Buuru a Balaamu Onnilavula

AIsarayeli yaahikhala moothakoni iyaakha 40. Awo yaahixintta mittetthe sinceene sootupa. Yaahiphiya elapo yowaataleya ya oMowabi, okhopela wa muro Yordani. Vano waahiphiya okathi wira ekele elapo yooleiheriwa. Balaki, mwene a oMowabi aanoova waakhiwa elapo awe. Nto aahaaruma atthu omurowela mulopwana aitthaniwa Balaamu a oMowabi wira aatakhalihe aIsarayeli.

Masi Yehova aahimuleela Balaamu wira: ‘Muhaatakhalihe aIsarayeli’. Nto Balaamu aahikhootta orowa. Mwene Balaki aahimwiitthana Balaamu ekwaha ya nenli ni aahimuleiherya onvaha mihakhu sinceene. Balaamu aahikhootta. Nuumala-vo, Muluku aahimuleela Balaamu wira: ‘Muroweke wa Balaki, masi mwamuleele paahi ele enrowa aka woohimeeryani’.

Balaamu aahinwela buuru awe onarowa epantte enikhuma epheyo ya oMowabi. Owo aahimpaka palano wira aatakhalihe aIsarayeli, nnaamwi Yehova aamukhoottihenrye opaka eyo. Nlaikha na Yehova naahimukhumelela mphironi ikwaha 3. Balaamu khaaweha nlaikha nle, masi buuru awe aaniweha. Ekwaha yoopacerya, buuru aahihapuwela mutakhwani. Nuumala-vo, buuru ole aahivira eriyari ya maluku ni aahihaamela exiri ya maluku nto aahiphita nnawu na Balaamu. Wanikisa waya buuru ole aahimpaathi vathi. Khula okathi buuru ole aapaka awe eyo Balaamu aanimmana ni ekopo awe.

Nuumala ekwaha ya neeraru, Yehova aahimwiiriha buuru olavula. Buuru aahimukoha Balaamu wira: ‘Xeeni munikimana anyu siisa?’ Balaamu aahaakhula wira: ‘Mookipakiha okhala ntoko mulolo. Kaarina ekatana, kanwiivani’. Buuru aahimukoha so: ‘Nyuwo mookiwela iyaakha sinceene. Kiireke kootoko owiirelani siisa?’

Nto Yehova aahimwiiriha Balaamu oweha nlaikha. Nlaikha nle naahimuleela wira: ‘Yehova ohooleelani wira muhaatakhalihe aIsarayeli’. Balaamu aahaakhula wira: ‘Koopaka etthu yoohiloka. Kinootthikela owaani’. Masi nlaikha naahimuleela wira: ‘Muroweke oMowabi, masi mwahimye paahi moolumo Yehova onrowa awe woohimeeryani’.

Niireke Balaamu aahiixutta etthu? Nnaari. Maana, aahimananiha waatakhaliha aIsarayeli ikwaha tthaaru, masi Yehova aahipaka mwiiriirya, nto otakhalihiwa iwo waahipakeya mareeliho. Moohipisa aIsarayeli yaahaatuphela atthu a oMowabi, ni Balaamu aahiiviwa. Niireke khivaarowa oloka vaakhanle wira Balaamu aahimwiiwelela Yehova wanipacerya wene?