Makoho Anipakiwa ni Ale Anisoma Irevista Sahu

Niireke vanniloka anamuyari ari maKristau okilaathi hoothe musalau ni anaaya akumihiwe mmulokoni?

▪ Khivanitthuneya opaka malamulo voohimya sa nipuro nookilaathi muSalau ya Omwene ale akumihiwe mmulokoni. Erevista ela yookhalana malakiheryo manceene wira yaalipihe anamuyari maKristau wira yaavaheke nikhaliheryo nomunepani anaaya yoomoliwe mmulokoni nlelo anikhala vate va anamuyari aya akhala wira vanniphwanelela. Ntoko silavuliwe aya epaaxina 19 ni 20 A Sentinela 15 de Novembro 1988, anamuyari pooti omusomaka Biibiliya ni anaaya acikhaani akumihiwe mmulokoni akhala wira anikhala hoothe vatthokoni. Opaka eyo pooti omukhaliherya mwaana owo waakhelaka nikhaliheryo ninrowa omuhiiha mweettelo awe woohiloka.a

Voohimya sa okilaathi Osalau ya Omwene, ti voophwanelela anamwane akumihiwe mmulokoni okilaathiki moowiimaaliha ni anamuyari aya. Khanikhanle nlamulo ninlavula wira ale akumihiwe ekilaathiki ottuli muSalau; eyo enooniherya wira anamwane akumihiwe pooti okilaathi ni anamuyari aya khula opuro aniphavela aya. Vaavo anamuyari anaakhapelela aya anaaya momunepani, tthiri awo anrowa ophavelaka oweha akhala wira anaaya annittottela mureerelo mithukumano. Ohiya waahiya anamwane yiixeettaka, ti vooloka waakhapelela anamwane wira ekhaliheriweke.

Ankhi akhala wira mwaana owo okumihiwe mmulokoni khanikhala ni anamuyari awe? Niireke mukhalelo ola onoolikana ni ole onikhala ni anamuyari awe? Khalai, erevista ela yaahivaha malakiheryo muKristau onitthuneya awe ottharaka sa moota wowaakhapelela ale akumihiwe mmulokoni ahinikhala ni hiyo.b Masi, mikhalelo siniwiiriha anamwane akumihiwe okilaathi ni anamuyari aya okathi wa mithukumano, khonlikana ni opatthana naawo ntoko wira ari owaani. Akhala wira atthu a vatthokoni vale aakhalana moonelo wooloka voohimya sa ole okumihiwe ni annittitimiha yooruma ya Biibiliya voohimya sa atthu akumihiwe, nto khivakhanle nthowa na oxankiheya.​—1 aKor. 5:11, 13; 2 Yoh. 11.

Nto anna a mmulokoni ehaaphukeleke akhala wira ale akumihiwe mmulokoni anikilaathi vamosa ni amusi aya, wala ni anna akina mmulokoni. Mwaha wa oturukeya wa mikhalelo, waakhoottiherya atthu okilaathi opuro oniphavela aya, pooti okumiherya mixankiho sinceene. Akhala wira otheene ari vaavo ohela muhina ale oororomeleya, anniilipiha ottittimiha malakiheryo a mBiibiliyani voohimya sa ale akumihiwe mmulokoni, nto nihikhale etthu enaakhumuliha akina; nto khivakhanle etthu eniiriha opaka malamulo voohimya sa opuro wookilaathi okathi wa owiriyana mithukumano sa eKristau.c

[Inoota]