Khuuvo Aawerya Waahiiha!

Aahikhala mulopwana mmosa aarakanle ahinawerya weetta, ni aamakela okilaathi vamukhora va etemplo. Khula nihiku owo aanaavekela esimola atthu yaakela mutemplo mme. Nihiku nimosa makaaripi, aahimoona Pedru ni Yohani ekelaka mutemplo ni aahiwiirela so: ‘Xontte, mukivahe etthu’. Pedru aahimuhimeerya wira: ‘Kookhalana etthu yootepa oreera wira koovaheeni ovikana musurukhu. Mwa nsina na Yesu, nvenye mweetteke!’ Nuumala-vo, Pedru aahimukhaliherya ovenya, vano mulopwana ole aahipacerya weetta! Muttitthi wa atthu waahihakalala vanceene mwaha wa mwiiriirya ole, nto atthu anceene yaanitepa waamini.

Masi alipa a mukuttho ni aSaduki yaahinanariwa. Awo yaahaavara arummwa ni waaroiha opuro waaphukiwa milattu ni yaahaakoha so: ‘Ti pani oovanheni owerya wira munvonihe mutthu ola?’ Pedru aahaakhula so: ‘Nivahiwe ni Yesu Kristu yoole omwiivale anyu’. Ahooleli ale a itiini yaahikhuwela eriki: ‘Nihiwooneni mulaleyaka nsina na Yesu!’ Masi arummwa yaahaakhula so: ‘Hiyo nihaana olaleya nsina na Yesu, khanimmaala’.

Moohipisa Pedru ni Yohani yaahitaphuliwa, ni yaahirowa waahimeerya awiixutti akina etthu yaakhumelenle. Awiixutti yaahinvekela Yehova hoothe, ehimyaka so: ‘Munivahe ikuru wira nilipihe murima wira niwerye ovara muteko onirumme anyu’. Yehova aahaavaha munepa wootteela, ni yaahivikaniha olaleya ni waapenuxa aretta. Atthu anceene yaamutepa omwaamini Yesu. ASaduki yanaakhalela nrima arummwa, nto yahaatthukwela mukhatteya. Masi ohiyu, Yehova aahiruma nlaikha, khurowa otthukula mikhora sa ekhatteya ni nahaaleela arummwa wira: ‘Murowe mutemplo mwawiixuttiheke atthu’.

Mmeeloni mwaya voosiisu, eSineedrio, eyo piiyo, etribunaali yuulupale ya ahooleli a itiini, yaahileeliwa wira: ‘Ekhatteya nlelo eri yoowaliwa ene, masi alopwana ale khakhanle! Nto awo ari mutemplo, awiixuttihaka atthu!’ Moohipisa arummwa ale yaahivariwa ni khurowaniwa oSineedrio. Muulupale a anamukuttho aahaakoha wira: ‘Khinoorummeni wira muhilaleye-tho nsina na Yesu?’ Masi Pedru aahaakhula so: ‘Hiyo nihaana omwiiwelela Muluku ovikana owiiwelela atthu’.

Ahooleli awo yaahinanariwa nto yaaniphavela owiiva arummwa ale. Masi nFarisi mmosa iihaniwa Gamaliyeli aaheemela khuhimya so: ‘Phoole! Woonasa wene Muluku ori ni alopwana ala. Mumphavela tthiri owana ni Muluku?’ Ahooleli awo yaahiiwelela miruku iyo. Nto yaahaamana arummwa ni ikopo, yaahaaruma-tho wira ahiye olaleerya, nuumala-vo yaahaahiya. Masi arummwa ale khiyaahiyale olaleerya. Awo yaahitthikela olaleya ihapari sooreera moolipa murima, mutemplo ni mmawaani.