WAAKHULIWA WA MAKOHO A MBIIBILIYANI

Niireke okumi woohimala onniweryaneya?

Mulopwana oopacerya, Adamu, aahikhala iyaakha sinci. Masi wanikisa waya, owo aahuuluvala ni khukhwa. Okhuma vaavo, atthu aamananiha opaka itthu sinci wira asyake wuuluvala ni okhwa. Masi, khuuvo mutthu otonko okhala mahiku otheene. Mwaha wa xeeni? Adamu aahuuluvala ni okhwa, mwaha woomutthekela ni ohimwiiwelela Muluku. Hiyo ninnuuluvala mwaha woowi noorava yoottheka ya Adamu ni ehukhumu aya, eyo piiyo, okhwa.​—Musome Maphattuwelo 5:5; aRoma 5:12.

Wira niphwanye okumi woohimala, nintthuneya wira mutthu mukina oniliverye yowoopola. (Yobi 33:24, 25) Yowoopola, esisapo eniliviwa wira oopoliwe mutthu; nto hiyo nintthuneya woopoliwa voohimya sa okhwa. (Okhuma 21:29, 30) Yesu ooliva esisapo eyo okathi okhwiiye awe mwaha wa hiyo.​—Mmusome Yohani 3:16.

Ninrowa ophwanya sai okumi woohimala?

Khahiyo wira atthu otheene anirowa woopoliwa voohimya sa iretta ni wuuluvala. Tthiri, atthu ahinimwiiwelela Muluku, ntoko Adamu, anirowa oyeleela eparakha ya okumi. Atthu anileveleliwa soottheka saya, tanirowa ophwanya okumi woohimala.​—Mmusome Yesaya 33:24; 35:3-6.

Wira nileveleliwe itampi sahu, nihaana opaka etthu. Nihaana omusuwela Muluku orweela mwa osoma Nuulumo nawe, Biibiliya. Owo onniniixuttiha moota wookhalana okumi wooloka, ni moota woweemereriwa ni Muluku wira niphwanye okumi woohimala.​—Mmusome Yohani 17:3; Miteko 3:19.

Wira musuwele itthu sikina, nwehe muru 3 wa eliivuru ela, Biibiliya Oniixuttiha Exeeni Tthiri?, yoolaleiwa ni Anamoona a Yehova.

[Elatarato epaaxina 16]

Etthu xeeni enirowa onoopola voohimya sa okhwa?