Olumwenku Ola onrowa Omala Sai?

‘Nto nyuwo, axinn’aka, khamunetta mwepiphini: tivó nihiku nlo nihotutuxeni ntoko nawiye’.​—1 ATES. 5:4.

MUNNIWERYA OTTHOKIHERYA?

Itthu xeeni sinrowa wiiraneya muhoolo silavuliwe ni soolepa iya sinttharelana?

1 aTesalonika 5:3

Wisupulula 17:16

Daniyeli 2:44

1. Exeeni enrowa onikhaliherya owehaweha ni oxintta soweeha?

MOOHIPISA-VA, sinimwiiraneya itthu sootikiniha. Wiiraneya wa iprofesia, sinnooniherya wira itthu iyo sinookhumelela; nto nihaana ovikaniha owehaweha. Exeeni enrowa onikhaliherya owehaweha? Murummwa Paulo onnintumererya ovikaniha “otthara itthu sihinòneya”. Nihaana wuupuwelaka ntthuvelo nirina ahu na okumi woohimala, pooti okhala wiirimu, wala elapo ya vathi. Ntoko sinooniherya aya masu oopacerya a Paulo, owo aahaatumererya axinnawe olipiherya ohakalala onikhumelela mwaha wa waamini waya. Eyo yaamwaakhaliherya oxintta soweeha ni olupatthiwa.​—2 aKor. 4:8, 9, 16-18; 5:7.

2. (a) Wira nilipihe nlipelelo nahu, nihaana opaka exeeni? (b) Exeeni ninrowa ahu wiixutta mwa yoosoma ela ni yoosoma enittharelana?

² Moolumo oolopola a Paulo aakhalana malakiheryo ala: Wira nivarexexe nlipelelo nahu, nihaana owehaka itthu sa muhoolo ohiya sa vano. Niweheke itthu sinrowa okhumelela masi nlelo sihiniweheya. (aHéb. 11:1; 12:1, 2) Nkahaya nithokorerye itthu muloko sinkela wiiraneya sinooniherya nlipelelo nahu na okumi woohimala.a

EXEENI ENROWA WIIRANEYA OHINATTHI OMALA OLUMWENKU OLA?

3. (a) Etthu xeeni enkela wiiraneya elavuliwe mwa aTesalonika 5:2, 3? (b) Exeeni ahooleli eelapo ankela aya opaka, nto ti pani onkela waakhaliherya?

³ Sookhumelela sa muhoolo sinnilavuliwa ni ewarakha ya Paulo aalepenle awe aTesalonika. (Mmusome 1 aTesalonika 5:2, 3.) Owo aattittimihenrye ‘nihiku n’Apwiya’ Yehova. Nuulumo noowi nihiku na Yehova, onihimmwa okathi wa ohononiwa wa etiini yoowootha, mpakha okathi wa Harmagedoni. Masi, ohalaka okathi vakhaani ophiya nihiku nno, alamuleli eelapo anrowa ohimyaka wira: ‘nokhalana murettele n’ikumi [ovareleleya]!’ Waaniheryasa, sinimwiiraneya itthu sinceene wira olaleiwe murettele owo wa mulaponi. Maloko ankela woonaka wira ahanle omaliha mixankiho sikina suulupale sa elapo. Nto exeeni enkela waakhumelela ahooleli a itiini? Okhala wira anniira mpantta ni elapo, waaniheryasa anootakaahana ni akhulupale a epoliitika. (Wis. 17:1, 2) Ahooleli ala a itiini anrowa olikanaka ni maprofeta owootha oYudeya a khalai. Yehova onihimya wira: ‘awo aniira: murettele! murettele! [masi] murettele owo khokhanle’.​—Yer. 6:14; 23:16, 17.

4. Moovirikana ni atthu akina, exeeni hiyo enisuwela ahu?

⁴ Etthu yuulupale eniwehererya ahu khahiyo muthinto wa atthu ankela olaleyaka wira ‘nokhalana Murettele n’ikumi’; masi ori osuwela wira eyo ethoonyeryo ya opacerya wa nihiku na Yehova. Ti nthowa naya Paulo onihimya awe wira: ‘Nto nyuwo axinn’aka, khamunetta mwepiphini: tivó nihiku nlo nihotutuxeni ntoko nawiye. Tthiri nyuwo othene munkhala mowaryani’. (1 aTes. 5:4, 5) Moovirikana ni atthu akina, ninnisuwela saana Soolempwa ni itthu siniiraneya vano. Masi enrowa wiiraneya sai eprofesia ela ya olaleiwa ‘Murettele [ni ovareleleya]’? Nihaana owehererya wira noone. Tivonto, ‘nihirupé’ masi, nikhaleke ‘òlipelela ni wisumaliha’.​—1 aTes. 5:6; Sof. 3:8.

PWIYAMWENE OHINROWA OTTOTTELA MUREERELO OKATHI AWE

5. (a) Ankela opacerya sai “maxakha malupale”? (b) “Pwiyamwene ola onkela oyeleela sai okathi awe wowoopowa?

⁵ Etthu xeeni enrowa wiiraneya nlelo ehinooneya? Paulo onihimya so: ‘atthu yahimya wira: Nokhalana murettele n’ikumi! Vavo t’unìraya warwele opweteya nananoru’. Epantta yoopacerya ya masu ani: ‘tunìraya warwele opweteya nananoru’, masu awo, anihimya otupheliwa wa “Babilonia Mulupale”, eyo piiyo, etiini yoowootha eniihaniwa-tho ‘muthiyana namararuwa’. (Wis. 17:5, 6, 15) Otupheliwa iwo onkela ohonona itiini sotheene sowootha, ohela muhina maKristau owootha; nto yowiiraneya ela tenkela opaceriha “maxakha malupale”. (Math. 24:21; 2 aTes. 2:8) Yookhumelela ela enrowa waatutuxerya atthu anceene. Mwaha wa xeeni? Nthowa noowi muthiyana namararuwa ole onkela wiixoonaka ntoko “pwiyamwene” ohitonko “ohawa”. Masi, mowaakuveya onkela oweha wira ooyeleela okathi awe wotheene, ni khonrowa woopowa. Owo onkela opwetexiwa mowaakuveya, okhalaka wira opweteya iwo okhumelenle ‘nihiku nimosa’.​—Wis. 18:7, 8.

6. Tani onkela opwetexa etiini yoowootha?

⁶ Nuulumo na Muluku, ninninooniherya wira “nxeni” nirina “manyaka muloko” ti ninrowa omutuphela muthiyana owo namararuwa. Otokosa eliivuru ya Wisupulula, ennooniherya wira, nxeni wala mwaaxinama ola onitaphulela Nações Unidas (ONU). “Manyaka mulokó”, anithoonyerya ikuvernu sotheene sa epoliitika sinikhaliherya “nxeni noxerya”.b (Wis. 17:3, 5, 11, 12) Tthiri, otupheliwa iwo onrowa okhala wuulupale! Maloko awo anihooleliwa ni ONU, anrowa omwaakha mihakhu sawe, khumuhiya ahirina etthu, okhuura erutthu awe, nto enkela ‘ohala anopwetexa ni moro’. Ohononiwa wa Babilonia muulupale onrowa okhala woomalela.​—Mmusome Wisupulula 17:16.

7. Exeeni enkela wiiraneya okathi wa otuphela wuulupale wa “nxeni”?

⁷ Eprofesia ya Biibiliya ennihimya-tho wira otupheliwa onrowa okhala wuulupale. Yehova onkela ohela vamurimani va alamuleli a mulaponi ‘yotthuna’ ya Muluku wira emuhonone muthiyana ole namararuwa. (Wis. 17:17) Etiini yoowootha ennivikaniha okhalana nthowa mwaha wa wiirela mpantta ikhotto; tivonto okathi maloko ankela aya ohonona etiini eyo, ankela woonaka wira aniphavela okhapelela elapo. Tthiri alamuleli a elapo anrowa woonaka wira aniira ‘yotthuna aya’. Masi awo ankela wiiraka yootthuna ya Muluku; anrowa okhala ntoko ekaruma awe wira ehonone itiini sotheene sowootha. Nave-tho, mpantta mukina wa Satana onkela otuphela ekrupu ekina; masi Satana khonrowa oxintta.​—Math. 12:25, 26.

OTUPHELIWA WA ATTHU A MULUKU

8. Otuphela xeeni onkela okumiheriwa ni “Gogi a elapo ya oMagogi”?

⁸ Nuumala ohononiwa etiini yoowootha, arumeyi a Muluku anookhalana “murettele ni witthyala”, mmittettheni voohitthuneya makokoro wala ekintaali yoolipihiwa. (Ezek. 38:11, 14) Nto exeeni enrowa owiiraneela atthu a Yehova yaawo ankela okhalaka ntoko kharina nikhaliheryo? Arumeyi awo, anrowa otupheliwa ni ‘atthu anceene’. Nuulumo na Muluku ninnihimya moota anrowa aya otupheliwa ni “Gogi a elapo y’oMagogi”. (Mmusome Ezekiyeli 38:2, 15, 16.) Ninrowa woonela sai otupheliwa iwo?

9. (a) Etthu xeeni yuulupalexa maKristau anivaha aya efaita? (b) Nipakeke exeeni wira nilipihe nroromelo nahu?

⁹ Osuwela vahinatthi wira arumeyi a Muluku anrowa otupheliwa, ohinixankiheke vanceenexa. Mwaha woowi etthu yuulupale khahiyo woopowa wahu, masi ori otteelihiwa wa nsina na Yehova ni ovuwihiwa wa okhulupale awe. Tthiri, Yehova oolavula etthu yoovikanaka ikwaha 60 ariki: ‘Nyuwo munosuwela wira miyo k’Apwiya’ Yehova. (Ezek. 6:7) Masi, ninniwehererya vanceene wiiraneya wa eprofesia yuulupale eri muliivuruni ya Ezekiyeli, nikupaliki wira Yehova ‘Muluku onniwerya owakiherya sotakhala atthu òrera murima’, ni owoopola mwa soweeha. (2 Ped. 2:9) Nto, nihaana ottottela muraarelo okathi wotheene orina ahu wira nilipiheke waamini wahu wira niwerye okhala oororomeleya ohoolo wa Yehova pooti sikhumelelaka mixankiho. Nto vano niireke exeeni? Nihaana ovekelaka, osoma Nuulumo na Muluku ni wuupuwelelaka enisoma ahu, ni waalaleeryaka akina ihapari sa Omwene. Wira siiso, ninrowa olipiha nroromelo ni nlipelelo nahu na okumi woohimala ntoko “nankura” onlipiha ekalawa.​—aHéb. 6:19; Esal. 25:21.

MALOKO OTHEENE ANOOSUWELA WIRA OWO TTHIRI TI YEHOVA

10, 11. Ethoonyeryo xeeni enrowa wooniherya opacerya wa ekhotto ya Harmagedoni, nto exeeni enkela wiiraneya okathi owo?

¹⁰ Itthu xeeni sowoopiha sinrowa wiiraneya vaavo arumeyi a Yehova anrowa aya otupheliwa? Yehova onrowa omurumeela Yesu ni anakhotto awe a wiirimu wira ewaakihe atthu Awe. (Wis. 19:11-16) Yowiiraneya eyo tenrowa okhala “nihiku nulupale na Muluku Òwerya Sothene”, wala Harmagedoni.​—Wis. 16:14, 16.

¹¹ Voohimya sa ekhotto eyo, Yehova oolavula muliivuruni ya Ezekiyeli ariki: “‘Kinomuroihela Gogi ihasara sothene. Anihimya t’Apwiya. Anakhotto awe animwìvanana mukina ni mukhw’awe’”. Atthu yaale ari mpantta wa Satana, onookhumelela waakanyerereya, nto anakhotto aya epaceryeke owana yaaworu. Mpantta wa Satana onookhumelela onyakulihana ni waakanyereya wuulupale. Yehova onihimya so: “Kinoomurupihela yowo n’anakhotto awe othene n’atthu othene arina awe epula yulupale ntoko mutáseke ni maralala ni moro”. (Ezek. 38:21, 22) Etthu ela Muluku onkela awe opaka enrowa okumiherya exeeni?

12. Maloko anrowa okhanyereriwa opaka exeeni?

¹² Nto maloko tanrowa aya osuwela wira ohononiwa waya iwo okumiheriwe tthiri ni Yehova. Ntoko siiranen’ye aya ni anakhotto a wEjiitu, okathi yaalupattha aya anaIsarayeli elapuwaka Ephareya Yooxeerya; nave anakhotto a Satana anrowa okhuwela wira: Tthiri Yehova toniwana awaakihaka! (Okhum. 14:25) Moohaaniherya, maloko otheene anrowa okhanyereriwa osuwela wira owo tthiri ti Yehova. (Mmusome Ezekiyeli 38:23.) Vano tthiri ninnaattamela wanipacerya wa sowiiraneya iyo!

KHUUVO-THO OMWENE MUKINA WA MULAPONI ONROWA OKHUMELELA

13. Exeeni eniixutta ahu wa epantta ya neethanu ya elatarato etthokiheriwe ni Daniyeli?

¹³ Eprofesia eri muliivuruni ya Daniyeli enninikhaliherya osuwela okathi orya ahu vano. Daniyeli onnilavula sa elatarato epakiwe ni muthinto wa khula enamuna wa eyuuma. (Dan. 2:28, 31-33) Elatarato eyo enitaphulela ilamulelo siniruma ikuvernu sotheene sa mulaponi siniranttelana, seiyo saalamulenle arumeyi a Muluku okhuma khalai ni mahiku ala. Iguverno iyo tiiya: Babilonia, Medo-Persia, Grecia, Roma, ni eguverno ele yookiserya eri mahiku ahu ala. Eprofesia ya eliivuru ya Daniyeli ennooniherya wira metto ni ilipwi seiyo sinrowa opwexakasiwa, sinitaphulela eguvernu yeela yookiserya enilamulela olumwenku wotheene. Okhuma okathi wa Ekhotto Yoopacerya ya Olumwenku, elapo ya oBretanha ni wEstados Unidos yahataana vaalupale. Nto, epantta ya neethanu ya elatarato ya eprofesia ya Daniyeli, yaataphulela Anglo-Americana ekuvernu ya olamulela wa olumwenku wotheene. Vano wanikisa wa ilipwi, onitaphulela wira khiivo-tho eguvernu ekina, maana wanikisa wa elatarato. Okhala wira inawu iyo vamosa ni ilipwi sipakiwe ni eyuuma etakaaxeriwe ni oloko, enitaphulela ohilipa-lipa wa olamulelo wa olumwenku wotheene wa Anglo-Americana.

14. Eguvernu xeeni enilamulela olumwenku wotheene enkela ophwanyiwa okathi waHarmagedoni?

¹⁴ Eprofesia ela, ennihimya-tho sa Omwene wa Muluku, yoowo ori ntoko nluku nuulupale nenlo naakomonwe omwaako wa mukhulupale Yehova eyaakha ya 1914. Vano nluku nno nihanle opwexakasa inawu sa elatarato. Okathi wa Armagedoni, inawu ni elatarato yotheene enrowa onyakattiwa. (Mmusome Daniyeli 2:44, 45.) Nto, okathi Harmagedoni onirwa awe, eguvernu ya olumwenku wotheene enkela ophwanyiwa elamulelaka, ti Anglo-Americana. Tthiri enrowa okhala etthu yookuxa murima oweha yiiraneyaka eprofesia ela!c Nto exeeni Yehova onkela awe omwiiriha Satana?

EXEENI ENROWA OMWIIRANEELA NWANANI MUULUPALE A MULUKU?

15. Nuumala Armagedoni, exeeni enrowa omukhumelela Satana ni malaikha awe?

¹⁵ Wanipacerya, Satana ohaana oweha ni maitho awe okathi iguvernu sa olumwenku awe sinrowa aya opwexakasiwa okhuma wanipacerya mpakha wanikisa. Nto nuumala vo, tonkela awe ovinyeriwa. Murummwa Yohani onnihimya etthu enkela wiiraneya moottharelana. (Mmusome Wisupulula 20:1-3.) Yesu Kristu, yoowo ori ‘nlaikha nirina mihulelo sa mwepiphini mowíxa’, onrowa omutthukwa Satana ni malaikha awe, wira aarihele weepiphini woowiixa wira yakhale weiwo iyaakha ekonto emosa. (Luka 8:30, 31; 1 Yoh. 3:8) Nto yowiiraneya ela, ori opaceriwa wa onyakattiwa muru wa Satana.d​—Maph. 3:15.

16. Enrowa otaphulela exeeni Satana oriheliwa ‘mwepiphini mowixa’?

¹⁶ Nihiiwa wira Satana ni malaikha awe onkela oriheliwa mweepiphini moowiixa. Vano nuulumo noowi “mwepiphini mowixa” nintaphulelani? Nuulumo nirumeeliwe va na nttaava na eKriki noowi: a’bys sos, nintaphulela “nipuro nootepexa wiixerya vanceene”. Nuulumo nla ninnitaphuleliwa-tho so: “opuro ohiniphiyeya, ohikhalanne mukano”, ni ohinimala”. Nipuro nna khuuvo oniwerya ophiya voohikhala paahi Yehova ni mwanawe oothanliwa, yoowo ori nlaikha nirina ixaavi wala ‘mihulelo sa mwepiphini mowíxa’. Nlo nipuro onrowa awe otthukweliwa Satana ni malaikha awe, wira ehiweryeke-tho opaka itthu nnakhala ‘owototha atthu’. Nto, kharamu owo “onopa murukulu”, onrowa omaalihiwa!​—1 Ped. 5:8.

IYA TI ITTHU SINROWA OKUMIHERYA MURETTELE

17, 18. (a) Itthu xeeni sihinooneya nithokorenrye ahu mpakha va? (b) Nuumala ovira itthu iyo, okathi xeeni wa opuha onrowa okhumelela?

¹⁷ Sookhala sowiiraneya suulupale ni sooxankiha sinrowa okhumelela muhoolo. Niwehereryeke wira niwehe moota onkela aya olaleiwa ‘murettele’ owo. Nto nuumala vo, ninrowa onweha Babilonia Muulupale apwetexiwaka, ni otuphela wa Gogi a elapo ya oMagogi, nave-tho ophiya wa Harmagedoni. Nto, Satana ariheliweke weepiphini vamosa ni malaikha awe. Nuuvira itthu iya, ni omala-malihiwa wa sootakhala sotheene, tonrowa ahu ovolowa elapo esya, napaceriheke mweettelo wa okumi musya:—Olamulelo wa Iyaakha Ekonto Emosa wa Kristu, memmo onkela ahu opuha “murettele womalela”.​—Esal. 37:10, 11.

¹⁸ Ohiya itthu thanu nithokorenrye ahu mpakha va, sihaavo-tho ‘itthu sihinoneya’ sikina seiyo sintthuneya ahu okhala “òwehaweha”. Itthu iyo sinrowa othokoreriwa esumana enittharelana.

[Inoota]

[Ekaaxa epaaxina 9]

ITTHU THANU SINROWA WIIRANEYA:

1 Olaleiwa wa ‘Murettele ni okumi [ovareleleya]’

2 Maloko anrowa omuhonona ‘Babilonia Mulupale’

3 Otupheliwa wa atthu a Yehova

4 Ekhotto ya Harmagedoni

5 Satana ni malaikha awe anrowa otthukweliwa mweepiphini moowiixa