Nikoho 3: Xeeni Muluku Onikihiya Awe Kihaawaka?

Paapa awe Ian aari mutthu ootepa ohapaliwa. Nnaamwi Ian aayariwe etthoko yaarina itthu sinceene, mwaha wa paapa awe okhala namuhapaliwa, Ian khaawerya ohimya itthu sa vamurimani sareerela omuleela paapa awe. Ian onihimya so: “Nkaaphavela-tho owoona apaapa, vanceenexa mwaha wa moota aamuhaaxa awe maama aka”. Nto okathi Ian annuwa awe owo aahipacerya ohikupali akhala wira Muluku ookhala tthiri. Owo uupuwela so: “‘Akhala wira Muluku ookhala tthiri, nto xeeni onaahiya awe atthu ahaawaka’”.

Exeeni enimwiiriha mutthu okohaka siiso? Nnaamwi nyuwo muhirina mixankiho, munnoona othunku vaavo vanaaweha anyu atthu akina ahaawaka. Masi okathi yoole onniphwanya aya mixankiho aahiiso owereiwa wala okhwa mmusi ihu, ntoko siiren’ya aya ni Ian, hiyo pooti woonaka okhala vootepa otthuneya waakhuliwa wa nikoho nlo.

Nto atthu akina anakhula sai? Atthu akina anikupali wira Muluku onneemya wira atthu ahaaweke ophavelaka oniixuttiha wira nikhaleke oowiiyeviha ni oomoriwa ikharari. Akina anikupali wira apinaatamu annihaawa mwaha wa itampi sa okumi wa khalai.

Nto waakhula mmoota owo onikumiherya exeeni? Onniwiiriha atthu woonaka wira Muluku khoniwoonela othunku apinaatamu anihaawa, ni wira toovila omphenta ni ootakhala.

Nto Biibiliya Oniixuttiha Exeeni? Biibiliya onnitthokiherya saana wira Muluku khahiyo tonikumiherya ohaawa wa apinaatamu. Maana onihimya so: “Ole onehereriwa ahihimyé wira: “Muluku t’onkehererya”. Tthiri Muluku khanwerya wehereriwa, yowo mwanene khanimutthekiha mutthu”. (Yakobo 1:13, Bibliya Solempwa sa Muluku) Tthiri muupuwelo owo oowi Muluku tonikumiherya ohaawa wa apinaatamu khonivarihana ni ele Biibiliya oniixuttiha awe voohimya sa makhalelo ooreera a Muluku. Moota xeeni?

Ophenta ori mukhalelo mmosa muulupalexa wa Muluku. (1 Yohani 4:8) Wira ottittimiherye eponto eyo, Biibiliya onihimya wira Muluku ookhalana moonelo onlikana ni maama onimwaamwiha mwaana. Muluku onikoha so: ‘Muthiyana ommwamwiha mwan’awe onowerya omuliyala, yowo ori ephome awe? Vano, onamwi owo amuliyalaka mwan’awe, miyo nkinoliyalani, nnákhala vakhani”. (Yesaya 49:15) Niireke vannikhalela maama oophenta, olakelela omukumiherya owereya mwanawe? Namuyari yoole onimphenta mwanawe onnimananiha omwaakiherya itthu sootakhala. Mmukhalelo mmosaru owo, Muluku khonaakumiherya atthu maxakha.​—Maphattuwelo 18:25.

Masi etthu enooneya tiila: atthu ahirina mulattu annihaawa. Tivonto nyuwo pooti okohaka so: ‘Akhala wira onninthokorerya ni toowerya sotheene, nto xeeni vahinimaliha awe itthu sinikumiherya maxakha?’

Muluku ookhala etthu yooloka enimwiiriha Muluku ohiya ohaawa ovikanihaka. Nrowe nithokorerye etthu emosa paahi: Ikwaha sinceene apinaatamu tanaakumiherya maxakha akhwa aya. Atthu anceene anahaaxa akina khaniphavela ohiya mweettelo aya wootakhala. Nto wira Muluku omalamalihe itthu sinceene sinikumiherya maxakha, ohaana waapwetexa atthu awo ootakhala.

Otthokiheryaka etthu enimwiiriha Muluku nlelo ohaapwetexa atakhali, murummwa Pedru aalempe so: ‘Apwiya khanipisa omaliherya itthu sinihimyaya: ale anivanya etthu ila annivonya. Vano Muluku onnovilelani nyuwo, mana khantthuna wira mutthu apweteye, nnákhala mmosá. Ontthuna wira atthu othene erukunuxe murima’. (2 Pedru 3:9) Nto waavilela wawe atakhali onooniherya moota Yehova sirya awe ootepa ophenta.

Masi, moohipisa Yehova Muluku onolokiherya itthu. Owo ‘onimwaliva ni sohawa ale anahaxa’ atthu ahirina mulattu. Nto ale anaakumiherya maxakha akhwa aya moohireerela, ‘anopweteya wohimala’.​—2 aTesalonika 1:6-9.

Ian yoole omuhimyale ahu wanipacerya, aahiphwanya waakhuliwa woohakalaliha voohimya sa ohaawa onaakhumelela apinaatamu. Nto etthu yaaxuttale awe yaahirukunuxa moonelo awe voohimya sa ekumi.

Soohimmwa sikina sa nthowa naya Muluku onaahiya awe apinaatamu ahaawaka ni ele enrowa awe opaka, nwehe muru 11 wa eliivuru Biibiliya Oniixuttiha Exeeni Tthiri? Enniweryaneya-tho obaxari va www.jw.org

[Elegenda eri epaaxina 9]

Yesu Aahimyale Exeeni sa Ohaawa wa Apinaatamu?

Yesu khanvahale nthowa Muluku oriki tonikumiherya ohaawa woonale awe. Moovirikana ni eyo, Yesu aapakale itthu iya.

Yesu aahooniherya wira Muluku khonaahukhumu aakumiheryaka maxakha atthu ahirina mulattu. Yesu ahaapenuxa aretta, atthu oorakala, ni alipa-ohoona. (Matheyo 15:30) Miiriirya saapakale awe sinniixuttiha itthu piili suulupale sekeekhai: Yoopacerya, Yesu aahirumeela ikuru sa Muluku wira omalihe ohaawa, ohiya okumiherya ohaawa. Ya nenli, Yesu khaapenunxe atthu awo murima awe ohikhanle vaavo. Okathi aawoona awe atthu ahaawaka, owo “ahimoriwa ikharari”. (Matheyo 20:29-34) Tthiri Yesu ahooniherya saana moonelo wa Tiithi awe. Tivonto mwa ele Yesu aaxuttihale awe ni aapanke awe, ninniixutta wira Muluku onniwoonela othunku atthu anihaawa, ni wira onnoona ni onniphavela omala-maliha maxakha awo.​—Yohani 14:7, 9.

Yesu aahooniherya wira maxakha manceene anaaphwanya apinaatamu anikumiheriwa ni Satana Diabo. Yesu aahimmye so: “Owo ti mulipa-òwiva okhuma wopajeryani”. (Yohani 8:44) Yesu aahooniherya-tho wira Satana Diabo ‘toniruma’ wala olamulela olumwenku ola, ni ‘onniwototha atthu othene’.​—Yohani 12:31; Wisupulula 12:9.

Yesu oonivaha nlipelelo wira onoophiya okathi ohaawa wotheene onrowa aya omala. Yesu aahiwiixuttiha atthareli awe olompa so: “Tith’ihu, muri wirimu, . . . otthuna wanyu wireye ntoko wirimu siso vathí-va”. (Matheyo 6:9, 10) Nto nuumala orwa Omwene wa Muluku, khanrowa okhala-tho maxakha valaponi, ntoko siisaale wirimu ohikhanle aya maxakha.

Wisupulula wooniheriwe murummwa Yohani, Yesu aahihimya moota okumi sinrowa aya okhala mOmweneni mwa Muluku. Okathi owo, Muluku “onopuputtha maithori aya othene: khunrowa okhala-tho okhwa, nnákhala oripiwa murima, walá wunla nnákhala ohawa. Tthiri olumwenku wa khalayi wovira”.​—Wisupulula 1:1; 21:3, 4.