Muteke Ekasamento Anyu Wira Ekhale Yoolipa ni Yoohakalala

“Yahari Apwiya anteka empa, ale anteka yanvara mahala”.​—ESAL. 127:1a.

MUNOOWERYA OTTHOKIHERYA?

Muxankiho xeeni onimakela waakhumelala atthu athelanne?

Moota xeeni anamathelana akhanle aya oomuhela Yehova muhina mwa ekasamento aya?

Moota xeeni mulopwana ni muthiyana athelanne anrowa aya ottharihela yooruma ya okhapelelana saana?

1-3. Muxankiho xeeni onimakela waakhumelela atthu athelanne? (Nwehe elatarato yoopacerya.)

MULOPWANA mmosa orina ekasamento yoohakalala mwa iyaakha 38 onihimya so: “Akhala wira nyuwo munniilipiherya ni murima anyu wotheene wira ekasamento anyu ekhumele saana, Yehova onimooreelihani”. Tthiri alopwana ni athiyana athelanne aakhalana owerya wa okhala oohakalala ni okhaliheryana mukina ni mukhwaawe okathi wa mixankiho.​—Mir. 18:22.

² Khuuvo mutthu onitikhina wira atthu anithelana annaakhumelela “maxakha” mweerutthuni mwaya. (1 aKor. 7:28) Mwaha wa xeeni? Okhala wira okathi onivara aya miteko sa khula nihiku pooti okhumelelaka itthu sinitteettheiha ekasamento. Okhulumulana, ohiiwanana ni ohisuwela olavulihana onikumiheriwa ni nlumi nahu noohimalela, onnikhumelela hata itthoko seiye sinooniwa okhala soolokexa. (Yak. 3:2, 5, 8) Anamathelana anceene annoona okhala voovila ovara muteko ota ni waakhapelela anamwane. Mixankiho ni okhulumuwa pooti owiirihaka anamathelana ohikhalana okathi oniphiyerya wira alipihe ekasamento aya. Ophentana ni ottittimihana waya pooti opahuwa mwaha wa othoiwa musurukhu, oretta ni mixankiho sikina. Ohiya-vo, mathipelo a ekasamento enooneya okhala yooloka pooti ohononiwa ni ‘makhalelo òtakhala’, ntoko oraruwa, wira itthu soohiirya, otakhala murima, onyokhana, wunlelana ehace, oviruwelana, ni ohiiwanana.​—aGal. 5:19-21.

³ Etthu enitepiha makhalelo awo oohiloka okhala wira hiyo ninkhala “okathi wokiserya” yoowo onihela muhina wiitthuna wa atthu, weiwo onipahula ekasamento. (2 Tim. 3:1-4) Nave, ookhala mutakhali oniphavela omala-maliha ikasamento. Murummwa Pedru onnilopola so: “Nwanan’inyu, Satana, onorukureryani ntoko kharamu onòpa murukulu, amphavelaka òmukhura”.​—1 Ped. 5:8; Wis. 12:12.

4. Vaniweryaneya sai okhalana ekasamento yoolipa ni yoohakalala?

⁴ Mulopwana mmosa oothela oJapão onihimya so: “Kaahikhalana mixankiho sinceene mwaha wa othoiwa musurukhu. Ni mwaha wa ohimulavulihaka saana mwaaraka, owo nave aahixankiheya vanceene. Mahiku ala owo oophwanya oretta wuulupale. Okathi mukina mixankiho iye saaniniiriha waakhulana”. Khivaniweryaneya osyaka wira sihikhumelele mixankiho mukasamentoni, masi vanniweryaneya oxintta mixankiho iyo. Akhaliheriwaka ni Yehova, anamathelana anoowerya okhalana ekasamento yoolipa ni yoohakalala. (Musome Esalimo 127:1.) Vano nrowe nithokorerye itixolo 5 soomunepani sinitekaniwa ekasamento yoolipa. Nuumala-vo ninrowa othokorerya moota itixolo iyo siniweryaneya aya omariwa ni niphento.

MMUHELE YEHOVA ERIYARI YA EKASAMENTO ANYU

5, 6. Exeeni mulopwana ni amwaarawe akhanle aya oopaka wira amuhele Yehova eriyari ya ekasamento aya?

⁵ Nluku nuulupale nintekaniwa ekasamento ti okhala oororomeleya ni omwiiwelela Ole okumihenrye ekasamento eyo. (Mmusome Musuweli 4:12.) Mulopwana ni amwaraawe anoowerya omuhela Yehova eriyari ya ekasamento aya akhala wira anootharihela malakiheryo awe. Biibiliya onnilavula sa atthu a Muluku a khalai oriki: “Mwahapuwelaka mono wolopwana walá mono wothiyana, owaruni wanyu munimwiwa nsu ninrowa wohimeryani wira, ‘ephiro yorera t’ila, mutthareke yela’”. (Yes. 30:20, 21) Mahiku ala anamathelana pooti ‘wiwa’ nsu na Yehova vaavo vanisoma aya Nuulumo nawe hoothe. (Esal. 1:1-3) Awo pooti olipiha ekasamento aya arumeelaka Okathi wa Omulompa Muluku Vatthokoni, yoowo ori woohakalaliha ni woolipiha omunepani. Onvekela Yehova khula nihiku poromosa onnikhaliherya vanceene ekasamento ni oxintta olumwenku ola wa Satana oniphavela omala-maliha ekasamento aya.

⁶ Gerhard a wAlemanha, onihimya so: “Khula okathi ohakalala wahu onaakanyerereya aya mwaha wa mixankiho ni ohiiwanana, miruku sa Nuulumo na Muluku sinninikhaliherya wiixutta olevelelana ni okhala oopixa murima. Makhalelo ala annikhaliherya vanceene ekasamento”. Vaavo anamathelana vaniimananiha aya omuhela muhina Yehova ni okhalela nthiti miteko sawe, awo annikhala oowiiraana ni Yehova ni varyaayaru.

AXILOPWANA OOTHELA YEETTIHEKE ETTHOKO NI OPHENTA!

7. Alopwana oothela yeettiheke sai etthoko aya?

⁷ Enamuna mulopwana enihoolela awe etthoko awe ennikhaliherya olipiha ekasamento. Biibiliya onihimya so: “Kristu ti murú w’atthu othene, mulopwana ti murú wa mwar’awe”. (1 aKor. 11:3) Masu ala annooniherya enamuna alopwana akhanle aya oohoolela etthoko aya, eyo piiyo mwa enamuna Kristu sinaahoolela awe atthu. Yesu khaatonko okhala ootakhala wala oohaaxa, masi khula okathi owo aakhala oomaala, oowiiyeviha, ni oopixa murima.​—Math. 11:28-30.

8. Mulopwana oniphwanelela sai ottittimihiwa ni ophentiwa ni amwaarawe?

⁸ Mulopwana Kristau, khonitthuneya waakhanyereryaka amwaarawe wira amuttittimiheke. Ohiya-vo alopwana ahaana okhalaka ni ‘nlema ni amwaraya [waattiittimiha ni waakhapelela], asuwelaka wira makhalelo a athiyana t’òttèttheya’. (1 Ped. 3:7) Mulopwana ohaana waattittimiha amwaarawe oryeene mekhawe wala vaatthuni, orweela mwa enamuna enaakhapelela awe owooniheryaka wira onnaaphenta. (Mir. 31:28) Ohoolela etthoko mwa enamuna eyo yoophenta ennimwiiriha muthiyana waaphenta ni waattittimiha aiyawe ni ennikumiherya mareeliho a Yehova mukasamentoni.

ATHIYANA OOTHELIWA AWIIWELELEKE AIYAYA VOOWIYEVIHA

9. Moota xeeni muthiyana onrowa awe wooniherya wira onniiwelela moowiiyeviha?

⁹ Ohikhala owiikuxererya, ni omphenta Yehova ntoko sinihimmwa aya mBiibiliyani, onooniiriha hiyo okhala owiiyeviha vamaithoni va Muluku ahu oowerya. (1 Ped. 5:6) Enamuna emosa yuulupale yeeyo muthiyana okhanle awe owooniherya wira onnittittimiha okhulupale wa Yehova ori omwiiwelela ni omukhaliherya iyawe vatthokoni. Biibiliya onihimya so: “Nyuwo, athiyana, mukhaleke òwìwelela aiy’anyu, sisale sinaphwanelaya atthu Àpwiya”. (aKol. 3:18) Ekeekhai wira khahiyo wira khula okathi soothanla sa mulopwana sinrowa omusivelaka mwaarawe. Masi vakhala wira soothanla iyo khasinivirikanya malamulo a Muluku, mwaarawe owo ohaana wiiwelela moohiikhupanyiha.​—1 Ped. 3:1.

10. Xeeni wiiwelela ni murima wotheene oryaaya wootthuneya?

¹⁰ Muthiyana ookhalana nipuro noottittimiheya vatthokoni ntoko mwaapara awe mulopwana. (Mal. 2:14) Owo ookhalana mpantta wootthuneya voohimya sa okhaliherya soothanla sinipakiwa ohimyaka mooneelo ni muupuwelelo awe, masi moohimukhanyererya iyawe. Mulopwana a miruku tuule oninwiriyana moopixa murima mwaarawe. (Mir. 31:10-31) Wiiwelela ni murima wotheene, onnikumiherya ohakalala, murettele ni wiiraana vatthokoni, ni onnimphwanyiha mulopwa ni muthiyana athelanne otteeliwa murima mwaha woosuwela wira annimuhakalaliha Muluku.​—aÉf. 5:22.

NVIKANIHEKE OLEVELELANA MUKINA NI MUKHWAAWE

11. Moota xeeni olevelelana oryaaya wootthuneya vatthokoni?

¹¹ Olevelelana teri etixolo yuulupale enitekaniwa ekasamento yoolipa. Ekasamento ennilipa vaavo mulopwana ni mwaarawe ‘anivilelana aya, ni olevelelana imara sothene anitthekelana aya’. (aKol. 3:13) Masi ekasamento enihononeya vaavo mulopwana ni amwaarawe anilepa aya itthu soohiloka siniirelana aya ni anirumeela aya wira atuphelane ni onyakulihana. Ntoko siisaale mitari siniwerya aya otteettheiha enupa, ohilevelelana, onimwiiriha okhala voovila wiiwanana vatthokoni. Tthiri ekasamento ennilipa vaavo mulopwana ni amwaarawe anikhapelelana aya mwa enamuna yooloka, alevelelanaka ntoko Yehova sinaalevelela awe.​—Mik. 7:18, 19.

12. Moota xeeni ophentana ‘onikhunela aya itampi, sinakhalaru sincene’?

¹² Ole oniphenta mwa ekeekhai “khanupuwela sotakhala sìreliwawe”. Tthiri ophentana ‘onnikhunela itampi, sinakhalaru sincene’. (1 aKor. 13:4, 5, mmusome 1 Pedru 4:8.) Niphento khannaalikelela ikwaha sinitthekeliwa awe mutthu siniweryaneya olevelela. Okathi murummwa Pedru aamukonhe awe Yesu wira aarowa omulevelelaka ikwaha kavi munnawe, Yesu aakhunle so: “Mmuleveleleke imara sothene”. (Math. 18:21, 22) Owo aaphavela wooniherya wira khokhanle mphimo wa ikwaha Kristau sinirowa awe omulevelaka mukhwaawe.​—Mir. 10:12.a

13. Ninrowa oxintta sai munepa wa ohilevelelana?

¹³ Annette, onihimya so: “Vakhala wira anamathelana khaniphavela olevelelana, oviruwelana ni ohiroromelana onninnuwa, ni eyo enoowerya opahula ekasamento eyo. Masi olevelelana onnilipiha ekasamento ni onniwuuraanyiha anamathelana awo”. Wira muxintte makhalelo a ohilevelelana, mmananihe okhalana munepa wa oxukhurelana ni ovahana efaita. Mpake okhala yoolema anyu omuttottopela ole othelanne anyu ni murima wotheene. (aKol. 3:15) Mwiira siiso munookhalana muupuwelelo woomaaleleya, wiiraana ni mareeliho Yehova onaavaha awe ale arina munepa woolevelelana.​—aRom. 14:19.

MWEETTELEKE YOORUMA YA WAATHOKORERYA SAANA ATTHU

14, 15. Exeeni ekhanle yooruma ya waakhapelela saana atthu akina, nave nthowa xeeni eryaaya yoovareleya muteko vatthokoni?

¹⁴ Moohaaniherya nyuwo vannoosivelani othokoreriwa moophwanelela ni nttittimiho. Vannoosivelani vakhala wira moonelo ni muupuwelelo anyu onnivahiwa efaita. Masi niireke mootoko wiiwa alavuliwaka masu ala ani: “Nnimoonana awo olelo-va”? Onaamwi okathi mukina vareerelaka olavula siiso, Biibiliya onnileela so: “Muhihimyé wira: ‘Kinomwirela ntoko sikìrihalyawe, kinrowa omuliva simphwanelawe’”. (Mir. 24:29) Tthiri Yesu onnitumererya wira nikhalaneke moonelo wooloka okathi onikhumelela aya ohiiwanana. Enamuna eyo ti yoosuwelexiwa, okathi mukina eniireliwa Nlamulo na Waakhapelela Saana Atthu Akina, nenno nniira so: “Etthu enosivelani wireliwa n’atthu akina, nwireleke yeyo akhw’inyu”. (Luka 6:31) Yesu aaphavela ohimya wira hiyo naathokoreryeke atthu akina mwa enamuna ennisivela othokoreriwa, nihaattikiheryaka soonanara siniirenle aya. Eyo enitaphulela wira vatthokoni nihaana opakaka itthu seiye sinoona ahu wira sinookumiherya mireerelo.

¹⁵ Anamathelana anoowerya olipiha ekasamento aya vakhala wira khula mutthu onoovaha efaita moonelo ni muupuwelelo wa mwaapara awe. Mulopwana mmosa oothela wAfrika do Sul onihimya so: “Hiyo ninnimananiha ottharihela yooruma ya waakhapelela saana atthu akina. Hata vari siiso okathi mukina ninninyonyihana, masi, hiyo ninnimananiha othokoreryana mwa enamuna yaaphavela ahu othokoreriwa nave, eyo piiyo, ovahiwa efaita ni ottittimihiwa”.

16. Etthu xeeni ehineemereriwa aya anamathelana wiirihana?

¹⁶ Muhimuulihiheke muru ole othelanne anyu muromolaka soottettheya sawe, hata mwiiraka onveya. Musuweleke wira ekasamento khahiyo nipuro noovathaaniwa wira nimoone ole onitupa, wala oniwerya okuxa miritti soolemela, aahiiso mutthu oowaakuva wuupuwela etthu yooloka. Ekeekhai wira hiyo ninnivonya okathi mukina, ni ninnaaveiha atthu akina. Masi khiivo enimweererya mulopwana wala muthiyana omuruwana ni omuramusa ole othelanne awe wala omukakha ni ommana.​—Musome Miruku 17:27; 31:26.

17. Moota xeeni mulopwana onrowa awe wooniherya wira onnittharihela Yooruma ya Waakhapelela Saana Akina?

¹⁷ Nnaamwi soolimalela sa ilapo sikina sihimyaka wira mulopwana onaamana amwaarawe tori mulopwana, Biibiliya onihimya so: “Erayi mutthu òpixa murima onvikana nakhotto òtupa; erayi t’ule òwimàliha onvikana onwerya okhottoni”. (Mir. 16:32) Vanitthuneya okhala mutthu oolipa omunepani ni omutakiha mulopwana muulupale aatonko okhala, Yesu, yoowo aawerya wiihiiha. Mulopwana onaahasula amwaarawe aaruwanaka wala waamana, onooyeleela waataana wawe ni Yehova. Nasalimo Davidi, yoowo aari mulopwana ootupa ni oolipa murima, aahimmye so: “Muhittheké-tho. Vankhalanyu mekhinyu mumpathiki, mwikhalele, mutthokelele”.​—Esal. 4:5.

“MUKUXE MURIMA W’OPHENTA”

18. Xeeni varyaaya vootthuneya wunnuuherya niphento vatthokoni?

¹⁸ Mmusome 1 aKorinto 13:4-7. Niphento ti etthu yootepexa otthuneya vatthokoni. “Tivó, mukuxe murima w’othunku, murima worera, wowiyeviha, womàla ni wovilela. Wovikana sothene iya, mukuxe murima w’ophenta, weiwo ommaleliha orera murima”. (aKol. 3:12, 14) Wiivahererya ni ophenta ntoko Kristu tori mattakha animareliwa itixolo sinitekaniwa ekasamento. Wira siiso onoolipiha ekasamento okathi wa ohiiwanana, oretta, othoiwa musurukhu, ni myaha sinaahela muhina amusi.

19, 20. (a) Anamathelana anrowa owerya sai oteka ekasamento yoolipa ni yoohakalala? (b) Exeeni enirowa ahu othokorerya muru onittharelana?

¹⁹ Ekeekhai wira vanitthuneya niphento na ekeekhai, okhala oororomeleya wa ole othelanne awe, ni wiimananiha ni murima wotheene wira ekasamento ekhumele saana. Ohiya ophavelaka omwalana sakhumelela mixankiho, ale athelanne ahaana olakela wiiriha ekasamento aya okhumela saana, eyo piiyo olokiherya khula okathi. MaKristau animuroromela Yehova ni aniroromelana mukina ni mukhwaawe, annilipiheriwa ni omphenta waya Muluku ni ophentana waya mukina ni mukhwaawe wira aphuke khula muxankiho nniphento, okhala wira, “ophenta khummala-tho”.​—1 aKor. 13:8; Math. 19:5, 6; aHéb. 13:4.

²⁰ Oteka ekasamento yoolipa ni yoohakalala etthu yootepexa ovila, vanceenexa mahiku ala “òxanka” anikhala ahu. (2 Tim. 3:1) Masi nikhaliheriwaka ni Yehova, eyo enooweryaneya. Ohiya-vo anamathelana anniwanana makhalelo oohisuumaaliha a olumwenku ola wootakhala. Muru onittharelana onrowa othokorerya etthu ekhanle awe oopaka mulopwana wala muthiyana athelanne wira alipihe makhalelo a omunepani a etthoko aya.

[Enoota]