Mwiixutte Ele Nuulumo Na Muluku Enihimya Aya

Niireke Muluku Onookumiherya eGuvernu Enrowa Olamulela Olumwenku?

Mwaha ola onaakhula makoho yaale woonasa wene atonko anyu opaka, ni onowooniheryani opuro onaakhuliwa aya mBiibiliyani. Anamoona a Yehova vanimwaasivela owooniheryani waakhuliwa waya.

1. Xeeni vanitthuneya aya eguvernu emosa olumwenku wotheene?

Mahiku ala mixankiho sa apinaatamu soosareya olumwenku wotheene. Ilapo sikina, atthu anceene amasikhini ni annihaaxiwa. Masi mapuro makina, anamunceene aakhalana mihakhu sinceenexa. Wira vaweryaneye okaiwa saana mihakhu, enitthuneya eguvernu eniwerya okhapelela olumwenku wotheene.​—Mmusome Musuweli 4:1; 8:9.

2. Tani oniphwanela ororomeliwa olamulela olumwenku wotheene?

Khivaniweryaneya pinaatamu, mulopwana wala muthiyana olamulela saana olumwenku wotheene. Khuuvo aarowa okupaliwa ni atthu otheene. Khuuvo pinaatamu namalamulela aarowa owerya okhootta wixinnuwiha. Tthiri etthu yooriiriha erutthu omuupuwela pinaatamu ootakhala olamulelaka olumwenku wotheene.​—Mmusome Miruku 29:2; Yeremiya 10:23.

Yehova Muluku oomuthanla Mwanawe, Yesu, wira aalamuleleke apinaatamu okathi woohimala. (Luka 1:32, 33) Yesu ootoko okhala valaponi-va. Aryeene valaponi, ahaapenuxa aretta, owiixuttiha atthu oowiiyeviha, ni aanilavula ni anamwane. (Marko 1:40-42; 6:34; 10:13-16) Tivonto Yesu onniphwanela okhala Mwene.​—Mmusome Yohani 1:14.

3. Niireke vanooloka okhalana mulamuleli mmosa molumwenkuni?

Muluku oomuthanla Mwanawe wira alamuleleke elapo aryeene wiirimu. (Daniyeli 7:13, 14) Ntokoni siisaale apinaatamu anilamulela valaponi ahinitthuneya aya ophiya khula nipuro anilamulela aya, nave Yesu khanitthuneya okhala valaponi wira aalamuleleke apinaatamu.​—Mmusome Matheyo 8:5-9, 13.

Niireke atthu otheene anoomweemya Yesu okhala Mwene? Nnaari. Atthu aniira sooloka paahi tanrowa omweemya. Yehova onimwaahonona valaponi atthu otheene animukhootta Mwene ola othanliwe a xariya ni oophenta.​—Mmusome Matheyo 25:31-33, 46.

4. Mwene ola a olumwenku wotheene onkela opaka exeeni?

Ntoko makampusi onikukhula ipwittipwitthi sawe, Yesu nenla-va onaathukumanya atthu a maloko otheene ni owiixuttiha iphiro soophenta sa Muluku. (Yohani 10:16; 13:34) Nto atthu awo annisiveliwa omukhaliherya Yesu ni omwene awe. (Esalimo 72:8; Matheyo 4:19, 20) Olumwenku wotheene, atthareli oororomeleya a Yesu mowiiraana annilaleya wira Yesu ti Mwene.​—Mmusome Matheyo 24:14.

Moohipisa, Yesu onkela owoopola atthu maxakha a olamulelo wa apinaatamu. Owo ohaathanla atthareli awe ankela omukhaliherya wira yalamuleleke ni Yesu wiirimu. (Daniyeli 2:44; 7:27) Omwene wa Yesu onoosariha elapo yotheene osuweliwa Yehova, ni opaka eparayiisu enlikana ni yeele erimenle woopaceryani wa apinaatamu.​—Mmusome Yesaya 11:3, 9; Matheyo 19:28.

Nwehe-tho muru 8 wa eliivuru ela epakiwe ni Anamoona a Yehova. Biibiliya Oniixuttiha Exeeni Tthiri?