WAAKHULIWA WA MAKOHO A MBIIBILIYANI

Exeeni enikhaliherya ekasamento okhala yoohakalala?

Biibiliya onnivaha miruku sinikhaliherya ekasamento okhala yoohakalala, maana Yehova Muluku, Topattunxe ekasamento. Biibiliya onniniixuttiha moota wookhalana mikhalelo sooloka sinihakalaliha ekasamento, ni moota woosyaka itthu sinihonona etthoko. Nave, onniixuttiha moota ovaanela saana onincererya aya ohakalala mukasamentoni.​—Mmusome aKolosi 3:8-10, 12-14.

Mulopwana ni muthiyana oothelana ahaana othokoreryana ni ottittimihana mukina ni mukhwaawe. Akhala wira anamathelana anoovara saana miteko sivahiwa aya ni Muluku, anoowerya okhala oohakalala.​—Mmusome aKolosi 3:18, 19.

Exeeni eniiriha ekasamento okhala okathi wotheene?

Anamathelana anoowerya okhala vamosa akhala wira anniphentana. Muluku onniniixuttiha moota woophenta. Owo ni mwanawe, Yesu, ari matakiheryo oolokexa a ophenta wekeekhai.​—Mmusome 1 Yohani 4:7, 8, 19.

Vaavo mulopwana ni mwaarawe anittittimiha aya ekasamento ntoko murehereryo wa Muluku, anoowerya okhala hoothe. Muluku oopaka ekasamento wira mulopwana ni muthiyana akhaleke hoothe mahiku otheene, ni wira itthoko sikhaleke soolipa. Ekasamento enoowerya okhala okathi wotheene maana Muluku ompattuxa mulopwana ni muthiyana, wira akhaliheryaneke mukina ni mukhwaawe mwa werutthuni ni mmuupuweloni. Nave, ohaapaka atthu ailattanihaka mmansawe, yaawo aniwerya omutakiha voohimya sa ophenta wawe.​—Musome Maphattuwelo 1:27; 2:18, 24.

Wira musuwele soohimmwa sikina, muwehe muru 14 wa eliivuru ela, Biibiliya Oniixuttiha Exeeni Tthiri?, yoolaleiwa ni Anamoona a Yehova

Mubaxari va www.jw.org

[Elatarato epaaxina 16]

Ovaanela wa moota xeeni onikumiherya ohakalala mukasamentoni?