Nyuwo Munnikupali Miiriirya Silempwe mBiibiliyani?
VAAKHANLE wira ohaavo mutthu oohimeeryaleni etthu emosa yookuxa murima, etthu yaarowa wookhaliheryani okupali enihimya awe waarowa okhala ororomeleya wa mutthu owo. Nto, ororomeleya wawe waarowa ohela mpuwa ohiya paahi moota ohimyale awe etthu ele, masi itthu sikina sinisuwela anyu sa mutthu owo. Ohiya vo, akhala wira okhuma khalai khonoottha ni khotonko woowokani, nto mwaarowa okupaliki etthu enihimya awe vano.
Etthu emosaru eyo enniiraneya ni miiriirya sa mBiibiliyani. Okathi siiraneya aya itthu iyo hiyo niira nihiyariwe. Masi hiyo pooti otokosa akhala wira myaha sa mBiibiliyani ti sekeekhai tthiri. Moota xeeni? Myaha iya sinttharelana sinnooniherya wira miiriirya sinihimmwa mBiibiliyani sihiiraneya tthiri.
Miiriirya sinceene siiraneya opuro wowaattiwa. Ikwaha sinci yaanikhala atthu anceene yaaweha miiriirya iyo siiraneyaka. (Okhuma 14:21-31; 19:16-19) Miiriira sa mBiibiliyani khisiiraneya wiiphiini siiraneya vanlakani.
Siiraneya mwa enamuna yookhweya. Miiriirya sa mBiibiliyani, khahiyo sakhala itthu soopakeleliwa wala wootthereya. Maana ikwaha sinceene, miiriirya sa mBiibiliyani, saaniiraneya okathi yoole atthu yahaalipelela aya wala nuumala atthu oveka. (Marko 5:25-29; Luka 7:11-16) Nto eyo enooniherya wira ole aapaka miiriirya iyo khahiyo wira ampaka palano.
Yaale yaapaka mitikiniho iyo khahiyo yaaphavela ovuwa, ottittimihiwa, wala ophwanya mihakhu. Masi, awo yaaphavela onvuwiha Muluku. (Yohani 11:1-4, 15, 40) Atthu yaale yaapaka mitikiniho ephavelaka othaaciri wala ovuwa, yaaniphukeliwa.—2 Mamwene 5:15, 16, 20, 25-27; Miteko 8:18-23.
Okhala wira mitikiniho sa mBiibiliyani ti sa mithinto soovirikana eyo enooniherya wira kahiyo saari itthu sa pinaatamu. Mwa ntakiheryo, ephareya ni epheyo yaahimaaleleya, maasi yaahithatuwa eviinyu, epula yaahimaala orupa, nave yaahipacerya orupa, atthu aniwereiwa yaanivonihiwa, yaahitthukuliwa maitho. Miiriirya sotheene iya, sinooniherya wira sookhala ikuru suulupalexa saakhaliherya wiiraneya wa mitiikiniho iyo.—1 Mamwene 17:1-7; 18:41-45; Matheyo 8:24-27; Luka 17:11-19; Yohani 2:1-11; 9:1-7.
Anamalupattha yaale yoonale miiriirya iyo, khiyaawerya okhootta wira iyo sihiiraneya tthiri. Okathi Yesu aamuhihimunxe awe mpatthani awe Laazaro, anatiini yaamulupattha Yesu, khiyaavaanya wira Laazaro ahookhwa. Yaarowa ovaanya sai? Maana Laazaro aahivithiwa khumaliha mahiku maxexe mmahiye. (Yohani 11:45-48; 12:9-11) Pooti nuumala Yesu okhwa ni khuvira iseekulu sinceene, alipa oolepa a aYuda a Talmud yaahivikaniha okupali wira tthiri Yesu aahikhalana ikuru sa opaka miiriirya. Etthu yaatikiniha yaari ela: Yesu aaphwanya woowi ikuru sene? Moolikanasa, okathi atthareli yaakohiwa aya ni etribunaali ya aYuda, awo khiyaakohiwe wira: “Munniwerya tthiri opaka miiriirya?” Awosa yaakohiwe so: ‘Owerya xeni walá nsina na wani mwiralyanyu itthu iya’?—Miteko 4:1-13.
Nto vano khamunikupali wira tthiri Biibiliya onnilavula sa miiriirya sekeekhai? Itthu niwenhe ahu, ethoonyeryo yuulupale yoowi Biibiliya onnilavula sa miiriirya seiyo siri sekeekhai. Aakhala-tho mathowa makina anniiriha okupali sowiiraneya sa mBiibiliyani. Mwa ntakiheryo: Okathi Biibiliya onihimya awe sa miiriirya, onnihimya-tho okathi ene, opuro, ni masina aatthu awo yaawiiranenle. Pooti atthu yaale aninvaanya Biibiliya, ikwaha sinceene annitikinihiwa okhala wira Biibiliya onilavula itthu sekeekhai ni soomalela. Iprofesia sinceene, sihiiraneya mwa enamuna yoomalela saana. Nave-tho, Biibiliya onnivaha miruku sa moota wowaathokorerya atthu akina, nto miruku iyo sihaakhaliherya atthu anceene ni a makhalelo oovirikana. Voohimya sa moota wowaathokorerya atthu akina Biibiliya ohooniherya okhala oovareleya muteko ovikana miruku sikina.
Akhala wira nlelo khamunimuroromela Biibiliya, mweererye omusoma ni ophavela omwiiwexexa saana. Nto vaavo vanitepa anyu osuwela saana itthu siri mBiibiliyani, nyuwo munootepaka omukupali Biibiliya. (Yohani 17:17) Nyuwo munooweha wira vanniweryaneya nyuwo ororomela ele enihimya awe sa miiriirya siiranen’ye khalai. Akhala wira munrowa okupali sowiiraneya iyo, nto munookhalana mathowa anrowa owiirihani ororomelaka itthu Biibiliya onihimya awe sinrowa okhumelela muhoolo.
[Elatarato epaaxina 5]
Anatiini yaamulupattha Yesu, khiyaavanya wira Laazaro ahookhwa