Niireke Vanniweryaneya Okhala Oororomeleya Elapo Ela ya Atthu Oohiroromeleya?
“Nimphavela wetta n’ixariya mwa sothene”.—AHÉBERI 13:18.
HATA niryeene atthu oottheka, nikhalaka elapo yoohiloka, ni Satana oneehereryaka opaka itthu soohiloka, vanniweryaneya hiyo ovaanyiha itthu iyo sotheene. Moota xeeni? Nimwaattamelaka Muluku ni ovarela muteko sooruma suulupale sa Nuulumo nawe, seiyo sinivareleya muteko okhuma khalai. Moone matakiheryo ala manli:
YOORUMA YUULUPALE YA BIIBILIYA: ‘Muhitthareke mwettelo wa elapo ela’.—aRoma 12:2, Biblya Exirima.
Etthu etonko wiiraneya: Guilherme, onikhala oBrasil, nto nakoso awe onnimweettela saana. Owo onneemya wira khivanikhweya okhala oororomeleya. Guilherme onilavula so: “Mutthu onimweetta nakoso mowaakuveya pooti opacerya owiiyerya atthu, woonasa wene mwaha woophavela ophwanya eluukru wala woova opwata mwaha wowaatta atthu animweetta nakoso mmoota owo. Atthu anceene khanuuleliwa muru ovaha makhwankwa. Akhala wira mutthu onoopacerya ovara muteko wala omweetta nakoso orina musurukhu munceene, mutthu onnoovelela opweteiwa musurukhu owo, tivonto vannivila mutthu okhala oororomeleya”.
Nnaamwi vavilaka, Guilherme oowerya okhootta sookhanyererya sa okhala oohiroromeleya. Owo onihimya so: “Hata opuro yoole atthu ahinuuleliwa aya muru oveka makhwankwa, vanniweryaneya mutthu ororomeleya. Wira eyo eweryaneye mutthu ohaana olipiherya opaka itthu sooloka. Biibiliya ookikhaliherya woona mureerelo onikhuma wa mutthu oororomeleya. Mutthu oororomeleya khanoova etthu, toomaaleleya ni onikhala oottittimiheya. Onniwerya owiixuttiha atthu akina makhalelo ooloka”.
YOORUMA YUULUPALE YA BIIBILIYA: “Ale antthuna wunjererya muhakhu aya annimorela vantaphani na xetwani, yehereriwaka ni sowupuwela sinjene s’ololo ni sotakhala: itthu sene seiyo sinnasamiha atthu mopweteyani ni mokhwani. Tthirí, ophenta musurukhu t’iphattuwelo ya sotakhala sothene. Atthu akina yaphavelenxe musurukhu ahapuwela ottaiwene ni wamini khwihaxa mmansaya ni masoso malupale”.—1 Timótheyo 6:9, 10.
Etthu etonko wiiraneya: André ookhalana empresa awe eninstalari itthu ntoko alarme, ikaamera ni itthu sikina sinikhapelela enupa. Mwa makiliyenti awe anceene ohaavo mmosa orina eklube yuulupale ya mphira. Nihiku nimosa nuumala wiiriwa xooku muulupale, André aahirowa oxikritoorio wa eklube ele khuvahererya elista ya musurukhu aarowa awe oliviwa mwaha wa muteko aavanre awe. Edepartamento enithokorerya musurukhu yahaatteliwa muteko okhala wira yaakontari musurukhu waaphwanyiwe nuumala otumihiwa ibilheti. Nto okhala wira vahiila, aakuveyaka xeefi aahaaliva otheene yaaphavela oliviwa, omuhela muhina André.
Nto André onihimya so: “Kirowaka owaani kahoona wira musurukhu aaliviwa aka ni xeefi ole, waahivikana ni ole aavarihanne ahu. Kaanisuwela wira waaniheryasa xeefi ole khaarowa osuwela ti pani aakuxale musurukhu ole. Masi kansuwela-tho wira xeefi ole ahaana okumiha mbolsani mwawe wira oliverye musurukhu aavahereriwa aka! Tivonto kahoona okhala wooreera otthika ni onvahererya musurukhu ole. Kahiimananiha wiiphunyeerya wira kivire eriyari ya muttitthi wa atthu yaarwaale onweha mphira, kaahivira khuttikiha musurukhu ole. Xeefi ole aahitikinihiwa vanceene mwaha wokoona kittikihaka musurukhu ole. Khuuvo aatonko omuttikiherya musurukhu”.
André onivikaniha ohimyaka so: “Omuttikiherya musurukhu wahimwiiriha xeefi ole okittittimiha, nuumala ovira iyaakha sinceene, mwa atthu otheene yaarwa ovara muteko miyo kihanle kirina ene ekontrato ya muteko. Ela ehiiraneya mwaha woovarela muteko malakiheryo maalupale a Biibiliya, nto eyo yoowiiriha atthu akina okoonaka okhala mutthu oororomeleya”.
Ti voohakalaliha osuwela wira weemya okhaliheriwa ni Muluku ti etthu enrowa onikhaliherya okhootta mweettelo woohixariya wa elapo ela. Masi wiimananiha wa mutthu mmosa paahi khonrowa omaliha muxankiho ola. Maana ahaavo mathowa maalupale ootepexa wunnuwa, tivonto hiyo apinaatamu oottheka khanniwerya omaliha ekhihiru. Nto niireke ovekeliwa makhwankwa khonkhala-khala omalaka? Muru wookiserya mmwaha ola onithokorerya ahu onnooniherya waakhula woohakalaliha wa Biibiliya.