Makhwankwa Anoomala!

“Mwaroromeleke Apwiya, mwiweleleke soruma saya . . . munowona alipa-òtakhala epweteyaka”.​—ESALIMO 37:34.

NIIREKE nyuwo muri ntoko atthu yaale anoona wira makhwankwa khantthyaweya ni khuuvo onrowa omaliha? Akhala wira owo tori moonelo anyu, eyo etthu yookhalela. Maana okhuma khalai apinaatamu aheererya khula muthinto wa eguvernu. Masi khawenrye omaliha khuluwi makhwankwa. Nto yookhala etthu ekhanle ahu oowehererya wira onoophiya okathi atthu otheene anrowa okhala oororomeleya?

Moohakalaliha, Biibiliya onnaakhula oriki aayo! Biibiliya onihimya wira Muluku onrowa omala-maliha ohixariya vamosa ni makhwankwa. Nto onrowa opaka sai? Onrowa orumeela Omwene awe, eguvernu ya wiirimu, eyo enrowa opaka mirukunuxo suulupale valaponi. Omwene owo ti yoole Yesu awiixuttihale awe atthareli awe wira avekeleke. Mwa ele enihimmwa okhala ovekela wa Apwiya wala wa Tith’ihu, Yesu aahimyale so: “Munnuwihe omwene anyu mulaponi mothene, otthuna wanyu wireye”.​—Matheyo 6:10, Biblia Solempwa sa Muluku.

Voohimya sa Yesu Kristu, yoowo onrowa Olamulelaka Omwene owo Biibiliya onihimya so: “Owo onrowa owòpola alipa-òhawa animukhuwelela: onowòpola òthoiwa ahinimona òwakiha. Onimwamorela ikharari alipa-òthanyiwa: onowòpola atthu òhawa ni òwiyeviha. Onowakiherya òlupatthiwa ni òpuheriwa”. (Esalimo 72:12-14) Muhaana woona wira Yesu onniwoonela othunku ale anipuheriwa, nto onrowa opaka etthu wira omalihe opuheryana! Munoonela sai, niireke eyo khahiyo etthu yoreera?

Nto omurumaka Mwene owo oomoriwa ikharari ni akuru, Omwene wa Muluku onrowa omaliha khuluyi makhwankwa valaponi. Moota xeeni? Omalamalihaka itthu iya tthaaru sinikumiherya makhwankwa seiye sithokorenrya ahu wanipacerya.

Sookhanyererya sa Erutthu Ahu Yoottheka

Nenna va otheene ahu nihaana owanana ni soophavela sa murima ahu woottheka seiyo sinniiriha opakaka itthu sa nrima. (aRoma 7:21-23) Masi, nlelo aakhala atthu aniphavela opaka itthu sooloka. Atthu awo annaamini yowoopola ya ephome emwarexiwe ya Yesu, ni anniphwanya oleveleliwa soottheka saya.a (1 Yohani 1:7, 9) Atthu awo tanrowa ottottela mureerelo ophenta wuulupale wa Muluku ntoko sinisoma ahu va Yohani 3:16: ‘Vekekhai, Muluku ahaphentexa atthu mpakha wavaha Mwana awe mmosene, wira othene ale animwamini yowo, ehirimelé, masi ekhalane ekumi ehinimala’.

Wa atthu yaale ari oororomeleya, Muluku tthiri onrowa opaka etthu yoohakalaliha. Nto elapo esya enirwa Muluku onrowa omaliha itthu sotheene sinniiriha ottheka, nto ohoolo waya onrowa waakhaliha apinaatamu otheene oomalela wira yeetteleke saana exariya. (Yesaya 26:9; 2 Pedru 3:13) Okathi owo khiivo yoottheka enrowa owiirihaka atthu ophavela makhwankwa. Alamuleliwaka ni Omwene wa Muluku, apinaatamu oororomeleya anrowa “wòpoliwa mwakhalihiwaya ipottha” sa yoottheka.​—aRoma 8:20-22.

Sookhanyererya sa Elapo Ela Yoohiloka Enikhala Ahu

Mooriipiha murima, moolakelela olelo atthu anceene anniwiiyerya akhwa aya. Awo annaapuherya atthu oowiiyeviha ni oohaawa, ohiya-vo, annaatumererya akina opaka etthu emosaru eyo. Tivonto Biibiliya onaalopola awe atthu awo: ‘Atakhali ehiyeke iphiro saya: alipa-òttheka erukunuxe mirima saya’, akhala wira atthu awo anoottharuwa, Biibiliya onileiherya wira Muluku ‘onimwakuva walevelela’.​—Yesaya 55:7.

Masi voohimya sa atakhali yaale anikhootta orukunuxa makhalelo aya, Muluku khorina yothanla ekina ohikhanle waapwetexa. Biibiliya onihimya wira sooleiherya sa Omwene wa Muluku sinrowa wiiraneya tthiri, maana onihimya so: ‘Mmuroromeleke Yahvéh ni mwetteleke ephiro awe’ munowoona alipa-ootakhala epweteyaka.b (Masalimo 37:34, Biblya Exirima) Nuumala opwetexiwa ale ahimphavela ottharuwa, nto atthu oororomeleya a Muluku, khanrowa-tho opuheriwaka.

Sookhanyererya sa Satana Diabo

Namattheka muulupale wa anamattheka othene ti Satana Diabo. Tthiri ninnihakalala osuwela wira moohipisa, Yehova onkela omutthukhwela Satana wira ahaawokeke apinaatamu. Muhoolo mwaya, Muluku onrowa ompwetexa Satana. Nto khonrowa okhala-tho mutakhali wira awiiriheke atthu opaka itthu soohiloka.

Tthiri, vankhala voovila wuupuwela wira Muluku onrowa ovenxa sootakhala sotheene siniwiiriha atthu ophavelaka makhwankwa. Tivonto nyuwo pooti okohaka so: ‘Niireke Muluku onoowerya tthiri opaka mirukunuxo iyo?’ Akhala wira ti siiso, xeeni ahaapaka awe khalai? Awo makoho ooloka, nto Biibiliya onnaakhula makoho awo.c Ninnoolattulani wira mmutokose Biibiliya ni moone ele eniixuttiha awe enkela wiiraneya muhoolo, vaavo itthu sotheene sinrowa aya okhala isya.

[Inoota]