Awo Yaahiivahererya ni Murima Wotheene Okhaliherya oFilipina

ETTHU yowiiraka iyaakha 10 sivinre, Gregorio ni Marilou, yaawo avirinhe iyaakha 30 athelanne ene, yaarumeela ntoko mapioneero oManila, okathi omosaru yaavara muteko wa mulaponi khula nihiku. Khivaakhweya, masi yaanikhumela saana. Nto, Marilou aahivahiwa exeefi obanko weiwe aavara awe muteko. Owo onihimya so: “Muteko ahu, waahiniphwanyiha mihakhu ni okumi woohakalaliha”. Itthu saniweetttela saana mpakha wuupuwela oteka empa yaaphavela aya okhuma khalai, opuro wootepexa oreera etthu yowiiraka ikilometru 19 mpantta onikhuma nsuwa wa oManila. Awosa yaahimpaka contrato ni mulipa ooteka, wira yaarowa olivaka vakhaani-vakhaani khula mweeri mpakha iyaakha 10.

“KOONA NTOKO WIRA KANIMWIIYERYA YEHOVA”

Marilou onihimya so: “Muteko aka musya, waavekela okathi ni ikuru sinceene tivonto osiveliwa waka ni miteko somunepani waahivukuwa. Koona ntoko wira kanimwiiyerya Yehova. Nkaawerya-tho onvarela muteko Yehova ntoko kaamulaihenryaka”. Mwaha woohisiveliwa ni makhalelo awo, Gregorio ni Marilou, yaahikilaathi wira evaanele ni otokosa moota yaakhala aya. Gregorio onihimya so: “Naaphavela orukunuxa makhalelo ahu, masi khinaasuwela etthu ene yoopaka. Naahithokorerya moota woomurumeela saana Yehova ntoko atthu ahirina anamwane. Naahinvekela Yehova wira anikhaliherye mmwaha owo”.

Okathi ole, naahiwiriyana myaha sinceene saalavula sa okhaliherya mapuro oothowa anamalaleerya a Omwene. Gregorio onihimya so: “Nto noona wira myaha iye saalavuliwe, aari Yehova aakhula mavekelo ahu”. Anamathelana ale, yaahinvekela Yehova wira aacererye nroromelo naya ni olipa murima wira epake soothanla sooloka. Muxankiho yaarina aya, yaari empa ele nlelo yaatekiwa. Awo yiira alinve ene musurukhu wa iyaakha tthaaru. Nto yaarowa opaka exeeni? Marilou onihimya so: “Vaakhanle wira nahimmala-maliha contrato ole empa ehimanle otekiwa, musurukhu otheene waalinve ahu naarowa opweteiwa. Masi nahaana oweha itthu iya piili, opaceriha opaka otthuna wa Yehova wala otthuna wahu”. Wuupuwelela masu a murummwa Paulo voohimya sa ‘orihela’ ota itthu sotheene, awosa yaahihiya muteko ole wa otekiwa empa, khuhiya miteko saya, khutumiha itthu saarina aya, ethaamela eviila ya esisiro yoPalawan, etthu yowiiraka ikilometru 480 onikhuma epheyo wa oManila.​—aFil. 3:8.

AWOSA “YAAHIIXUTTA ESIIRI”

Ahinatthi othaama, Gregorio ni Marilou yaahimananiha weererya okhweeherya okumi aya, masi khiyaasuwela moota yaarowa aya okhalaka mpakha ophiya opuro waarowa aya. Marilou onihimya so: “Etthu yoonale aka khiyaakisivenle. Khiyaakhanle energia, hata itthu sikina sinikhweiherya okumi. Khinaarumeela efugau naahaana othaya ikhuni wira naapeeleke soolya. Kahinkheliwa orowa ilooxa suulupale, orowa olya orestaurante, ni itthu sikina siniphwanyaneya musidade”. Hata vaari siiso, awosa yaanivikaniha wuupuwela etthu yaawiirinhe othaama, nto nuuvira mahiku vakhaani yaahilokiherya muupuwelo ayasa. Marilou onihimya so: “Vano kinnihakalala oweha oreera wa itthu sipattuxiwe, ohela muhina waarya wa itheneeri ohiyu. Etthu ekina yootepa ohakalaliha ori waaweha atthu ehakalalaka okathi onaalaleerya ahu ihapari sooreera. Orumeela wahu va, wooniixuttiha ‘okhala’ oohakalala”.​—aFil. 4:12.

Gregorio onihimya so: “Okathi naaphin’ye ahu opuro ola, yaari Anamoona axexe paahi. Awo yaahihakalala okathi kaapacenrye aka olavula myaha khula esumana ni omurumeela waka guitara okathi wowiipa isipo sa Omwene”. Muhina mwa eyaakha emosa alaleeryaka, egrupu ele yahinnuwa khukhala muloko wa anamalaleerya 24. Gregorio onihimya so: “Moota oniphentiwa ahu muloko ola woovara murima ahu”. Olelo-va, yaweha ottuli, etthu yoovikana iyaakha 6 sivinre arumenle aya opuro ole woorakamela esidade, awo anihimya so: “Ohakalala wotheene ophwannye ahu mwaha wa itthu somunepani khonilikana ni itthu sikina. Khinaatonko ohakalala mmota owo”.

‘MIYO KOOLAWIHA KIWEHA WIRA YEHOVA TOOLOKA!’

Elapo ya oFilipina, anna ni arokora oowiiraka 3.000, athaamela mapuro oothowa anamalaleerya a Omwene. Anamalaleerya oowiiraka 500 ari axirokora oohitheliwa. Mwa ntakiheryo, mmosa a yaawo ti Karen.

Karen, vano orina iyaakha sinivikana 20, nto oyariwe oBaggao Cagayan. Okathi aapacerya awe omiravo, aanuupuwelelaka wunnuuherya muteko awe woolaleerya. Karen onihimya so: “Mwaha woosuwela wira okathi ohanle ori vakhaani ni atthu anceene ahaana wiiwa ihapari sa Omwene, kaniphavela nto orumeela opuro woothowa anamalaleerya”. Nnaamwi amusi awe akina yaamutumererya osoma universidade, ohiya orowa olaleerya mapuro oorakamela, Karen aahiveka nikhaliheryo na Yehova. Owo aahivaanela-tho ni ale yaarumeela mapuro oorakamela. Okathi aarina awe iyaakha 18, aahithaamela opuro wa 64 ikilometru orakamela osidade wawe.

Muloko mwaamukhaani aaronwe awe okhaliherya, onikhapelela mittetthe sa mmiyaakoni okherekhere wa ephareya ya Pacifico. Karen onnuupuwela ariki: “Wira mutthu arowe muloko mukina wa oBaggao, naaneetta mahiku mararu niviraka mmiyaakoni ni olapuwa miro sowiiraka 30”. Owo onnincererya ariki: “Wira kaaphwanye atthu akina anaasomiha aka Biibiliya, kinneetta iwoora 6 nave kinnirupa weiwo nto nihiku nikina kineetta iwoora sikina 6 kirowaka owaani”. Niireke eyo enniphwanyiha mireerelo? Ariki otheya Karen onihimya so: “Ikwaha sikina metto saka sinniipa, masi kinnihakalala osuwela wira kihiiriha soosoma sa Biibiliya sinceene siniphiyerya 18”. Miyo ‘koolawiha koona wira [Yehova] toloka’.​—Esal. 34:9

‘KIHIIXUTTA OMUROROMELA YEHOVA’

Exeeni yaamwiirinhe Sukhi, murokora oohitheliwa orina iyaakha sinivikana 40 othaama Estados Unidos khurowa oFilipina? Mwaakha wa 2011 owo aahirowa wa asembeleya weiwo aakohiwe awe munna ni amwaarawe. Awo yaahimyale wira yaahitumiha itthu sinci saarina aya khuthaama erowaka oMeexiko okhaliherya muteko woolaleerya. Sukhi onihimya so: “Mwaha ole wa makoho ni waakhula, waahikiiriha wuupuwela saana soolukama sahaatonko aka wuupuwela”. Vaavo Sukhi yoowo anamuyari awe anikhuma wIndia, aasuwenle awe wira vaanitthuneya okhaliheriwa atthu anikhuma oPunjabi, yaawo anikhala oFilipina, nto owo aahithanla orowa okhaliherya. Niireke saahimphwanya mixankiho?

“Vaari voovila othanla etthu yootumiha ni yookuxa, masi khonvikana mixankiho saarowa ahu okumana. Nave nuumala okhala iyaakha 13 empa aka yooreera, kaahithaama kirowa okhala ni emusi emosa, yaarina enupa yoohaatta itthu soreera. Khivaakhwen’ye, masi eyo ti etthu yaakikhalihenrye olimalela okhala ni itthu vakhaani”. Nto mixankiho xeeni saaphwannye nuumala ophiya oFilipina? “Muxankiho muulupale waari woova makhalelo a elapo ele, owoova axiitthu, ni wunkheliwa owaani. Kaahincererya omuroromela waka Yehova!” Niireke oophwanya mareeliho? Atheyaka, Sukhi onihimya so: “Yehova onninleela wira ‘Mukehererye mwaha wetthu ila, munimona wira miyo kinrowa otthukula mikhora sa wirimu, wira komoriheleni watta wa sorera sa khula enamuna’. Kihoona masu ala yiiraneyaka wa miyo, okathi mwaneene etthoko aakikoha awe wira: ‘Muntthikela sili okixukurya? Kihaana makoho manceene’. Eyo ti etthu enkihakalaliha, waakhaliherya atthu anivoliwa etala yomunepani!” (Mal. 3:10) Sukhi onnincererya ariki: “Tthiri etthu yaari yooxankiha waari othaama. Nuumala opaka eyo, vaakhala ntoko mutikiniho woona moota Yehova, aakikhaliherya awe”.

“KAAHIWERYA OXINTTA WOOVA WAKA”

Sime, munna oothela vano orina iyaakha okhuma 30, aahithaama oFilipina orowaka elapo ya Oriente Médio wira avareke muteko oniphwanyiha musurukhu. Aryeene weiwe, munna Sime aahikhaliheriwa ni mwaha waalavuliwe ni mutokweene a esirkwitu ni munna ori a Nikhuuru Noolamulela, wira owo apweheke nipuro noopacerya soophavela sa Yehova. Sime onihimya so: “Wuupuwela ohiya muteko aka, khiwaakiphwanyiha ikhove”. Hata vari siiso, Sime aahihiya muteko ole atthikela oFilipina. Olelo-va, Sime ni amwaarawe aniihaniwa Haidee, anirumeela oDavao del Sur, epantta enikhuma epheyo wa elapo ele, weiwo ori woothowa anamalaleerya a Omwene. Sime olavunle so: “kaweha ottuli, kinnixukhurela mwaha wa oxintta woova waka oyeleela muteko, ni wira kipacerihe soophavela sa Yehova’. Khiivo etthu yooloka ovikana onvaha Yehova sooreera sotheene siniwerya ahu!”

“EYO ENNINIVAHA OHAKALALA WEKEEKHAI!”

Okathi Ramilo ni Juliet, anamathelana yaawo ari mapioneero arina iyaakha okhuma 30, yaasuwenle aya wira muloko woorakamela ikilometru 30, waatthuneya okhaliheriwa, nto nahivahererya orowa okhaliherya. Nto khula esumana, pooti erupaka epula wala noopaka nsuwa, Ramilo ni Juliet anneetta ikwaha sinceene enwenle ene motorizada aya wira erowe yiire mithukumano ni olaleerya. Mixankiho sikina ori oviraka iphiro soosareya mithala, olapuwaka mithato wala iponti, masi awo annihakalala mwaha wa wunnuuherya muteko aya woolaleerya. Ramilo onihimya so: “Miyo ni amwaaraka ninniiriha soosoma sa Biibiliya 11! Orumeela opuro woothowa anamalalaleerya, onitthuneya wiivahererya, masi eyo etthu yootepa otteeliha murima”!​—1 aKor. 15:58.

Mwaaniphavela osuwela saana moota wookhaliherya opuro woothowa anamalaleerya a Omwene elapo anyu wala elapo ekina? Mwaaphavelaka-vale, mulavule ni mutokweene anyu a esirkwitu, nave musome mwaha oni: Munoowerya ‘Orowa Omasedonia’?, Orummwa Ahu Wa Omwene a Akosto 2011.

[Eponto yuulupale ya epaaxina 3]

“Ohakalala orina ahu mwaha wa waaweha atthu yinnuwaka omunepani waya, khonlikana ni etthu ekina. Ninnitepa ohakalala okhala wira nookhalana ekumi yekeekhai”.—Gregorio ni Marilou

[Elatarato epaaxina 3]

[Ekaaxa epaaxina 4]

MOOTA AKINA ANIWERYA AYA OPHWANYA YOOLYA

Etthu yowiiraka anna ni arokora 70 vanceenexa arina iyaakha okhuma 18 ni akina 50, yaawo anikhaliherya oFilipina, anikhuma ilapo sikina. Robert ni Mirjam, anamathelana arina iyaakha okhuma 40, anikhuma wAlemanha, anihimya wira aathaamela elapo ekina wira yakhaliherye mwaakha mmosa. Masi vano soovira iyaakha 14, nlelo anikhaliherya oFilipina! Nto aniwerya sai ophwanya musurukhu onaakhaliherya? Robert onihimya so: “Okhala wira ovila ophwanya muteko oFilipina, ninnirowaka wAlemanha ekwaha emosa khula mwaakha khiyavara muteko myeeri miraru”. Nto musurukhu onaakhelihiwa ahu myeeri iye, onninikhaliherya olaleeryaka niryeene oFilipina mwaakha ole wotheene. Mirjam onihimya so: “Ekeekhai wira okhala elapo ekina wookhalana mixankiho saya, masi, kinnikhalana murettele wekeekahai mwaha wookhapeleliwa ni Yehova”. Vano Robert onnicererya eyo oriki: “Orumeela opuro ola, woolipiha waamini wahu”.

[Elatarato]

[Elatarato epaaxina 5]

(Efootu moono woothiyana) Karen

[Elatarato epaaxina 5]

(Efootu moono woolopwana) Sukhi

[Elatarato epaaxina 6]

(Efootu moono woothiyana) Sime ni Haidee

[Elatarato epaaxina 6]

(Efootu moono woolopwana) Juliet ni Ramilo