Muttottele Saana Mureerelo Omusoma Biibiliya

‘Kinnisiveliwa ni ikano sa Muluku’.​—AROM. 7:22.

MOONE IPONTO IYA:

Moota xeeni osoma ni moolumo ‘ohituperya’ onoovahaayani mureerelo?

Munrowa osuka sai iponto sa mBiibiliyani wira mwaakhaliherye akina?

Omusoma Biibiliya onookhapelelani sai?

1-3. Mireerelo xeeni sinikhumelela mwaha woomusoma Biibiliya ni weettela sowiixuttiha sawe?

“KINNIMUXUKHURELA Yehova khula voosiisu mwaha wa okikhaliherya omwiiwexexa Biibiliya”. Murokora mmosa owunnuwela yoowo olavunle masu ala, oomusoma Biibiliya otheene ikwaha 40, ni khomuhiyale omusoma. Ookhala murokora mmiravo olempe wira Biibiliya oomukhaliherya omoonaka Yehova okhala ekeekhai. Mwaha waivaavo, owo ohaataana saana ni Yehova, ntoko Tiithi awe a wiirimu. Owo ohimyale so: “Kookhalaru, nkinahakalale mmoota ola!”

² Murummwa Pedru aahaatumererya anna otheene wira ‘ephaveleke masu a Muluku, ari yolya yekekhai’. (1 Ped. 2:2) Otheene yaale anisiveliwa omusoma Biibiliya, ni yaale aneettela sowiixuttiha sawe, aakhalana yowuupuxerya ya murima yooloka ni yoolakela yekeekhai. Awo anninnuuherya wataana ni atthu yaale animphenta ni omurumeela Muluku eekeekhai. Iya ti itthu siniiriha ‘Osiveliwa n’ikano sa Muluku’. (aRom. 7:22) Masi sookhala-tho mireerelo sinceene. Mireerelo xeeni sikina?

³ Vaavo muniixutta anyu itthu sinceene sa Yehova ni Mwanawe, waaphenta wanyu awosa ni apinaatamu onimunnuwaka. Okhalana osuwela wekeekhai wa Biibiliya onimookhaliheryani oweha moota Muluku onrowa awe owoopola atthu wa olumwenku ola wootakhala. Nyuwo muhaana ihapari sooreera wira mwaaleeleke atthu. Yehova onimooreelihani vaavo muniwiixuttiha anyu akina itthu mwiixuntte anyu mBiibiliyani.

MMUSOMEKE NI MUTTHOKOLELEKE

4. Ontaphulelani omusoma Biibiliya ni masu ‘oohiituperya’?

⁴ Yehova khaniphavela wira arumeyi awe omusoma waya Biibiliya yiireke oomutthimaka. Owo aahimuleela Yoxuwa wira: ‘Eliivuru ela ya ikano ehikhumeke vayanoni vanyu nto nyuwo musomeke ohiyu ni othana moohiituperya’. (Yox. 1:8, Tradução do Novo Mundo; Esal. 1:2) Niireke yoolepa ela enitaphulela wira muhaana osomaka masu otheene ni moolumo oohiituperya okhuma Maphattuwelo mpakha Wisupulula? Nnaari. Eyo enitaphulela wira muhaana osomaka wa enamuna enrowa owiirihani otthokelela. Vaavo munimusoma anyu Biibiliya ‘moohiituperya’, enimookhaliheryani owehexexa epantta erina efaita enkela woolipihani okathi yoole. Mwaphwanya ifrase iyo ni iveersu aahiiso myaha iyo, musomeke moohaakuvana, waaniheryasa muromolaka masi moohiiwanyeya masu vayanoni. Ikuru sa masu a mBiibiliyani sinoowiirihani wuupuwelela saana makhalelo anyu. Xeeni varyaaya va faita? Mwaha woowi wiiwexexa saana miruku sa Muluku sinoowiirihani ophavela weettela.

5-7. Muhimye moota osoma Nuulumo na Muluku moohiituperya onookhaliheryaayani: (a) Okhala ooloka ni owiisuumaaliha; (b) Waapixerya murima akina ni oreera murima; (c) Olipiha omuroromela Yehova hata okathi wa mixankiho.

⁵ Osoma ni masu oohiituperya, onnikhaliherya vanceenexa mwaasomaka iliivuru seiye muhilimalenle anyu. Mwa ntakiheryo, nkahaya muthokorerye sowiiraneya tthaaru. Yoopacerya, mmuupuwele mwammiravo yoowo muKristau aapaka yoosoma awe; nto khumwiiriha orowa osomaka eprofesia ya Hoseya. Asomaka ekapiitulu 4, owo aahisoma moohaakuva iveersu 11 mpakha 13. (Mmusome Hoseya 4:11-13.) Mwaha wa xeeni? Iveersu iye saanivara murima awe mwaha woowi oxikola owo oniwana ni muxankiho wa okhanyereriwa orupihana woohiloka. Owo onnitthokelela iveersu iya wira: ‘Yehova onniweha itthu soohiloka pooti siiriwaka mowiipitheya. Nkiniphavela onveeha’. Munna ole aahiilipiha wira akhale ooloka vamaithoni va Muluku.

⁶ Yowiraneya ya nenli ori murokora muKristau onisoma eprofesia ya Yoweli ekapiitulu 2 eveersu 13. (Mmusome Yoweli 2:13.) Okathi owo onisoma awe moohiituperya, owo onnuupuwelela moota woomutakiha Yehova yoowo ori ‘òrera murima ni omoriwa ikharari òpisa onanariwa ni òroromeleya’. Owo onnilakelela omala-maliha olavula moonanariwa, onyema okathi onilavula awe ni aiyawe ni atthu akina.

⁷ Ya neeraru, mmuupuwele tiithi mmosa ori muKristau oyelenle muteko awe khiyaxanka moota wowaakhaliherya amwaarawe ni anaawe. Nto owo onnisoma moohiituperya yoolepa ya Nahumi 1:7 masu ani: Yehova ‘onnakhapelela ale animutthyawelela’ nave ‘onnasuka atthu awe nihiku n’oxanka’. Muupuwelo ola onnimulipiha. Owo onniweha ophenta wa Yehova nto khiyamaala oxankiheya vanceene. Nuumala-vo onnisoma eveersu 15 moohiituperya. (Mmusome Nahumi 1:15, NM.) Munnihu onniweha wira olaleya ihapari sooreera okathi wooxankiha, ontaphulela ompaka Yehova okhala ntthyawelo nawe. Vaavo munna onaavya awe muteko wa mulaponi, owo oniira akhaliheryaka muteko wa olaleerya khula esumana.

8. Mowaakuveya muhimye itthu sa faita mwiixuntte anyu mwa yoosoma anyu ya Biibiliya.

⁸ Myaha iya sooreerela simanle olavuliwa, siri mBiibiliyani seiyo akina anoona aya ovila wiiwexexa saana. Vaavo munithokorerya anyu moohakalala iliivuru sa Hoseya, Yoweli, ni Nahumi, munoophavelaka-tho osoma iveersu sikina ni masu oohiituperya. Nkuupuwelani miruku munrowa anyu ophwanya mwaasomaka soolepa sa maprofeta awo! Nto ankhi iliivuru sikina siri mBiibiliyani? Nuulumo na Muluku ninlikana ni opuro onthimpwa maluku a ediamante. Nyuwo muhaana othipaka oratteene! Nto, mmusomeke Biibiliya ni yoolakela ya ophwanya mihakhu sa Muluku, eyo piiyo, malakiheryo yaawo ari ekeekhai.

MWIIMANANIHE WIRA MWIIWEXEXE

9. Ninrowa wuncererya sai osuwela wahu yootthuna ya Muluku?

⁹ Vaavo munimusoma anyu Biibiliya khula nihiku, nyuwo-tho muhaana ophavelaka omwiiwexexa ni okhalana ankhili. Nto murumeeleke iliivuru sa mulokiheryo wa Yehova wira mutokose mikhalelo sa atthu, mapuro, ni sowiiraneya munisoma anyu. Akhala wira khamunsuwela yowiixuttiha emosa ya mBiibiliyani nyuwo pooti omukoha mutokweene a mmulokoni wala muKristau mukina oolipa. Wira nitakiherye otthuneya waya wiiwexexa ni osuwela wahu, nithokorerye ntakiheryo na muKristau a eseekulu yoopacerya aapanke eyo. Nsina nawe ti Apolo.

10, 11. (a) Moota xeeni nikhaliheryo aavahiwe awe Apolo waalokihenrye aya muteko awe wa olaleerya ihapari sooreera? (b) Yowiraneya ya Apolo enniixuttihani? (Nwehe ekaaxa eni: “Wiixuttiha Wanyu Onnitthara Malakiheryo a Ninaano?”)

¹⁰ Apolo aari muKristau muYuda yoowo ‘àsuwela sana Solempwa’ ni aahisareya ikuru sa Muluku. Eliivuru ya Miteko, enihimya wira: Owo ‘anixuttiha orattene itthu sa Yesu, nnamwi asuwenle obatizo wa Yohani pahi’. Nuumala onwiriyana aixuttihaka wEfeso, anamathelana yiihaniwa Prisila ni Akila, yaahimutthokiherya ‘orattene ephiro ya Muluku’. (Mit. 18:24-26) Nto Apolo aattottenle sai mureerelo?

¹¹ Nuumala olaleerya wEfeso, Apolo aahirowa wAcaia. ‘Vaphiyalyawe weiwo, ahakhaliherya vanjene atthu awo òwamini, alipihiwaka ni eparakha ya Muluku. Tthirí, avanyihanaka n’aYuda mmuthukumanoni, anawerya n’ikuru sa molumo awe, anathonyerya mwa Solempwa, wira Yesu ti Mòpoli’. (Mit. 18:27, 28) Okathi ole, Apolo aahitthokiherya saana yootaphulela ya obatiziwa wa muKristau. Mwaha wa wuncererya osuwela wawe, ‘ahakhaliherya’ maKristau asya wunnuuherya okokhorela waya wekeekhai. Yowiiraneya ela enniixuttiha exeeni? Nimutakihaka Apolo, nihaana wiilipiha okathi onimusoma ahu Biibiliya wira nimwiiwexexeke saana. Nto okathi muKristau mukhwiihu oosuwela onnikhaliherya awe moota woowiixuttiha saana, nihaana weemererya moowiiyeviha ni oxukhurela. Wira siiso, muteko oninvarela ahu Muluku onrowa okhalaka wooloka.

MURUMEELE ENIIXUTTA ANYU WIRA MWAAKHALIHERYE AKINA

12, 13. Muhimye moota xeeni orumeela mooreerela murima Soolempwa sinimukhaliherya awe ole onimusoma Biibiliya okela vahoolo momunepani.

¹² Ntoko Prisila, Akila ni Apolo, hiyo nnoowerya wakhaliherya atthu akina. Munoonela sai okathi olipiha wanyu onaakhaliherya aya ale anisiveliwa ekeekhai osyaka sooweeha wira annuwele omunepani? Wala nyuwo ntoko mutokweene, munoonela sai vaavo muKristau mukhwiinyu onooxukhurelaweni mwaha wa miruku sa mBiibiliyani simukhalihenrye okathi wa mixankiho? Moohaaniherya, orumeela Nuulumo na Muluku wira mwaakhaliherye akina olokiherya ikumi saya, eri etthu yoohakalaliha.a Moone moota woophwanya yoolakela anyu eyo.

¹³ Voohimya sa okokhorela wekeekhai ni wa ethiru, anaIsarayeli anceene mahiku a Eliya, yaakhala oxerexere wa ekeekhai. Miruku seiye Eliya aavanhe awe pooti omukhaliherya ole ommusoma Biibiliya ohinrowa vahoolo momunepani. (Mmusome 1 Mamwene 18:21.) Nkahaya muthokorerye yowiiraneya ekina: Akhala wira ole onimusomiha anyu Biibiliya oniwoova apatthani awe wala amusi, nyuwo pooti omulipiha ovikaniha omukokhorela Yehova mmooniheryaka Yesaya 51:12, 13.​—Mmusome.

14. Exeeni enrowa wookhaliheryani wuupuwelaka soolepa sa mBiibiliyani okathi onrowa anyu waakhaliherya akina?

¹⁴ Vekeekhai Biibiliya ookhalana moolumo ookhomaaliha, anittaruxa, wala waalipiha ale animusoma Biibiliya. Nto nyuwo pooti wiikoha so: ‘Kinrowa wuupuwelela sai soolepa okathi kiniphavela aka’? Mmusomeke Biibiliya ni otthokelela moolumo a Muluku khuta nihiku. Wira siiso munoolipiha ni munoosuka masu yaawo munepa wa Muluku onrowa aya owuupuxeryakani okathi muniphavela anyu wira yookhaliheryeni.​—Marko 13:11; mmusome Yohani 14:26.b

15. Exeeni enrowa wookhaliheryani osuwela saana Nuulumo na Muluku?

¹⁵ Ntoko Mwene Salomoni, muhaana onvekelaka miruku Yehova wira nvareke saana miteko sawe. (2 Wah. 1:7-10) Ntoko siira aya maprofeta a khalai, awo ‘yahiphavela osuwela orattene’ Nuulumo na Muluku wira emusuwele saana Yehova ni yootthuna awe. (1 Ped. 1:10-12) Murummwa Paulo aahimulipiha Timootheyo wiilyihaka ‘molumo òwamini ni mwixuttiho wa ekekhai’. (1 Tim. 4:6) Opaka eyo, munrowa waakhaliherya saana atthu akina momunepani. Nave munrowa olipiha waamini wanyu.

NIKHALIHERYO NEEKEEKHAI NIRI MBIIBILIYANI

16. (a) Moota xeeni ovarerya soolempwa nihiku ti nihiku waakhalihenrye aya atthu a oBereya? (b) Xeeni omusoma Biibiliya khula nihiku onnivaha aya efaita olelo-va?

¹⁶ Ayuda oMacedonia yaakhala esidade ya oBereya, vaanaasivela ‘nihiku ti nihiku osoma Solempwa sa Muluku’. Okathi Paulo aalaleerya awe aYuda, awo yaanilikanyiha ele yaasuwenle aya ni ele yaasoma aya mwa Soolempwa. Nto exeeni yaakhumelenle? Anamunceene yaahikupali wira yiixutta ekeekhai nto awo ‘yahamini’. (Mit. 17:10-12) Ela enooniherya wira omusoma Biibiliya khula nihiku onnilipiha omwaamini wahu Yehova. Waamini, ori okupali ‘itthu sinlipelelahu’, nto ti wootthuneya wira noopowe nikelaka elapo esya ya Muluku.​—aHéb. 11:1.

17, 18. (a) Moota xeeni nroromelo noolipa ni ophenta onikhapelela aya murima wa nthoonyeryo wa muKristau? (b) Moota xeeni nlipelelo ninnikhapelela aya?

¹⁷ Moophwanelela, Paulo oolepa wira: ‘Nto hiyo n’àtthu òthana: nihana wisumaliha. Niwareke wamini n’uphentana, ntoko sowara sa yuma; niwareke ororomela wopowa, ntoko ekapaseti ya yuma’. (1 aTes. 5:8) Murima wa toropa, ohaana okhapeleliwa. Emosa-mosa, murima wa nthoonyeryo wa muKristau, ohaana okhapeleliwa wira ohittheke. Exeeni eniiraneya akhala wira arumeyi a Yehova athelanne anninnuuherya nroromelo mwa anatiri a Yehova omphenta owo ni apinaatamu akhwaaya? Murumeyi mmoota owo, onnikhalana mukhalelo woolokexa ni woolipa wa omunepani. Vankhala wira owo khanrowa-tho opaka etthu enrowa omoceeliha wataana ni Muluku.

¹⁸ Paulo nave aahilavula sa ekapaseeti okhala ‘nlipelelo na wopowa’. Toropa a okathi wa khalai, akhala wira khaakhapelela muru awe, owo aamookhwa. Masi ekapaseeti yooloka yaarowa omwaakiherya mavaka mmuruni wira ahivulalihiwe. Ninnilipiha woopoliwa wahu ni Yehova vaavo ninsoma ahu Nuulumo nawe. Okhalana nlipelelo noolipa, onninisyakiha anammwareya ni masu aya ‘ahintekeliwa etthu’. (2 Tim. 2:16-19) Nlipelelo nahu ninrowa onlipiha wira nikhootteke itthu sinikhoottihiwa ni Yehova.

ETTHU ENITTHUNEYA WIRA MUTTHU OOPOWE

19, 20. Nthowa xeeni nimphenta ahu vanceene Nuulumo na Muluku, ni ovaha efaita? (Moone ekaaxa eni: “Yehova Onnikivaha Ele Enikithowa”.)

¹⁹ Vaavo nintepa ahu waattamela wanikisa, nto ti vootthuneyexa ororomela Nuulumo na Muluku. Miruku nimphwanya ahu mBiibiliyani, sinniniiriha osyaka mweettelo wootthekiha. Orweela mwa nikhomaaliho ni olipihiwa, ninrowa oxintta soweeha sa Satana ni itthu sa olumwenku awe. Nilakiheriwaka ni Yehova, nnoowerya okhala mphironi oniphwanyiha ekumi.

²⁰ Muhiliyale wira yoophavela ya Muluku ti wira ‘atthu othene yopowe’. Nto, arumeyi a Yehova ari atthu a maloko otheene. Nave atthu awo, annitthuneya waakhaliherya, mmuteko ahu woolaleerya. Masi otheene yaale aniphavela woopowa, ahaana ‘osuwela ekekhai’. (1 Tim. 2:4) Nto, wira niwerye woopowa mmahiku ala ootakhala, nihaana omusomaka Biibiliya ni weettela sowiixuttiha sa Muluku. Tthiri, omusoma wahu Biibiliya khula nihiku, onnooniherya saana ophenta wahu ikeekhai siri muNuulumo na Yehova.​—Yoh. 17:17.

[Inoota]

[Elatarato epaaxina 7]

[Ekaaxa epaaxina 9]

WIIXUTTIHA WANYU ONNITTHARA MALAKIHERYO A NINAANO?

Nimphavela okhala oosuwela itthu sa niinano voohimya sa Biibiliya wira niweryeke waaleela akina ihapari iyo. Moovarihana ni eyo, nto mwaarowa waakhula sai makoho ala?

▪ Exeeni Yesu uupuwela awe okathi aalavunle awe wira ‘atthu a vano’ alavuliwe mMatheyo 24:34?​—A Sentinela 15 de Abril de 2010, ipaaxina 10-11.

▪ Ovalaanyiwa wa ‘ipwittipwitthi ni ‘ipuri’ olavuliwe mMatheyo 25:32 onipacerya silini?​—A Sentinela 15 de Outubro de 1995, ipaaxina 21-23.

▪ Ntoko silavuliwe aya ni Luka 21:26, silini ‘atthu akina anrowa aya okhwa wova elipelelaka itthu sinrowa okhumelela mulaponi mothene’?​—A Sentinela 15 de Fevereiro de 1994, ipaaxina 19-20.

Orweela mwa omusomaka oratteene khula nihiku Biibiliya, ninrowa waakhaliherya atthu weetta mmuthukoni mmo onitepa waarya okumiheriwaka ni Yehova onooniheriwa mBiibiliyani.​—Mir. 4:18.

[Elatarato]

Apolo aahikhaliheriwa olokiherya muteko awe woolaleerya wira okhumele saana

[Ekaaxa epaaxina 11]

‘YEHOVA ONNIKIVAHA ELE ENIKITHOWA’

Murokora mmosa mwammiravo muKristau, aalempe so: “Sowuupuxerya sotheene soolopola Yehova onnivaha awe orweela mwa omusoma Biibiliya khula nihiku sookhaliherya saana okumi aka. Kipacenrye omusoma Biibiliya universidade, masi kaahiviriha iyaakha piili wira kimmalihe omusoma Biibiliya otheene. Okhuma okathi ole, kaahiweha mBiibiliyani itthu sotheene kaaphavela aka okathi wa opaka yoothanla aka. Nto vano kinnimusoma Biibiliya ekwaha ya nenli. Masi nlelo vanikhala wira kinsoma itthu kihitonko aka oweha. Omusoma Biibiliya vano ti woohakalaliha ntoko wanipacerya. Kinnihakalala oweha moota Yehova oniwerya awe okivaha sotheene sinkithowa”.