Xeeni Vanireerela Aya Waattittimiha Makhulupale?

1, 2. (a) Nihaana wiiwelela okhulupale wawani? (b) Muru ola, ninrowa waakhula makoho xeeni?

OKATHI mwaari anyu mwaana, woonasa wene anamuyari anyu yaahoovekelani opaka etthu muhaaphavela anyu. Tthiri okhala wira mwaanaaphenta, mwaanisuwela wira muhaana owiiwelela. Hata vari siiso, khahiyo wira okathi wotheene mwaaniphavela owiiwelela.

² Khivanikhweya okathi wotheene wiiwelela okhulupale. Masi ninnisuwela wira nihaana ottittimiha okhulupale wa Yehova. (Miruku 24:21) Maana Yehova, Tiithi ihu ni onniniphenta vanceene. Owo onninikhapelela ni onninivaha itthu sotheene nimphavela ahu wira nikhale akumi. Moohaanyiherya, Yehova oniphavela wira nihakalaleke, tivo onnivaha awe malakiheryo aahiiso miruku. Okathi mukina, Yehova onnaaruma atthu akina wira anivahe malakiheryo. Masi, xeeni okathi mukina vanivila aya wiiwelela malakiheryo? Xeeni Yehova onnivekela awe otthara malakiheryo? Ninrowa wooniherya sai wira ninnittittimiha okhulupale wa Yehova?—Nwehe Enoota, n.° 9.

XEENI VANIVILA AYA WIIWELELA?

3, 4. (a) Xeeni apinaatamu otheene ari aya oohimalela? (b) Xeeni vanivila aya omwiiwelela Yehova ni atthu akina?

³ Okhuma okathi Adamu ni Eva yaatthenke aya, apinaatamu otheene toohimalela. Nto eyo, enniniiriha woona ovila wiiwelela. Nnaamwi yaapattuxiwe oomalela, awo yaahithanla ohimwiiwelela Muluku. Nto okhuma okathi ole, apinaatamu otheene aarava etampi ni toohimalela. Nlo nthowa nimosa ninniiriha woona ovila omwiiweelela Yehova ni atthu akina. Nthowa nikina, okhala wira atthu Yehova onaarumeela awe wira anilakiheryeke toohimalela.—Maphattuwelo 2:15-17; 3:1-7; Esalimo 51:7; aRoma 5:12.

⁴ Okhala wira naatthu oohimalela, okathi mukina ninniixinnuwiha. Nto wiixinnuwiha onniniiriha ohiiwelela malakiheryo. Mwa ntakiheryo, Yehova aahimuthanla Moise wira oweettiheke aIsarayeli. Nto mulopwana mmosa iihaniwa Kore aahipacerya ohimuttittimiha Moise. Saahivira iyaakha sinceene Kore omurumeelaka Yehova moororomeleya mwa iyaakha sinceene. Masi, hata vaari siiso, owo aahipacerya wiixinnuwiha. Nnaamwi Moise aavahiwe muritti wooweettiha atthu a Muluku, owo khaixinnuwiha. Maana Biibiliya onnimuhimya Moise okhala mutthu oowiiyeviha waavikana atthu otheene a okathi ole. Kore aahiwiiriha atthu anceene ohimwiiwelela Moise. Nto etthu xeeni yaakhumelenle? Kore ni atthu otheene yaamukhaliherya yaahiiviwa. (Mothakoni 12:3; 16:1-3, 31-35) MBiibiliyani aakhala matakiheryo manceene anooniherya wira wiixinnuwiha onnikumiherya mixankiho.—2 Wahala 26:16-21; nwehe Enoota, n.° 10.

5. Moota xeeni atthu akina yaarumeelale aya moohiloka okhulupale aya?

⁵ Woonasa wene, munnoona wira okathi atthu akina anivahiwa aya okhulupale, awo anootepa okhala owiixinnuwiha. Tthiri okhuma khalai, atthu anceene annirumeela moohiloka okhulupale aya. (Mmusome Musuweli 8:9.) Nkahaya nwehe ntakiheryo na Sawuli. Okathi Yehova aamuthanlale awe okhala mwene aIsarayeli, Sawuli aari mutthu oowiiyeviha. Nuuvira okathi, Sawuli aahipacerya wiixinnuwiha ni nrima. Tivonto owo aanimulupattha Davidi, hata aahaapanke etthu yoohiloka. (1 Samuweli 9:20, 21; 10:20-22; 18:7-11) Muhoolo mwaya, Davidi aahivahiwa omwene ni aahikhala mwene ootepa oloka a wIsarayeli. Masi okathi mukina, Davidi aahirumeela moohiloka okhulupale awe. Owo aahiraruwa ni Bathi-Xeba, yoowo aatheliwe ni Uriya. Nuumala-vo, ophavelaka ovitha etampi awe, Davidi aahimwiiviha Uriya okhottoni.—2 Samuweli 11:1-17.

XEENI VANIREERELA AYA OTTITTIMIHA OKHULUPALE WA YEHOVA?

6, 7. (a) Mwaha womphenta Yehova, exeeni nimphavela ahu opaka? (b) Ntakiheryo na Yesu ninniixuttiha exeeni?

⁶ Hiyo ninnittittimiha okhulupale wa Yehova, mwaha woowi ninnimphenta vanceene. Okhala wira ninnimphenta Yehova waavikana atthu akina, nimphavela omuhakalaliha. (Musome Miruku 27:11; Marko 12:29, 30.) Masi okhuma okathi wa Adamu ni Eva, Satana onniwiiriha atthu anceene ohittittimiha okhulupale wa Yehova. Tthiri Diabo oniphavela owiiriha atthu wuupuwelaka wira Yehova khorina ehakhi yoowaaleela ele anireerela aya opaka. Masi hiyo noosuwela wira iwo wootha wuulupale. Tthiri ninnikupali moolumo ala ani: “Nyuwo mophwanela wakhela ovuwa ni nttittimiho n’uwerya. Tthiri ti nyuwo mpattunxe itthu sothene”.—Wisupulula 4:11.

⁷ Okathi mwaari anyu mwaana, mwaanoona wira mwaahaana wiiwelela okhulupale wa anamuyari anyu hata muhiphavelaka. Moolikanasa, khivankhweya okathi wotheene omwiiwelela Yehova. Masi hiyo ninnimphenta ni omuttittimiha Yehova, nto ninniimananiha omwiiwelela ni murima wotheene. Yesu oonivaha ntakiheryo nooloka. Owo aanimwiiwelela Yehova hata okathi wooxankiha. Tivonto aahimmye awe wira: “Ehireyé ntoko sintthunaka: yireye ntoko sintthunanyu nyuwo”.—Luka 22:42; nwehe Enoota, n.° 11.

8. Olelo-va, mwa inamuna xeeni Yehova onnilakiherya awe? (Nwehe ekaaxa eni: “Nwiriyaneke Miruku”.)

⁸ Olelo-va, Yehova onninlakiherya mwa inamuna soovirikana. Mwa ntakiheryo, owo onnimurumeela Biibiliya ni axitokweene wira anikhaliheryeke. Tthiri ninnooniherya wira ninnittittimiha okhulupale wa Yehova okathi ninwiiwelela ahu axitokweene, yaawo onaarumeela awe wira anilakiheryeke. Akhala wira ninnikhootta malakiheryo aya, nnooniherya wira ninkhootta malakiheryo a Yehova. Okathi aIsarayeli yahaamwiiwelela aya Moise, Yehova khivaamusivela. Maana vaakhala ntoko wiira yaakhootta omwiiwelela Yehova.—Mothakoni 14:26, 27; nwehe Enoota, n.° 12.

9. Ophenta onnikhaliherya sai otthara malakiheryo? Nvahe ntakiheryo.

⁹ Okathi nnaattittimiha ahu ale arina okhulupale, ninnooniherya wira ninnaaphenta anna ni arokora. Mwa ntakiheryo, okathi sinikhumelela aya ihasara sa ephattu, sinnikhala igrupu sinikhaliherya wira siwoopole atthu awo. Wira egrupu eyo ekhumele saana, onnithanliwa mutthu mmosa wira otthokiheke ni ovaha malakiheryo. Nave khula mutthu ohaana otthara malakiheryo a muhooleli owo. Akhala wira ookhala mutthu ohiniiwelela, onapaka itthu moohitthara malakiheryo, exeeni enrowa okhumelela? Hata orina ene moonelo wooloka, ohitthara malakiheryo pooti okumiherya mixankiho. Woonasa wene, atthu akina a egrupu eyo pooti ovulala. Mwa enamuna emosaru, akhala wira khanimmwiiwelela Yehova ni atthu onaarumeela awe wira anilakiheryeke, pooti waakumiherya mixankiho atthu akina. Masi vaavo nimmwiiwelela ahu Yehova ninnooniherya wira ninnaaphenta anna ni ninnitthara malakiheryo a Yehova.—1 aKorinto 12:14, 25, 26.

10, 11. Exeeni ninrowa ahu othokorerya vano?

¹⁰ Itthu sotheene Yehova onnivekela awe sinninikumiherya mireerelo. Tthiri ninniphwanya mireerelo vaavo ninttittimiha ahu okhulupale vatthokoni, mmulokoni ni makhulupale a mulaponi.—Otumererya 5:16; aRoma 13:4; aÉfeso 6:2, 3; aHéberi 13:17.

¹¹ Osuwela nthowa naya Yehova onnivekela awe waattittimiha atthu akina, onoonikhaliherya opaka eyo. Nrowe niwehe moota nikhanle ahu oottittimiha okhulupale vatthokoni, mmulokoni ni wa kuvernu.

OTTITTIMIHA OKHULUPALE VATTHOKONI

12. Mulopwana oothela onooniherya sai wira onnimuttittimiha Yehova?

¹² Yehova topattunxe itthoko ni onvaha khula mutthu a vatthokoni muteko awe. Akhala wira khula mutthu a vatthokoni onnisuwela ele Yehova oniphavela awe wira opakeke, etthoko eyo ennikhala saana ni ennihakalala. (1 aKorinto 14:33) Mwa ntakiheryo, Yehova onvaha mulopwana oothela okhala muhooleli a etthoko awe. Eyo enooniherya wira Yehova oniphavela wira mulopwana owo aakhapeleleke moophenta amwaarawe, anaawe ni atthu akina a vatthokoni. Musuweleke wira Yehova onnoona akhala wira mulopwana onnivara saana muritti awe aahiiso nnaari. Mulopwana onimurumeela Yehova, ohaana okhala ooreera murima, oophenta ni aakhapeleleke atthu otheene a etthoko awe ntoko Yesu aakhapelela awe muloko. Akhala wira mulopwana onnipaka eyo, owo onnooniherya wira onnimuttittimiha Yehova.—aÉfeso 5:23; nwehe Enoota, n.° 13.

13. Muthiyana onooniherya sai wira onnittittimiha okhulupale?

¹³ Muthiyana oovahiwa muritti wa faita vatthokoni. Owo onnimukhaliherya iyawe okhala muhooleli ooloka. Mulopwana ni mwaarawe aakhalana muritti wowiixuttiha anaaya. Enamuna emosa muthiyana onooniherya awe wira onniwiixuttiha anaawe ori waakhaliherya okhala oottittimiha ni waavaha ntakiheryo nooloka. (Miruku 1:8) Owo ohaana omuttittimiha iyawe ni okhaliherya soothanla sa iyawe. Nto akhala wira yookhala etthu ohineemererya awe, muthiyana owo onnimutthokiherya muupuwelo awe mwa nttittimiho ni mooreerela murima. Ankhi akhala wira iyawe khonimurumeela Yehova? Okathi owo itthu pooti oxankiha. Masi akhala wira onoovikaniha omuttittimiha, omphenta ni omuthokorerya, pooti wira onoophiya okathi mulopwana owo onrowa awe othanla omurumeela Yehova.—Mmusome 1 Pedru 3:1.

14. Anamwane anooniherya sai wira annittittimiha okhulupale wa anamuyari aya?

¹⁴ Yehova onnaavaha efaita anamwane. Awo ahaana okhapeleliwa ni olakiheriwa oratteene. Anamwane aniwiiwelela anamuyari aya, awo annaahakalaliha vanceene. Nave okathi anamwane aniwiiwelela aya anamuyari aya, awo annimuttittimiha Yehova ni annimuhakalaliha. (Miruku 10:1) Masi itthoko sinceene, anamwane anihuuwa ni amamaya aahiiso ni apapaya paahi. Eyo ennaaxankiha vanceene anamwane awo ni anamuyari aya. Nto akhala wira anamwane anniwiiwelela ni waakhaliherya amamaya wala apapaya, itthu pooti weetta saana. Ekeekhai wira khiivo etthoko ehinkhalana mixankiho. Masi hata vari siiso, etthoko enoowerya okhala yoohakalala akhala wira khula mutthu a vatthokoni onnitthara malakiheryo a Yehova. Etthoko ntoko eyo, enninvuwiha Yehova, Mpattuxa a itthoko sotheene.—aÉfeso 3:14, 15.

OTTITTIMIHA OKHULUPALE MMULOKONI

15. Nnooniherya sai wira ninnittittimiha okhulupale mmulokoni?

¹⁵ Yehova onnirumeela muloko wira onikhaliheryeke ni onikhapelela. Owo onvaha Yesu okhala mukhulupale a miloko sotheene. (aKolosi 1:18) Nto Yesu onvaha “murumeyi òroromeleya ni ànkhili” muritti wowaakhapelela arumeyi a Yehova elapo yotheene. (Matheyo 24:45-47) Olelo-va, “murumeyi òroromeleya ni ànkhili” ti Nikhuuru Noolamulela na Anamoona a Yehova. Anna awo anninivaha itthu sotheene nimphavela ahu wira nilipihe waamini wahu. Nave Nikhuuru Noolamulela ninnaavaha malakiheryo axitokweene, arummwa oorumeela ni axitokweene a esirkwiitu wira akhapeleleke miloko elapo yotheene. Anna awo otheene anookohiwa ni Yehova, moota anikhapelela aya muloko. Nto vaavo nnaattittimiha ahu, ninnooniherya wira ninnittittimiha okhulupale mmulokoni ni wa Yehova.—Mmusome 1 aTesalonika 5:12; aHéberi 13:17; nwehe Enoota, n.° 14.

16. Xeeni ohimyaka wira axitokweene ni arummwa oorumeela anithanliwa ni ikuru sowaarya sa Muluku?

¹⁶ Axitokweene ni arummwa oorumeela anithanliwa ni ikuru sowaarya sa Muluku. Xeeni ohimyaka siiso? Mwaha woowi, ahinatthi othanliwa anna awo ahaana okhalana mikhalelo siri 1 Timótheyo 3:1-7, 12; Tito 1:5-9. Yehova aahirumeela ikuru sawe sowaarya wira silempwe mikhalelo iyo mBiibiliyani. Ahinatthi omuthanla munna, axitokweene annivekela ikuru sa Muluku wira saakhaliherye okhalana moonelo wa Yehova. Eyo enooniherya wira Yehova ni Yesu annikhapelela muloko. (Miteko 20:28) Ekeekhai wira axitokweene ni arummwa oorumeela atthu oohimalela ntoko hiyo. Masi anna awo yoovaha ya Yehova ni annikhaliherya muloko okhala wowiiraana ni woolipa.—aÉfeso 4:8.

17. Wira ooniherye ottittimiha, murokora ohaana opaka exeeni?

¹⁷ Okathi mukina pooti ohikhala axitokweene ni arummwa oorumeela wira akhapeleleke muloko. Nto miloko iyo, anna apatisiwe pooti okhaliherya. Masi aahikhale munna opatisiwe, pooti murokora oopatisiwa ovara miteko sinivariwa ni anna oopatisiwa. Okathi owo, murokora owo ohaana owara nleeso. (1 aKorinto 11:3-10) Opaka eyo, onooniherya wira onnittittimiha okhulupale wa Yehova, vatthokoni ni mmulokoni.—Nwehe Enoota, n.° 15.

WAATTITTIMIHA MAKHULUPALE A ELAPO

18, 19. (a) ARoma 13:1-7, onniixuttiha exeeni? (b) Ninrowa wooniherya sai wira ninnaattittimiha makhulupale a kuvernu ni atthu akina?

¹⁸ Makhulupale a mulaponi aakhalana owerya mwaha woowi Yehova onniweemererya, nto nihaana waattittimiha. Awo annitthokiha itthu wira seetteke saana valaponi, ntoko ixiripitaali ni ixikola. Anamoona a Yehova, annitthara malakiheryo ari aRoma 13:1-7. (Mmusome.) Tthiri ninnaattittimiha “alupale anettiha elapo” niiwelelaka malamulo a muttetthe aahiiso elapo ninkhala ahu. Malamulo awo pooti ovarihana ni emusi ahu, nakoso ni mireerelo sahu. Mwa ntakiheryo, hiyo ninniliva mpoosito ni okathi makhulupale a guvernu annikoha aya etthu, hiyo ninniwaakhula. Ankhi akhala wira anninivekela opaka etthu envirikanya malamulo a Muluku? Murummwa Paulo aahimmye so: “Etthu yotepa otthuneya omwiwelela Muluku ovikana owiwelela atthu”.—Miteko 5:28, 29.

¹⁹ Okathi ninlavula ahu ni makhulupale a kuvernu, ntoko mulipa-oophuka ni mapoliisia nihaana waattittimiha. Anaxikola ahaana waattittimiha maprusoore aya ni anamuteko akina. Nave omutekoni nihaana waattittimiha mapatarau ahu hata atthu akina ahipakaka eyo. Opaka eyo, nnimooniherya wira ninnimutakiha murummwa Paulo. Okathi wotheene aanaattittimiha makhulupale a kuvernu, hata vaaxankiha opaka eyo. (Miteko 26:2, 25) Tthiri, hata atthu akina anithokoreryaka voohiloka, nihaana waattittimiha.—Mmusome aRoma 12:17, 18; 1 Pedru 3:15.

20, 21. Exeeni enrowa okhumelela vakhala wira ninnaattittimiha atthu otheene?

²⁰ Olumwenku wotheene, atthu anceene khanttittimiha. Masi Anamoona a Yehova atthu oottittimiha. Tthiri yoolakela ahu ti omuttittimiha khula mutthu. Okathi nimpaka ahu eyo, ninnooniherya wira ninnitthara malakiheryo a murummwa Pedru ani: “Mwattittimiheke atthu othene”. (1 Pedru 2:17) Atthu anninoona vaavo nnaattittimiha ahu. Tivonto okathi owo ninniiwelela masu a Yesu ani: “Warya wanyu wamwaleleke atthu, wira yòneke miteko sanyu sorera, yavuwiheke Atith’inyu ari wirimu”.—Matheyo 5:16.

²¹ Nihaana ottittimiha etthoko ahu, mmulokoni, makhulupale a kuvernu ni atthu akina. Akhala wira nnoopaka eyo, exeeni enrowa okhumelela? Mweettelo ahu wooloka pooti owiiriha atthu akina omusuwela Yehova. Nave okathi nnaattittimiha ahu atthu akina nimmuttittimiha Yehova. Opaka eyo ninnimuhakalaliha Yehova ni ninnooniherya wira ninnimphenta.