Mutteeliweke Murima ni Soolopola sa Yehova

“Soruma sanyu ti muhakhu aka wa mahiku othene”.​—ESAL. 119:111.

MWAAROWA WAAKHULA SAI?

Mathowa xeeni arina ahu wira nitteeliweke murima ni soolopola sa Yehova?

Ninrowa olipiha sai omuroromela wahu Yehova?

Efaita xeeni ekhanle oluttuweliwa ni miteko sa Omwene?

1. (a) Apinaatamu aneemya sai malakiheryo, nto nthowa xeeni? (b) Moota xeeni wiixinnuuha onimwiiriha aya mutthu ohiiwelela miruku?

APINAATAMU weemya waya malakiheryo onikhala wa inamuna soovirikana. Ikwaha sinci vannikhweya wiiwelela soolopola sinivahiwa ni mutthu orina okhulupale, masi soolopola sinikhuma wa mutthu onilikana ahu makhalelo, wala wa mutthu ohinooneliwa vatthu, waakuva okhoottiwa. Khula mutthu onnikhalana-tho moonelo oovirikana voohimya sa yoolaka wala malakiheryo. Akina anikhala oothanana, ooriipiwa murima, oowuuliwa muru weettela ele etumereriwa aya, akina anoona wira aaroxiwa, wala woona oreerela opaka etthu. Exeeni eniiriha ovirikana? Wiixinnuuha ti etthu emosa eniiriha. Tthiri otepa wiikupali onnimwiiriha mutthu ohuupuwela saana miruku sivahiwa awe, khuhiyaphavela wiiwelela soolopola ni okhootta malakiheryo otheene arina efaita.​—Mir. 16:18.

2. Xeeni maKristau ekeekhai anixukhurela aya soolopola sa Nuulumo na Muluku?

² Masi, maKristau ekeekhai, annixukhurela olakiheriwa, vanceenexa akhala wira miruku iyo sinikhuma muNuulumo na Muluku. Soolopola sa Yehova, sinnimwiiriha mutthu okhala a miruku, sinniniixuttiha ni onikhaliherya osyaka miraakho ntoko ophenta mihakhu, orupihana woohiloka, orumeela mirette soohapala ni ohapaliwa. (Mir. 20:1; 2 aKor. 7:1; 1 aTes. 4:3-5; 1 Tim. 6:6-11) Ohiya-vo, ‘ninnitteliwa murima’ mwaha wa wiiwelela soolopola sa Muluku.​—Yes. 65:14.

3. Moonelo xeeni wa nasalimo onireerela ahu otakiha?

³ Wira nikhapelele wataana wahu ni Tiithi ahu a wiirimu, nihaana ovikaniha weettela sowiixuttiha sa miruku sa Yehova. Ti vooloka okhalana moonelo sintoko nasalimo aalempe wira: ‘Soruma sanyu ti muhakhu aka wa mahiku othene, seiyo sinnikitteliha murima’! (Esal. 119:111) Niireke ni hiyo ninnihakalala ni sooruma sa Yehova, wala okathi mukina nnoona ovila weettela? Pooti ikwaha sikina ninyoonyiheyaka ni miruku ninvahiwa ahu, masi nihaana osyaka ohicalela malakiheryo awo. Nihaana olipiha ororomela wahu miruku suulupale sa Muluku! Nrowe nthokorerye inamuna tthaaru.

MULIPIHE OKUPALI WANYU ORWEELA MWA NIVEKELO

4. Ti pani Davidi aavikaninha awe omuroromela?

⁴ Mwene Davidi, mookumini mwawe aanikhalana okathi wooreera ni wooxankiha, masi okathi wotheene owo aanivikaniha omuroromela Mpattuxa awe. Owo aahimmye so: ‘[Yehova], murima aka onninkheliwa ni nyuwo! Muluku aka, kinnororomelani’. (Esal. 25:1, 2) Exeeni yaamukhalihenrye Davidi omukupaleela saana Tiithi awe a wiirimu mwa enamuna eyo?

5, 6. Nuulumo na Muluku ninhimya exeeni sa wataana Davidi aarina awe ni Yehova?

⁵ Anamunceene aninvekela Muluku okathi yoole paahi onaaphwanya aya maxakha. Mwaarowa woonela sai aakhanle wira mpatthani anyu wala mmusi anyu, onilavula ni nyuwo okathi oniphavela awe musurukhu paahi wala etthu ekina? Waaniheryasa mwaarowa woonaka wira owo oniphavela musurukhu anyu paahi. Masi, Davidi khahiyo aari mutthu ntoko owo. Wataana wawe ni Yehova, wooniherya otepa wawe omwaamini ni omphenta okathi wotheene wa okumi awe; okathi wooreera wala wooxankiha.​—Esal. 40:9.

⁶ Nkawehani masu a Davidi aninvuwiha Yehova ariki: ‘[Yehova] Muluku ahu! Eyùlupale [ya nsina] nanyu ti yothamaliha mulaponi mothene. Eyinnuwelo anyu ennivikana erimu’. (Esal. 8: 2) Nto nyuwo kiira munniweha wataana wuulupale Davidi aarina awe ni Tiithi awe a wiirimu? Oxukhurela wawe okhulupale wa Muluku ni ovuwa wawe, waanimwiiriha omuttittimiha Yehova ‘khula nihiku’.​—Esal. 35:28.

7. Ninttottela sai mureerelo omwaattamela Muluku nnivekelo?

⁷ Nimutakihaka Davidi, nihaana olavulaka ni Yehova khula okathi wira nlipiherye omuroromela wahu. Biibiliya onihimya so: ‘Mmwattameleke Muluku: Muluku onowattamelani’. (Yak. 4: 8) Omwaattamela Muluku nnivekelo, ti enamuna ekina yuulupale ya oveka munepa wootteela.​—Mmusome 1 Yohani 3:22.

8. Xeeni vanitthuneya ahu osyaka omakela ohimya etthu emosaru okathi woovekela?

⁸ Niireke okathi onivekela anyu, munimakela orumeela moolumo mamosaru khula nivekelo? Akhala wira munnipaka eyo, muhinatthi ovekela, muhaana oviriha okathi vakhaani wira muupuwelele itthu sinrowa anyu olavula munivekeloni. Vaakhanle wira okathi onilavula ahu ni amusi wala apatthani nimmakela ohimya etthu emosaru, niireke eyo yamwaasivela? Eyo pooti omwiiriha ohiphavela wiiwa ele enihimya ahu. Ekeekhai wira Yehova khanrowa okhootta mavekelo a murima wotheene anipakiwa ni arumeyi awe oororomeleya. Masi, nihaana osyaka omakela ohimya etthu emosaru paahi okathi onivekela ahu.

9, 10. (a) Exeeni enireerela ohela muhina mwa mavekelo ahu? (b) Exeeni enrowa onikhaliherya opaka mavekelo a murima wotheene?

⁹ Nto akhala wira nimphavela wataana ni Muluku, nihaana ovekelaka ni murima wotheene. Vaavo vanitepa ahu onvahererya Yehova sooxankiha sahu, ninrowa otepaka wataana nuuwo ni omuroromela. Vano itthu xeeni sinreerela ohela muhina okathi woovekela? Nuulumo na Muluku ninnaakhula wira: ‘Muhukhuwé mwaha wetthu pitthu. Okathi wothene nweliherye mavekelo anyu wa Muluku mmulompaka, munvaraka metto mmuxukhuruku-tho’. (aFil. 4:6) Tthiri khula etthu enivarihana ni wataana wahu ni Muluku wala enivarihana ni okumi ahu ntoko arumeyi awe, ennireerela ovekela.

¹⁰ Ti vooloka othokorerya masu yaalavuliwe ni arumeyi oororomeleya, alopwana ni athiyana yaawo mavekelo aya alempwe mBiibiliyani. (1 Sam. 1:10, 11; Mit. 4:24-31) Eliivuru ya Esalimo yookhalana mavekelo ni masipo a murima wotheene aninvuwiha Yehova. Mavekelo ni isipo iyo, annooniherya itthu sinci, okhuma oriipiwa murima mpakha ohakalala wa pinaatamu. Otokosa saana moolumo awo yaalavuliwe ni arumeyi oororomeleya, anoonikhaliherya onvekelaka Yehova moophwanelela.

MUUPUWELELEKE SOOLOPOLA SA MULUKU

11. Xeeni vanitthuneya aya wuupuwelela saana malakiheryo a Muluku?

¹¹ Davidi aahilavula ariki: ‘[Soolopola sa Yehova], ti sòroromeleya, sinnavaha miruku atthu òroromeleya, ni òwiyeviha’. (Esal. 19:8) Aayo, hata niryeene atthu ahinisuwela itthu sinci, nnoowerya okhala amiruku mwaha wa wiiwelela sooruma sa Muluku. Masi, malakiheryo makina a Biibiliya, anitthuneya wuupuwelela saana, akhala wira nimphavela ottottela mureerelo. Eyo pooti wiiraneya mmyaha sa ororomeleya woomalela okathi wokhanyereriwa opaka etampi oxikola, wala omutekoni, wiiwelela nlamulo na Muluku mmwaha wa ephome, ohiirela mpantta epoliitika ntoko maKristau, ni weettela malakiheryo a Biibiliya voohimya sa mawarelo ni wiitthokiha. Okhalana muupuwelo wa Muluku mmyaha iyo, onoonikhaliherya osyaka mixankiho. Nave-tho enooniiriha wiilokiherya ni osuwela etthu yoopaka wakhumelela muxankiho. Wuupuwela ni wiitthokiha vahinatthi mmoota owo, onoonikhaliherya osyaka itthu soopwexiha muru.​—Mir. 15:28.

12. Itthu xeeni sinitthuneya ahu wuupuwelela wira sinikhaliherye soolopola sa Muluku?

¹² Vaavo vanlipelela ahu wiiraneya wa soolaiherya sa Muluku, niireke ninnooniherya wira noolipa omunepani? Mwa ntakiheryo, niireke ninnikupali wira Babilonia Muulupale onrowa opwetexiwa moohipisa? Niireke mareeliho a muhoolo ntoko ale a okumi woohimala mparayiisu valaponi, ninnoona okhala ekeekhai ntoko saana ahu okathi opacenrye ahu wiiwa? Niireke ninniluttuweliwa mmuteko woolaleerya, ohiya oluttuweliwa ni miteko sahu paahi? Niireke ninnikupali nlipelelo na ohihimuwa, otteelihiwa wa nsina na Yehova, ni ovuwihiwa okhulupale awe? Niireke nlelo ninnoonela efaita myaha iyo? Wuupuwelela makoho ala, anrowa onikhaliherya okhala ntoko nasalimo yoowo aavikaniha wiiwelela ‘[soolopola ntoko] muhakhu wa mahiku othene’.​—Esal. 119:111.

13. Xeeni maKristau a eseekulu yoopacerya yoona aya oxankiha wiiwexexa itthu sikina? Nvahe ntakiheryo.

¹³ Itthu sikina siromoliwe mBiibiliyani, pooti okhala soohikhweya wiiwexexa saana nenla-va, mwaha wa ohiphiya okathi Yehova oniphavela awe wira atthu asuwele. Mwa ntakiheryo, Yesu khula okathi aanaaleela awiixutti awe wira aahaana ohaawa ni okhwa. (Mmusome Matheyo 12:40; 16:21.) Masi awiixutti khiyaasuwela saana etthu aalavula awe. Nto awo yaahiwexexa saana nuumala Yesu okhwa ni ohihimuwa khiixooniherya wa awiixutti anceene, nto ‘atthukula osuwela waya, wira esuwelexe Solempwa’. (Luka 24:44-46; Mit. 1:3) Vamosaru, mpakha ophiya okathi yoole munepa wootteela waamwaraxiwe aya oPentekositi a 33 E.C., atthareli a Kristu khiyaasuwela saana wira Omwene wa Muluku waarowa otikitheriwa wiirimu.​—Mit. 1:6-8.

14. Wanipacerya wa eseekulu 20, ntakiheryo xeeni nooloka anna anceene avanhe aya, nnaamwi yahaasuwela saana voohimya sa mahiku ookiserya?

¹⁴ Mwa enamuna emosaru, wanipacerya wa eseekulu 20, saahikhala itthu soohikhalela saalipeleliwa ni maKristau ekeekhai, voohimya sa ‘okathi wokiserya’. (2 Tim. 3:1) Mwa ntakiheryo, eyaakha ya 1914, akina yoona wira waahiphiya okathi wira ekuxiwe eroihiwaka wiirimu. Vaavo waapisa aya wiiraneya ele yaalipelela aya, otthikela waya ovarerya saana Soolempwa, wahooniherya wira ekampaanya yuulupale ya olaleerya nlelo yaari muhoolo. (Mar. 13:10) Nto, mwaakha wa 1922, J. F. Rutherford, yoowo muhoolo mwaya aari muhooleli a muteko woolaleerya, aahaaleela ale yaathukumanne okongresuni a ilapo sotheene oCedar Point, Ohio E.U.A, ariki: “Vano, Mwene onnilamulela! Nyuwo alipa-oomulaleya. Tivonto, mmulaleye, mmulaleye, mmulaleye, Mwene ni omwene awe”. Okhuma okathi ole, olaleiwa wa ‘ihapari sorera sa omwene’ teri etthu yuulupale wa arumeyi a Yehova a niinano.​—Math. 4:23; 24:14.

15. Ninttottela sai mureerelo wuupuwelela moota Muluku onaakhapelela awe atthu awe?

¹⁵ Wuupuwelela inamuna soohakalaliha sa moota Yehova aakhapelenle awe atthu awe, khalai ni mahiku ala, onooniiriha ororomela owerya wawe waakhwaniherya soolakela sawe sa muhoolo. Okathi omosaru, soolopola sa Muluku, sinniniiriha ohiliyala iprofesia seiye nlelo sihiranen’ye. Nihaana okupali wira opaka eyo, onoonikhaliherya wunnuuherya ororomela wahu soolaiherya sawe.

MUVAREKE MITEKO SA OKOKHORELA WIRA MULIPIHE OROROMELA WANYU

16. Mareeliho xeeni anikhumelela mutthu avikaniha ovara miteko sa Muluku?

¹⁶ Muluku ahu Yehova, ti Muluku ooluttuweliwa, Muluku oovara miteko. Nasalimo aahikoha ariki: ‘[Yehova] Muluku òweryexa, tani onlikana ni yuwo?’ Owo aahilavula-tho wira: ‘Ntata nanyu ti nowerya ni ti novuwa’. (Esal. 89:9, 14) Mwaha waivaavo, Yehova onnivaha efaita ni onnireeliha wiilipiha wahu wira nikhaliherye soophavela sa Omwene. Owo onnaaweha arumeyi awe wira annivara muteko; alopwana ni athiyana, amiravo ni aalupale, khanikilathi paahi khiyalya ‘ahivanre muteko’. (Mir. 31:27) Nimutakihaka Mpattuxa ahu, nihaana oluttuweliwa miteko sa Muluku. Omurumeela Muluku ni murima wotheene onniphwanyiha mireerelo, ni onnimwiiriha Yehova ophavelaka oreeliha muteko ahu woolaleerya.​—Musome Esalimo 62:13.

17, 18. Xeeni vanihimmwa aya wira sowiira sinooniherya waamini wahu sinnilipiha omuroromela wahu Yehova? Nvahe ntakiheryo.

¹⁷ Moota xeeni sowiira sa ororomeleya sinnikhaliherya aya olipiha omukupaleela wahu Yehova? Muthokorerye ele enihimmwa ni Biibiliya okathi aIsarayeli yaavolowa aya Elapo Yooleiheriwa. Yehova aahaalakiherya anamukuttho yaateexa nivuku na wataana wira yeette mpakha omuro Yordani. Masi okathi atthu yaattamela aya muro owo yaahoona wira epula yaarumpe yaahiiriha muro ole osareya maasi. Nto aIsarayeli yaarowa opaka exeei? Niireke yaarowa omaka muxerexere mwa muro ole isumana sinceene awehereryaka owelela? Nnaari. Awo yaahimuroromela vanceene Yehova khiyatthara malakiheryo awe. Nto exeeni yaakhumelenle? Biibiliya onihimya so: ‘Vano ale yathante nivuku na watàna, etuphelihakaru inawu saya mmàsini mukherekehe wa muró màsi awo yahinyonyowela okhuruwa wakhumaya, . . . vano alipa a mukuttho yathante nivuku no watána w’Apwiya yahemela variyari va muró Yordani inawu sihinanne, khukhalaka vavo okathi wothene atthu a Isarayeli waviraya elapuwaka, metto sihinanne. Siso-tho nloko nothene n’atthu a Isarayeli nahilapuwa muró Yordani’. (Yox. 3:12-17) Nkaapuwelani moota waakuxa aya murima oweha maasi ootupa yeemenle ene ahineetta! Aayo, weettela malakiheryo, waahiwiiriha aIsarayeli olipiha omwaamini waya Yehova.

¹⁸ Ekeekhai wira olelo-va, Yehova khonipaka mitikiniho wira aakhaliherye arumeyi awe, masi owo onnireeliha miteko sinooniherya ororomela waya. Ikuru soowerya sa Muluku sinnaakhaliherya owerya olaleerya ihapari sooreera sa Omwene, olumwenku wotheene. Nave Namoona muulupale Kristu Yesu yoowo ohihimuxiwe, aahaalipiherya awiixutti awe wira aarowa okhaliherya muteko ola muulupale, ariki: ‘Murowé mwawixuttiheke atthu a maloko othene . . . vano miyo kinokhala ni nyuwo mpakha omala’ makhalelo a itthu. (Math. 28:19, 20) Anamoona anceene yaakhala oowuuliwa muru wala woovelela, awo aaweha owerya wa ikuru sa munepa wa Muluku, khuvahiwa olipa murima wira elavuleke ni atthu ahinaasuwela aya yaalaleeryaka.​—Musome Esalimo 119:46; 2 aKorinto 4:7.

19. Nnaamwi nirine ene mixankiho, etthu xeeni enilipiheriwa ahu?

¹⁹ Anna ni arokora akina, toohiwerya-werya mwaha wa owereiwa aahiiso wuuluvala. Anna awo ahaana okupali wira ‘Tithi a ikharari ni Muluku onnihakalaliha inamuna sothene’, onnisuwelaka mikhalelo sa khula muKristau ekeekhai. (2 aKor. 1:3) Owo onnivaha efaita sotheene sinipaka ahu wira nikhaliherye miteko sa Omwene. Otheene ahu nihaana osuwela wira waamini wahu mukuttho onoopola wa Kristu, tonniiriha okhala akumi vaavo nnimurumeela ahu moovarihana ni mikhalelo sahu.​—aHéb. 10:39.

20, 21. Inamuna xeeni ninrowa ahu wooniherya omuroromela Yehova?

²⁰ Omukokhorela wahu Muluku onihela muhina orumeela okathi ahu, ikuru sahu, mihakhu sahu wira nikhaliherye saana miteko sawe moovarihana ni owerya wahu. Tthiri ninniphavela ni murima ahu wotheene ‘ovara muteko’ wolaleerya. (2 Tim. 4:5) Tivonto ninnitteeliwa murima waakhaliherya akina wira ‘esuwele ekekhai’. (1 Tim. 2:4) Tthiri, onvuwiha ni omuttittimiha Muluku muulupale Yehova, onninthaaciriha moomunepani. (Mir. 10:22) Eyo ennilipiha omuroromela wahu ole Onipattunxe.​—aRom. 8:35-39.

²¹ Ntoko soonale ahu, ororomela malakiheryo ooloka a Yehova khoniiraneya ekhayaru, nihaana wiimananiha wira nikhale oororomeleya. Nto mwa inamuna sotheene nrowe nimuroromele Yehova orweela mwa mavekelo. Muupuweleleke moota Yehova aakhwanihenrye awe yootthuna awe khalai, nto owo onrowa waakhwaniherya-tho muhoolo. Nvikaniheke olipiha omuroromela wanyu Yehova orweela mwa sowiira sinooniherya okokhorela wekeekahi. Tthiri, soolopola sa Yehova sinoovikaniha okhala wa mahiku otheene. Nyuwo-tho, munoowerya okhala wa mahiku otheene!

[Elatarato epaaxina 12]

[Elatarato epaaxina 15]

Niireke nyuwo munoomuroromela Yehova ntoko atthu a okathi wa Yoxuwa? (Moone ittima 17, 18)