Sowiira Sahu Sivarihaneke ni Ovekela Wophenta wa Yesu
“Tithi, . . . munvuwihe mwan’ inyu, yowo òvuwiheni-tho nyuwo”.—YOH. 17:1.
MUNOONELA SAI?
Exeeni eniheliwa muhina mwa ‘omusuwela’ tthiri Muluku?
Nivekelo na Yesu nilempwale va Yohani 17 naakhuliwe sai eseekulu yoopacerya?
Ninrowa owerya sai okhala moovarihana ni nivekelo na Yesu olelo-va?
1, 2. Muhimye etthu Yesu aapanke awe wa arummwa awe oororomeleya, nuumala niira na Paasikha a 33 E.C.
VANO viilale khalai ohiyu wa 14 a Nisani mwaakha wa 33 E.C. Yesu ni atthareli awe anitthapela nihiku na Paasikha, nihiku nenle Muluku aawooponle awe atthu awe weepotthani wEjito. Masi awiixutti a Yesu anrowa ‘ophwanya wopowa wa mahiku othene’. Mmeeloni mwaya, Yesu, muhooleli aya oohittheka onrowa wiiviwa ni anyokhani awe. Masi sowiira sa anyokhani awe saarowa orukunuwa wira sikhale mareeliho. Maana omwarexiwa ephome ya Yesu onrowa okumiherya matthipelo wira apinaatamu yoopoliwe mwa yoottheka ni okhwa.—aHéb. 9:12-14.
2 Ophavelaka wira nihiliyale yoovaha ela yoophenta, Yesu aahipaceriha niira na niinano naarowa wiiriwaka khula mwaakha, voomuranttela Paasikha. Owo aahipaka ela ameyaka ephaawu yoohiruruvala nto khaakawela awiixutti awe oororomeleya 11, ahimyaka so: ‘Ela erutthu aka, evaheriwe nyuwo. Mwireke ela mukupuwelaka miyo’. Yesu aahipaka etthu emosaru ni eviinyu ahimyaka so: ‘Ekális’ila ti wàtana wa nanano, opakiwe n’iphome aka, yela emwarexeliwe nyuwo’.—Luka 22:19, 20.
3. (a) Murukunuxo xeeni wiiranen’ye nuumala Yesu okhwa? (b) Makoho xeeni anitthuneya ahu othokorerya voohimya sa nivekelo na Yesu va Yohani 17?
3 Nto Nlamulo na wataana wa khalai eriyari ya Isarayeli a werutthuni ni Muluku, naarowa omala moohipisa. Naarowa oranttelihiwa ni wataana wa naanano wa Yehova ni Yesu, ni atthareli awe. Yesu aari ooxankiheya ni ele yaarowa wiiraneya wa nloko nla na niinano nomunepani. Isarayeli a werutthuni aari ookawanyeya mmyaha sa itiini ni makhalelo a mulaponi voohikhala-vo nlipelelo, eyo yaanikumiherya onyoholiwa wuulupale wa nsina nootteela na Muluku. (Yoh. 7:45-49; Mit. 23:6-9) Tivonto, Yesu aaphavela wira atthareli awe akhaleke oowiiraana saana wira aweryeke ovara muteko vowiiwanana ni ovuwiha nsina na Muluku. Nto exeeni Yesu enipaka awe? Owo onnipaka nivekelo nooreeraxa nenlo khula mutthu onitthuneya awe osoma. (Yoh. 17:1-26; moone elatarato yoopacerya.) Vannireera hiyo wuupuwelela nivekelo nlo ni okoha so: “Niireke Muluku ohaakhula nivekelo na Yesu?” Nihaana-tho wiivarerya mmansihu ni wiikoha so: “Kiireke sowiira saka sinnivarihana ni nivekelo nla?”
ITTHU SAARI SOOTTHUNEYA WA YESU
4, 5. (a) Exeeni eniixutta ahu wa masu oopacerya a nivekelo na Yesu? (b) Yehova aakhunle sai yooveka ya Yesu voohimya sa ele yaarowa omwiiraneela muhoolo?
4 Mwaha Yesu aalavunle awe muhoolo mwaya ohiyu yoole, aahiwiiriha awiixutti awe okhalana osuwela onikhuma wa Muluku. Nuumala-vo owo aahittukhulela maitho awe osulu, khuvekela ariki: ‘Tithi, okathi wophiya, munvuwihe mwan’inyu wira mwan’inyu òvuwiheni-tho nyuwo. Tthiri nyuwo monvaha owerya wowaruma atthu othene, wira àvahe okumi wohimala othene yale anvaherenrye anyu. . . Miyo kihovuwihani vathí-va, komaliha muteko wakirummyanyu ovara. Vano tthiri mukivuwihe vamaithoni vanyu ovuwa weiwe warinaka vamosá ni nyuwo olumwenku ohinatthi okhala’.—Yoh. 17:1-5.
5 Nkawehani ele Yesu yoona awe otthuneya mmasu oopacerya a nivekelo nawe. Yoophavela awe yuulupale, waari ovuwihiwa Tiithi awe, eyo ennivarihana ni yooveka yoopacerya wa nivekelo na ntakiheryo naapakiwe ni Yesu, noowi: ‘Tithi, nsina nanyu nivuwihiwe’. (Luka 11:2) Etthu ya nenli enoona awe otthuneya ti okhapeleliwa wa awiixutti awe, wira ‘àvahe okumi wohimala’. Nuumala-vo, Yesu oniveka etthu mmureerelo awe wira avuwihiwe ni aTithi awe, ni ovuwa aarina awe olumwenku ohinatthi okhala. Nto Yehova aahimutthuvela Mwanawe oororomeleya ni itthu sinceene ovikana iye saavenke awe, onvahaka Yesu ‘nsina ninvikana masina a malaikha’ otheene.—aHéb. 1:4.
‘OMUSUWELA MULUKU MMOSA EKEKHAI’
6. Wira arummwa aphwanye ekumi ehinimala yaatthuneya opaka exeeni, nto ninsuwela sai wira yaahikhumela saana?
6 Yesu aahivekela-tho etthu hiyo ntoko anamattheka enitthuneya ahu opakaka wira niphwanele waakhela eparakha ehinireerela ahu, okumi woohimala. (Mmusome Yohani 17:3.) Yesu aahimmye wira nihaana ovikaniha ‘omusuwela’ Muluku ni Kristu. Enamuna emosa yoopaka eyo onihela muhina orumeela maitho ni maaru ahu wira niixutte voohimya sa Yehova ni Mwanawe. Enamuna ekina ya omusuwela Muluku, ti weererya ophwanya ohakalala onikhumela mwaha woovarela muteko ele eniixutta ahu. Arummwa yaahitthara mweettelo ola onivaha ekumi, ntoko Yesu aavikaninhe awe ovekela ariki: ‘[Masu akivanhe anyu] kihavahererya, awo khwamini wira ti nyuwo mukirumme’. (Yoh. 17:8) Masi wira ephwanye ekumi ehinimala, awo yaahaana ovikaniha wuupuwelela masu a Muluku ni ovarela muteko khula nihiku mookumini mwaya. Niireke arummwa yaahikhumela saana mmwaha ola mpakha wanikisa wa okumi aya valaponi? Aayo. Ninnisuwela okhala wira masina a khula murummwa aalempwa opuro ohinttipiheya mmalukuni 12 a Yerusalemu musya a wiirimu.—Wis. 21:14.
7. Nintaphulelani nuulumo noowi ‘omusuwela’ Muluku, nto xeeni varyaaya vootepa otthuneya?
7 Moovarihana ni musuweli mmosa a nttaava na eGriki, nuulumo nitaphuleliwe ‘omusuwela Muluku’ pooti otaphuleliwa-tho so: “muhaana wiimananiha omusuwela Muluku”, wala “muhaana ovikaniha omusuwela Muluku”. Moolumo ala manli annivarihana ni tootthuneya. Omusuwela Muluku ohimmwale ni Yohani 17:3, moovarihana ni Biibiliya mukina, onihimya etthu ehinimala enrowa okumiherya eparakha ya ‘omusuwela’ saana Muluku. Tthiri omusuwela Muluku, onnihela muhina itthu sinceene ohiya osuwela mikhalelo ni soolakela vakhaani paahi sa Muluku. Omusuwela Yehova onitaphulela omphenta owo ni anamakokhorela akhwiinyu. Biibiliya onihimya so: ‘Ole ohinimphenta mukhw’awe, khanimusuwela Muluku’. (1 Yoh. 4:8) Tivonto, omusuwela Muluku onitaphulela omwiiwelela. (Mmusome 1 Yohani 2:3-5.) Tthiri eparakha yuulupale okhala mmosa wa ale animusuwela Yehova! Masi ntoko siiranen’ye aya ni Yuda Isikaryoti, mutthu ennimpweteya eparakha eyo. Nto niimananihe wira ehinipweteye. Napaka eyo, muhoolo mwaya nnooreerela waakhela eparakha ehinniphwanela, ekumi ehinimala.—Math. 24:13.
MWAHA WA NSINA NANYU
8, 9. Tiivi yaari yoophavela yuulupale ya Yesu okathi aarya awe valaponi, nto yoolema xeeni ya ahooleli a itiini Yesu aakhoottale awe?
8 Nuumala osoma nivekelo na Yesu nilempwale va Yohani 17, ti pani onihoverya wira Yesu aanaaphenta vanceene arummwa a okathi ole ni ale yaarowa okhumelela muhoolo? (Yoh. 17:20) Okathi omosaru nihaana osuwela wira woopowa wahu khahiyo etthu yoopacerya wa Yesu. Yoolakela awe yuulupale, okhuma wanipacerya mpakha wanikisa wa orummwa awe valaponi, waari otteeliha ni ovuwiha nsina na Tiithi awe. Mwa ntakiheryo, okathi aalaleya awe muteko awe musinagoga oNazarethi, owo aahisoma eroolu ya profeta Yesaya ariki: ‘Munepa wa [Yehova] ori mwa miyo, wira kàlalèrye alipa-òhawa ehapari yorera’. Tthiri Yesu aaniromola saana nsina na Muluku okathi aasoma awe masu ala.—Luka 4:16-21.
9 Yoolema ya aYuda, enihimya wira khalai Yesu ohinatthi orwa valaponi, ahooleli a itiini yanaakhoottiherya atthu oromola nsina na Muluku. Nto nihaana okupali wira Yesu aahikhootta yoolema eyo yahaatumereriwa ni Muluku. Owo aahimmye so wa anyokhani awe: ‘Miyo kihorwa mwa nsina n’Atithi, vano nyuwo khamunkakhela; masi arwa mwa nsina nawe mukina ahirummwe, mwammwakhela yowo’. (Yoh. 5:43) Mahiku vakhaani ohinatthi okhwa, Yesu aahooniherya etthu yuulupale yaatepa awe wuupuwela avekelaka so: ‘Tithi nvuwihe nsina ninyu’. (Yoh. 12:28) Tivonto vahintikhina ahu woona wira Yesu aanixankela nsina na aTithi awe mwa nivekelo nawe nenlo vano nintokosa ahu.
10, 11. (a) Yesu osuweliha nsina na Atithi awe waahela muhina exeeni? (b) Awiixutti a Yesu yaahaana wiimananiha wira aphwanye exeeni?
10 Yesu aahivekela ariki: ‘Awo yari awinyu, vano nyuwo mokivaha atthu yawo. Miyo kihasuweliha nsina ninyu, vano awo ahettela molumo anyu. Miyo nkinkhala-tho vathí-va, nto awo anokhala mulaponi kirowaka wa nyuwo. Tithi òwarya mwakhapelele n’uwerya wanyu ale akivahale anyu [mwaha wa nsina nanyu nikivanhe anyu] wira ekhale mmosaru sisale nyuwo ni miyo siryahu mmosaru’.—Yoh. 17:6, 11.
11 Osuweliha nsina na Tiithi awe wa awiixutti awe, waahela muhina itthu sinceene ohiya oromola paahi. Yesu aahaakhaliherya-tho osuwela ele yaataphulela aya nsina na Muluku, eyo piiyo, mikhalelo sawe sooreerexa ni moota onnithokorerya awe moophenta. (Okhum. 34:5-7) Ohiya-vo, oryeene opuro awe woovuwihiwa wiirimu, Yesu onnivikaniha waakhaliherya awiixutti awe wira asuwelihe nsina na Yehova elapo yotheene. Nto tiivi eri yoophavela awe? Wira athukumanyiwe awiixutti anceene akina ohinatthi ophiya wanikisa wa mukhalelo ola wootakhala. Nto Yehova onrowa ovuwiha nsina nawe, vaavo vanrowa awe owoopola anamoona awe oororomeleya.—Ezek. 36:23.
WIRA ELAPO YOOPOWE
12. Itthu xeeni tthaaru siri sootepa otthuneya wira nivare saana muteko onoopola ikumi?
12 Oryeene valaponi, Yesu aahimananiha waakhaliherya awiixutti awe wira awanane ni sootteettheya saya. Eyo yaari yootthuneya wira amaliherye muteko Yesu aapacenrye awe. Yesu aavekenle so: ‘Sisale nyuwo mukirummyanyu molumwenkuni-mu, ni miyo kinnaruma orowa eriyari y’atthu’. Wira awiixutti akhumele saana muteko ola wa woopola ikumi, Yesu aahittittimiherya itthu tthaaru sootepa otthuneya. Yoopacerya, owo aahivekela wira awiixutti awe ahiireleke mpantta olumwenku wa Satana. Yanenli, owo aahivekela wira atteelihiwe, wala okhalihiwa oowaarya, mwaha woweettela ekeekhai ya Nuulumo na Muluku. Yaneeraru, Yesu aahixonttelela ikwaha sinceene avekaka wira awiixutti awe akhale oowiiraana moophentani ntoko siisaale owo ni Tiithi awe sirya aya oophentana. Mwaha ola onivekela ovarerya makhalelo ahu. Khula mutthu ohaana wiikoha so: ‘Kiireke sowiira saka sinnivarihana ni itthu tthaaru saavekiwe ni Yesu?’ Mwaha woovaha ephoole itthu iya, Yesu aahooniherya ororomela wawe oriki: ‘wira yopoliwe elapo ekirummyanyu’.—Mmusome Yohani 17:15-21.
13. Eseekulu yoopacerya E.C. naakhuliwe sai nivekelo na Yesu?
13 Otokosa eliivuru eri mBiibiliyani ya Miteko sa Arummwa yeeyo elempwale nuumala Ivangelyo xexe, onooniherya wira nivekelo na Yesu nahaakhuliwa tthiri. Nkaapuwelani moota vaarowa aya okweya maKristau oopacerya okhala ookawanyeya, maana mwa yaawo yaahikhala aYuda ni Amalapo, ooraala ni ohaawa, ipottha ni axineene ipottha. Hata vaari siiso, wiiraana waya waari wuulupale mpakha olikanyihiwa ni ipantte soovirikana sa erutthu seiye Yesu orya awe muru. (aÉf. 4:15, 16) Tthiri owo aari mutikiniho muulupale, eriyari ya olumwenku wookawanyeya wa Satana! Mwa sotheene iyo oniphwanelela ottottopeliwa ti Yehova, iirihale oweryaneya, mwaha woorumeela ikuru sawe soowerya, munepa wootteela.—1 aKor. 3:5-7.
14. Mahiku ala nivekelo na Yesu naakhuliwe sai?
14 Mooriipiha murima, nuumala arummwa okhwa wiiraana nno wa mutikiniho khiwaavikaninhe. Ntoko saahimmwale aya vahinatthi waahikhumelela onammwareya wuulupale, wiirinhe eKristau yoowoka okhala yookawanyeya. (Mit. 20:29, 30) Masi mwaakha wa 1919, Yesu aahiwoopola atthareli awe oowoottihiwa, mukhatteya mwaari aya mwa etiini yoowoka nto khaathukumanya khukhala emusi yowiiraana. (aKol. 3:14) Vano yookhumela xeeni yaarina aya muteko aya woolaleerya olumwenku wotheene? Apatthani aya a ipwittipwitthi sikina, anivikana imilyau 7 yaawo anikhuma wa atthu a ‘ilapo sothene ni maloko othene, ni mahimo othene, ni malavulelo othene’ ahaataana ni oowoottihiwa a Muluku khukhala nikoto nimosa. (Yoh. 10:16; Wis. 7:9) Tthiri nno waakhuliwa wowooneya saana wa nivekelo na Yesu noowi: ‘Siso atthu a vathí-va anosuwela wira ti nyuwo mukirumme ni wira muhaphenta ntoko sikiphentalyanyu’!—Yoh. 17:23.
EMALIHERYO YOOHAKALALIHA
15. Nivekelo xeeni na vameekhaaya Yesu naapanke awe voohimya sa awiixutti awe oowoottihiwa?
15 Wanipacerya wa oxekuwa wa 14 a Nisani, Yesu ahaavuwiha wala waattittimiha arummwa awe opakaka wataana wa naanano, woorowa olamulela hoothe Moomweneni mwawe. (Luka 22:28-30; Yoh. 17:22) Nto voohimya sa ale otheene yaarowa okhala atthareli awe oowoottihiwa, Yesu onivekela so: ‘Tithi ale akivahalyanyu, kimphavela wira weiwo kinrowaka okhala yawo-tho yakhaleke weiwo vamosá ni miyo, wira yoone ovuwa waka weiwo okivahalyanyu. Tthiri nyuwo mokiphenta okhuma ohinatthi opattuxiwa olumwenku’. (Yoh. 17:24) Wa ipwittipwitthi sikina sa Yesu, ela ennaakumiherya ohakalala ohiya okhalela nrima. Nto ela yowooniherya ekina ya wiiraana okhanle wa maKristau otheene ekeekhai, ari valaponi olelo-va.
16, 17. (a) Masu xeeni oottittimiherya Yesu yaahimmye awe okathi aamaliha awe ovekela wawe? (b) Etthu xeeni enitthuneya ahu olakela opaka?
16 Yeettihiwaka ni ahooleli a itiini soowoka, atthu anceene valaponi, annikhootta moolakelela yowooniherya yoowi Yehova ookhalana atthu oowiiraana yaawo animusuwela tthiri. Etthu emosaru yaaniiraneya mahiku a Yesu. Tivonto owo aahimaliha nivekelo nawe ni masu ala oohakalaliha: ‘Tithi àxariya atthu a vathí-va khiyòsuwenleni, nto miyo kihosuwelihani, nave-tho ala àsuwela wira ti nyuwo mukirumme. Miyo kihasuweliha nsina nanyu nave kinotepa wasuweliha wira ophenta onkiphentananyu okhale mwa yawo, nave miyo-tho kikhale mwa yawo’.—Yoh. 17:25, 26.
17 Tthiri khuuvo onikhootta wira Yesu aahikhala moovarihana ni nivekelo nawe. Ntoko Muru a muloko, owo onnivikaniha onikhaliherya wira osuwelihe nsina ni soolakela sa aTithi awe. Nto nivikaniheke weemya okhulupale awe, ni okhalela nthiti wiiwelela yooruma awe ya olaleerya ni waapaka awiixutti. (Math. 28:19, 20; Mit. 10:42) Nivikaniheke-tho omananiha okhapelela wiiraana orina ahu. Opaka eyo, onimwiiriha sowiira sahu ovarihanaka ni nivekelo na Yesu wira ovuwihe nsina na Yehova mmureerelo ahu wa mahiku otheene.
[Elatarato epaaxina 26]
[Elatarato epaaxina 28]
MaKristau a eseekulu yoopacerya yaneemya munepa wootteela wira waakhaliherye okhala oowiiraana (Moone ettima 13)
[Elatarato epaaxina 30]
Arumeyi a Yehova olumwenku wotheene ari oowiiraana (Moone ettima 14)