Ekumi Epacenrye Sai?

Muluku tori “maphattuwelo èkumi”. (Esalimo 36:10) Niireke nyuwo munnikupali eyo? Atthu akina khanikupali wira Muluku topattunxe itthu sotheene sikhanle. Akhala wira eyo ekeekhai, itthu sotheene sikumi sikhumelenle mekhaya paahi ni khasirina yoolakela aya. Masi Yehova Muluku, topattunxe itthu sotheene sikumi ni aahikhalana yoolakela awe.a Yoosoma ela, ninrowa oweha ele Biibiliya onihimya awe sa moota okumi opacenrye aya. Nave ninrowa woona itthu sinniiriha okupali eyo.

1. Olumwenku opacenrye sai?

Biibiliya onihimya wira: “Wopajeryani, Muluku opattunxe erimu n’ilapo ya vathí”. (Maphattuwelo 1:1) Masientista manceene annikupali wira olumwenku wookhalana wanipacerya waya. Nto Muluku opattunxe sai olumwenku? Muluku aahirumeela ikuru sawe, eyo piiyo, munepa awe woowaarya wira opake itthu sotheene sikhanle moolumwenkuni, ohela muhina, igalaaxia, itheneeri ni iplaneeta.—Maphattuwelo 1:2.

2. Etthu xeeni emwiirinhe Muluku opattuxa elapo?

JYehova Muluku, ‘khopattunxe elapo [wira] ehikhale etthu, masi opattunxe wira ekhaleke-mo atthu’. (Yesaya 45:18) Tthiri etthu emwiirinhe Muluku opattuxa elapo aaphavela wira ekhale nipuro nooloka yaarowa aya okhalaka apinaatamu mahiku otheene. (Mmusome Yesaya 40:28; 42:5.) Masientista annikupali wira elapo ti yavameekhaaya ni yoovirikana ni iplaneeta sikina. Awo khawenrye ophwanya iplaneeta sikina vaniweryaneya aya apinaatamu okhala.

3. Etthu xeeni eniwiiriha apinaatamu ovirikana ni inama?

Nuumala opattuxa elapo, Yehova aahipaka miri ni inama. Nuumala-vo, ‘Muluku ahimpattuxa mutthu ailikanyihaka mmensawe’. (Musome Maphattuwelo 1:27.) Etthu xeeni eniwiiriha apinaatamu ovirikana ni inama? Okhala wira Muluku onipattunxe ailikanyihaka mmansawe, eyo enooniherya wira ninniwerya otakiha mikhalelo sawe ntoko ophenta ni exariya. Muluku onipattunxe wira niweryeke wiixutta mattaava, osiveliwa itthu sooloka ni osiveliwa owiriyana muusika. Nave, moovirikana ni inama, apinaatamu aakhalana eparakha yoomukokhorela Muluku yoowo ori Mpattuxa.

MWIIXUTTE ITTHU SIKINA

Nwehe itthu sinooniherya wira: (1) Okumi oroopattuxiwa, (2) ele Biibiliya onihimya awe wira itthu siroopattuxiwa ti yookhalela ni (3) wira elapo eroopattuxiwa. Mikhalelo sa apinaatamu sinniixuttiha aya voohimya sa Muluku.

4. Itthu sikhanle siroopattuxiwa

Apinaatamu annittottopeliwa vaavo anipaka aya itthu atakihaka soopattuxiwa. Nto khamunoona wira ole opattunxe itthu iyo onniphwanelela ovuwihiwa? Nwehe EVIIDIYU, nuumala-vo mwaakhule nikoho ninttharelana.

EVIIDIYU: Omwaamini Muluku (2:43)

• Itthu xeeni apinaatamu apanke aya atakihaka soopattuxiwa?

Khula empa enipakiwa ni mutthu. Nto tani opanke itthu sotheene sikhanle molumwenkuni? Mmusome aHeeberi 3:4, nuumala-vo mwaakhule makoho anittharelana:

• Molumwenkuni soosareya itthu sooloka. Itthu xeeni sikhanle moolumwenkuni sinootikinihani vanceene?

• Niireke vannoovilani okupali wira olumwenku ni itthu sotheene sikhanle siroopattuxiwa? Mwaha wa xeeni?

Nyuwo mwaanisuwela?

Nyuwo pooti ophwanya myaha ni iviidiyu sikina voohimya sa mwaha owo, va jw.org mpantta oni: “Niireke Ookhala Mpattuxa?” ni “Miyoonelo Voohimya sa Moota Okumi Opacenrye Aya”.

“Mweekeekhai, khula empa enitekiwa ni mutthu, masi Muluku topattunxe itthu sotheene”

5. Sookhala itthu sinnikupaliha wira ele Biibiliya onihimya awe wira itthu siroopattuxiwa ekeekhai

EVIIDIYU: Niireke Olumwenku Oroopattuxiwa?—Eviidiyu yaamukhaani (3:51)

• Niireke Biibiliya onniixuttiha wira elapo epattuxiwe mahiku 6, khula nihiku siviraka iwoora 24?

• Munoona wira ele Biibiliya onihimya awe sa moota elapo epattuxiwe aya ti sekeekhai? Etthu xeeni eniwiirihani ohimya siiso?

Musome Maphattuwelo 1:1, nuumala-vo mwaakhule makoho anittharelana:

• Masientista anihimya wira olumwenku wookhalana wanipacerya. Eyo enivarihana sai ni eversiikulu ela musomme anyu mBiibiliyani?

Masientista makina anihimya wira Muluku aarootatuxa itthu wira opake itthu sikumi. Awo anihimya wira Muluku aapanke eseelula emosa, nuumala-vo eseelula eyo enapakeya itthu sinceene sikumi. Musome Maphattuwelo 1:21, 25, 27, nuumala-vo mwaakhule makoho anittharelana:

• Niireke Biibiliya onniixuttiha wira Muluku aarootatuxa itthu wira opake ihopa, inama ni apinaatamu? Wala Muluku topattunxe khula etthu ya khula “enamuna”?b Nwehe enoota.

6. Pinaatamu yoopattuxiwa ya vameekhaaya ya Muluku

Hiyo apinaatamu noovirikana vanceene ni inama Yehova opattunxe awe. Musome Maphattuwelo 1:26, nuumala-vo mwaakhule nikoho ninttharelana:

• Apinaatamu anniwerya waaphenta atthu akina ni woona othunku. Mwaha wa xeeni? Mwaha woowi Muluku onipattunxe iilikanyihaka mwaneene. Eyo enniixuttiha exeeni voohimya sa omutthu wa Yehova?

IPONTO SUULUPALE

Yehova Muluku topattunxe elapo ni itthu sotheene sikumi siri mulaponi.

Wuuluula

• Biibiliya onniixuttiha exeeni sa moota olumwenku opacenrye awe?

• Niireke Muluku orumenle othatuwa wira opake itthu sa khula enamuna wala oroopattuxa itthu sotheene?

• Itthu xeeni siniwiiriha apinaatamu okhala a vameekhaaya?

NWEHE ITTHU SIKINA

Itthu sikhanle mulaponi sinooniherya wira ookhala mpattuxa.

“Soopattuxiwa Sinniixuttiha Exeeni?” (Nvenye!, Setembro, 2006)

Nwehe moota anamuyari akhanle aya oowaatthokiherya anaaya acikhaani ele Biibiliya onihimya awe wira itthu siroopattuxiwa.

“Yehova . . . Oopattuxa Itthu Sotheene” (2:37)

Nwehe akhala wira yowiixuttiha ya othatuwa ennivarihana ni Biibiliya.

“Niireke Muluku Orumenle Othatuwa Wira Opake Itthu Sikumi Sikhanle?” (Mwaha ori va jw.org)

Atthu akina anihimya wira makhuva a khalai ni sowooniherya sa siensia sinnooniherya wira itthu siroothatuwa. Niireke eyo ekeekhai?

A Origem da Vida—Cinco Perguntas Que Merecem Resposta (ebroxura)