Moise—Aari Mulopwa Oophenta

EXEENI EKHANLE OPHENTA? Ophenta onitaphulela waathokorerya saana atthu akina. Mutthu yoole oniphenta, moolumo ni sowiira sawe sinnooniherya moota siniwoonela awe atthu yaale animphenta, nnaamwi opaka eyo ovekelaka wiileva.

MOISE OONIHENRYE SAI OPHENTA? Moise ahooniherya eyo mmoota samphenta awe Muluku. Moota xeeni? Niireke munnuupuwela masu ari va 1 Yohani 5:3: “Nnimphenta sai Muluku? Nnimphenta nettelaka soruma sawe”. Moise aneettela yooruma eyo. Miteko sotheene Muluku saamurumma awe, eyo piiyo, okhuma muteko yoole waari woowoopiha, woorowa olavula ni mwene oowerya Farawo, mpakha muteko wootepexa okhweya, nire so, wookolola ekopo awe othoonyaka Ephareya Yooxeerya, Moise aahiira sotheene iyo. Khuta yooruma yookhweya wala yoovila, Moise ahiiwelela. “khwira sothene Apwiya samurummyaya”.​—Okhuma 40:16.

Ohiya-vo, Moise anaaphenta-tho aIsarayeli akhwa awe. Awo yaahisuwela wira Moise aarummwa ni Muluku wira oweettiheke, tivonto awo yaanimwaattamela ni milattu saya soovirikana. Ninsoma so: ‘Moise ahikilathi wira aphuke milattu, khuphuka okhuma vosisu mpakha ohiyu’. (Okhuma 18:13-16) Nkuupuwelani moota Moise sarya awe ootemwa nuumala owiriyana milattu saaruuhiwa ni aIsarayeli wira ophuke! Nlelo Moise aakhala oohakalala mwaha woophavela waakhaliherya atthu yaaphenta awe.

Ohiya owiriyana milattu saya paahi, Moise aanivekela mmureerelo wa atthu ale aaphenta awe. Mpakha waavekelela atthu yaale yaamutthekenle! Mwa ntakiheryo, okathi yoole Miriyamu, murokora awe Moise, aamulavunle awe moohiloka Moise, Yehova aahimuhukhumu Miriyamu khumukumiherya makuttula. Moise khaatteeliwe murima ni ehukhumu ele, tivonto aahaakuvela omuxonttelela Muluku, khuvekela so: “Xontte, Muluku! Munvonihe!” (Mothakoni 12:13) Niireke yookhala etthu ekina ohikhanle ophenta, yaarowa omwiiriha opaka nivekelo nle ni murima wotheene?

NTO ETTHU XEENI ENIIXUTTA AHU? Nihaana omutakihaka Moise nimananihaka omphenta saana Muluku. Ophenta iwo ononiiriha ophavelaka wiiwelela sooruma sawe ‘ni murima ahu wothene’. (aRoma 6:17) Omwiiwelelaka Yehova ni murima ahu wotheene, onnimwiiriha Owo ohakalala. (Miruku 27:11) Hiyo-tho ninnittottela mureerelo. Okathi onimurumeela ahu Muluku ni murima ahu wotheene, ninnisuwela wira nimpaka etthu yooloka, nto osuwela eyo onniniiriha okhala oohakalala!​—Esalimo 100:2.

Enamuna ekina ekhanle ahu oomutakiha Moise, wiimananiha wiileva wira naaphente akina. Okathi apatthani ahu, wala amusi annaattamela aya avekaka nikhaliheryo, ophenta onniniiriha opaka itthu iya: (1) waawiriyana ni murima ahu wotheene, (2) owoonela othunku, nihimye so, woonaka wira mwaha owo tawihu, ni (3) owooniherya wira ninnaacalela.

Nimutakihaka Moise, nnoowerya waavekelela amusi ni apatthani ahu. Ekeekhai wira ikwaha sikina onninriipa murima mwaha woohisuwela yoopaka wira naakhaliherye mixankiho saya. Woonasa wene pooti ohimyaka so: “Ni miyo koxanka, etthu eniwerya aka opaka woolompelani paahi”. Masi muupuwele-tho so: ‘Malompelo n’uvara metto wa mutthu òrera murima anniwerya valupale’. (Yakobo 5:16) Mavekelo ahu pooti omwiiriha Yehova opaka etthu mmureerelo wa mutthu ole, yeeyo Muluku yahaarowa awe opaka. Nto niireke yookhala etthu ekina yooreerexa, eniwerya ahu opaka wira naakhaliherye amusi ni apatthani ahu ahikhanle mavekelo ahu paahi?a

Munoonela sai, khamunaakhulela wira tthiri vanniweryaneya wiixutta itthu sinci voohimya sa Moise? Nnaamwi aari mutthu ntoko hiyo otheene, owo oonivaha ntakiheryo nuulupale na waamini, wiiyeviha, ni ophenta. Nto vaavo vanitepa ahu omutakiha Moise, ninrowa otepaka ottottela muraarelo hiyo ni atthu akina.​—aRoma 15:4.

[Enoota]

[Elatarato epaaxina 6]