Moise—Aari Mulopwana Owaamini
WAAMINI ONITAPHULELA EXEENI? Ntoko sinirumeeliwa aya mBiibiliyani “wamini” onihela mpuwa olipiherya okupali etthu yekeekhai. Mutthu yoole onimwaamini Muluku onnikupaleela wira Muluku onrowa waakhwaniherya sotheene silaihenrya awe.
MOISE OONIHENRYE SAI WAAMINI WAWE? Okumi wotheene wa Moise waalipa ni soolaiherya sa Muluku. (Maphattuwelo 22:15-18) Owo anwerya okhalana okumi woopuha eriyari ya itthu sooreera sa wEgitu, masi khuleva itthu iyo, nto “ahithanla ohaxiwa vamosa n’atthu a Muluku, khukhotta opuha okathi vakhani n’itthu sotakhala”. (aHéberi 11:25) Niireke opaka eyo waari okhummwa murima, waarowa awe othanana muhoolo? Nnaari maana Biibiliya onihimya wira Moise “ahilipiha murim’awe, ntoko amona Muluku ohinòneya”. (aHéberi 11:27) Moise khonathanane mwaha wa yoothanla, ele yaapanke awe.
Moise aanilipiha waamini wa atthu akina. Nkuupuwelani etthu yiiren’ye okathi aIsarayeli yaakhala aya wira aattiyeleliwa; ottuli khukhala anakhotto a Farawo, ohoolo Ephareya Yooxeerya. Nto mwaha wa woova ele yuupuwela aya okhala ehasara yaarowa wiiraneya, aIsarayeli yaahikelela okhuwela wa Moise avekaka okhaliheriwa ni Yehova.
Moise aarowa opaka exeeni? Pooti wira Moise anuupuwela vakhaani wira Muluku aarowa okawanya ephareya yooxeerya ekhale ipantte piili, nto ekhumele ephiro wira aIsarayeli etthyawe. Hata ahaasuwela saana, Moise aanikupali wira Muluku aarowa opaka etthu wira owaakiherye atthu Awe. Tivonto Moise aaphavela wira aIsarayeli akhwa awe akupaliki etthu emosaru eyo. Ninsoma so: ‘Moise ahiwakhula atthu wira: ‘Muhòve etthu! Mukurunuxe mirima sanyu. Munimona sotikiniha Apwiya sinrowaya owirelani olelo va, wira ewòpoleni’’. (Okhuma 14:13) Niireke moolumo awo yaahilipiha waamini wa aIsarayeli ale? Aayo, okhala wira Biibiliya onnihimya, ohiya sa Moise paahi masi sa aIsarayeli otheene wira: “Mwaha wo wamini, aIsarayeli yahilapuwa Ephareya Yoxerya, ntoko yetta vatthayani yowuma”. (aHéberi 11:29) Waamini wa Moise waahikumiherya mureerelo ohiya wa yena paahi masi-tho wa khuta mutthu oniphavela oxutta-vo etthu.
ETTHU XEENI ENIIXUTTA AHU? Nnoowerya otakiha waamini wa Moise, nooniheryaka ni mweettelo ahu wira ninnikupali soolaiherya sa Muluku. Mwa ntakiheryo, Muluku oolaiherya onithokorerya akhala wira ninnoona omurumeela Owo okhala etthu yootepexa otthuneya ovikana itthu sikina. (Matheyo 6:33) Ekeekhai wira olelo mutthu pooti woonaka ovila okhootta sookhanyererya sinceene sa wiithukumanyerya mihakhu. Masi nihaana okupali wira vaavo vaniimananiha ahu ohaattiherya itthu okumi ahu wira nimukokhoreleke saana, Yehova onrowa onivaha sotheene sinitthuneya. Owo olipihenrye so: “Miyo nkinonyanyalani-tho, kinimojalani mahiku othene”.—aHéberi 13:5.
Ninniimananiha-tho waakhaliherya akina wira waamini waya winnuwe. Mwa ntakiheryo, anamuyari a miruku annisuwela eparakha yuulupale erina aya ya olipiha waamini wa anaaya. Nto vaavo awo aninnuwa aya, anamwane anitthuneya osuwelaka saana wira Muluku ookhala, ni wira oonivaha sooruma wira nisuweleke itthu sookhalela ni soohikhalela. Ohiya-vo, anamwane ahaana okhaliheriwa wira akupaliki mmansaya wira weettela sooruma sa Muluku sinnikumiherya mireerelo. (Yesaya 48:17, 18) Tthiri anamuyari annaavaha anaaya etthu ya faita, vaavo vanaakhaliherya aya waamini wira “Muluku òkhala ni wira onnatthuvela ale animphavela”—aHéberi 11:6.
[Elatarato epaaxina 4]
[Elatarato epaaxina 4]