Tani Ori Mwene a Omwene wa Muluku?

• Othanliwe ni Muluku. “Ti miyo kimuthanlale mwené aka . . . Mukivekele: miyo kinimovahani atthu a maloko othene: elapo yothene enrowa okhala yawinyu”.—Esalimo 2:6, 8.

• A nloko na Mwene Davidi. “Noyareliwa mwana mwamulopwana: novahiwa mwanamwane. . . . Owo onokilathi vehijeni va Davidi, àrumaka atthu awe. Owerya wawe onimunnuwa: murettele onruhawe khunrowa omala-tho. Owo ontthuna okhaliha n’ulipiha omwene”.—Yesaya 9:5, 6.

• Oyariwa oBethelehemu. “Nyuwo oBethelehemu . . .  nyuwo munrowa okiyarela ole ontthuna owettiherya atthu . . . Maloko a mulaponi mothene anrowa osuwela ovuwa wawe”.—Mikeya 5:1, 3.

• Okhoottiwa ni wiiviwa. “Owo anithanyiwa, ari esapalá y’atthu: . . . Owo ohaxeriwe mwaha wa sottheka sahu: onyakatteliwé mwaha wa sotakhala sahu”.—Yesaya 53:3, 5.

• Ohihimuxiwa ni ovuwihiwa ni Muluku. “Khamunkihiya mmapuroni mw’alipa-òkhwa: khamunihiya erutthu ya murumeyi anyu yinttaka mmahiye. . . . Munnikitteliha murima vanjene . . . mahiku othene”.—Esalimo 16:10, 11.

Yesu Kristu Onniphwanela Olamulela

Okhuma vaavale apattuxiwe aya apinaatamu, mutthu mmosa paahi toniphwanela okhala Namalamulela, mutthu ene ti Yesu Kristu. Ohiya-vo, nlaikha naahimuleela Maria, maama awe Yesu wira: “Apwiya Muluku anonvaha omwene wa Davidi, tiithi awe. . . . Omwene awe khummala-tho”.—Luka 1:31-33.

Yesu khonakhale namalamulela a valaponi. Tthiri onrowa waalamulelaka apinaatamu ori ene wiirimu ntoko Mwene a Omwene wa Muluku. Xeeni ohimyaka wira Yesu onniphwanela olamulela? Xontte, nwehe ele aapanke awe okathi aari awe valaponi.

• Yesu aanaathokorerya atthu. Yesu aanaakhaliherya atthu otheene, alopwana, athiyana, anamwane, atthu oowuuluvala, athaaciri ni atthu oohaawa. (Matheyo 9:36; Marko 10:16) Okathi omosa namakuttula aahimuxonttela oriki: “Mwatthuná vale, munowerya okireriha!” Nto Yesu aahimoonela othunku ni aahimpenuxa.—Marko 1:40-42.

• Yesu aahiixuttiha moota woomusiveliha Muluku. Yesu aahimmye so: “Khamunwerya omurumela Muluku vamosá ni Muhakhu”. Nave musuweleke wira Yesu aahiixuttiha wira nihaana waathokorerya atthu ntoko nimphavela ahu othokoreriwa. Ohiya-vo, Yesu aahooniherya wira Muluku onnivaha efaita ohiya paahi ele nimpaka ahu, masi-tho moonelo ni muupuwelo ahu. Nto, wira nimusiveliheke Muluku, nihaana osuwela okasoopa ele nnuupuwela ahu. (Matheyo 5:28; 6:24; 7:12) Nave Yesu ooniixuttiha wira naphavela ohakalala wekeekhai, nihaana osuwela ele Muluku oniphavela awe wira nipakeke ni nihaana omwiiwelela.—Luka 11:28.

• Yesu aahooniherya ele entaphulela aya waaphenta atthu akina. Moolumo ni miteko sa Yesu saahikhalana owerya wuulupale woovara mirima sa atthu. Biibiliya onihimya so: “Atthu othene yahitikinihiwa n’uwixuttiha wawe. Tthiri, owo aniwixuttiha ntoko mwanene molumo”. (Matheyo 7:28, 29) Yesu aahimmye so: “Mwaphenteke awanan’inyu”. Tthiri Yesu aahaavekelela atthu akina yaamwiivale, oriki: “Tithi, mwalevelele, okhala wira khansuwela sinìraya”.—Matheyo 5:44; Luka 23:34.

Yesu onniphwanela okhala Namalamulela mwaha woowi tooreera murima ni onnaathokorerya atthu. Masi, onrowa opacerya silini olamulela valaponi?