Ninrowa Waaphenta Sai ni Waamorela Ikharari Ale Anittheka?

1. Exeeni eniiraneya nuumala mutthu opaka etampi yuulupale?

MWAHA ovinre, nooweha etthu murummwa Paulo aalenle awe makristau a oKorinto, nuumala mulopwana mmosa opaka etampi yuulupale. Okhala wiira mutthu ole khaarukununxe murima awe, nto aahaana okumihiwa mmulokoni. Masi ntoko enooniherya aya yoolepa ya mwaha ola, atthu akina apanke etampi yuulupale vanniweryaneya okhaliheriwa wiira arukunuxe murima. (aRom. 2:4) Axitokweene anrowa omukhaliherya sai mutthu otthenke orukunuxa murima?

2-3. Exeeni nikhanle ahu oopaka vakhala wiira munnihu oopaka etampi yuulupale? Mwaha wa xeeni?

² Axitokweene yaahisuwele wiira mutthu oopaka etampi yuulupale, awo khanrowa owerya omukhaliherya. Exeeni nikhanle ahu oopaka akhala wiira noosuwela wiira mukristau mukhwiihu oopaka etampi yuulupale, yeeyo yaakhanle oomwiiriha okumihiwa mmulokoni? Opacerya wene, nihaana omutumererya munna owo wala murokora owo orowa olavula ni axitokweene wiira okhaliheriwe. — Yes. 1:18; Mit. 20:28; 1 Ped. 5:2.

³ Ankhi mutthu owo akhootta orowa olavula ni axitokweene? Hiyo nnoorowa olavula ni axitokweene wiira mutthu owo akhaliheriwe. Ti vookhalela wiira siiso, maana khanimphavela omperteri munnihu wala murokorihu. Mutthu owo aahihiye mweettelo awe woonanara, onoohonona ompatthani awe ni Yehova. Nave-tho, owo pooti onanariha nsina na muloko. Nto hiyo nnoopaka etthu okhala wiira ninnimphenta Yehova, nave ninnimphenta mutthu owo. — Esal. 27:14.

MOOTA AXITOKWEENE ANAAKHALIHERYA AYA ALE ANIPAKA ITAMPI SUULUPALE

4. Yoolakela ya axitokweene tiivi okathi anithukumana aya ni mutthu opanke etampi?

⁴ Okathi mutthu mmulokoni onipaka awe etampi yuulupale, nikhuuru na axitokweene ninnaathanla axitokweene araru, wiira yiirele mpantta ekomisau.a Anna awo aahaana okhala oowiiyeviha ni omuroromela Yehova. Awo annisuwela wiira hata yeereryaka omukhaliherya mutthu owo orukunuxa murima, khakhanle oomukhanyererya opaka eyo. (Otum. 30:19) Axitokweene annisuwela wiira khahiyo atthu ootheene anipaka etampi, anrowa orukunuxa murima ntoko iirale awe Mwene Davidi. (2 Sam. 12:13) Atthu akina anittheka annikhootta wiiwelela miruku sinikhuma wa Yehova. (Maph. 4:6-8) Masi etthu axitokweene aniphavela aya, ori omukhaliherya mutthu owo orukunuxa murima. Malakiheryo xeeni axitokweene anitthara aya okathi anikumana aya ni mutthu owo opanke etampi?

5. Axitokweene akhaleke sai okathi anithukumana aya ni mutthu opanke etampi? (2 Timootheyo 2:24-26) (Nwehe eteseenyo.)

⁵ Axitokweene annisuwela wiira mutthu ole opanke etampi onlikana ni epwittipwitthi erimenle, nave nlelo ookhalana efaita vamaithoni va Yehova. (Luka 15:4, 6) Okathi axitokweene anithukumana aya ni mutthu owo, khanimpwapwela aahiiso ohimuthokorerya saana. Nave khanuupuwela wiira muteko aya omukoha makoho paahi ni ophavela osuwela itthu siiraneyale. Masi awo animooniherya mikhalelo siniromoliwa 2 Timootheyo 2:24-26. (Mmusome.) Axitokweene khaninanariwa, nave annimureerela murima, okhala wiira aniphavela omukhaliherya oturuka muupuwelo awe.

6. Axitokweene anilokiherya sai murima aya ahinatthi othukumana ni mutthu opanke etampi? (aRoma 2:4)

⁶ Axitokweene annilokiherya murima aya. Awo anniimananiha omutakiha Yehova moota onaathokorerya awe ale anipaka etampi. Annuupuwela moolumo a Paulo ani: “Muluku onnooreerelani murima ookhaliheryakani wira muttharuwe”. (Mmusome aRoma 2:4.) Axitokweene ari ntoko amakampusi. Awo ahaana otthara malakiheryo a Kristu ni omutakiha yena, okathi anikhapelela aya muloko. (Yes. 11:3, 4; Math. 18:18-20) Ekomisau ya axitokweene ehinatthi othukumana ni mutthu owo, enninvekela Yehova wiira ewerye omukhaliherya mutthu owo orukunuxa murima awe. Nuumala-vo, awo anootokosa mbiibiliyani ni iliivuru sahu. Nuumala-vo, anonvekela Yehova wiira aakhaliherye omusuwela saana mutthu owo ni osuwela makhalelo awe. Awo anoophavela osuwela etthu emwiirinhe mutthu ole wuupuwela siisaale ni opaka etthu opanke awe. — Mir. 20:5.

7-8. Axitokweene anrowa otakiha sai opixa murima wa Yehova okathi anithukumana aya ni mutthu opanke etampi?

⁷ Axitokweene annitakiha opixa murima wa Yehova. Awo annuupuwelela moota Yehova aathokorenrye awe atthu yaapanke etampi khalai. Mwa ntakiheryo, Yehova aahimpixerya murima Kayini. Aahimuleela etthu yaarowa omwiiraneela vakhala wiira khaarowa oturuka murima awe. Nave aahimuleela wiira ammureeliha vakhala wiira ammwiiwelela. (Maph. 4:6, 7) Yehova aahimuruma profeta Natani orowa onvaha miruku Davidi. Natani aahirumeela nlikanyiho wiira omukhaliherye Davidi orukunuxa murima awe. (2 Sam. 12:1-7) Nave “khula okathi vohihiyererya”, Yehova aanaaroihela maprofeta awe, atthu a nloko na Isarayeli, yaawo yahaamwiiwelela. (Yer. 7:24, 25) Yehova khaalipelenle wiira atthu awo apacerye ottharuwa, nuumala-vo aakhaliheryeke. Ohiya-vo, Yehova aahaatumererya atthu awo orukunuxa murima aya nnaamwi nlelo yaapaka itthu sootakhala.

⁸ Axitokweene annitthara ntakiheryo na Yehova, okathi aneererya aya waakhaliherya ale anipaka itampi suulupale. Ntoko onihimya awe 2 Timootheyo 4:2, awo annilavula ni mutthu ole opanke etampi, ‘ampixeryaka murima vanceene’. Nto okathi wootheene, mutokweene ohaana okhala oomaaleleya ni oopixa murima, wiira omukhaliherye mutthu ole otthenke, opaka etthu yooloka. Akhala wiira mutokweene onoonanariwa ni onyoonyiheya, mutthu owo pooti ohiwiriyanaka miruku sawe aahiiso okhootta orukunuxa murima awe.

9-10. Moota xeeni axitokweene anrowa omukhaliherya mutthu opanke etampi wuupuwelela etthu opanke awe?

⁹ Axitokweene anneererya osuwela etthu emwiirinhe mutthu ole opaka etampi. Niireke waataana wa mutthu owo ni Yehova waanivukuwa, mwaha wa ohimusoma Biibiliya ni ohilaleerya? Niireke mutthu owo oohiya onvekela Yehova okathi wootheene? Niireke eyo yaahimwiiriha ohiya owanana soophavela sawe soohiloka? Apatthani awe taani, nave matthekulelo awe taavi? Itthu onithanla awe sinimwiiriha wuupuwelela exeeni ni ophavela opaka exeeni? Niireke onnisuwela moota Tiithi awe Yehova, onoonela awe etthu opanke awe?

¹⁰ Axitokweene pooti omukoha mutthu owo, makoho anrowa omukhaliherya wuupuwelela itthu siirinhe ompatthani awe ni Yehova ovukuwa ni simwiirinhe opaka etampi. Awo aahaana opaka eyo amureerelaka murima ni ahimukohaka itthu sa mookumini mwawe ahinreerela aya osuwela. (Mir. 20:5) Awo pooti orumeela malikanyiho wiira amukhaliherye mutthu owo woona wiira etthu opanke awe ti yoohiloka, ntoko siisale Natani iirale awe ni Davidi. Pooti wiira muthukumano woopacerya mutthu owo pooti oriipiwa murima, mwaha wa mweettelo awe ni etthu opanke awe. Nave pooti wiira mutthu owo onoorukunuxa murima okathi ene yoowo.

11. Yesu aatthokorerya sai anatampi?

¹¹ Axitokweene anniimananiha omutakiha Yesu. Yesu aahimukhaliherya Saulo a oTarso, omukohaka so: “Saulo, Saulo, xeeni munikilupattha anyu?” Siiso, Yesu aahimukhaliherya Saulo, woona wiira etthu yaapaka awe khiyaalonke. (Mit. 9:3-6) Omuhimyaka “muthiyana Yezabeli”, Yesu aahimmye wiira: “Miyo kaahinvaha okathi muthiyana owo wira orukunuxe murima awe”. — Wiis. 2:20, 21.

12-13. Moota xeeni axitokweene anrowa onvaha okathi mutthu opanke etampi wiira orukunuxe murima? (Nwehe efootu.)

¹² Axitokweene annimutakiha Yesu, ahaakuvelaka wuupuwela wiira mutthu owo khoniphavela oturuka muupuwelo awe ni mweettelo awe. Atthu akina pooti orukunuxa murima ekwaha yoopacerya anithukumana aya ni axitokweene. Masi atthu akina annipirisari okathi munceene. Tivonto axitokweene pooti opirisariki othukumana ni mutthu owo ikwaha sikina. Woonasa wene, nuumala othukumana ekwaha yoopacerya, mukristau owo pooti wuupuwelela oratteene etthu oleeliwa awe, nto eyo pooti omwiirihaka wooniherya wiiyeviha ni onvekela Yehova wiira omulevelele etampi awe. (Esal. 32:5; 38:18) Siiso, ekwaha ya nenli anrowa aya othukumana, mutthu owo pooti wooniheryaka otepa oriipiwa murima ovikana ekwaha yoopacerya.

¹³ Axitokweene annooniherya othunku ni oreera murima wiira amukhaliherye mutthu owo opanke etampi orukunuxa murima. Awo annivekela Yehova wiira aareelihe wiimananiha waya ni annilipelela wiira munnaya ole onimoona wiira oopaka etthu yoohiloka ni onoorukunuxa murima. — 2 Tim. 2:25, 26.

14. Ti pani oniphwanela ottottopeliwa nuumala mutthu opanke etampi orukunuxa murima? Nave mwaha wa xeeni?

¹⁴ Okathi mutthu opanke etampi yuulupale onirukunuxa awe murima, hiyo ninnihakalala! (Luka 15:7, 10) Nnaamwi axitokweene yiimananihaka omukhaliherya mutthu owo orukunuxa mweettelo awe, ti pani tthiri onimwiiriha mutthu owo orukunuxa murima? Aahimyaka ale anipaka etampi yuulupale, Paulo olempe wiira: “Woonasa wene, Muluku onoowiiriha orukunuxa murima”. (2 Tim. 2:25) Yehova tonimukhaliherya mukristau oturuka muupuwelo awe ni moonelo awe. Pinaatamu khoniwerya opaka eyo. Paulo onnitthokiherya itthu sooreera siniiraneya, nuumala mutthu orukunuxa murima. Mutthu owo onnisuwela oratteene ekeekhai, onnirukunuxa mweettelo awe ni onoowerya osyaka miraakho sa Satana. — 2 Tim. 2:26.

15. Axitokweene anrowa omukhaliheryaka sai mutthu orukununxe murima nuumala opaka etampi?

¹⁵ Okathi mutthu onirukunuxa awe murima, axitokweene khanirowa ohiya omuxukurya wiira amukhaliherye olipiha waamini wawe. Nave-tho anoomukhaliherya wiira okhootteke sooweha sa Satana ni ovareke itthu sooreera. (aHeeb. 12:12, 13) Axitokweene khanirowa waaleela atthu akina itthu sootheene mutthu owo opanke awe. Masi itthu xeeni woonasa wene, sinireerela osuwelihiwa muloko?

“MWAAPWAPWELEKE OHOOLO WA ATTHU OTHEENE”

16. Ti pani anihimmwa okhala “atthu otheene” yaawo murummwa Paulo aaromonle awe 1 Timootheyo 5:20?

¹⁶ Mmusome 1 Timootheyo 5:20. Paulo aahimuleela Timootheyo, yoowo-tho aari mutokweene, wiira aapwapweleke “ohoolo wa atthu otheene” ale anipaka etampi. Niireke murummwa Paulo aaphavela ohimya wiira mutthu owo opanke etampi aahaana ottaruxiwa ohoolo wa atthu ootheene a mmulokoni? Nnaari, khahiyo siiso! Ohiya-vo, owo aaphavela waahimya atthu yaale vakhaani anisuwela etampi mutthu owo opanke awe. Atthu awo, pooti okhala yaale asuwenle etampi eyo, aahiiso mutthu yoole oleeliwe ni mutthu owo opanke etampi, nto, axitokweene pooti waaleela atthu yaawo paahi wiira mutthu yoole opanke etampi oottaruxiwa.

17. Exeeni enilaleiwa mmulokoni nuumala etampi osuweliwa vanceene aahiiso wooniwa wiira enoosuweliwa vanceene? Mwaha wa xeeni?

¹⁷ Ikwaha sikina, pooti wiiraka etampi eyo yoosuweliwa vanceene mmulokoni aahiiso enoosuweliwa vanceene. Eyo yiiraneya, nuulumo noowi “atthu otheene”, pooti ohimmwaka muloko wootheene. Tivo, mutokweene mmosa onoolaleya mmulokoni wiira munna aahiiso murokora owo oopwapweliwa. Mwaha wa xeeni? Murummwa Paulo aahitthokiherya wiira ehaana opakiwa eyo “wira akina yooveke” opaka etampi.

18. Vakhala wiira mwaana oopatisiwa onnipaka etampi yuulupale, axitokweene anithokorerya sai mwaha owo? (Nwehe efootu.)

¹⁸ Exeeni eniiraneya okathi mutthu ohiphiyerinhe iyaakha 18, onipaka awe etampi yuulupale? Nikhuuru na axitokweene, ninnaathanla axitokweene anli wiira athukumane ni mwaana owo, vamosa ni anamuyari awe makristau.b Axitokweene animwaakoha anamuyari awe mwaano awo etthu apanke aya wiira amukhaliherye mwaana owo oturuka mweettelo awe ni orukunuxa murima. Vakhala wiira mwaana owo onoowiiwelela anamuyari awe ni onimweemererya oturuka mweettelo awe, weeso axitokweene awo anli pooti othanla omalela vaavo mwaha owo. Siiso anamuyari awo pooti othanla otthikela omukhaliherya mwanaya, nto ekomisau ya axitokweene khenipirisari-tho othukumana ni mwaana owo vamosa ni anamuyari awe, okhala wiira Yehova ohaavaha muritti owo anamuyari wa waattaruxa anaaya yooniheryaka ophenta. (Otum. 6:6, 7; Mir. 6:20; 22:6; aEef. 6:2-4) Ikwaha sikina axitokweene anoowehaka vakhala wiira anamuyari annimukhaliherya mwanaya owo ntoko vanireerela aya. Masi, sai vakhala wiira mwaana owo oopatisiwa onnikhootta wiiwelela miruku onivahiwa awe, nave onnikhootta orukunuxa murima, onathipelela opaka itthu soohiloka? Eyo yiiraneya, axitokweene araru anoothukumana ni mwaha owo vamosa ni anamuyari awe makristau.

“YEHOVA TOOPHENTA VANCEENE NI TOOMORIWA IKHARARI”

19. Axitokweene aniimananiha sai otthara ntakiheryo na Yehova okathi anaathokorerya aya atthu apanke etampi?

¹⁹ Okathi axitokweene aniirela aya mpantta ekomisau, awo aakhalana muritti ohoolo wa Yehova wa wiiriha muloko okhala wooloka. (1 aKor. 5:7) Masi-tho, awo anniphavela vanceene wiira mutthu owo opanke etampi, orukunuxe murima vaweryaneya. Tivo, awo annikhalana moonelo wooloka ni annilipelela wiira mutthu owo onooturuka mweettelo awe. Xeeni aniira aya siiso? Mwaha woowi aniphavela omutakiha Yehova, yoowo ‘ori oophenta vanceene ni oomoriwa ikharari’. (Yak. 5:11) Nkawehani moota murummwa Yohani yoowo aari oowuuluvala vanceene aalempe awe aahimyaka anna ni arokora. Owo aalempe so: “Anaaka oophentiwa, kinoolepelani itthu iya wira muhipake etampi. Masi, akhala mutthu onipaka etampi, nookhalana namakhaliherya Yesu Kristu, naxariya, yoowo ori ni Tiithi”. — 1 Yoh. 2:1.

20. Mwaha wookiserya wa mpantta ola, ninrowa othokorerya exeeni?

²⁰ Mooriipiha murima, ikwaha sikina, mukristau onipaka etampi onnikhootta orukunuxa murima. Eyo yiiraneya, ohaana okumihiwa mmulokoni. Axitokweene aniphuka sai mwaha siiso? Eyo ti etthu ninrowa ahu othokorerya mwaha onittharelana.