Xeeni Atthu Anivikaniha Aya Ophavelaka Makhwankwa?

‘Akhala anihawa epuheriwaka ni atthu arina owerya’.​—MUSUWELI 8:9.

MOOLUMO ala anihimya etthu eniiraneya mwa olamulelo wotheene wa apinaatamu. Opuheriwa wookumiherya ohaawa ni osikhini wuulupale. Okhuma khalai, atthu ooreera murima yaale animananiha waakhaliherya atthu oohaawa, annilupatthiwa ni atthu a nrima ni makhwankwa. Xeeni eyo wiiraneyaka? Xeeni atthu anivikaniha aya ophavela makhwankwa? Eyo enniiraneya mwaha wa itthu iya tthaaru:

1. Sookhanyererya sa erutthu ahu yoottheka.

Biibiliya onnihimya saana wira atthu ‘otheene t’ottheka’. (aRoma 3:9) Ntoko oretta wooyaraniwa, etampi “enkhala” mwa hiyo. Okhuma khalai etampi ehooniherya owerya waya elamulelaka ntoko mwene wa apinaatamu. Owerya wa etampi onniweettiha atthu otheene. Tivonto etampi enniwiiriha atthu anceene ophavelaka mureerelo aya paahi, ophavelaka okhalana itthu sinceene ekhaya paahi, aahiiso waanyakelaka akina wira ephwanye ekhulupale.​—aRoma 5:21; 7:17, 20, 23, 25.

2. Sookhanyererya sa elapo ela yootakhala enikhala ahu.

Elapo ela enikhala ahu yoosareya ananrima ni atthu oowiitthuna. Tivonto atthu akina annoona ovila okhala mutthu oovirikana ni atthu awo. Yeettihiwaka ni nrima naya, atthu awo annitepa ophavelexa ekhulupale. Ohiya-vo, hata arineene itthu sinceene, awo annivikaniha ophavela ophwanya musurukhu ni itthu sikina. Tivonto, moothananiha khanuuleliwa muru oveka makhwankwa wira aphwanye itthu iyo siniphavela aya. Mwaha wohikhootta sookhanyererya iyo soohiloka, atthu awo anuupuwela so: “atthu othene anira sisa!”.​—Okhuma 23:2.

3. Sookhanyererya sa Satana Diabo.

Satana, yoowo ommwarenle Muluku, ‘onniwototha atthu othene’. (Wisupulula 12:9) Owo onnimananiha oweettiha apinaatamu. Nuumala osuwela wira mutthu onniphavela okhalana mihakhu ni itthu sikina sooreera sa werutthuni, owo onniwerya omwiiriha mutthu ophavelaka waawoka akina.

Nto niireke eyo enitaphulela wira hiyo khaninwerya okhoottela miteko sa Satana, nihimye so, niireke hiyo niri ntoko arumeyi a Satana? Nnaari! Mwaha onittharelana onnikhaliherya osuwela nthowa naya.