Niireke Nyuwo Munoomuroromela Muluku?

MUUPUWELELE waari nyuwo mookhalana mpatthani anyu onoosivelani vanceene, masi owo oopaka etthu nyuwo muhiniwerya anyu okupali. Akina anninyohola etthu opanke awe nto khiyahimya wira mpatthani anyu tootakhala. Niireke nyuwo mwaarowa waakuveya waakupali atthu awo, wala mwaarowa olipelela wira mwiiwe etthu xeeni mpatthani anyu aarowa awe ohimya? Akhala wira owo khokhanle opuro yoowo wira ohimye mmansawe etthu yiiraneyale, niireke mwampixa murima, ni ohimphukela naananoru?

Muhinatthi waakhula, waaniheryasa munniphavela osuwela itthu sikina. Nyuwo pooti wiikoha so: ‘Kiireke kinnimusuwela saana mpatthani aka, ni mathipelo xeeni kirina aka wira kimphenteke’? Waaniheryasa, mookhalana mathowa manceene. Nto khanikhanle oorumeela mathowa mamosaru wira nisuwele akhala wira Muluku tootakhala?

Waaniheryasa nyuwo onnoovilani osuwela itthu sikina seiyo Muluku onipaka awe, wala munnixankiheya nthowa naya owo oneemererya awe itthu iyo siiraneyaka. Aakhala atthu anceene anirowa wooleelani wira Muluku tootakhala ni anirowa wootumereryani ophukela sowiira sawe ntoko awo siniira aya. Niireke nyuwo munimweererya mwaha owo muhinatthi osuwela saana? Waakhuliwa waya onirowa wooneya akhala wira nyuwo munnimusuwela saana Muluku. Nto mwiikoheke so: ‘Muthinto xeeni wa opatthani miyo orina aka ni Muluku’?

Akhala wira okumi anyu ti wooxankiheya, nyuwo pooti opacerya ohimya wira Muluku khahiyo mpatthani ooloka. Masi nkuupuwelelani. Niireke Muluku tonikumiherya mixankiho sanyu, wala onikumiherya mareeliho? Sintoko ninsuwela ahu Satana ‘toniruma vathí-va’ ohiya Yehova. (Yohani 12:31) Tivonto, Satana tonikumiherya mixankiho ni ohixariya wotheene wa olumwenku ola. Niireke nyuwo khamunikupali wira ohimalela wahu ni makhalelo ahu oovirikana annikumiherya mixankiho sahu sinceene?

Mwa mpantta mukina, etthu xeeni Muluku onikumiherya awe? Biibiliya onihimya wira Muluku ‘topattuxale erimu n’ilapo ya vathí’. (Esalimo 124:8) Eyo ennuupuxerya wira erutthu ahu ‘yupiwe motikiniha’. (Esalimo 139:14) Nave, Biibiliya onnimuhimya Yehova okhala “Muluku yowo orina ekumi anyu mmatatani mwawe”. (Daniyeli 5:23) Eyo enitaphulela exeeni?

Eyo enitaphulela wira iphumu sinimumula ahu, ni okumi orina ahu, nivahiwe ni Mpattuxa. (Miteko 17:28) Eyo enitaphulela-tho wira elapo ninkhala ahu, oreera waya ophentana ni okhalana apatthani, eyoolya yoosiva ninlya ahu, wiiwa oruma wa itthu, ni woona wunkhela, itthu iya sotheene nivahiwe ni Muluku. (Yakobo 1:17) Niireke nyuwo khamunikupali wira mareeliho awo annimwiiriha Muluku okhala mpatthani onireerela omuttittimiha ni omuroromela?

Mwekeekhai, nyuwo pooti woona okhala woovila omuroromela Muluku. Waaniheryasa mookhala owuupuwelaka wira nyuwo nlelo kamunimusuwela saana wira mmuroromeleke. Nto eyo pooti wiiraneya. Mwa myaha iya soowaakuveya, khaninwerya ohimya mathowa otheene aniwiiriha akina omphukela Muluku ntoko mutthu ootakhala. Masi niireke khiwaarowa okhala wooloka wiilipiherya omusuwela saana Muluku?a Hiyo ninnikupali wira mwiira siiso, munrowa osuwela ekeekhai voohimya sa Muluku. Niireke owo tootakhala? Nnaari, maana Biibiliya oni: “Muluku ophentá”.​—1 Yohani 4:8.

[Enoota]

[Elatarato epaaxina 7]

Niireke Muluku tonikumiherya mixankiho sanyu, wala onikumiherya mareeliho?