Niireke Onoolikana ni Iliivuru Sikina?

“Solempwa sothene supuxeriwé ni Muluku, khukhalihiwa wira sixuttiheke ekekhai . . . , siso, mutthu a Muluku onolikanyihiwa murohoni mwawe, onolipiheriwa ovara miteko sothene sorera”.—2 TIMÓTHEYO 3:16, 17.

KHAHIYO wira atthu otheene annikupali wira masu awo teekeekhai. Nto nyuwo munoonela sai? Moolumo ala anittharelana, taavi anoona anyu okhala ekeekhai voohimya sa Biibiliya?

• Eliivuru yooloka ntoko sikina

• Onoolikana ni iliivuru sinceene soowaarya sinikupaliwa

• Eliivuru ya ihantisi sinitumererya mweettelo wooloka

• Nuulumo na Muluku

Nikoho nikina tinla: Ehaavo efaita aya otokosa ele enikupali anyu? Biibiliya onihimya so: “Sothene silempwe khalai, silepeliwe wira nixuttihiwe, wira niphwanyé ororomela, nilipihiwaka, ni nthiti, nihakalalihiwaka ni Solempwa sa Muluku”. (aRoma 15:4) Tthiri Biibiliya onnihimya ekeekhai wira olepeliwe oniixuttiha, onilipiha ni onivaha nlipelelo.

Masi vaakhanle wira Biibiliya ti eliivuru pure, aahiiso onlikana ni iliivuru sikina sowaarya, wala ele enihimya awe ti yoovirikana ni ele enuupuwela anyu okhala yooloka, niireke vaamureerela okupali wira onniwerya tthiri onilakiherya ni okhaliherya etthoko ahu? Vaakhanle wira owo eliivuru ya ihantisi, niireke mwammukupali wira onnikumiherya ohakalala ni nlipelelo na muhoolo?

Atthu imilyau sinceene amusomme Biibiliya, aakupali wira owo Nuulumo na Muluku ohinlikana ni eliivuru ekina. Mwaha wa xeeni? Onivirikana sai ni iliivuru sikina? Ninveka wira muthokorerye iponto thanu sa Biibiliya sinittharelana.