Ohihimuxiwa wa Yesu Ontaphulela Okumi!
OHIHIMUWA wa Yesu, khahiyo etthu emosa paahi yiiren’ye khalai ehirina yootaphulela aya wa hiyo olelo-va. Murummwa Paulo aahooniherya yootaphulelaya vaavo aalempe awe so: ‘Kristu òhihimuwa, ni ti mulipu w’ohihimuwa w’alipa-òkhwa. Ntoko okhwa sirwiyaya mwaha wa mutthu mmosá, siso-tho ohihimuwa w’alipa-òkhwa orwiye mwaha wa mutthu mmosa. Ntoko atthu othene sinikhwaya mw’Adamu, siso-tho othene anokhalihiwa-tho akumi mwa Kristu’.—1 aKorinto 15:20-22.
Yesu aahihihimuxiwa nihiku na Nisani 16, 33 EC, nihiku na mwaakha nenlo aYuda yanvaha aya Yehova Muluku milipu sa ipyo soopacerya, mpaani mwa Muluku oYerusalemu. Mwaha woomuhimyaka Yesu okhala milipu, masu a Paulo anooniherya wira yaamukhala atthu akina yaarowa ohihimuxiwa nuumala ohihimuwa Yesu.
Nto masu anittharelana a Paulo annooniherya ele eweryanen’ye mwaha wa ohihimuwa wa Yesu. Paulo onihimya so: ‘Ntoko okhwa sirwiyaya mwaha wa mutthu mmosá, siso-tho ohihimuwa w’alipa-òkhwa orwiye mwaha wa mutthu mmosa’. Mwaha wa yoottheka eravihiwa ahu ni Adamu, otheene ahu ninnookhwa. Masi, mwaha woovaha erutthu awe yoomalela ntoko mukuttho, Yesu oohula ephiro wira apinaatamu yoopoliwe weepotthani wa ottheka ni okhwa orweela mwa ohihimuwa. Nto otthokiheryaka saana mwaha owo, Paulo aahilepa mwa aRoma 6:23 so: ‘Ale anira etampi anniliviwa n’ukhwa. Vano eparakha Muluku ennivahawe mahala enniphwanyiha ekumi ehinimala, mwa Yesu Kristu Pwiya’ahu’.
Yesu muneene onnihimya saana ele enitaphulela wa hiyo okhwa wawe. Owo aahimyale so: ‘Mwana a mutthu ohana othomeiwa, wira othene ale animwamini, ekhalane mwa yoowo ekumi ehinimala; Vekekhai, Muluku ahaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala’.—Yohani 3:14-16.
Nkahaya muupuwele, okumi woohimala, ohikhanle masooso, ohaawa wala soowereya! (Wisupulula 21:3, 4) Tthiri eyo etthu yooreera olipelela! Musomi onitokosa itthu soolempwa, aahimmye so: “Vaavo mahiye wala ikhapuri, animuupuxerya aya mutthu wira okumi khonlekela, ohihimuwa wa atthu onrowa wooniherya wira okhwa, khorina owerya wa mahiku otheene”. Aayo, ohihimuwa wa Yesu ontaphulela okumi ohinimala!
[Elatarato epaaxina 7]