Muuluuleke Iponto Suulupale Mwiixuntte Anyu

Niireke vannoovilani wuupuwela etthu musomme anyu? Eyo enniiraneya ni khula mmosa a hiyo. Exeeni enrowa wookhaliheryani? Muupuweleleke iponto suulupale sa mwaha musomme anyu.

Okathi munisoma anyu, mweemeleke vakhaani wiira mulepe iponto seiye munoona anyu wiira sinimookhaliheryani. Murummwa Paulo aahaatumererya anna ni arokora wiira yahaana opaka etthu emosa-ru okathi yaarowa aya osomaka ekarta awe. Owo aalempe so: Ela “etthu yuulupale ya mwaha ninlavula ahu”. (aHeeb. 8:1) Ni moolumo ala, murummwa Paulo aahaakhaliherya alipa oowiriyana otthara muupuwelo ni khula eponto yuulupale yaavarihana ni mwaha owo.

Okathi munipaka anyu yoosoma ya omwaneene mwiivaheke okathi woonasa wene iminutu 10 wiira muupuwelele ele mmanle anyu othokorerya. Vakhala wiira vannoovilani wuupuwelela ele musomme anyu, nyuwo pooti oweha miru saamukhaani aahiiso nyuwo pooti osoma efrase yoopacerya ya khula ettima. Mwiira siiso, munoowerya wuupuwelela ele musomme anyu. Akhala wiira muhiixutta etthu esya, mmananiheke otthokiherya ni moolumo anyu. Akhala wiira munimuupuwelela iponto suulupale, eyo enimookhaliheryani ohiliyala etthu musomme anyu ni munoowerya weettela mookumini mwanyu.