YOOSOMA 14

Ottittimiherya Iponto Suulupale

AHéberi 8:1

MALAKIHERYO: Mwaakhaliheryeke alipa-oowiriyana wira yoottharekeni okathi munilavula anyu, ni mooniherye moota khula eponto enivarihana aya ni muru wa mwaha.

MOOTA WOOPAKA:

Mukhalaneke yoolakela. Nwehe vahinatthi akhala wira mwaha anyu orina yoolakela ya osuweliha, okupaliha, aahiiso otumererya. Nuumala-vo, muhaana olavula moovarihana ni yoolakela ya mwaha owo. Iponto suulupale sa mwaha anyu sihaana okhaliheryaka wiwexexiwa saana mwaha owo.

Mwiikoheke so: ‘Makoho xeeni alipa-oowiriyana yaarowa aya okhalana voohimya sa mwaha ola? Nikoho xeeni yaarowa aya opacerya opaka voohimya sa mwaha ola?’ Nto mulokiheryeke iponto moovarihana ni makoho awo wira alipa-oowiriyana aweryeke otthara, yiiwexexeke ni weemererya etthu enihimya anyu.
Muttittimiheryeke muru wa mwaha anyu. Muromoleke masu wala moolumo anivarihana ni muru wa mwaha anyu.
Mwiiwanyeiheke saana iponto suulupale. Muthanleke paahi iponto suulupale sinivariha ni mwaha anyu, murumeeleke seiyo wira mwiixuttihe oratteene muhina mwa okathi othanleliwe anyu. Muthanleke iponto vakhaani, mutthokiheryeke saana khula eponto, muhilutteleleke ni eponto ekina. Alipa-oowiriyana asuweleke wira vano ninrowela eponto ekina.

Woopaceryani wa mwaha anyu, nyuwo pooti ohimya iponto suulupale wira alipa-oowiriyana aweryeke woottharani, wala ohimya iponto iyo wanikisa wa mwaha wira yuupuweleleke.