Exeeni Eniiraneya Nuumala Mutthu Okhwa?

Niireke mootoko okhweliwa mutthu munimphenta anyu? Okathi owo wooxankiha, woonasa wene nyuwo munniikoha so: ‘Exeeni eniiraneya mutthu akhwa? Niireke nnoohokoleela waaweha ale nnaaphenta ahu akhwiiye?’ Yoosoma ela ni yoosoma enittharelana, Biibiliya onimwaakhula makoho awo mwa enamuna yoomaaliha.

1. Exeeni eniiraneya nuumala mutthu okhwa?

Yesu aahilikanyiha okhwa ni orupa. Mutthu onrupa mpakha wiiliyala, owo khoniwerya osuwela itthu siniiraneya. Nto mwa enamuna xeeni okhwa onlikana aya ni orupa? Nuumala mutthu okhwa khonoona owereya. Nave khonimphwanya omeekha hata aaphenta vanceene amusi ni apatthani awe. Biibiliya onihimya wira “alipa-òkhwa khansuwela-tho etthu”.—Mmusome Musuweli 9:5.

2. Osuwela ekeekhai voohimya sa okhwa onnikhaliherya sai?

Atthu anceene annoova okhwa ni anniwoova alipa-ookhwa! Masi ele Biibiliya oniixuttiha awe voohimya sa okhwa enninimaaliha vanceene. Yesu aahimmye so: “Ekeekhai eyo enimootaphulani”. (Yohani 8:32) Itiini sinceene, siniixuttiha wira mutthu ookhalana erooho envikaniha okhala nuumala mutthu okhwa. Masi Biibiliya khoniixuttiha eyo. Nto eyo enooniherya wira nuumala mutthu okhwa khonihaawa. Nave okhala wira alipa-ookhwa khanisuwela etthu, awo khaniwerya onihaaxa. Nto khivanitthuneya waavaha esatakha wala opaka soolema sikina ntoko opattiha iveela wira naavahe alipa-ookhwa.

Atthu akina anihimya wira nnoowerya olavula ni alipa-ookhwa. Masi musuweleke wira khivaniweryaneya olavulana. Ntoko niwenhe ahu alipa-ookhwa khanisuwela etthu. Nto okathi mutthu onihimya awe wira oolavula ni alipa-ookhwa, owo olavunle ni minepa sootakhala, seiyo siniipakelela okhala alipa-ookhwa. Tthiri osuwela ekeekhai voohimya sa alipa-ookhwa, onninikhapelela wira nihihapuxiwe ni minepa sootakhala. Yehova onninlopola wira niheereryeke olavula ni alipa-ookhwa, mwaha woowi owo onnisuwela wira opaka eyo ninniikhapelela wira nihikumiheriwe mixankiho ni minepa sootakhala.—Mmusome Otumererya 18:10-12.

3. Mwiixutte ekeekhai voohimya sa alipa-ookhwa

Olumwenku wotheene atthu aakhalana miyoonelo soovirikana voohimya sa etthu eniiraneya nuumala mutthu okhwa. Tthiri khahiyo wira miyoonelo sotheene ti sekeekhai?

• Esoona munikhala anyu atthu anihimya wira eniiraneya exeeni nuumala mutthu okhwa?

EVIIDIYU: Exeeni Enimwiiraneela Mutthu Nuumala Okhwa?—Eviidiyu yaamukhaani (1:19)

Mmusome Musuweli 3:20, nuumala-vo mwaakhule makoho anittharelana:

• Moovarihana ni eversiikulu ela, etthu xeeni enimwiiraneela mutthu nuumala okhwa?

• Niireke yookhala etthu enivikaniha okhala nuumala mutthu okhwa?

Biibiliya onnihimya okhwa wa Laazaro, yoowo aari mpatthani a Yesu. Mmusome Yohani 11:11-14, wira nwehe etthu Yesu aahimmye awe yaamwiiranenle Laazaro nuumala okhwa. Nuumala-vo mwaakhule makoho anittharelana:

• Yesu aalikanyinhe okhwa ni exeeni?

• Nlikanyiho nno ninniixuttiha exeeni voohimya sa etthu eniiraneya nuumala mutthu okhwa?

• Niireke nyuwo munnikupali etthu Biibiliya onihimya awe?

4. Osuwela ekeekhai voohimya sa okhwa onninikhaliherya vanceene

Osuwela ekeekhai voohimya sa okhwa onninikhaliherya ohiwoova alipa-ookhwa. Mmusome Musuweli 9:10, nuumala-vo mwaakhule nikoho ninttharelana:

• Niireke alipa-ookhwa pooti onihaaxa?

Atthu akina anoona wira nihaana opaka isatakha wira naavahe alipa-ookhwa aahiiso waattittimiha naavekelaka wala opattiha iveela. Osuwela ekeekhai ya mBiibiliyani ennintaphula soolema iyo soohiloka. Mmusome Yesaya 8:19 ni Wiisuupulula 4:11, nuumala-vo mwaakhule nikoho ninttharelana:

• Yehova onoonela sai okathi mutthu onaakokhorela awe ni waavekela nikhaliheryo alipa-ookhwa?

5. Osuwela ekeekhai voohimya sa okhwa onninimaaliha vanceene

Atthu anceene yiixuttihiwe wira nuumala okhwa anoohaaxiwa mwaha wa itthu soohiloka yaapaka aya. Masi ti voomaaliha osuwela wira khuuvo mutthu onihaawa nuumala okhwa hata mutthu owo opanke ene itthu soohiloka. Mmusome aRoma 6:7, nuumala-vo mwaakhule nikoho ninttharelana:

• Biibiliya onihimya wira mutthu okhwiiye ooleveleliwa itampi sawe aahiiso Muluku oottipiha itampi sawe. Munoona wira nuumala mutthu okhwa onnihaaxiwa mwaha wa itampi aapanke awe?

Okathi nimmusuwela ahu oratteene Yehova, ninnoona wira owo khonikhala-khala aahaaxaka alipa-ookhwa. Mmusome Otumererya 32:4 ni 1 Yohani 4:8, nuumala-vo mwaakhule makoho anittharelana:

• Ntoko sinooniherya aya mikhalelo iya sa Muluku, niireke owo aamumpaha mutthu okhwiiye?

• Niireke osuwela ekeekhai voohimya sa okhwa onnoomaalihani? Mwaha wa xeeni?

IPONTO SUULUPALE

Nuumala mutthu okhwa, owo khorina okumi. Nto alipa-ookhwa khaniwerya waahaaxa atthu akumi.

Wuuluula

• Etthu xeeni eniiraneya nuumala mutthu okhwa?

• Osuwela ekeekhai voohimya sa okhwa ennikhaliherya sai?

• Xeeni osuwela ekeekhai voohimya sa okhwa onnimaaliha aya?

NWEHE ITTHU SIKINA

Nwehe ele nuulumo noowi “erooho” nintaphulela aya.

“Erooho Exeeni?” (Mwaha ori va jw.org)

Nwehe itthu sinooniherya wira Muluku khonaapaha omooroni atthu ootakhala.

Niireke Omooroni Etthu Yekeekhai? (3:06)

Niireke nihaana owoova alipa-ookhwa?

Minepa sa Alipa-ookhwa—Sinoowerya Wookhaliheryani Aahiiso Woohaaxani? Nto Sookhala Tthiri? (ebroxura)

Nwehe moota mulopwana mmosa aahakalanle awe nuumala wiixutta ekeekhai voohimya sa etthu eniiraneya nuumala mutthu okhwa.

“Waakhula Wooloka wa Biibiliya Waahikivara Murima” (Owehaweha, 1 a Feverero, 2015)