Yehova Aahimulavuliha Samuweli

Muulupale a anamukuttho Eli, aahikhalana anamwane anli yaawo yaarumeela otabernaakulu ntoko anamukuttho. Masina aya yaari Hofini ni Pineha. Awosa khiyeettela malamulo a Yehova, ni yaathokorerya atthu mwa enamuna yootakhala. Okathi aIsarayeli yaarowa aya onvaha mikuttho Yehova, Hofini ni Pineha yaanithanla enama yoolokexa khiyakuxa. Eli aahiiwa ele anaawe yaapaka aya, masi owo khaapaka etthu. Nto Yehova oonenle sai yowiiraneya ele?

Nnaamwi Samuweli aari mmiravo mwaamukhaani, owo khaamutakinhe Hofini ni Pineha. Nto Yehova aahisiveliwa ni Samuweli. Ohiyu omosa Samuweli orupaka, aahiiwa nsu nimwiitthanaka. Nto aahivenya ni aahitthimakela wa Eli, ni khumuhimeerya wira: ‘Miyo kiri va!’ Masi Eli aahimuhimeerya wira: ‘Nkiwiihanneni. Murowe mwammaathi’. Samuweli aahitthikela wummaathi. Moohipisa eyo yaahiiraneya-tho. Okathi Samuweli aiwale awe nsu nlo ekwaha ya neeraru, Eli aahisuwela wira Yehova taamwiitthana Samuweli. Owo aahimuleela Samuweli wira atthikela wiiwa nsu nlo nimwiitthanaka, aakhule so: ‘Mulavuleke, Yehova! Murumeyi anyu onnoowiriyanani’.

Samuweli aahitthikela wummaathi. Nto owo aahiiwa-tho nsu niiraka: ‘Samuweli! Samuweli!’ Owo aahaakhula wira: ‘Mulavuleke, murumeyi anyu onnoowiriyanani’. Yehova aahimuhimeerya wira: ‘Mmuleele Eli wira kinoomuhukhumu owo ni emusi awe. Eli onnisuwela wira anaawe anipaka itthu sotakhala mutabernaakulu, masi khonaattaruxa’. Mmeeloni mwaya voosiisu, Samuweli aahitthukula mikhora sa otabernaakulu, ntoko siira awe khula nihiku. Vano owo aanoova omuleela namukuttho muulupale etthu Yehova aamuhimenrye awe. Masi Eli aahimwiitthana, anamukoha wira: ‘Mwanaka, Yehova oohimenryeni exeeni? Muhikikhuwe etthu’. Samuweli aahimuleela Eli itthu sotheene.

Samuweli aaninnuwa, nave Yehova aanivikaniha omukhapelela. Atthu othene a wIsarayeli, okhuma oDani mpakha oBèrixeba, yaahisuwela wira Yehova aahimuthanla Samuweli wira okhale profeta ni mukhulupale.