Miiriirya Sinrowa Wiiraneya Muhoolo
AAKHANLE wira mulipa-oniwooperari atthu oorummwa wira awoperarini, masi nyuwo khisuwela wira owo khotonko omooperari mutthu orina eretta yooxankiha mmoota owo, mwaarowa woonela sai? Tthiri mwaarowa okhala ooxanka. Ankhi aakhanle wira nyuwo moosuwela wira dotore owo onnisuwela saana muteko owo, nave ootoko owooperari atthu anceene yaarina eretta ntoko yawinyu masi nto atthu awo khupenuwa, mwaarowa okhala sai? Khimwaarowa omukupali wira tthiri onoowerya wookhaliheryani?
Olumwenku ola oryaahu onlikana ni oretta onitthuneya “operasau” muulupale. Arumeelaka Nuulumo nawe, Biibiliya, Yehova Muluku oolaiherya wira onoottikiherya Eparayiisu elapo ya vathi. (2 Pedru 3:13) Masi wira eyo yiiraneye, wanipacerya ohaana ovenxiwa moomalela sootakhala valaponi. (Esalimo 37:9-11; Miruku 2:21, 22) Mikhalelo sotheene sootakhala sinnihaaxa, sinrowa omala-malihiwa ehinatthi ottikiheriwa eparayiisu valaponi. Tthiri ola onrowa okhala mutikiniho muulupale wa mwiiriirya onlipelela ahu wiiraneya!—Wisupulula 21:4, 5.
Anamoona a Yehova annikupali wira mirukunuxo iya sinceene, sinrowa tthiri wiiraneya. Mwaha wa xeeni? Miiriirya Yehova Muluku opanke awe khalai, sinnooniherya wira owo ookhalana owerya wowaakhwaniherya anatiri awe. Nkawehani miiriirya thanu namosa paahi sinihimmwa mBiibiliyani sikhanle ntoko yoolaiherya ya muhoolo.
Nto, vikanihani osoma soolaiherya sa muhoolo siri mBiibiliyani. Vaavo muninnuuherya anyu waamini wanyu, nto nlipelelo nanyu ninrowa olipaka ni owehererya okathi woottottela mureerelo miiriirya Yehova onkela awe opaka.
[Ekaaxa/Ilatarato siri epaaxina 7]
MWIIRIIRYA:
YESU AHAAVAHA YOOLYA ATTHU IKONTO SINCEENE ARUMEELAKA IPHAU VAKHAANI NI IHOPA.—MATHEYO 14:13-21; MARKO 8:1-9; YOHANI 6:1-14.
YOOLAIHERYA:
‘Etthaya [enrowa] wimiha mihokorokho sowatta: Apwiya Muluku ahu anónireriha’.—ESALIMO 67:7.
ELE ENITAPHULELA AYA WA HIYO:
KHUUVO ONKELA OHAAWAKA MWAHA WA ETALA
MWIIRIIRYA:
YESU AAHITTHUKULA MAITHO A ALIPA-OOHOONA.—MATHEYO 9:27-31; MARKO 8:22-26.
YOOLAIHERYA:
“Mahiku awo anotthukuwa maitho àlipa òhona”.—YESAYA 35:5.
ELE ENITAPHULELA AYA WA HIYO:
ATTHU AHINOONA ANIMOONAKA.
MWIIRIIRYA:
YESU AHAAPENUXA ALIPA OORAKALA—MATHEYO 11:5, 6; YOHANI 5:3-9.
YOOLAIHERYA:
‘Alipa-òtuthunya anotupha ntoko nahe’.—YESAYA 35:6.
ELE ENITAPHULELA AYA WA HIYO:
ATTHU OTHEENE YAALE ARAKANLE ERUTTHU ENOOLOKA.
MWIIRIIRYA:
YESU AHIPENUXA IRETTA SA KHULA MUTHINTO.—MARKO 1:32-34; LUKA 4:40.
YOOLAIHERYA:
“Khavo-tho onkela ohimya wira: “Miyo ki muretta””.—YESAYA 33:24.
ELE ENITAPHULELA AYA WA HIYO:
IRETTA SOTHEENE SINIRAKALIHA, SINROWA OMALA-MALIHIWA. NTO, NINROWA OPUHAKA EKUMI YOOMALELA.
MWIIRIIRYA:
YESU AANIWERYA WEETTIHERYA ITTHU SEEPHATTU.—MATHEYO 8:23-27; LUKA 8:22-25.
YOOLAIHERYA:
‘Atthu awo anrowa oteka ipa saya, ekhaleke memmo: anrowa ophatteya miri s’evidera, elyeke mihokorokho saya: atthu aka animolya mihokorokho sihawenlya aya’.—YESAYA 65:21, 23.
‘Munrowa olipihiwa n’ihakhi n’ixariya: owanawana wothene onimomalelani, khivo-tho enrowa owopopihani; ovelavela wothene khunophwanyani-tho, khivo-tho enkelanyu wova’.—YESAYA 54:14.
ELE ENITAPHULELA AYA WA HIYO:
IHASARA SA EPHATTU SINOOMALA-MALA.
MWIIRIIRYA:
YESU AHAAHIHIMUXA ALIPA-OOKHWA.—MATHEYO 9:18-26; LUKA 7:11-17.
YOOLAIHERYA:
‘Atthu othene ari mmahiye . . . anokhuma mmahiye’.—YOHANI 5:28, 29.
“Ephareya yahahokoloxa atthu ale yakhwenle menmo. Okhwa n’ilapo y’alipa-òkhwa wahatthikiherya atthu yakhwiye yarinaya”.—WISUPULULA 20:13.
ELE ENITAPHULELA AYA WA HIYO:
AMUSI AHU ALE AKHWIIYE NAAPHENTA AHU ANOOHIHIMUXIWA.