Nivikaniheke Okhala Ntoko “Aletto Ni Anamurwa”
‘Nyuwo mwa aletto n’anamurwa, tivó vanotumereryakani wira mwinaneleke sonanara sa erutthu’.—1 PED. 2:11.
MWAAROWA WAAKHULA SAI?
Xeeni maKristau oothanliwa aniihaniwa aya anamurwa ni aletto?
Enamuna xeeni ale a “ipwittipwitthi sikina” aryaya aletto wala anamurwa?
Exeeni nyuwo muniwehererya anyu moowunkheliwa voohimya sa muhoolo?
1, 2. Pedru aahimya aani ni masu oowi: ‘alipa-òthanliwa’, nto xeeni oniwiihana awe okhala ‘anamurwa wala aletto’?
NUUVIRA iyaakha 30 Yesu awenle ene wiirimu, murummwa Pedru aahaalepela owaamini ‘òthanliwa yamwarenle ntoko anamurwa: oPonto, oGalasia oKapadosia, wAsia ni oBitinia’. (1 Ped. 1:1) Vanniweheya wira nuulumo noowi: ‘òthanliwa’, Pedru aahimya yaale yaari ntoko owo yoottihiwe wala othanliwa ni munepa wootteela ‘eyariwa vasya’ ni nlipelelo na olamulela ni Kristu wiirimu. (Mmusome 1 Pedru 1:3, 4.) Nto xeeni alipa-oothanliwa awo onaahimya awe okhala ‘anamurwa wala aletto’? (1 Ped. 2:11) Nto entaphulela exeeni wa hiyo olelo-va, vaavo etthu yowiiraka anamoona 650, mmosa paahi tonihimya okhala oothanliwa?
2 Vaaniphwanela owiirela ‘anamurwa wala aletto’ maKristau oowoottihiwa a eseekulu yoopacerya. Ntoko ale ahanle akumi olelo-va, okhala waya valaponi waari wa vakhaani. Murummwa Paulo aahilavula mmensawe ntoko mulipa-oothanliwa a ‘nikoto namukhani’ ariki: ‘Masi hiyo, elapo ahu eri wirimu: weiwo ninwehereryahu orwa mòpoli ahu, Pwiya Yesu Kristu’. (Luka 12:32; aFil. 3:20) Onnivahiwa okhala a ‘wirimu’, okathi alipa-owoottihiwa anikhwa aya, nto annihiya makhalelo a valaponi khiyaphwanya mukhalelo woolokexa, okumi ohinikhwa wiirimu. (Mmusome aFilipi 1:21-23.) Tthiri mmukhalelo wekeekhai, awo ari ntoko ‘anamurwa wala aletto’ a elapo ela enilamuleliwa ni Satana.
3. Nikoho xeeni ninkhumelela voohimya sa ‘ipwittipwitthi sikina’?
3 Ankhi apatthani akhwaaya a ‘ipwittipwitthi sikina’? (Yoh. 10:16) Niireke kharina yoolipiherya ya Biibiliya, ya okhala alipa oomaka okathi wotheene valaponi? Ekeekhai, ela enrowa okhala elapo aya okathi woohimala! Masi mwa enamuna ekina, awo pooti wooniwaka okhala aletto wala anamurwa. Moota xeeni?
“SOPATTUXIWA SOTHENE NLELO SINNÌPULELA”
4. Exeeni ahooleli a elapo ahiniwerya aya opaka?
4 Vaavo olumwenku wa Satana onivikaniha aya, khula mutthu ohela muhina maKristau, annihaawa ni mixankiho sinikhumelela mwaha wa Satana ommwareela wawe Yehova. Yoolepa ya aRoma 8:22, enihimya so: ‘Nosuwela tthiri wira sopattuxiwa sothene nlelo sinnìpulela ni ohawa’. Ahooleli a mulaponi, masientista, alipa oowaakhaliherya ale anihaawa, nnaamwi aphavelaka omaliha mixankiho, awo khaniwerya.
5. Okhuma mwaakha wa 1914, etthu xeeni imilyau sinceene sa atthu anithanla aya opaka, mwaha wa xeeni?
5 Okhuma eyaakha ya 1914, imilyau sinceene sa atthu aathanla okhala atthu a Mwene Yesu Kristu yoowo othanliwe ni Muluku. Awo khaniphavela wiirela mpantta elapo ya Satana. Annikhootta okhaliherya olumwenku wa Satana. Nto, annirumeela ikumi saya wira ekhaliheryeke soophavela sa Omwene wa Muluku.—aRom. 14:7, 8.
6. Moota xeeni Anamoona a Yehova aniihaniwa aya okhala aletto ni anamurwa?
6 Ekeekhai wira Anamoona a Yehova anniiwelela malamulo a ilapo sowiiraka 200 sinikhala aya; masi, moohicikha etthu sa elapo enikhala aya, awo anamurwa wala aletto. Awo khaniirela mpantta ipoliitika, ni myaha sa mulaponi sa khula nihiku. Hata vano, awo aniithokorerya okhala atthu a elapo esya enikumiheriwa ni Muluku. Awo annihakalala woona mahiku aya ookhala ntoko anamurwa ni aletto mwa elapo ela yoohiloka, yaakuveyaka wira amala-male.
7. Arumeyi a Muluku anrowa okhala sai alipa oomaka valaponi mahiku otheene?
7 Mowaakuveya, Kristu onoorumeela okhulupale awe wira ahonone olumwenku wootakhala wa Satana. Olamulelo woomalela wa Kristu onoomaliha valaponi itampi ni ohaawa. Olamulelo owo onoomaliha mikhalelo sotheene soohiloka sinooneya ni sihinooneya saakumiheriwe mwaha wohiiweleliwa okhulupale wookhalela wa Yehova. Arumeyi oororomeleya a Muluku anrowa okhalaka mahiku otheene mParayiisu valaponi. (Mmusome Wisupulula 21:1-5.) Mmukhalelo woomalela, soopattuxiwa sotheene sinrowa ‘wòpoliwa mwakhalihiwaya ipottha, mwapwetexiwaya, wira sikaweliwe otaphuwa n’uvuwa w’ána a Muluku’.—aRom. 8:21.
EXEENI ENIVEKELIWA AYA MAKRISTAU EKEEKHAI?
8, 9. Antaphulela exeeni masu a Pedru oowi: ‘sophavela sa erutthu’?
8 Pedru onnitthokiherya ele anivekeliwa aya ale ari maKristau ariki: ‘Apatthani aka òphentiwa, nyuwo mwa aletto n’anamurwa vathí-va: tivó vanotumereryakani wira mwinaneleke sonanara s’erutthu, seiyo sinvirikanya makhalelo òrera’. (1 Ped. 2:11) Malakiheryo ala wanipacerya yaavahiwa maKristau owoottihiwa, masi-tho annivareleya muteko wa ipwittipwitthi sikina sa Yesu.
9 Soophavela sikina sa erutthu, akhala wira siniiriwa mwa enamuna Mpattuxa opanke awe, khivamulattu. Maana soophavela sa erutthu sinnihakalaliha okumi. Mwa ntakiheryo: soophavela sa erutthu sooloka ori olya yoolya yooloka, owurya, otthekula wooloka, ni okhalana ompatthani wooloka. Hata atthu athelanne, annihakalala mwaha wa okumanela waya wooreerela. (1 aKor. 7:3-5) Masi Pedru, aalavula paahi ‘minkhela sa erutthu’ seiyo ‘sinivirikanya makhalelo òrera’. Wira masu ala etthokiheriwe saana, aakhala anamataphulela a Biibiliya anihimya so: ‘osiveliwa woohiloka wa enoka’ (Vesão Rei Jaime), wala “soophavela sootthekiha” (Nova Versão Internacional). Vano nooweha wira soophavela sotheene sa apinaatamu siniwana-wana ni yoolakela ya Yehova, ni itthu sinikhoottiherya wataana nuuwo, tivonto nihaana osyaka. MuKristau ohinsyaka itthu iyo, pooti oyeleela okumi awe.
10. Itthu xeeni Satana onipaka awe wira aakuxe maKristau ekhale atthu a elapo awe?
10 Yoolakela ya Satana ori otteettheiha yoophavela ya maKristau ya okhala anamurwa mmukhalelo ola wa vano. Soohapuxa sa Satana mahiku ala tiiya: ophenta muhakhu, oraruwa, ophavela ovuwa mulaponi, ophavela opuha mekhaya paahi, ni onyokhana mwaha wa elapo. Wiimananiha wahu okhootta soophavela soohiloka sa erutthu, onimooniherya wira khanimphavela wiirela mpantta elapo ya Satana. Tivonto ninnooniherya tthiri wira hiyo aletto ni anamurwa. Etthu eniphavela ahu, ori okhala mahiku otheene elapo esya ya Muluku enrowa okhala-mo exariya.
MWEETTELO WOOREERA
11, 12. Ikwaha sikina anamurwa anikhala mulaponi anooneliwa sai, nto ankhi Anamoona a Yehova anooneliwa sai?
11 Pedru onnivikaniha otthokiherya ele enivekeliwa aya maKristau ari ‘aletto ni anamurwa’, eversiikulu 12 enihimya so: ‘Mwettelo anyu okhale worera eriyari y’atthu ahikhanle aKristu, wira okathi oniwotheryayani okhala atakhali, emwaleliwe ni miteko sanyu sorera, envuwihe Muluku nihiku ninrwawe’. Anamurwa wala aletto anikhala mulaponi, ikwaha sinceene annilavuliwa moohiloka. Mwaha wa ovirikana ni anamwaattamani aya, awo pooti wooniwaka wira atakhali. Ikwaha sinceene malavulelo aya, miteko saya, mawarelo aya hata mukhalelo aya ti woovirikana. Masi okathi miteko saya wala mweettelo aya onikhala aya wooloka, itthu sinootheriwa aya khasincaleliwa.
12 Etthu emosamosa, maKristau ekeekhai annivirikana ni anamwaattamanani aya mwa inamuna ntoko ovaanela waya, ni ele enithanla aya voohimya sa otthekula. Mawarelo ni moota aniitthokiha aya annivirikana ni makhalelo a mapuro awo. Mwaha wa ovirikana nno, ikwaha sikina aakhala ahinsuwela saana khiyapacerya woonaka wira awo atakhali. Masi atthu akina annaattottopela mwaha wa mweettelo aya wooloka.
13, 14. Ankhili anooneya sai okhala oloka ni miteko saya? Nvahe ntakiheryo.
13 Tthiri mweettelo wooloka onnivaanya wootheriwa wootakhala. Hata Yesu, mulopwana aari oomalela ni oororomeleya wa Muluku, aahootheriwa ni olavuliwa moohiloka. Yesu aatoko wiireliwa okhala ‘namulyá, namuhapaliwa, mpatthani àlipa-òliviha mpósito, ni mpatthani álipa-òttheka’. Masi ekeekhai ti yoowi mweettelo awe wa miruku omurumeelaka Muluku, wahooniherya wira itthu saahimmwa saari sowootha. Yesu aahilavula oriki: ‘Ankhili annòneya okhala òloka mwaha wa miteko saya’. (Math. 11:19) Olelo-va eyo enniiraneya. Mwa ntakiheryo: anamwaattamanani a muttetthe wa Selters Alemanha yaawoona okhala atthu oohiloka anna ni arokora anivara muteko oBetheli mapuro ale. Masi, presidente a munisipio a muttetthe ole ahaalavula saana anna ale, owo aahimmye so: “Makhalelo a Anamoona anirumeela va, toovirikana ni awihu, masi khanikumiherya mixankiho muttetthe ahu ola”.
14 Nave-tho ehiiraneya etthu emosaru ni Anamoona a Yehova anikhala Moscovo oRussia. Yahootheriwa okhala atthu anivara miteko soohiloka. Nto, nihiku na 20 mweeri wa maio 2010, Corte Europeia de Direitos Humanos Strasbourg oFrança yaahilamula eriki: “Corte Europeia, ehoona wira eguvernu ya Moscovo yoottheka, mwaha wa okhoottiheryaka edireito mutthu orina awe ya ovara miteko sa etiini eniphavela awe. Alipa oophuka milattu oMoscovo khahimmye etthu ‘yuulupale yiiriha ophwanela ohaaxiwa atthu ala’, wira tarina mulattu mwaha wa ohonona imusi, waatumererya atthu wiixiiva, aahiiso okhootta olya murette hospitaali. Tivonto, “olamuliwa waapakiwe ni alipa oophuka milattu oMoscovo, waari woohikhalela, maana khiyaavarenrye saana wira asuwele akhala wira itthu saahimmwale saari sekeekhai”.
WIIWELELA ONIPHWANELELA
15. Anamoona a Yehova elapo yotheene anntthara malakiheryo xeeni a mBiibiliyani?
15 Anamoona a Yehova oMoscovo, nihimye so, ilapo sotheene, annaakhwaniherya yoovekela ya eKristau ettittimiheriwe ni Pedru. Owo olempe so: ‘Mwaha w’Apwiya, nwìweleleke makhulupale othene a vathí-va: mmwìweleke mwené mulupale, mana tonettiha elapo anyu’. (1 Ped. 2:13, 14) Nnaamwi ehiirelaka mpantta elapo ela yootakhala, maKristau ekeekhai, anniwiiwelela akhulupale ‘anettiha elapo’, ntoko Paulo aawiixuttinhe awe.—Mmusome aRoma 13:1, 5-7.
16, 17. (a) Exeeni enooniherya wira Anamoona a Yehova khaniwana ni kuvernu? (b) Exeeni akhulupale akina a epoliitika akupanli aya?
16 Okathi Anamoona a Yehova aneetta aya ntoko ‘anamurwa ni aletto’, awo khahiyo anikhootta wiiwelela malamulo a elapo eyo. Nave khahiyo aniwana ni ahooleli a elapo eyo, wala waakhoottiherya atthu akina aniphavela opaka itthu iyo, aahiiso ophavela opaka epoliitika aya. Awo khanlikana ni itiini sikina siniirela mpantta epoliitika; Anamoona a Yehova khanipaka eyo. Awo khaniphavela ovaanyiha malakiheryo a mapoliisia wala guvernu. Muupuwelo woowi awo anivaanyiha okhulupale wa eguvernu wala waakanyerya murettele wa mulaponi, etthu yeethiru; awo khanuupuwela opaka etthu ntoko eyo!
17 Vaavo aniiwelela aya miruku sa Pedru wira ‘nimwiweleleke mwene’, maKristau annooniherya nttittimiho moovarihana ni okhulupale aya atthu awo. (1 Ped. 2:17) Ikwaha sinceene mapoliisia aaweha wira awo khanitthuneya oxankiheyaka ni Anamoona a Yehova. Mwa ntakiheryo: Mukhulupale mmosa a epoliitika wAlemanha, oniitthaniwa Steffen Reich, aavara muteko ogabineti wa ministro, muttetthe wa Brandenburd, nto muhoolo mwaya khukhala membro a eparlamento wAlemanha, aahimmye so: “Mweettelo wooloka wa Anamoona a Yehova, ti wootthuneya olelo-va ntoko sarya aya khalai, maana eyo tenikumiherya mukhalelo wa demokrasia, awo yahavaanyiha anakhotto a SS, nto khuwoonela othunku anamutthukiwa akina. Mikhalelo saya sinnitepa otthuneya mulaponi mwahu, vaavo vanoona ahu wuncerereya wa atthu anaanyokha anamurwa, aahiiso onyokha muupuwelo wa atthu akina”.
MOONIHERYE NIPHENTO
18. (a) Xeeni vannikhweela aya waaphenta axinni ihu? (b) Exeeni atthu akina ahikhanle Anamoona aniweha aya?
18 Nave Pedru aahilavula wira: ‘Mwaphenteke axinninyu ówamini: mmoveke Muluku’. (1 Ped. 2:17) Anamoona a Yehova annoova omunanariha Muluku, nto eyo enninnuuherya opakaka yootthuna awe. Awo annihakalala omurumeela waya Yehova ntoko emusi ya olumwenku wotheene anna ni arokora arina yoophavela emosaru. Nto khivanaavila ‘waphenta axinnaya olumwenku wothene’. Ophenta iwo wa anna, onnaathowa atthu a mulaponi asareya nrima; nto ale ahikhanle Anamoona annitikiniheya. Mwa ntakiheryo: Mutthu mmosa onaahoola maturista, onivara muteko empresa Amerikana ya mikwaha sooweetta, aahitikiniheya ni ophenta wooniheriwe ni Anamoona a ilapo sikina mwaakha wa 2009 okonkresuni a ilapo sotheene wAlemanha. Muthiyana owo onihimya wira okhuma okathi opacenrye awe ovara muteko khanawehe ophenta moota owo. Muhoolo mwaya, Namoona mmosa aahihimya ariki: “Khula etthu aalavula awe aamutikiniheya, ni ohakalala vanceene”. Niireke mootoko wiiwa etthu emosaru eyo wa mutthu oniwoona Anamoona athukumanne va kongresu?
19. Exeeni enitthuneya ahu ovikaniha wiiwelela, nto mwaha wa xeeni?
19 Mahiku otheene, Anamoona a Yehova, annooniherya mukhalelo aya ntoko ‘anamurwa wala aletto’ mulaponi-mu mwa Satana. Awo aahiilipiha ovikaniha wiiwelela. Nlipelelo naya ti noolipa ni neekeekhai okhala wira moohipisa anrowa okhalaka okathi wotheene elapo esya ya Muluku ya exariya. Nto nyuwo khamuniwehererya elapo eyo?
[Elatarato epaaxina 23]
Hiyo khahiyo nimphavela woopola elapo ya Satana
[Elatarato epaaxina 23]
Ninlaleya elapo esya ya Muluku
[Elatarato epaaxina 25]
Ikeekhai sa mBiibiliyani sookhaliherya wataaniha emusi ela ya oRussia.