‘Anamurwa Ni aletto’ Anniiraana Mwa Okokhorela Wekeekhai
‘Amalapo animorwa worumelani ni wolimelani imatta sanyu. Vano nyuwo munrowa wihaniwaka ‘Anamukuttho’, a Yehova.—YES. 61:5, 6.
MWAAROWA WAAKHULA SAI?
Anamunceene anoonela sai nuulumo noowi ‘namurwa’ wala mmalapo, nto moonelo owo onivirikana sai ni Biibiliya?
Nlattulo xeeni ninvahiwa atthu a maloko otheene?
Exeeni eniiraneya enooniherya wira ninniirela mpantta wa elapo ehikhanle anamurwa?
1. Atthu akina aniwoonela sai anamurwa, masi xeeni moonelo owo oryaaya woohiloka?
NTOKO sihimmwale aya mmwaha ovinre, atthu annirumeela moolumo oowi anamurwa wala ‘amalapo’, mmukhalelo woohiloka, woonyohola, oniwiiriha anamurwa ohooneliwaka vatthu. Etthu yoohiloka owoonaka atthu yaale anikhuma elapo ekina arwaaka elapo enikhala ahu okhala oohifai. Ohiya-vo, muupuwelelo owo onooniherya osuwela ekeekhai voohimya sa mapattuwelo ahu. Atthu awo khanicalela moota apinaatamu akhumelenle aya. Eliivuru emosa The Races of Mankind, eni: ‘ekeekhai voohimya sa maloko wala iraasa sotheene sa apinaatamu eri mBiibiliyani nto otheene ari anna’ Atthu ayariwe etthoko emosa pooti okhala oovirikana, masi, nlelo awo annisuwela wira amusi.
2, 3. Yehova oniwoonela sai anamurwa a ilapo sikina?
2 Khula opuro onikhala ahu ninkhala vamosa ni atthu ari anamurwa. Eyo yaahiiraneya ni anaIsarayeli, yaawo mwaha wa Nlamulo na nivarihano, yaarina wataana wa va-meekhaaya ni Yehova Muluku. Nnaamwi anamurwa, yahaarina ihakhi sotheene, anaIsarayeli yaahivahiwa nlamulo wira yaattittimiheke anamurwa awo. Tthiri nla ntakiheryo nooloka otthara! Wa maKristau ekeekhai khuuvo oneemereriwa waanyokha wala waahaaxa anamurwa. Mwaha wa xeeni? Murummwa Pedru oni: “Vano kosuwela orattene wira Muluku khanathanla atthu. Tthiri Muluku onnaphenta atthu a nloko ti nloko, yale animuttittimiha, enettela exariya”.—Miteko 10:34, 35.
3 Anamurwa okathi wa Isarayeli, yaanittottela mureerelo wataana waya ni anaIsarayeli. Nto ninnoona wira Paulo aarina moonelo wa Yehova vaavo aakonhe awe wira: ‘Muluku ta aYuda pahi’? Owo khahiyó-tho Muluku a amalapo? Vekekhai, Muluku ta amalapo-tho.—aRom. 3:29; Yow. 2:32.
4. Xeeni vanihimmwa aya wira Isarayeli a Muluku, khaavo namurwa wala mmalapo?
4 Orweela wa wataana wa niinaano, muloko wa maKristau owoottihiwa, aaranttela nloko na Isarayeli a khalai, nenle naarina wataana wa vameekhaaya. Nto awo, vano taniihaniwa Isarayeli a Muluku. (aGal. 6:16) Ntoko Paulo otthokihenrye awe, nloko nla nsya, ‘khavo-tho muYuda walá mmalapo, khavo òwìnnuwihiwa nnákhala òhinnuwihiwa, khavo mulipa-òwali, khivo epottha nnakhala òtaphuwa: ori-vo ti Kristu. Owo t’uri sothene mwa itthu sothene’. (aCol. 3:11) Nto eyo enooniherya wira mmulokoni wa eKristau khaavo anithokoreriwa ntoko amalapo.
5, 6. (a) Yoolepa ya Yesaya 61:5, enikumiherya nikoho xeeni? (b) Tani ari ‘anamukuttho’ a Yehova, ni ‘amalapo’ wala anamurwa aromoliwe ni Yesaya 61:6? (c) Ikrupu iya piili muteko xeeni onivara aya vamosa?
5 Mwa mpantta mukina, waaniheryasa akina pooti oromolaka ekapiitulu 61 ya eliivuru ya Yesaya enilavula sa eprofesia eniiraneya mmulokoni weeKristau. Eveersu 6 ya ekapiitulu eyo, enaahimya ale anrowa orumeelaka ntoko ‘anamukuttho’ a Yehova. Eveersu 5 ennaalavula ‘amalapo’ wala anamurwa yaawo yaarowa waakhaliheryaka ‘anamukuttho’. Nto masu ala niiweke sai?
6 Masu oowi ‘anamukuttho’ a Yehova, anaahimya maKristau oowoottihiwa, aniirela mpantta ‘ohihimuwa wopajerya’ wira yakhale ‘anamukuttho a Muluku ni a Kristu, akhale mamwene mpakha iyakha iye ekonto emosá’. (Wis. 20:6) Nave-tho, aakhala maKristau anceene oororomeleya anilipelela okhala valaponi. Nto awo annaakhaliherya oratteene axinnaya anrowa orumeelaka wiirimu, nto ale anrowa okhala valaponi anniihaniwa okhala anamurwa a nthoonyeryo. Moohakalala, annivara muteko vamosa ni ‘anamukuttho’ a Yehova, ekhalaka ntoko anilima ‘imatta saya’. Tthiri awo anniruwerya sowiima somunepani sinnivuwiha Muluku, vaavo anivara aya muteko woohepha. Akhale ale ari maKristau oothanliwa, wala ‘ipwittipwitthi sikina’, otheene aya anniwaavya ni waathokorerya ale aniphavela omurumeela Muluku okathi wotheene.—Yoh. 10:16.
‘ANAMURWA’ A MULAPONI NTOKO ABRAHAMU
7. Moota xeeni maKristau olelo-va animutakiha aya Abrahamu ni atthu oowaamini a khalai?
7 Ntoko niwenhe ahu yoosoma yoopacerya, maKristau eekeekhai ari ntoko anamurwa wala aletto, mulaponi-mu mootakhala enilamuleliwa ni Satana. Nto awo anlikana ni arumeyi oororomeleya a khalai; ohela muhina Abrahamu, yaawo anilavuliwa wira: ‘yari anamurwa’ a elapo ele. (aHéb. 11:13) Pooti niryeene ale anrowa wiirimu, wala anihala valaponi, ninnihakalala wataana orina ahu ni Yehova ntoko aarina awe Abrahamu. Yakobo, yoowo iirela mpantta nikhuuru noolamulela na eseekulu yoopacerya onnitthokiherya wira: ‘Abrahamu òmwamini Muluku, vano Muluku òmukhaliha naxariya mwaha wo wamini. Siso òkhalihiwa mpatthani a Muluku’.—Yak. 2:23.
8. Yoolaiherya xeeni aavahiwe awe Abrahamu, nto owo oonenle sai ovira wa okathi awehereryaka wiiraneya?
8 Muluku aahilaiherya wira orweela mwa Abrahamu ni osuulu awe, atthu otheene a valaponi ohiya paahi nloko nimosa, yaarowa oreelihiwa. (Musome Maphattuwelo 22:15-18.) Nnaamwi wiiraneya wa yoolaiherya ela ya Muluku yaari ohoolo woorakamela, Abrahamu aanikupali wira enimwiiraneya. Nimeya na okumi awe wotheene, owo ni emusi awe, yaanimaka mapuro oovirikana ni othaama ikwaha sinceene. Masi okathi wotheene Abrahamu aahivikaniha wataana ni Yehova.
9, 10. (a) Inamuna xeeni nikhanle ahu oomutakiha Abrahamu? (b) Yoolattula xeeni nikhanle ahu oowaavaha akina?
9 Nnaamwi Abrahamu ahaasuwenle okathi ene, yaarowa aya wiiraneya yoolaiherya ele, masi omphenta wawe Yehova waanilipa. Owo khaamakela wuupuwela wira aari namurwa nto khiyaphavela omaka wira okhaleke mahiku otheene elapo ya atthu akina. (aHéb. 11:14, 15) Ti vamiruku otthara ntakiheryo na Abrahamu, wira nikhweeherye okumi ahu, nisyakaka waattiherya itthu okumi ahu, ntoko mihakhu, okhulupale, ni miteko sikina sa mulaponi. Efaita xeeni erina aya omananiha ophwanya itthu sinooniwa okhala sooreerela elapo ela, masi sihinrowa opisa? Xeeni ophentexaka etthu ehinrowa opisa? Ntoko Abrahamu, hiyo noororomelihiwa etthu yootepexa oreera ovikana itthu iya. Nave nimutakihaka Abrahamu, ninnipixa murima nilipelelaka wiiraneya wa anatiri a Yehova.—Mmusome aRoma 8:25.
10 Yehova onnaalattula atthu a maloko otheene wira ereelihiwe orweela mwa osuulu wa Abrahamu. Nave ‘anamukuttho’ a Yehova, ni ‘ipwittipwitthi sikina’ ari ‘anamurwa’ annaalattula atthu a ilapo sotheene anilavula mattaava anivikana 600.
NIHIWEKE ILAPO PAAHI ATTHU AWO ONIRWA AYA
11. Salomoni aawoonela sai atthu yaarwa ilapo sikina?
11 Okathi yaatthapeliwa aya empa ya Muluku 1026 A.E.C., moovarihana ni yoolaiherya ya Yehova wa Abrahamu, nto Salomoni aahaalattula atthu a maloko otheene wira yanvuwihe Yehova. Owo aahivekela ariki: ‘Hatá amalapo, atthu ahikhanle a nloko nanyu na Isarayeli, yaiwa vale ovuwa wanyu n’itthu sulupale ni sa ikuru sìralyanyu mwaha w’atthu anyu, yakhuma mulaponi mwaya ottaiwene, erwaka vava ottittimiha nsina nanyu n’ulompa mpani mwanyu-mu, nyuwo nwiriyane ovekela waya. Wirimu oryanyu nwirele amalapo awo sorera sinovekelayani, wira atthu a maloko othene a mulaponi esuwele nsina nanyu, ewiweleleni ntoko siniwiwelelayani atthu a Isarayeli, siso-tho esuwele wira emp’ela etenke aka ti nipuro ninrowanyu okokhoreliwa’.—1 Mam. 8:41-43.
12. Xeeni atthu akina aniwoona aya Anamoona a Yehova ntoko anamurwa wala aletto?
12 Namurwa, wala muletto, mutthu yoole orwaale elapo ekina, wala onikhala elapo ehikhanle yawawe. Ela ti etthu eniiraneya ni Anamoona a Yehova. Awo aakhalana ekuvernu aya yoopacerya ya wiirimu, Omwene wa Muluku orweela mwa Kristu. Awo khaniira mpantta ni epoliitika nnaamwi atthu akina mahiku ala ewoovelelaka.
13. (a) Moota xeeni orumeeliwa wa nuulumo noowi “namurwa” ohinikhala aya ele enuupuwela ahu? (b) Niireke yoolakela yoopacerya ya Yehova yaahela mpuwa okhala wa anamurwa? Mutthokiherye.
13 Anamurwa ikwaha sinceene waakuva osuwanyeya mwaha wa okhala atthu vakhaani. Aahiiso nttaava anilavula aya, soolimalela saya, mukhalelo wa erutthu aya, hata mawarelo aya. Ohihela mpuwa itthu simanle ahu ohimya, makhalelo aya makina anoolikana ni atthu a maloko otheene, nnaamwi aryeene a ilapo soovirikana. Ekeekhai wira namurwa onnisuwanyeya mwaha wa ovirikana wawe mwa inamuna sikina. Masi vaavo vahinweha ahu itthu iyo, nto nuulumo noowi ‘namurwa’ pooti ohitaphulela-tho ele hiyo nuupuwela ahu. Vaakhanle wira atthu otheene ta eguvernu ya epoliitika emosa valaponi, khuuvo aarowa okhala namurwa mulaponi wala mmukhalelo wa epoliitika. Khalai Yehova aaphavenle wira apinaatamu yaataane ekhale emusi emosa ni olamulelo omosa paahi wawawe. Niireke yookhala enkela wiiriha oweryaneya atthu a maloko a elapo yotheene waataana?
14, 15. Exeeni Anamoona a Yehova ntoko ekrupu anivaha aya efaita?
14 Olumwenku ola wa nrima ni onyokhana mwaha wa elapo, ti voohakalaliha woona wira aakhala atthu anaathokorerya saana atthu a ilapo sikina. Ekeekhai wira muxankiho wa othalana mwaha wa nloko ti woovila omaliha. Mulipa oopacerya opaka network a televisau CNN, Ted Turner, aahilavula sa muteko onivara awe ni atthu anikhuma ilapo soovirikana oriki: “Othukumana ni atthu oovirikana ilapo etthu yoohakalaliha tthiri. Kaahiweha wira ale yaakhuma ilapo sikina khahiyo yaari ‘amalapo’ wala anamurwa, masi apatthani aka anikhala olumwenku yoola. Kaahipacerya owehaka nuulumo noowi ‘namurwa’ okhala noohiloka, kipaka nlamulo naka wira muhina mwa opuro waari eseedi aka ya televisau CNN, kihiiwe-tho nirumeeliwaka nuulumo noowi ‘namurwa’ wala muletto okathi onivaanela ahu muskritoorio. Masi nirumeeleke nuulumo noowi atthu a ‘ilapo sotheene’.
15 Olumwenku wotheene, paahi Anamoona a Yehova taniilipiha okhala ekrupu erina muupuwelo mmosaru. Okhala wira ahiixutta okhalana moonelo wa Yehova, awo aakumiha-mo mmuupuweloni mwaya onyokhana mwaha wa ovirikana elapo. Ohiya okumiherya othanyana wala ohiroromelana wala ohittittimiha edireito ya akina, awo ahiixutta wira ovirikana wa makhalelo onnikumiherya etthu yooreera. Niireke mootoko wuupuwela mwaha owo, ni moota eyo eniweryaneya aya, ni nyuwo ottottenle anyu mureerelo?
ELAPO EHINROWA OKHALA ANAMURWA
16, 17. Wiiraneya wa masu a Wisupulula 16:16 ni Daniyeli 2:44 antaphulela exeeni wa nyuwo?
16 Moohipisa, maloko otheene enrowa waakhumelela ekhotto enkela ohooleliwa ni Yesu Kristu ni malaikha wira yaakiherye okhulupale wa Muluku; ekhotto eyo nttaava na eHeeberi eniihaniwa ‘Harmagedoni’. (Wis. 16:14, 16; 19:11-16) Iyaakha sivinre ottuli 2.500, profeta Daniyeli aahihimya vahinatthi etthu enrowa waakhumelela maguvernu a elapo yaawo anivirikanya otthuna wa Muluku. Daniyeli olempe so: ‘Mahiku òmwene owo, Muluku a wirimu onokumiherya omwene ohinrowa omala, nnákhala oweriwa n’umwene mukina. Omwene owo onohonona n’upwetexa omwene wothene wa mulaponi, numalá onrowa okhalaka wa mahiku othene’.—Dan. 2:44.
17 Munnuupuwela moota munrowa anyu okhala yiiraneya masu ala? Apinaatamu mahiku ala annipaka mikano sa elapo, seiyo olelo siniwiiriha atthu okhala anamurwa, masi moohipisa sinoomala. Khula ovirikana wa mikhalelo sa erutthu ya apinaatamu, ethoonyeryo yoowi soopattuxa sa Muluku sookhalana mithinto sinceene sootikiniha. Nto mukhalelo woohakalaliha oniiriheke ovikaniha onvuwiha vanceenexa ni omuttittimiha mpattuxa Yehova Muluku.
18. Etthu xeeni eniiraneya vano enooniherya wira vanniweryaneya omaliha muupuwelo oowi ‘namurwa’?
18 Niireke ontaphulela owokeya okupali wira itthu iya sinimwiiraneya olumwenku wotheene? Nnaari khahiyo owokeya. Masi etthu yekeekhai okupali wira enimwiiraneya. Muupuwelo woowi namurwa wala ‘mmalapo’, yootaphulela aya ennivirikana ni moonelo wa anamoona a Yehova yaawo ahincalela ovirikana wa elapo wala mapuro anikhala aya. Mwa ntakiheryo, mahiku ala iseedi saamukhaani sinivara aya muteko anamoona a Yehova, saahipakiwa mirukunuxo sinikhweiherya olaleiwa oratteene ihapari sooreera sa Omwene. (Math. 24:14) Okathi malamulo a elapo aneemererya aya, ovirikana wa elapo khahiyo yaari etthu yooceeliha olipiha wataana wa anna wira evareke muteko. Ela tthiri yowooniherya yoowi Mwene yoowo othanliwe saana ni Yehova, Yesu Kristu, onnimala-maliha ovirikana wa mikano sa elapo, nto owo moohipisa onkela ‘oxintta’!—Wis. 6:2.
19. Elavulelo yooloka wala ekeekhai enikumiherya exeeni?
19 Ekhumaka maloko otheene ni elavulaka mattaava oovirikana, anamoona a Yehova anniilipiha okhalana elavulelo emosa, eyo piiyo weettela ekeekhai. Ekeekhai eyo ennilipiha wataana ohinikawanyeya. (Mmusome Sofoniya 3:9.) Ela emusi ya ilapo sotheene eneemela okherekhere, masi enivalaana ni olumwenku ola wootakhala. Emusi ela yowataana eri ethoonyeryo ya elapo enirwa yeeyo ehinrowa okhala anamurwa wala amalapo. Khula mutthu mukumi, onrowa moohakalala okupaleela ekeekhai ya masu a eliivuru yeele eni: ‘ekeekhai voohimya sa maloko wala iraasa sotheene sa apinaatamu eri mBiibiliyani, nto otheene ari anna’.—The Races of Mankind.
[Elatarato epaaxina 31]
Munniwehererya okathi ohinrowa aya okhala mikano wala nuulumo noowi ‘namurwa’ aahiiso muupuwelo oowi, ‘namurwa’ ohinrowa-tho okhala?
[Elatarato epaaxina 28]
Munnilipelela okathi onrowa aya wiiraneya anatiri a Muluku ntoko iirale awe Abrahamu?
[Elatarato epaaxina 30]
Mmoonelo wa Yehova, khuuvo ori ‘namurwa’.