Soolopola sa Yehova ti Sororomeleya

‘[Soolopola] sa Yehova ti sororomeleya, sinnavaha miruku atthu òwiyeviha’.—ESAL. 19:8.

MWAAROWA WAAKHULA SAI?

Soolopola xeeni Yehova onivaha awe mBiibiliyani?

Soolopola sa Yehova sinaakhaliherya sai maKristau olelo-va?

Mathowa xeeni arina ahu wira niroromeleke soolopola sa Yehova?

1. Myaha xeeni atthu a Muluku animakela aya wiixutta, nto mireerelo xeeni siniphwanya ahu mwaha wa wuuluula myaha iyo?

OKATHI onitthokiha anyu mwaha onrowa osommwaka mwa erevista ya Owehaweha, niireke mootoko wuupuwela so: ‘Mano, kiira nootoko othokorerya-tho mwaha ola?’ Akhala wira mpacenrye khalai wataana ni muloko wa eKristau, waaniheryasa muhoona wira myaha sinceene sinimakela otthikeliwa othokoreriwa. Tthiri wiixutta sa Omwene wa Muluku, mukuttho onoopola, muteko wowaapaka awiixutti, ni mikhalelo sikina ntoko ophenta ni nroromelo, oniirela mpantta wa yoolya ahu yoomunepani ya khula nihiku. Okathi onuuluula ahu myaha iyo, waamini wahu onnilipa nto khiyakhala ‘owettela masu’, ohiya ‘okhala alipa-òwiwa-pahi’.​—Yak. 1:22.

2. (a) Mwa ikwaha sinci nuulumo noowi ‘[soolopola] sa Muluku’ nintaphulelani? (b) Anivirikana sai malamulo a Muluku ni malamulo a pinaatamu?

² Nuulumo na eHeeberi nitaphuleliwe ‘soolopola’ ikwaha sinceene anihimmwa malamulo, sooruma ni malakiheryo Muluku onaavaha awe atthu awe. Moovirikana ni malamulo aapinaatamu, yaawo ikwaha sinci anitthuneya osariheliwa wala orukunuxiwa, malamulo ni malakiheryo a Yehova toororomeleya okathi wotheene. Nnaamwi malamulo makina yaapakiwa moovarihana ni okathi ni itthu siiraneya, malamulo awo toomalela ni anniphwanelela khula okathi. Nasalimu aahimyale so: ‘malamulo anyu taxariya vomalela’.​—Esal. 119:144.

3, 4. (a) Soolopola sa Yehova sinihela muhina exeeni? (b) Yaattottela sai mureerelo okathi aIsarayeli yaiwelela aya soolopola?

³ Waaniheryasa mooweha wira soolopola sa Yehova ikwaha sinci sinihela muhina mihupi sinaalopola atthu. Ikwaha sinceene, anaIsarayeli yaanilopoliwa ni maprofeta a Muluku. Mwa ntakiheryo, ehalaka vakhaani okela Elapo Yaalaiheriwe aya, Moise aahaalopola ariki: ‘Mwipasope, murimanyu ohotothiwé ni amuluku akina. Tivó muhihiyé omwìwelela [Yehova], muharumeleké amuluku akina muhakokhoreleke. Mwattheka sisa onanariwa wa [Yehova] onimophwanyani’. (Otum. 11:16, 17) Biibiliya onnooniherya wira Muluku onnaavaha atthu awe soolopola sinceene.

⁴ Ikwaha sinceene Yehova anaatumererya aIsarayeli omoovaka, onwiriyana ni otteelihaka nsina nawe. (Otum. 4:29-31; 5:28, 29) Okathi awo yaiwelela aya soolopola iyo, awo yaanaakhela mareeliho a Yehova.​—Onam. 26:3-6; Otum. 28:1-4.

MOOTA ANAISARAYELI YOONELA AYA SOOLOPOLA SA MULUKU

5. Exeeni yaamwiirinhe Yehova omwaakiha Mwene Ezekiya?

⁵ Okathi yoole aIsarayeli yaaxankiheya aya, Muluku aanooniherya wira aanimwaakhwaniherya natiri awe. Mwa ntakiheryo, okathi Mwene a wAsiria Senakeribi aavolonwe awe muttetthe wa oYudeya, nto anaphavela owana ni Mwene Ezekiya, Yehova aahimukhaliherya orumaka nlaikha nawe. Ohiyu omosa paahi, nlaikha na Muluku nahaapwetexa “anakhotto òthene òtupa” a wAsiria, nto Senakeribi aahikhanyereriwa otthikela owaani uulihiwe ene muru. (2 Wah. 32:21; 2 Mam. 19:35) Xeeni Muluku ohalaka omwaakiha mwene Ezekiya? Mwaha woowi ‘owo [aahimuroromela Yehova], khàmunyanyanle, ahìwelela ikano sawe’.​—2 Mam. 18:1, 5, 6.

6. Mwene Yosiya oonihenrye sai omuroromela Yehova?

⁶ Ntakiheryo nikina na mutthu aiwelela sooruma sa Yehova ti na mwene Yosiya. Okhuma okathi aarinaawe iyaakha thanu na tthaaru, “ahìra sorera vamaithoni va [Yehova], . . . Ahihapuwelaka nnákhala mono wolopwana nnákhala mono wothiyana”. (2 Wah. 34:1, 2) Yosiya ahooniherya omuroromela wawe Yehova vaavo amala-malinhe awe amuluku eethiru mulaponi ni ottikiherya okokhorela wekeekhai. Nto mwaha woopaka eyo, Yosiya aahiruuha mareeliho ohiya wa owo paahi, masi-tho wa nloko notheene.​—Mmusome 2 Wahala 34:31-33.

7. Exeeni yaakhumelela aIsarayeli okathi yahaiwelela aya soolopola sa Yehova?

⁷ Masi, mooriipiha murima, khahiyo wira atthu a Muluku okathi wotheene yaakhala oomuroromela Yehova. Nuuvira iseekulu, awo yaahipacerya ohivaha efaita wiiwelela. Okathi nroromelo naya naavukuwa aya, ikwaha sinci yaakhala ntoko atthu aromoliwe ni murummwa Paulo: ‘oveveleya ni opuruliwa ni epheyo ya khula mwixuttiho’. (aÉf. 4:13, 14) Ntoko saahimmwale aya vahinatthi, okathi yaahiya aya omuroromela Muluku, awo yaaniphwanya maxakha oothananiha.​—Onam. 26:23-25; Yer. 5:23-25.

8. Sinniixuttiha exeeni sowiiraneya sa aIsarayeli?

⁸ Nniixutta exeeni mwa sowiiraneya iya sa aIsarayeli? Ntoko awo, arumeyi a Muluku a mahiku ala, annivahiwa miruku ni soolaka. (2 Ped. 1:12) Nuulumo nowuupuxeriwa ni Muluku nnoowerya onilopola khula okathi onisoma ahu. Ntoko atthu arina owerya woothanla, hiyo pooti othanla wiiwelela malakiheryo a Yehova, wala ophavela ele maitho ahu anoona aya okhala yoreera. (Mir. 14:12) Nrowe nthokorerye itthu sinniiriha ororomela soolopola sa Yehova ni moota okhanle ahu oottottela mureerelo.

MMWIIWELELE MULUKU WIRA MUKHALANE EKUMI

9. Yehova oonihenrye sai wira aarowa waakhaliheryaka aIsarayeli okathi yaari aya moothakoni?

⁹ Okathi aIsarayeli yaapacenrye aya weetta ekwaha yoorakama ni yooxankiha ya iyaakha 40 ‘mothakoni mowopiha’, Yehova khaahimmye itthu sotheene sa moota aarowa awe oweettihaka, waakhapelela ni waathokorerya. Hata vaari siiso, khula okathi, Yehova aaniwooniherya wira yahaana omuroromelaka ni wiiwelela malakiheryo awe. Arumeelaka neeku neemela ohoolo waya othana, ni neeku na mooro ohiyu, Yehova aaniwuupuxerya aIsarayeli wira owo aarowa wakhaliherya, vaavo aaruma awe wira avireke yeettaka muttetthe ole wootakhala. (Otum. 1:19; Okhum. 40:36-38) Yehova aanaavaha-tho itthu sootthuneya saathowa. ‘Sowara saya khisathanle, inawu saya khisaipale’. Tthiri khiivo ‘yahalenle’.​—Neh. 9:19-21.

10. Yehova onaakhapelela sai atthu awe olelo-va?

¹⁰ Arumeyi a Muluku olelo-va, ahaattamela elapo esya ya xariya. Niireke ninnimuroromela Yehova wira onrowa onivahaka itthu sinnithowa wira nivilele ‘maxakha malupale’ anirwa? (Math. 24:21, 22; Esal. 119:40, 41) Ekeekhai wira Yehova khonirumeela nenla-va, neeku nooweemela wala na mooro wira aneettiheke mpakha elapo esya. Masi owo onirumeela mulokiheryo awe wootthokiheya wira nikhaleke oowehaweha. Mwa ntakiheryo, vannitepa ottittimiheriwa wira nihaana olipiha omunepani wahu orweela mwa omusoma Biibiliya, Omulompa Muluku Vatthokoni, ni orowaka moohihiyererya mithukumano, ni olaleerya. Niireke ninnitthara malakiheryo awo avahiwe ahu? Opaka eyo, onrowa onikhaliherya olipiha nroromelo nahu ni onikhapelela wira noopowe ni orowa elapo esya.

11. Muluku onooniherya sai onikhapelela wawe?

¹¹ Nave-tho wira nilipihiwe omunepani wahu, malakiheryo anivahiwa ahu anninikhaliherya mwa itthu sa khula nihiku. Itthu iyo sinihela muhina okhalana moonelo wooloka voohimya sa mihakhu sa valaponi ni okhalana niitho nooluluwanya wira nivukule otepa oxankiheya. Ninnittottela-tho mureerelo malakiheryo anivahiwa ahu sa moota woowara ni wiitthokiha wahu, othanla enamuna yooloka ya otthekula, ni othanla mwaattelo wa iyaakha siniviriha ahu nisomaka oxikola. Nkuupuwelani-tho malakiheryo ooloka anivahiwa ahu voohimya sa empa ahu, ikaaro sahu, eSalau ya Omwene ni enamuna yowiilokiherya mwaha wa ihasara sa ephattu. Malakiheryo awo anooniherya wira Muluku onniphavela onikhapelela.

OLOPOLIWA WAHAAKHALIHERYA MAKRISTAU OOPACERYA OKHALA OOROROMELEYA

12. (a) Mwaha xeeni Yesu aamakela awe waaleela awiixutti awe? (b) Etthu xeeni Yesu aapanke awe yeeyo Pedru ahaaliyala awe, nto eyo ennikhaliherya sai?

¹² Eseekulu yoopacerya, atthu a Muluku yaanaakhela malakiheryo khula okathi. Ikwaha sinceene, Yesu anaaleela awiixutti awe otthuneya waya wiiyeviha. Hata vaari siiso, Yesu aahiwooniherya moota wowiiyeviha ohiya paahi waaleela ni masu. Nihiku nawe nookiserya ntoko pinaatamu valaponi, Yesu aahaathukumanya awiixutti awe wira emulye Paasikha. Okathi yaalya aya, Yesu aahivenya anarapiha inawu sa awiixutti awe; muteko owo waavariwa paahi ni murumeyi a vatthokoni. (Yoh. 13:1-17) Enamuna ele ya wiiyeviha wa Yesu yaahiwiiriha awiixutti ale ohiliyala. Nto nuuvira iyaakha 30, murummwa Pedru yoowo aarivo nihiku nle na Paasikha, aahaavaha miruku maKristau akhwaawe voohimya sa wiiyeviha. (1 Ped. 5:5) Ntakiheryo na Yesu, nihaana oniiriha okhala oowiiyeviha mmoota wowaathokorerya akhwiihu.​—aFil. 2:5-8.

13. Etthu xeeni eri yootepexa otthuneya Yesu aatumerenrye awe awiixutti awe wira aphaveleke okhalana?

¹³ Yesu aanilavula-tho ni awiixutti awe voohimya sa otthuneya waya okhalana nroromelo noolipa. Nuumala awiixutti wooceela woomola nlaikha nootakhala naamukenle mwammiravo, awo yaahimukoha Yesu eriki: ‘Hiyo nojelenle-ni womola nlaikha nle’? Yesu aahakhula ariki: ‘Mwaha wowamini wanyu vakhani. Kinohimeryani ekhweli wira: mwarina wamini ntoko enuku yamukhanixa [ya mostarda], . . . khivo yarowanyu wojelaka’. (Math. 17:14-20) Okathi Yesu aalaleya awe valaponi, owo aahaaleela awiixutti awe wira waamini, ti etthu eri yootepa otthuneya. (Mmusome Matheyo 21:18-22.) Niireke ninnittottela mureerelo eparakha erina ahu vano ya olipiha waamini wahu, orweela mwa malakiheryo anaakhela ahu okongresuni, asembeleya, ni mithukumano sikina sa eKristau? Mithukumano iyo, khahiyo sinkumiherya ohakalala paahi, masi okathi wowooniherya wira ninnimuroromela Yehova.

14. Xeeni olelo va, varyaaya vootepa otthuneya okhalana ophenta weKristau?

¹⁴ Soolempwa sa eKristau sa eGriki, soosareya soolopola sinnitumererya ophentana. Yesu aahimmye wira nlamulo nuulupale na nenli tinla: ‘mumphenteke mukhwinyu ntoko sinìphentanyu’. (Math. 22:39) Mwa mukhalelo mmosaru, Yakobo, yoowo aari munna awe Yesu, aahihimya sa ophenta okhala ‘molumo [wala yooruma] yòmwene’. (Yak. 2:8) Nave-tho murummwa Yohani aahilepa ariki: ‘Apatthani aka òphentiwa, khahiyó [yooruma ya] nanano enolepelakani. Masi [yooruma] ya khalai’. (1 Yoh. 2:7, 8) Yohani aahimya exeeni moolumo oowi: ‘[yooruma] ya khalai’ ni [yooruma ya] nanano’? Owo aahimya yooruma ya ophenta. Yooruma eyo yaari ya ‘khalai’ okhala wira Yesu aalavunle khalai “okhuma wopajeryani”. Masi yaari ya ‘nanano’ okhala wira naavekela ophenta wowiileva, awiixutti yaatthuneya aya wooniheryaka okathi wa mixankiho. Okhala wira hiyo atthareli a Kristu, nto ti vootthuneya wiiwelela soolopola ni osyaka munepa wa wiixinnuuha onimakela wooneya mulaponi, yoowo oniwerya ohonona yoolakela ahu ya waaphenta akhwiihu!

15. Muteko xeeni muulupale Yesu aavanre awe valaponi?

¹⁵ Yesu aanooniherya ophavela wawe waathokorerya atthu. Ophenta wawe onnisuwanyeya okathi aapenuxa awe aretta, ni waahihimuxa alipa-ookhwa. Masi, muteko muulupale wa Yesu khahiyo waari waapenuxa atthu yaawereiwa. Olaleerya wawe ni wiixuttiha, ti etthu yaatepa waalipiha atthu anceene. Moota xeeni? Noosuwela wira atthu yaale Yesu aapenunxe awe ni waahihimuxa eseekulu yoopacerya, nto nuuvira okathi yahuuluvala ni okhwa, masi ale yaakhulenle ihapari aalaleya awe, yaahikela ephiro ya ekumi yoohimala.​—Yoh. 11:25, 26.

16. Muteko woolaleerya Omwene ni waapaka awiixutti wuulanne mpakha woowi olelo-va?

¹⁶ Muteko wa olaleerya Yesu aapacenrye awe eseekulu yoopacerya, olelo va onnitepa wuulaana. Yesu aahaaruma awiixutti awe ariki: ‘Vano, murowé mwawixuttiheke atthu a maloko othene’. (Math. 28:19) Tthiri awo yaahaana waapaka awiixutti, nave-tho hiyo nihaana waapaka! Etthu yowiiraka imilyau 8 sa Anamoona a Yehova, anniluttuweliwa olaleerya Omwene wa Muluku ilapo sinivikana 230; nave-tho nihiku ti nihiku annaasomiha Biibiliya, atthu imilyau sinci. Olaleeriwa waya, ethoonyeryo yoowi niri mahiku ookiserya.

MMUROROMELE YEHOVA OLELO-VA

17. Miruku xeeni saavahiwe ni murummwa Paulo ni Pedru?

¹⁷ Tthiri weettela soolopola wahaakhaliherya maKristau oopacerya ovikaniha waamini waya. Nkuupuwelani moota Timootheyo aalimpe awe vaavo murummwa Paulo yoowo aatthukweliwe oRoma, aamuupuxenrye awe ariki: ‘Mutthareke sana molumo èkekhai mukìwalyanyu’. (2 Tim. 1:13) Nuumala waalipiherya maKristau akhwa awe wira akhalane mikhalelo iya ntoko ovilela, waaphenta anna, ni wiihiiha, nto murummwa Pedru aahilavula wira: ‘Tivó vantthunaka owupuxeryani ikekhai iya mahiku othene, munamwi musuwenlene, mulipiheriwe mwa ikekhai sakhenlyanyu’.​—2 Ped. 1:5-8, 12.

18. MaKristau a eseekulu yoopacerya yoonela sai soolopola?

¹⁸ Aayo, ipaphelo Paulo ni Pedru saalempe awe, sinihimya ‘molumo yahimmwale khalai ni maprofeta a Muluku’. (2 Ped. 3:2) Niireke malakiheryo ale khiyaasivenle anna a eseekulu yoopacerya? Nnaari, okhala wira yaari ethoonyeryo ya ophenta wa Muluku weiwo waakhalihenrye ‘otepa wuncererya ophenta ni omusuwela Yesu Kristu, Pwiyahu ni Mòpoli ahu’.​—2 Ped. 3:18.

19, 20. Xeeni vanitthuneya ahu ororomela soolopola sa Yehova, nto mureerelo xeeni oniphwanya ahu?

¹⁹ Olelo-va, nookhalana mathowa manceene wira niroromeleke soolopola sa Yehova, siniphwanyaneya mBiibiliyani, Nuulumo nawe nihinturukeya. (Mmusome Yoxuwa 23:14.) Maana mBiibiliyani ninnoona moota Muluku onaakhapelela awe atthu oohimalela mwa iyaakha ikonto sinceene. Sowiiraneya iyo silempwe wira sinikhaliheryeke. (aRom. 15:4; 1 aKor. 10:11) Nto ninniweha wiiraneya wa iprofesia sa mBiibiliyani. Iprofesia pooti ohimmwaka-tho okhala soolopola sinilavuliwa vahinatthi. Mwa ntakiheryo, ikonto sinceene sa atthu annikela mmulokoni wira amukokhoreleke Yehova ntoko saalavuliwe aya vahinatthi wira yaamwiiraneya ‘yaphiya mahiku’ ookiserya. (Yes. 2:2, 3) Otakhala wa olumwenku oniirela mpantta, wiiraneya wa iprofesia sa Biibiliya. Ntoko silavuliwe aya, wuncerereya wa ekampaanya ya muteko woolaleerya enaakhwanihereya masu a Yesu.​—Math. 24:14.

²⁰ Sowiiraneya sinci sinimuhela muhina Mpattuxa ahu, sihaana oniirihaka omuroromela. Niireke ninnittottela mureerelo sowiiraneya iyo? Nihaana waaminiki soolopola sawe. Ela ti etthu yaapanke awe Rosalina. Owo onihimya so: “Vaavo kaapacenrye aka omuroromelaxa Yehova, nto kaaniweha tthiri ophenta ni okilipiha wawe”. Hiyo-tho nrowe nittottele mureerelo malakiheryo a Yehova.

[Elatarato epaaxina 7]

[Elatarato epaaxina 8]

Soolopola sa Yehova saahimwiiriha Yosiya okhalela nthiti okokhorela wekeekhai (Moone ettima 6)

[Elatarato epaaxina 10]

Wiiwelela soolopola sa Yehova oniiriheke ophavela oreeriha eSalau ahu ya Omwene wira ehikumiherye ehasara ni ekhaleke yooreera (Moone ettima 11)