Vaavo Ole Nnimphenta Ahu Onihiya Awe Omurumeela Yehova

1. Atthu anoonela sai vaavo mmusi aya onikumihiwa awe mmulokoni?

NIIREKE ookhala mpatthani wala mmusi anyu okumihiwe mmulokoni? Akhala wira ti siiso, eyo etthu yooriipiha murima vanceene! Murokora oniihaniwa Hilda,b onihimya so: “Vaavo iyaka aakhwiiye awe nuuvira iyaakha 41 nithelanne ene kaahiriipiwa murima vanceene. Masi nuumala mwanaka mwaamulopwana okumihiwa mmulokoni, waahiya amwaarawe ni anaawe eyo yaari etthu yaatempe okiriipiha murima vanceene mookumini mwaka”.

2-3. Moovarihana ni Esalimo 78:40, 41, Yehova onoonela sai vaavo murumeyi awe onihiya awe omukokhorela?

² Nkahaya muupuwele moota Yehova ariipiwe awe murima vaavo malaikha makina yaahiyale aya omurumeela! (Yuda 6) Nave Yehova aaniriipiwa murima vanceene vaavo aaweha awe aIsarayeli ikwaha sinceene ahimwiiwelelaka. (Musome Esalimo 78:40, 41.) Tthiri mukupaliki wira Tiithi anyu a wiirimu onniriipiwa murima vaavo mmusi anyu onihiya awe omurumeela Yehova. Nave Yehova onnisuwela wira nyuwo mooriipiwa murima. Mukupaliki wira Yehova onimoolipihani ni wookhaliheryani.

³ Mwaha ola, ninrowa oweha itthu nikhanle ahu oopaka wira Yehova onikhaliherye vaavo mmusi ahu wala mpatthani ahu onihiya awe omurumeela. Nave ninrowa oweha moota wowaakhaliherya anna ni arokora vaavo mmusi aya onikumihiwa awe mmulokoni. Masi wanipacerya ninrowa othokorerya muupuwelo woohiloka ninreerela ahu osyaka vaavo mmusi ahu onikumihiwa awe mmulokoni.

MUHIIVAHEKE NTHOWA

4. Anamuyari anceene anoonela sai vaavo mwanaya onihiya awe omurumeela Yehova?

⁴ Vaavo mwaana onihiya awe omurumeela Yehova, anamuyari awe anniphavela osuwela akhala wira yookhala etthu yaareerela aya opaka wira amukhaliherye ohihiya ekeekhai. Nuumala mwanawe mwaamulopwana okumihiwa mmulokoni munna oniihaniwa Luke ohimmye so: “Kaaniivaha nthowa, nto eyo yaanikixankiha vanceene. Okathi mukina kaaninla ni murima waanikiwereya vanceene”. Murokora aarina muxankiho mmosaru oniihaniwa Elizabeth ohimmye so: “Kiireke yookhala etthu yoohiloka kipanke aka? Koona wira nkaawenrye omwiixuttiha saana ekeekhai mwanaka mwaamulopwana”.

5. Tani orina nthowa akhala wira mutthu onnihiya omurumeela Yehova?

⁵ Othene ahu nisuweleke wira Yehova oonivaha eparakha ya othanla mootaphuwa. Eyo enitaphulela wira nihaana othanla omwiiwelela wala nnaari. Anamwane akina khiyaavahiwe ntakiheryo nooloka ni anamuyari aya masi hata vari siiso, awo yaahithanla omurumeela Yehova ni olipiha omwaamini waya ni ovara muteko awe. Anamwane akina, anamuyari aya yaahiimananiha owiixuttiha omphenta Yehova. Masi nuumala wunnuwa awo yaahihiya omurumeela Yehova. Nto vannooneya oratteene wira otheene ahu nihaana othanla omurumeela Yehova. (Yox. 24:15) Masi anamuyari ale ariipiwe murima mwaha woowi anaaya aahiya omurumeela Yehova, awo pooti wuupuwelaka wira khawenrye omwiixuttiha oratteene mwanaya!

6. Anamwane anoonela sai vaavo anamuyari aya anihiya aya omurumeela Muluku?

⁶ Okathi mukina paapa wala maama onnihiya omurumeela Yehova ni etthoko awe. (Esal. 27:10) Eyo ennaaxankiha vanceene anamwane, mwaha woowi awo anlipa ni anamuyari aya ni aniphavela otthara ntakiheryo naya. Murokora oniihaniwa Esther yoowo paapa awe aakumihiwe mmuloko onihimya so: “Kaamakela wunla maana kaahoona wira khahiyo paahi aahiya ekeekhai, masi owo aahithanla ohiphavela-tho omurumeela Yehova. Kaanimphenta vanceene paapa aka nto vaavo aakumihiwe awe mmulokoni kaamakela wuupuwela mukhalelo awe wa weerutthuni nto eyo yaanitepa okixankiha”.

7. Yehova oniwoonela sai anamwane anamuyari aya akumihiwe mmulokoni?

⁷ Anamwane, musuweleke wira vaavo maama anyu wala paapa anyu onikumihiwa awe mmulokoni, murima onniniwereya vanceene! Nave musuweleke wira Yehova onnisuwela muxankiho anyu. Owo onnihakalala vanceene vaavo muhinihiya anyu ororomeleya. Anna ni arokora a mmulokoni annihakalala. Nave musuweleke wira nyuwo khamurina nthowa mwaha wa soothanla sa anamuyari anyu. Ntoko nilavunle ahu wanipacerya, Yehova onvaha khula mutthu eparakha ya othanla mootaphuwa. Musuweleke wira khula mutthu iivaherenrye wa Yehova ni opatisiwa “onrowa oteexa muritti awe”.—aGal. 6:5.

8. Etthu xeeni munreerela anyu opaka vaavo munlipelela anyu wira ole okumihiwe mmulokoni ohokolowele wa Yehova? (Nwehe ekaaxa eni: “Muhokolowele wa Yehova”.)

⁸ Okhala wene, vaavo ole munimphenta anyu onihiya awe omurumeela Yehova, nyuwo munnilipelela wira onoohokolowela wa Yehova. Mulipelelaka okathi owo, etthu xeeni mukhanle anyu oopaka? Muhaana opaka sotheene muniwerya anyu wira mulipihe waamini wanyu. Opaka eyo munimwaavaha ntakiheryo nooloka amusi anyu akina ni woonasa wene munonvaha ntakiheryo nooloka ole okumihiwe mmulokoni. Nave munookhalana ikuru wira nwerye ovilela oriipiwa wanyu murima. Nrowe niwehe itthu vakhaani munreerela anyu opaka.

ITTHU MUNREERELA ANYU OPAKA WIRA MULIPIHE WAAMINI WANYU

9. Itthu xeeni mukhanle anyu opaka wira mulipihe waamini wanyu? (Nwehe ekaaxa eni: “Soolepa Soomaaliha Vaavo Ole Munimphenta Anyu Onihiya Awe Omurumeela Yehova”.)

⁹ Mpakeke sotheene muniwerya anyu wira mulipihe waamini wanyu. Ti vooloka ohihiya olipiha waamini wa atthu otheene a etthoko anyu. Munrowa owerya sai opaka eyo? Mphaveleke olipihiwa ni Yehova mmusomaka Biibiliya khula nihiku, wuupuwelela ele munisoma anyu ni orowela mithukumano. Joanna yoowo paapa awe ni muulupale awe yaahiyale ekeekhai onihimya so: “Kinnikhala oomaaleleya vaavo kinisoma aka matakiheryo a atthu anilavuliwa mBiibiliyani ntoko Abigayili, Estheri, Yobi, Yosefe ni Yesu. Ntakiheryo naya ninnikilipiha vanceene ni ninnikikhaliherya okhalana moonelo wooloka. Nave iviidiyu sa isipo sinnikilipiha vanceene”.

10. Esalimo 32:6-8, enrowa onikhaliherya sai ovilela oriipiwa murima?

¹⁰ Mmuleeleke Yehova muxankiho anyu. Okathi wootheene munriipiwa anyu murima muhihiye onvekela Yehova. Nave muhihiye omuxonttela Muluku ahu oophenta wira ookhaliheryeni oweha itthu ntoko yena oniweha awe, ‘wovahani miruku ni wothonyeryani ephiro yorera’. (Musome Esalimo 32:6-8.) Okathi mukina pooti onixankiha vanceene omuleela Yehova moonelo ahu. Masi musuweleke wira Yehova onnisuwela muxankiho anyu ni onnoona owereya. Owo onnoophentani vanceene ni oniphavela wira mmuleeleke mixankiho sanyu sotheene.—Okhum. 34:6; Esal. 62:8, 9.

11. Moovarihana ni aHeeberi 12:11, xeeni vari aya vooloka ororomela ottaruxa wa Yehova? (Nwehe ekaaxa eni: “Okumihiwa Mmulokoni Enamuna Yoophenta ya Ottaruxa wa Yehova”.)

¹¹ Mukhaliheryeke yoothanla ya axitokweene. Musuweleke wira okumihiwa mmulokoni, oniirela mpantta mareheryo a Yehova. Vaavo onimuttaruxa awe mutthu moophenta, eyo enamuna yooloka ya omukhaliherya mutthu owo ohiyale omurumeela Yehova ni waakhaliherya atthu akina. (Mmusome aHeeberi 12:11.) Atthu akina mmulokoni, pooti ohimyaka wira axitokweene aavonya mwaha wa omukumiha mutthu owo opanke etampi yuulupale. Masi musuweleke wira atthu awo khaniphavela ohimya itthu soohiloka mutthu owo opanke awe. Nave khanisuwela itthu sootheene siiraneyale. Nto mukupaliki ni murima wotheene wira axitokweene amphukenle mutthu owo aatthara oratteene malakiheryo a Yehova asuwelaka wira amphukenle mwa “nsina n’Apwiya” Yehova.—2 Wah. 19:6.

12. Mireerelo xeeni sinikhumelela vaavo ninkhaliherya ahu ottaruxa wa Yehova?

¹² Okhaliherya yoothanla ya axitokweene enoomukhaliherya mutthu ole okumihiwe mmulokoni otthikela wa Yehova. Murokora Elizabeth nimulavunle ahu wanipacerya ohimmye so: “Vaanikixankiha vanceene ohiya olavula ni mwanihu mwaamulopwana muulupale. Masi nuumala ohokolowela wa Yehova, owo ohimmye wira aaniphwanela okumihiwa mmulokoni. Nuuvira okathi owo ohimmye wira okumihiwa mmulokoni woomwiixuttiha itthu sinceene sooloka. Nto kaahiixutta ovaha efaita ottaruxa wa Yehova”. Iyawe yoowo oniihaniwa Mark ohimmye so: “Okhala wira owo khaalavula ni hiyo, aahoona wira aahaana otthikela wa Yehova. Kinnimuxukhuru vanceene Yehova mwaha woonikhaliherya okhala atthu oowiiwelela”.

13. Etthu xeeni enrowa wookhaliheryani ovilela oriipiwa wanyu murima?

¹³ Mwaaleeleke moonelo anyu apatthani anyu. Ovaanela ni maKristau oolipa mwa omunepani, onimookhaliheryani vanceene okhalana moonelo wooloka. (Mir. 12:25; 17:17) Joanna yoowo nimulavunle ahu wanipacerya onihimya so: “Waahikiphwanya omeekha, masi olavula ni apatthani aka waahikikhaliherya vanceene ovilela”. Etthu xeeni munireerela anyu opaka akhala wira atthu akina mmulokoni annihimya itthu sinincererya oriipiwa wanyu murima?

14. Xeeni vari aya vooloka ‘ovilelana ni olevelelana ni murima wotheene’?

¹⁴ Mwaapixeryeke murima anna ni arokora. Musuweleke wira khahiyo wira atthu otheene anrowa olavulaka itthu sooloka. (Yak. 3:2) Maana otheene ahu na atthu oohimalela, nto okathi mukina moohilakelela atthu akina pooti ohimya itthu sinrowa wuncererya oriipiwa wanyu murima. Muupuweleke malakiheryo murummwa Paulo onivanhe awe oriki: “Nvilelaneke, mulevelelaneke ni murima wotheene ikwaha sotheene, hata musuwelaka wira mootthekeliwa”. (aKol. 3:13) Murokora mmosa yoowo mmusi awe aakumihiwe mmulokoni, ohimmye so: “Yehova ookikhaliherya vanceene waalevelela anna ni arokora yaawo yaaphavela okilipiha masi akikhulumula”. Nto muloko onrowa waakhaliherya sai atthu a etthoko anyu?

MULOKO ONOOWERYA ONIKHALIHERYA

15. Nihaana opaka exeeni wira naakhaliherya ale mmusi aya okumihiwe mmulokoni?

¹⁵ Mwaareereleke murima atthu otheene a etthoko eyo. Murokora Miriam onihimya wira vaanimuxankiha orowa omuthukumanoni nuumala murokora awe okumihiwa mmulokoni. Owo onihimya so: “Vaavo kuupuwela aka etthu atthu akina yaarowa aya ohimya kaanoova vanceene. Masi yaahikhala anna ni arokora anceene yaawo yaaripiwe murima mwaha wa etthu ele yaakhumelenle. Maana awo khiyaanyoonyiheyale ni khiyaahimya itthu soohiloka voohimya sa murokora aka aakumihiwe mmulokoni. Kinnaaxukhurela vanceene, vano nkinoona wira kiri mekhaka”. Murokora mukina ohimmye so: “Nuumala mwanihu mwaamulopwana okumihiwa mmulokoni, apatthani ahu yaahirwa onimaaliha. Akina ahimmye wira khiyoona etthu yoohimya masi awo yaaninla ni hiyo ni yaaninlepela ikarta. Tthiri awo aanikhaliheya vanceene!”

16. Anna ni arokora a mmulokoni anrowa waakhaliherya sai atthu ale mmusi aya okumihiwe mmulokoni?

¹⁶ Muhihiye waakhaliherya atthu ale mmusi aya okumihiwe mmulokoni. Vano awo anniphavela ophentiwa ni olipihiwa vanceene ovikana khalai. (aHeeb. 10:24, 25) Okathi mukina atthu ale mmusi aya okumihiwe mmulokoni pooti woonaka wira khanithokoreriwa saana ni anna akina a mmulokoni. Tthiri hiyo khanimphavela wira eyo yiiraneye! Masi nihaana waattottopela ni waalipiha amiravo yaawo anamuyari aya ahiyale omurumeela Yehova. Maria yoowo iyawe aakumihiwe mmulokoni ni aakhumme vatthokoni vawe onihimya so: “Apatthani aka akina yaanirwa owannyaka waapeya yoolya ni okikhaliherya omusoma Biibiliya ni anaaka. Awo yaanoona owereya koona aka ni yaaninla ni miyo. Nave yaanikikhaliherya vaavo atthu akina yaakilavula aya voohiloka. Tthiri yaahikilipiha vanceene!”—aRom. 12:13, 15.

17. Axitokweene anrowa waalipiha sai ale axankale?

¹⁷ Axitokweene ahaana waavya okathi wira yaalipihe atthu ale mmusi aya okumihiwe mmulokoni. Awo aakhalana muritti wa waamaaliha ni waalipiha ale mmusi aya ohiyale omurumeela Yehova. (1 aTes. 5:14) Nto mwiimananiheke waalipiha ni waamaaliha sihinatthi ni nuumala mithukumano. Mwaaxukuryeke ni mwaavekeleleke. Mulaleeryeke hoothe ni mwaalattuleke wiirela mpantta omulompa Muluku vatthokoni vanyu. Nave axitokweene ahaana waakhapelela atthu otheene axankale ni waakhaliherya woona wira Yehova onniwoonela othunku, onnaaphenta ni onnaathokorerya ni murima wootheene.—1 aTes. 2:7, 8.

MUHIHIYE OKHALANA NLIPELELO NI OMUROROMELA YEHOVA

18. Moovarihana ni 2 Pedru 3:9, Muluku oniphavela wira ale ahiyale omurumeela apake exeeni?

¹⁸ Yehova “khoniphavela wira mutthu opwetexiwe, nnakhala mmosa. Masi oniphavela wira atthu otheene arukunuxe murima”. (Mmusome 2 Pedru 3:9.) Nnaamwi mutthu owo opanke ene etampi yuulupale, nlelo Yehova onnivaha efaita yinceene okumi wa mutthu owo. Musuweleke wira Yehova oovaha okumi wa Mwanawe onimphentexa awe wira owoopole anatampi. Moophenta, Yehova onniimananiha waakhaliherya atthu ale ahiyale omurumeela wira ahokolowele wa yena. Nlikanyiho Yesu aapanke awe na mwaana aakhumme etthoko ya paapa awe, ninnooniherya wira Yehova oniphavela wira atthu ale ahiyale omurumeela ahokolowele wa yena. (Luka 15:11-32) Atthu anceene yaahiyale omurumeela Yehova, nuuvira okathi aahokolowela wa Tiithi ahu oophenta. Nto anna ni arokora a mmulokoni anniwaakhela ni murima wootheene. Elizabeth nimulavunle ahu wanipacerya aahihakalala vanceene onweha mwanawe ohokolowelaka mmulokoni. Uupuwelaka itthu saakhumelenle, owo onihimya so: “Kinnaaxukhurela anna ni arokora otheene yaakilipinhe ni yaakikhalihenrye ohihiya olipelela”.

19. Xeeni vari aya vooloka ohihiya omuroromela Yehova?

¹⁹ Okathi wootheene nihaana omuroromela Yehova. Owo khonikhala-khala onivahaka malakiheryo anrowa onikumiherya mixankiho. Maana owo Tiithi oovaha, oowoona othunku ni onnaaphenta vanceene atthu otheene animukokhorela. Mukupaliki ni murima wotheene wira Yehova khonikhala-khala oonyanyalakani okathi wa mixankiho. (aHeeb. 13:5, 6) Munna Mark nimulavunle ahu wanipacerya ohimmye so: “Yehova khonikhala-khala oninyanyalaka. Maana okathi wootheene oniphavela onikhaliherya owanana mixankiho”. Nave Yehova khonrowa ohiya woovahani “owerya onivikana wa mutthu”. (2 aKor. 4:7) Tthiri nyuwo munoowerya ohihiya ororomeleya ni okhalana nlipelelo hata mutthu munimphenta anyu ohiyaka omurumeela Yehova.