Awosa Yaahiivahererya Orowa—oMéxico

ETTHU yoohakalaliha oweha wuncerereya wa amiravo a Anamoona a Yehova yaawo anikhweiherya okumi aya wira yinnuuherye muteko weKristau. (Math. 6:22) Mirukunuxo xeeni awosa anipaka aya? Mixankiho xeeni sinaaphwanya? Wira nisuwele, nrowe niiwe enihimya aya ale anirumeela oMéxico.

“NAAHAANA OPAKA MIRUKUNUXO”

Dustin ni Jassa anikhuma wEstados Unidos, yaathelanne mweeri wa Janero 2007. Nuuvira okathi vakhaani, yaahiwerya ophwanya etthu yaphavela aya okhuma khalai, omphwanya pakiti enakhala memmo mwaakha ntero. Nto pakiti aya yahimweemexa khumutthukelela waattamela Astoria, Oregon E.U.A epantta emosa yooweheya miri, miyaako, eneeve, waattamela epantta ya Oceano Pacífico. Dustin onihimya so: “Khula opuro naweha ahu wakhala woonihakalaliha”. Anamathelana ale yoona wira yaahikhweeherya okumi aya ni omuroromela Yehova. ‘Masi awo khiyaakhwehenrye’; maana annihimya wira ‘nakhala mpakitini owiiraka imeeturu 7.9, nanivara muteko nimeya na nihiku, mithukumano narowela muloko waalavula nttaava na elapo ekina, nave nanirumeela ntoko mapioneero ookhaliherya ikwaha sikina’. Nuuvira okathi yaahiweha wira awo yahiiwoka. Dustin onihimya wira: “ohiya okhaliherya muloko hiyo naniviriha okathi munceene nimulokiheryaka pakiti ahu. Naahisuwela tthiri wira akhala wira nimphavela opaceriha omurumeela Yehova mookumini mwahu nahaana opaka mirukunuxo”.

Jassa onincererya oriki: “Kihinatthi otheliwa kaakhala oMéxico, muloko onlavuliwa Englexi. Wanikisivela orumeela muloko ole ni kaaniphavela otthikela”. Okathi woomulompa Muluku vatthokoni, wira elipihe yoophavela aya orumeela opuro woothowa anamalaleerya, Dustin ni Jassa, yaahipacerya osoma sowiiraneya sa anna ni arokora yaathaamenle ilapo seiye wahaareere muteko woolaleerya. (Yoh. 4:35) Dustin onihimya so: “Nihiyo naaphavela ophwanya ohakalala iwo”. Okathi yawiiwale aya apatthani aya oMéxico wira waahipakiwa muloko waatthuneya okhaliheriwa, Dustin ni Jassa, yahuupuwela orowa opuro owo. Yahivukula miteko saya khumuhiya pakiti aya ethaamela oMéxico.

“ETTHU YOOTEPA OREERA YANIIRANENLE”

Dustin ni Jassa yahirowa omaka esidade ya Tecomán nlelo waattamela Oceano Pacífico etthu yoowiiraka ikilomo 4.345 mpantta onikela nsuwa wa Astoria. Dustin onihimya so: “Movirikana ni opuro ole naweha ahu miyako, yoopa aya epheyo yooloka, vano ninkhala opuro wooviha, woosareya miri sa limau ni khivaniweryaneya oweha ottaiwene”. Woopaceryani, awo khiyaawerya ophwanya muteko. Mwaha wa othoiwa musurukhu, awo yaalya musoro ni feijão ikwaha piili khula nihiku isumana sotheene. Jassa onihimya so: “okathi yoolya ahu enikhala aya wira khenilokexa, atthu anaasomiha ahu Biibiliya, anninivaha imanka, enika, apaphaya ni mirupa soosareya limau!” Nuuvira okathi, anamathelana ale yaahiphwanya muteko exikola ya mattava osommwa waya enirumeeliwa internet, eniweheriwa esidade ya Taiwan. Musurukhu anaakhela aya omutekoni vano, onniphiyerya othuma soolya saya sa khula nihiku.

Nto Dustin ni Jassa anoonela sai okumi aya vano? Awo anihimya wira: “Othaamela nno, ti etthu yootepa oreera eniiranenle. Wataana wahu ni Yehova ni varyaahuru, ti wootepa olipa ovikana khalai. Khula nihiku, ninnipaka itthu vamosa, orowa olaleerya, ovaanela, ni olavula moota wowaakhaliherya ale anaasomiha ahu Biibiliya, ni otthokiha mithukumano. Nave vano nootaphuwa wa sookhanyererya saarina ahu khalai”. Awo anilavula-tho wira: “Vano ninnixukhurela vanceene ni ovaha efaita masu ekeekhai nahaasuwela ahu saana ari mu Esalimo 34:9 ani: ‘Mwererye mone orera waya murima Apwiya [Yehova]’”.

EXEENI YAAWIIRINHE ATTHU IKONTO SINCEENE WIIVAHERERYA?

Anna ni arokora anivikana 2.900, oothelana ni oohithela, yaawo anamunceene yaarina iyaakha okhuma 20 ni 30, yaahithaamela mapuro makina a oMéxico weiwo nlelo anithowa aya anamalaleerya a Omwene. Nthowa xeeni Anamoona ala yaaronwe aya ovara muteko ola wooxankiha? Okathi atthu awo yaakohiwe aya, awo yaahaakhula ehimyaka mathowa mararu maalupale. Mathowa awo taavi?

Omphenta Yehova ni atthu akhwiihu. Letícia yoowo aabatiziwe arineene iyaakha 18, onihimya so: “Okathi kaivaherenrye aka wa Yehova, kaahisuwela wira eyo yaataphulela omurumeela ni murima aka wotheene ni okumi aka wotheene. Nto, wira kooniherye omphenta iwo Yehova, kaaphavela wiilipiha orumeela okathi ni ikuru saka kivaraka muteko awe”. (Mar. 12:30) Hermilo, yoowo othelanne ni Letícia, nto okathi aarina awe iyaakha okhuma 20, aahithaamela opuro woothowa anamalaleerya a Omwene. Owo aalavunle so: “Kooweha wira waakhaliherya atthu wiixutta itthu sa Muluku, tenrowa okhala etthu enooniherya omphenta namwaattamanani aka”. (Mar. 12:31) Nto owo aahihiya esidade ele yoothaaciri ya oMonterrey weiwo aavara awe obanko ni aanikhalana okumi woothaaciri; masi owo aahithaamela esidade yaamukhaani.

Wira mphwanye ohakalala woohimala ni wekeekhai. Moohipisa, nuumala Letícia obatiziwa aahimuhoola pioneero oolimalela olaleerya orowa muttetthe mmosa weiwo yaalalenrye aya mweeri ntero. Letícia onnuupuwela ariki: “Kaahitikiniheya. Mwaha wa waaweha atthu yeemereryaka saana ihapari sa Omwene naalaleerya ahu nto naahihakalala. Wanikisa wa mweeri ole, kaahilavula wira, ‘nto ela ti etthu eniphavela aka mookumini mwaka!’” Emosa-emosa, yaahimwiiraneela murokora ohitheliwe oniihaniwa Essly, orina iyaakha okhuma 20, owo aahihakalala mwaha wa ovara muteko ola wa Muluku. Okathi aasoma awe universidade, aanilaleeriwa ni Anamoona a Yehova ooluttuweliwa yaawo yaakhaliherya mapuro oothowa anamalaleerya. Owo onihimya so: “Oweha owiitho waya woohakalala wa anna ni arokora ale, waahikiiriha ophavela okela muteko wa okathi wotheene”. Axirokora ancipale yaahiphavela omutakiha Essly. Tthiri oMéxico axirokora oohitheliwa anivikana 680, yaahirowa okhaliherya mapuro oothowa anamalaleerya. Tthiri nla ntakiheryo nooloka wa amiravo ni atthu oowunnuwela!

Okhalana yoolakela ni okumi woohakalaliha. Okathi aamaliha awe osoma universidade, Essly aahileiheriwa oliveriwaka akursu a universidade. Apatthani a oxikola yaahimutumererya waakhelela yoovahiwa ele wira akhalane “okumi wooloka”, wira asome vanceene, aphwanye muteko, akhalane ekaaro, ni wira aweryeke weetta ilapo sikina ni opuha. Masi owo khaatthanre miruku iyo. Essly onihimya so: “Apatthani aka anci ari maKristau yaahikhalana mihakhu iyo, nto kaahiweha wira khiyaacalela miteko sa Muluku. Kaahiweha-tho wira okumi aya waamalela mmixankihoni vaavo okathi munceene yaavara aya itthu sa mulaponi. Kaaphavela wira omiravo aka kimurumeeleke Yehova okathi wotheene”.

Essly aahirowa omwiira kursu mukina aarowa omukhaliherya ophwanya muteko wira arumeeleke okathi wa muteko awe wa opioneero; nuumala-vo aahithaamela opuro wootepa othowa anamalaleerya a Omwene. Owo-tho aahipaka mirukunuxo wira aixutte mattaava anilavuliwa ni atthu Otomi ni oTlapaneco. Vano aweha ottuli iyaakha tthaaru aalaleerya opuro woothowa anamalaleerya, onnilavula wira: “Orumeela opuro ole wookivaha ohakalala wuulupale ni okumi wooloka. Vanceenexa eyo yoolipiha wataana waka ni Yehova”. Nave anikupali eyo, ti Filipe ni Raquel anamathelana a wEstados Unidos arina iyaakha okhuma 30. “Olumwenku onnirukunuwa mowaakuveya nto anamunceene ikumi saya khasirina yoolipana. Orumeela opuro nnaaphwanya ahu atthu aniwiriyana ihapari sa Biibiliya onninlipiha vanceene ni okhalana nlipelelo. Eyo tthiri ti yoohakalaliha vanceene!”

MOOTA WOOPHUKA MIXANKIHO

Ekeekhai wira orumeela opuro woothowa anamalaleerya a Omwene, wookhalana mixankiho saya. Mixankiho sikina onihela muhina othowa musurukhu wa wiikhaliheryano. Wira nwerye opaka eyo, muhaana orukunuxa makhalelo anyu. Pioneera olimalenle olaleerya oniihaniwa Verónica, onnitthokiherya wira: “Opuro omosa waatonko aka orumeela, kaanitthokiha soolya sookhweya kinatumiha. Mapuro makina kaatumiha ikuwo ni waamettha atthu. Mahiku ala, kinivara miteko sa vate ntoko ovela, ni waasomiha anamwane ovaanelaka ni anamuyari aya”.

Olimalela makhalelo a elapo ekina nyuwo muhisuwenle anyu, pooti okhala vooxankiha vanceenexa eriyari ya atthu a elapo yeeyo oovalaana ni mapuro makina. Nto Filipe ni Raquel, awo yahaana wiixutta nttaava okathi yaarumeela aya muttetthe onilavuliwa nttaava Nahuatl. Filipe onihimya so: “Ovirikana wa makhalelo waari wuulupale”. Exeeni yaakhalihenrye orukunuxa makhalelo aya? Raquel onihimya so: “Etthu naawehexexa ahu wa atthu anilavula nttaava Nahuatl, waari wataana wa imusi saya, othokoreryana waya, ni mwaha wa okhala atthu oovahanana. Nihiixutta sinceene mwaha wa ovaanelaka ni annihu ni arokorihu ni atthu a muttetthe ole”.

MOOTA WOWIITTHOKIHA

Akhala wira munniphavela orumeela opuro woothowa anamalaleerya munrowa wiitthokiha sai? Anna ni arokora atonko orumeela siiso anihimya so: Muhinatthi othaama mpaceryeke okhweiherya okumi anyu ni ohakalalaka ni ele erina anyu. (aFil. 4:11, 12) Nave etthu xeeni ekina enrowa anyu opaka? Letícia onihimya so: “Miyo kaanisyaka miteko sa mulaponi saarowa okiiyerya okathi kivaraka muteko opuro omosa. Miyo kaaphavela othaama khuta okathi kirowaka opuro woothowa anamalaleerya”. Hermilo onihimya so: “Kaahiixutta waapeya, okattha, ni wingomari ikuwo”. Verónica onihimya so: “Okathi kaaryaaka owaani ni anamuyari aka, ni axinnaka kaanikhaliherya ovela vate ni wiixutta waapeya soolya saamukhaani siniphwanyiha ekumi. Kaahiixutta moota woosuka saana musurukhu”.

Levi ni Amélia anikhuma wEstados Unidos athelanne etthu yowiiraka iyaakha 8, annihimya wira yaanipaka mavekelo okathi yiilokiherya aya orowa orumeela oMéxico. Levi onihimya so: “Naahipaka ikontha sahu niweha musurukhu onitthuneya orumeela eyaakha emosa, nuuvira-vo ninvekela Yehova nto khuphwanya tthiri musurukhu owo”. Nuuvira myeeri, yaahiwerya osuka musurukhu yaaphannye aya nuumala ovekela nto moohipisa khuthaama. Levi onihimya so: “Yehova aahaakhula yooveka ahu, nto hiyo naahaana otthara”. Amélia onnilavula wira: “Hiyo nuupuwela wira naarowa okhala mwaakha mmosa, masi vano ninrumeela etthu yowiiraka iyaakha thanu na tthaaru, nto nlelo khanuupuwenle otthikela owaani! Okhala nno wooniiriha onweha moota Yehova onikhaliherya awe. Khula nihiku, ninniweha moota Yehova oryaawe ooreera murima”.

Adam ni Jennifer, anamathelana yaawo akhumme wEstados Unidos, anirumeela muttetthe onilavuliwa Englexi oMéxico, nto nivekelo naya naahaakhaliherya-tho. Awo anihimya wira: “Muhiwehererye makhalelo ooreerexa. Muhaana ovekelaka akhala wira muniphavela orumeela mapuro oothowa anamalaleerya, nto mpakeke moovarihana ni mavekelo anyu. Mutthokiherye okumi anyu, mulepele epaphelo ofiliyali muhimyaka wira muniphavela orumeela, nto nuumala otokosa makhalelo anyu pooti othaama!”a Mwiira siiso munrowa waakhela mareeliho manceene oomunepani.

[Enoota]

[Elatarato epaaxina 3]

Dustin ni Jassa

[Elatarato epaaxina 4]

Amélia ni Levi

[Elatarato epaaxina 4]

Raquel ni Filipe

[Elatarato epaaxina 4]

Essly

[Elatarato epaaxina 5]

Letícia ni Hermilo

[Elatarato epaaxina 5]

Verónica

[Elatarato epaaxina 5]

Adam ni Jennifer