. Atthu akina annihaawa mwaha wa opaka etampi. Nto Yehova onnaaruma axitokweene wiira yaakhaliheryeke. (Mmusome Ezekiyeli 34:​15, 16.) Masi Yehova oniphavela onikhaliherya ootheene ahu okathi nimpirisari ahu. Yehova khoniphavela paahi wiira ninvekeleke nikhaliheryo, masi-tho oniphavela wiira naavekeleke nikhaliheryo “amakampusi ni alipa-oowiixuttiha” a mmulokoni, okathi nimpirisari ahu. — aEef. 4:​11, 12.

3. Ninrowa ottottela sai mureerelo osuwela muteko wa axitokweene?

³ Mwaha ola, ninrowa oweha moota Yehova onaaruma awe axitokweene wiira yaakhaliheryeke, atthu yaale omwaamini waya Yehova ovukuwale. Nave ninrowa waakhula makoho ala: Okathi xeeni ninreerela ahu owiitthana axitokweene wiira anikhaliherye? Xeeni ninreerela ahu opaka eyo? Axitokweene annikhaliherya sai? Pooti wiira waataana wahu ni Yehova, ti woolipa ni khanimpirisari okhaliheriwa ni axitokweene. Hata vari siiso, mwaha ola ninrowa wuncererya oxukhurela wahu, okhala wiira Yehova oonivaha axitokweene ni onoonikhaliherya osuwela etthu nikhanle ahu oopaka naaphavelaka okhaliheriwa.

OKATHI XEENI NIMPIRISARI AHU ‘OWIITTHANA AXITOKWEENE’?

4. Ninsuwela sai wiira Yakobo 5:​14-16, 19, 20, onimulavula mutthu yoole ovukuwale waataana wawe ni Yehova? (Nwehe ifootu.)

⁴ Mwiixutti Yakobo, aahitthokiherya moota Yehova onaaruma awe axitokweene wiira anikhaliherye. Yakobo aalempe so: “Niireke ookhala mutthu oniwereiwa? Owiitthane axitokweene a mmulokoni”. (Mmusome Yakobo 5:​14-16, 19, 20.) Moolumo ala, Yakobo aamuhimya mutthu yoole ovukuwale waataana wawe ni Yehova. Mwa ntakiheryo, moone wiira iversiikulu iya, Yakobo onihimya wiira mutthu oniwereiwa ohaana owiitthana axitokweene a mmulokoni wiira amukhaliherye, ohiya omwiitthana meetiku. Nave-tho, Yakobo onitthokiherya wiira mutthu yoole opanke itthu soohiloka, onooleveleliwa itampi sawe. Aaphavelaka okhala saana, mutthu oniwereiwa ohaana orowa okumana ni meetiku ni omuleela etthu eninwereya. Mutthu owo, ohaana otthara malakiheryo a meetiku. Mwa enamuna emosa-ru, wiira nitthikele olipiha waataana wahu ni Yehova, nihaana orowa olavula ni axitokweene ni waaleela muxankiho ahu. Nuumala-vo, nihaana otthara malakiheryo annivaha aya, yaawo anikhuma mbiibiliyani.

5. Ninrowa osuwela sai wiira waataana wahu ni Yehova woovukuwa?

⁵ Malakiheryo ari Yakobo ekapiitulu 5, annitumererya orowa olavula ni axitokweene noona wiira waataana wahu ni Yehova onnivukuwa. Veekeekhai, ti vamiruku okhaliheriwa ni axitokweene nihinatthi ohonona waataana wahu ni Muluku! Nihiiwokeke nuupuwelaka wiira nookhalana waataana wooloka ni Yehova, variki nihirina. (Yak. 1:22) Eyo yaahiiraneya ni makristau makina a muloko wa oSardi. Masi Yesu aahaaleela wiira awo khiyaamusiveliha Yehova. (Wis. 3:​1, 2) Ninrowa osuwela sai vakhala wiira nookhalana waataana wooloka ni Yehova? Enamuna emosa, ori olikanyiha moota waataana wahu waari aya okathi naapatisiwe ahu niinaano, ni moota ori aya nenna-va. (Wis. 2:​4, 5) Nihaana wiikoha so: ‘Kiireke vannikisivela omusoma Biibiliya ni wuupuwelela ntoko vaakisivela aya khalai? Kiireke kinnilokiherya ni kinnirowela mithukumano sootheene? Kiireke kinnikhalela nthiti muteko woolaleerya? Kiireke kinivaha efaita vanceene musurukhu, ovikana itthu sikina?’ Vakhala wiira nookhala nikoho munaakhula anyu wiira nnaari, eyo enooniherya wiira waataana wanyu ni Yehova khokhanle saana. Akhala wiira khanniwerya olipiha waataana wahu ni Yehova aahiiso noopaka etthu ehinivarihana ni malakiheryo a Muluku, nihaana owiitthana axitokweene wiira anikhaliherye.

6. Etthu xeeni akhanle aya oopaka atthu ale apanke itampi suulupale?

⁶ Vakhala wiira mutthu oopaka etampi yuulupale, yeeyo yaarowa omwiiriha okumihiwa mmulokoni, ohaana orowa olavula ni mutokweene. (1aKor. 5:​11-13) Mutthu opanke etampi yuulupale, ohaana okhaliheriwa wiira otthikele okhalana waataana wooloka ni Yehova. Muluku onoomulevelela mutthu opanke etampi yuulupale, orumeelaka mukuttho wa Yesu, vakhala wiira mutthu owo ‘onoovara miteko sinooniherya orukunuxa wawe’ murima. (Mit. 26:20) Enamuna emosa okhanle awe oopaka eyo, ori waaleela axitokweene vakhala wiira oopaka etampi yuulupale.

7. Atthu xeeni akina anipirisari okhaliheriwa ni axitokweene?

⁷ Axitokweene khahiyo paahi anaakhaliherya ale apanke etampi yuulupale, masi-tho annaakhaliherya ale waataana waya ni Yehova ovukuwale. (Mit. 20:35) Mwa ntakiheryo, nyuwo pooti woonaka wiira khamuniwerya okhootta soophavela soohiloka. Pooti otepa wooxankihani okhootta soophavela soohiloka, vakhala wiira muhinatthi wiixutta ekeekhai mwaanihapaliwa, mwaaniweha epornokrafia ni orupihana woohiloka. Nto muhiwananeke mixankiho iyo mekhinyu, nvekeleke okhaliheriwa. Nyuwo pooti omutthokiherya muxankiho anyu, mutokweene munimuroromela anyu. Mutokweene owo, onimoovahani malakiheryo anrowa wookhaliheryani owanana soophavela soohiloka. Nave, onrowa owuupuxeryani wiira munoowerya omusiveliha Yehova ni okhootta soophavela soohiloka. (Mus. 4:12) Woonasa wene, nyuwo pooti oriipiwaka murima mwaha woowi nlelo munnipaka itthu soohiloka. Masi axitokweene anoowuupuxeryani wiira Yehova onnaareeliha ale anninvekela nikhaliheryo. Nave anoohimya wiira mwa mutthu oowiiyeviha ni munniphavela omuhakalaliha Yehova. — 1aKor. 10:12.

8. Niireke nihaana waaleela axitokweene khula efaalya yaamukhaani nimpaka ahu?

⁸ Hiyo khanimpirisari waaleela axitokweene khula etthu yaamukhaani ninfalyari ahu. Mwa ntakiheryo, pooti wiira nihiku nlo, mwaahilavula etthu yanwereyale munna wala murokora aahiiso mwaahinanariwa. Nto eyo yiiraneya, khonipirisari orowa olavula ni axitokweene. Nyuwo muhaana otthara malakiheryo a Yesu a okhaliha murettele ni munninyu aahiiso murokora owo. (Math. 5:​23, 24) Nave muhaana osoma iliivuru sahu sinimutthokiherya Biibiliya wiira mwiixutte okhala oomaala, oopixa murima ni oowiihiiha. Masi moona wiira munnipirisari okhaliheriwa, pooti othanla orowa olavula ni axitokweene wiira yookhaliheryeni. Ekarta aalepenle awe afilipi, murummwa Paulo aahoona wiira Evodia ni Sintikhe, khiyaawerya ophuka muxankiho aya, nto aahaavekela anna wiira yaakhaliherye. Mwa enamuna emosa-ru, axitokweene a muloko anyu, pooti wookhaliheryani ophuka muxankiho anyu. — aFil. 4:​2, 3.

XEENI NINREERELA AHU OWIITTHANA AXITOKWEENE?

9. Hata noovelelaka, xeeni vari aya vooloka waavekela nikhaliheryo axitokweene? (Miruku 28:13)

⁹ Okathi nimpaka ahu etampi yuulupale aahiiso vannixankiha aya owanana soophavela soohiloka, nimpirisari olipa murima ni okhalana waamini wiira naaleele axitokweene. Nihuuleliweke muru aahiiso nihooveleleke waavekela nikhaliheryo axitokweene. Mwaha wa xeeni? Mwaha woowi, Yehova oonivaha axitokweene wiira anikhaliheryeke olipiha waataana wahu ni yena. Nto, vaavo ninvaanela ahu ni axitokweene ninnooniherya wiira ninnimuroromela Yehova ni ninnimwiiwelela. Nave, ninnoona wiira nihaana okhaliheriwa ni atthu akina wiira nipakeke itthu sooloka. (Esal. 94:18) Akhala wiira noopaka etampi, nikupaliki wiira Yehova onoonilevelela vakhala wiira ninrowa waaleela axitokweene ni ohiya opaka etampi eyo. — Musome Miruku 28:13.

10. Exeeni enrowa wiiraneya vakhala wiira khinnaaleela axitokweene itampi sahu?

¹⁰ Vakhala wiira ninrowa waaleela axitokweene itampi sahu, Yehova onoonilevelela, nave nnootthikela okhalana waataana wooloka ni yena. Masi naahaaleele axitokweene, itampi iyo sinaamunihaaxa. Mwa ntakiheryo, waahikhala okathi mwene Davidi aapanke awe itampi, masi ohinaphavela waalela atthu akina. Mwaha woopaka eyo, owo aanisuwela wiira aahihonona waataana wawe ni Yehova. (Esal. 32:​3-5) Vakhala wiira mutthu onniwereiwa aahiiso onnivulala, ohinaphavela orowa wa meetiku, oretta awe pooti omutepelaka. Mwa enamuna emosa-ru, akhala wiira noopaka etampi nihinaphavela ohimya, waataana wahu ni Yehova, onrowa otepaka ohononeya. Yehova onnisuwela eyo, tivonto onnilattula awe oriki: “Haya, rwakani, nivaneleke”. Nto onnipaka eyo, aarumaka axitokweene wiira anikhaliherye olipiha waataana wahu ni yena. — Yes. 1:​5, 6, 18.

11. Atthu akina anrowa waafetareya sai, vakhala wiira khinnaaleela axitokweene etampi nipanke ahu?

¹¹ Vakhala wiira nnoovitha itampi sahu, nnimwaakumiherya mixankiho atthu akina. Nnimwiiriha ikuru soowaarya sa Muluku ohivara saana muteko aya mmulokoni, nave ninrowa ohonona murettele anna ni arokora arina aya. (aEef. 4:30) Nave akhala wiira nonweha mutthu opanke etampi yuulupale, nihaana omutumererya wiira aaleele axitokweene etampi awe.a Akhala wiira khonipaka eyo, nihaana waaleela axitokweene, okhala wiira naahiire siiso, nnookhalana nthowa mwaha wa etampi opanke awe. (Onam. 5:1) Okhala wiira ninnimphenta Yehova, eyo enooniiriha orowa waaleela axitokweene itthu sootheene siiraneyale. Napaka eyo, ninrowa waakhapelela anna ni arokora a mmulokoni. Nave ninrowa omukhaliherya mutthu owo opanke etampi, otthikela okhalana waataana wooloka ni Yehova.

AXITOKWEENE ANROWA OMUKHALIHERYA SAI?

12. Axitokweene anaakhaliherya sai ale apanke etampi?

¹² Biibiliya onnaavaha malakiheryo axitokweene wiira ahaana waakhaliherya ale apanke itampi, otthikela okhalana waataana wooloka ni Yehova. (1aTes. 5:14) Vakhala wiira moopaka etampi, axitokweene animookohani itthu vakhaani wiira asuwele moonelo anyu voohimya sa etampi mpanke anyu. (Mir. 20:5) Ekeekhai wiira khivanikhweya nyuwo orowa ovaanela ni axitokweene, woonasa wene, mwaha woowi munnuuliwa muru waaleela etthu mpanke anyu. Masi munimwaakhaliherya vakhala wiira munimwaaleela moota itthu sootheene siiraneyale aya. Tivonto, muhooveleleke muupuwelaka wiira munrowa olavula ‘mulumo a ololo’. (Yoobi 6:3) Axitokweene khanrowa woophukelani moowaakuveya mwaha wa etthu muhimyale anyu. Nto, awo animoowiriyanani ni ephoole wiira asuwele itthu sootheene ahinatthi woovahani miruku sa mbiibiliyani. (Mir. 18:13) Axitokweene, annisuwela wiira onipirisari ovira okathi wiira amukhaliherye mutthu. Nave annisuwela wiira, ahaana ovaanela ni nyuwo ikwaha sinceene wiira awerye wookhaliheryani.

13. Okathi axitokweene anivekela aya ni hiyo ni annivaha aya malakiheryo a mbiibiliyani, enrowa onikhaliherya sai? (Nwehe ifootu.)

¹³ Okathi munaaleela anyu axitokweene, khaniphavela owiirihani otepa wiivaha nthowa mwaha wa etthu mpanke anyu. Ohiya-vo, awo anoovekela hoothe ni nyuwo. Yehova onoowiriyana mavekelo aya okhala wiira “aakhalana owerya wuulupale”. Nto munookhalana ikuru, munoolipa ni munoomaaleleya ovikana moota muupuwela anyu. Okathi mutthu oniwiihana awe axitokweene, awo anoomukhaliherya ‘amuttikitthelaka makhura mwa nsina na Yehova’. (Yak. 5:​14-16) “Makhura” anihimmwa-va, ti ekeekhai eri Nuulumo na Muluku. Okhala wiira annimurumeela Biibiliya, axitokweene pooti woolipihani ni woomaalihani, yookhaliheryakani otthikela okhalana waataana wooloka ni Yehova. (Yes. 57:18) Malakiheryo a mbiibiliyani anrowa aya woovahani, animookhaliheryani ohihiya opaka ele Yehova oniphavela awe. Okhuma vaavo orowa ohoolo, munrowa wiiwaka nsu na Yehova nooleelakani wiira: “Ephiro yorera t’ila: mutthareke yela”. — Yes. 30:21.

14. Moovarihana ni aKalaasia 6:​1, axitokweene animukhaliherya sai mutthu oneetta “ephiro yootakhala”? (Nwehe ifootu.)

¹⁴ Mmusome aKalaasia 6:1. Mukristau yoole oneetta “ephiro yootakhala”, onnooniherya wiira khonipaka etthu Yehova oniphavela awe. Vaahimmwaka wiira ephiro yootakhala, enooniherya wiira mutthu owo oopaka yoothanla yoohiloka, aahiiso oopaka etampi. Okhala wiira axitokweene annaaphenta anna ni arokora, awo anneererya ‘omuttikiherya ephiro yooreera’. Masi annipaka eyo, amureerelaka murima. Nuulumo na ekereku noowi ‘omuttikiherya’, naanirumeeliwa ophavelaka ohimmwa meetiku onookolola nikhuva wiira ottikiherye moota naari aya. Okathi onittikiherya awe nikhuva nlo, meetiku ooloka, onnipaka eyo ni ephoole wiira mutthu owo ohitepeke woona owereya. Mwa enamuna emosa-ru, okathi axitokweene aneererya aya omukhaliherya mutthu oneetta ephiro yootakhala, annipaka eyo amureerelaka murima, wiira mutthu owo ohitepe-tho oriipiwa murima. Nave anniimananiha onvaha miruku mwa enamuna yooloka. Biibiliya onnaaleela axitokweene wiira ahaana ‘wiipasoopa’. Okathi axitokweene animukhaliherya aya mutthu wiira eetteleke miruku sa mbiibiliyani, annuupuwela wiira nave awo annifalyari. Okathi animukhaliherya aya, axitokweene khaniimananiha wooniherya wiira awo toolokexa ni tootepexa okhala a xariya, onvikana mutthu owo. Ohiya-vo, awo annikhala oowiiyeviha ni annimoonela othunku mutthu owo. — 1Ped. 3:8.

15. Exeeni nikhanle ahu oopaka nakhalana muxankiho?

¹⁵ Nihaana waaroromela axitokweene a mmulokoni. Yehova onnaaleela axitokweene wiira ahaaleeleke atthu akina isiiri sahu. Nave axitokweene ahiixutta wiira ahaana onivaha miruku sinikhuma mbiibiliyani, ohiya onileela itthu anoona aya okhala sooloka. Nave-tho, ahiixutta wiira ahaana ohihiya onikhaliherya owanana mixankiho sahu. (Mir. 11:13; aKal. 6:2) Axitokweene aakhalana mikhalelo ni soowiiraneya soovirikana. Masi okathi ninkhalana ahu mixankiho, hiyo pooti omuleela mutokweene nnoona ahu okhweya olavulana. Masi khanimpirisari olavula ni khula mutokweene nimwaavyaka ole onrowa onileela itthu nimphavela ahu. Akhala wiira nnoopaka eyo, ninrowa olikanaka ni atthu ale “anrowa owaavyaka alipa-oowiixuttiha wira aleeliweke itthu aniphavela aya wiiwa”, ohiya ophavela “soowiixuttiha sooreera” sa Nuulumo na Muluku. (2Tim. 4:3) Akhala wiira nnoomuleela mutokweene muxankiho ahu, owo pooti onikoha akhala wiira nihaaleela axitokweene akina ni miruku xeeni anivahale aya. Okhala wiira mutokweene owo toowiiyeviha, pooti wiira onimwaavekela miruku axitokweene akina. — Mir. 13:10.

ETTHU NIKHANLE AHU OOPAKA

16. Etthu xeeni nikhanle ahu oopaka?

¹⁶ Axitokweene anninivaha malakiheryo ni anninikhaliherya okathi ninkhalana ahu muxankiho, masi awo khanrowa onileela etthu yoopaka. Khula nihiku, itthu ninlavula ahu ni nimpaka ahu, nihaana omooniherya Yehova wiira ninnimphenta ni nimphavela omuhakalaliha. Nikhaliheriwaka ni Yehova, nnoowerya opaka soothanla mwa miruku ni ohihiya ororomeleya. (aRom. 14:12) Tivonto, axitokweene ahinrowa aya onileela etthu yoopaka, masi anrowa omurumeela Biibiliya wiira anikhaliherye osuwela moonelo wa Yehova voohimya sa mwaha owo. Masi hiyo nirina muritti wa opaka yoothanla. Akhala wiira nnootthara malakiheryo a mbiibiliyani, nnoowerya “orumeela saana muupuwelo” ahu, wiira nipake soothanla sooloka. — aHep. 5:14.

17. Yehova oniphavela wiira nipakeke exeeni?

¹⁷ Ninnimuxukhurela Yehova, mwaha wa onikhapelelaka moophenta, ntoko makampusi onikhapelela awe ipwittipwitthi sawe! Yehova oomuruma Yesu, yoowo ori “makampusi ooreera murima”, wiira ovahe mukuttho ni nikhalane eparakha ya ophwanya okumi woohimala. (Yoh. 10:11) Nave Yehova oonivaha axitokweene wiira anikhapeleleke mmulokoni, ntoko oleihenrye awe oriki: “Kinimwathanla amakampusi anyu anasuwelaka okìwelela: yawo antthuna owettihani n’ankhili n’ujaliha”. (Yer. 3:15) Tivonto, akhala wiira waamini wahu onnivukuwa ni nimphavela okhalana waataana wooloka ni Yehova, nihooveleleke waavekela axitokweene wiira anikhaliherye. Muttotteleke mureerelo mareheryo awo Yehova onivahale awe, aarumeelaka axitokweene a mmulokoni.