YOOSOMA 25
Tiivi Eri Yoolakela ya Muluku wa Hiyo?
Biibiliya onnooniherya wira okumi wa apinaatamu ti wa ‘okathi vakhani ni ti wosareya ohawa’. (Yobi 14:1) Niireke okumi yoola Muluku aaphavela awe wira nikhalane? Akhala wira khahiyo, etthu xeeni emwiirinhe Muluku waapattuxa apinaatamu? Niireke ele Muluku oniphavela awe enimwiiraneya? Vanimoosivelani osuwela moota Biibiliya onaakhula awe makoho awo.
1. Yehova aaphavela wira nikhalane okumi xeeni?
Yehova oniphavela wira nikhalane okumi wooloka. Okathi aapattunxe awe apinaatamu oopacerya, Adamu ni Eva, owo aahaapweha eparayiisu yooreera valaponi aahiiso exardim ya wEdeni. Nuumala-vo, “Muluku aharèriha, àhimeryaka wira: Mwayareke an’inyu, munjerereyeke: musareyeke mulaponi mothene. Mwettiheke elapo yothene”. (Maphattuwelo 1:28) Tthiri Yehova aaphavela wira yaayareke anamwane, yiiriheke elapo yotheene okhala eparayiisu ni okhapelela inama. Nave Muluku aaphavela wira atthu otheene akhalane okumi wooloka ni akhaleke mahiku otheene.
Ekeekhai wira itthu khasiiraneyale ntoko Muluku aaphavela awe.a (Nwehe enoota.) Masi yoolakela ya Muluku kheturukeyale. (Yesaya 46:10, 11) Nlelo Muluku oniphavela wira apinaatamu oowiiwelela akhalane okumi wooloka ni makhalelo ooloka.—Mmusome Wiisuupulula 21:3, 4.
2. Ninrowa okhalana sai okumi woohakalaliha niinaano-va?
Yehova aapattunxe apinaatamu ni yoophavela ya ‘omusuwela’ ni omukokhorela. (Mmusome Matheyo 5:3-6.) Nave Yehova oniphavela wira nikhalane waataana wooloka ni yena, ‘nitthareke iphiro sawe sothene nimphenteke’ ni ‘nimurumeeleke ni murima ahu wotheene’. (Otumererya 10:12; Esalimo 25:14) Akhala wira nnoopaka eyo, nnoophwanya ohakalala wekeekhai hata nirina ene mixankiho. Tthiri vaavo nimmukokhorela ahu Yehova, ninnoona wira okumi ahu wookhalana yoolakela aya, maana ninnikhala moovarihana ni ele oniphavela awe.
MWIIXUTTE ITTHU SIKINA
Nwehe ophenta wuulupale Yehova oonihenrye awe okathi aalokihenrye awe elapo wira hiyo nikhaleke. Nave nwehe ele Biibiliya oniixuttiha awe voohimya sa yoolakela ya okumi.
3. Yehova oniphavela wira apinaatamu akhalane okumi wooloka
Nwehe EVIIDIYU, nuumala-vo mwaakhule nikoho.
Etthu xeeni emwiirinhe Muluku opattuxa elapo?
Mmusome Musuweli 3:11, nuumala-vo mwaakhule nikoho ninttharelana:
Yoolepa ela ewiixuttinheni exeeni voohimya sa Yehova?
4. Ele Yehova oniphavela awe enimwiiraneya
Musome Esalimo 37:11, 29 ni Yesaya 55:11, nuumala-vo mwaakhule nikoho ninttharelana:
Ninsuwela sai wira ele Yehova oniphavela awe kheturukeyale?
Empa ehanle ophweeya, pooti olokiheriwa. Mwa enamuna emosaru, elapo ennihononiwa ni apinaatamu, masi Yehova onoolokiherya ni waavaha ale animphenta
5. Omukokhorela Yehova onniiriha okumi ahu okhalana yoolakela
Osuwela yoolakela ya okumi onninihakalaliha. Nwehe EVIIDIYU, nuumala-vo mwaakhule nikoho.
Okumi wa Terumi waaturukeyale sai nuumala osuwela yoolakela ya okumi?
Mmusome Musuweli 12:13, nuumala-vo mwaakhule nikoho ninttharelana:
Yehova oonivaha itthu sinceene, ninrowa wooniherya sai wira ninnimuxukhurela?
ATTHU AKINA POOTI WOOKOHANI WIRA: “Tiivi eri yoolakela ya okumi?”
Munrowa owaakhula sai?
IPONTO SUULUPALE
Yehova oniphavela wira nikhalane okumi woohimala ni makhalelo ooloka. Vaavo nimmukokhorela ahu Yehova ni murima wotheene, okumi ahu onnikhalana yoolakela aya.
Wuuluula
Tiivi yaari yoolakela ya Yehova wa Adamu ni Eva?
Ninsuwela sai wira ele Yehova oniphavela awe kheturukeyale?
Okumi anyu onrowa okhalana sai yoolakela aya?
NWEHE ITTHU SIKINA
Nwehe itthu sinooniherya wira exardim ya wEdeni yaahikhala.
“Exardim ya wEdeni, Ekeekhai Wala Etthu Yowoothiwa?” (Owehaweha, 1 a Janero, 2011)
Nwehe itthu sinooniherya wira elapo khenrowa opwetexiwa ni enrowa okhalaka mahiku otheene.
Nwehe itthu sinooniherya wira okumi wookhalana yoolakela aya.
John uupuwela wira aahikhalana itthu sotheene mookumini mwawe. Masi nwehe moota oonale awe wira yaahikhala etthu yaamuhaleela.
a Yoosoma enittharelana ninrowa oweha nthowa naya nihirina ahu okumi wooloka olelo-va.